mi(sual).com

Taxation Department chuan e-governance tihhlawhtlinna tur atan nasa takin hma an la a, Sumdawngte’n a hring a hran a Taxation Office a kal kher ngai lova, internet kaltlanga Department atanga an mamawh engkim an neih vek theihna turin ruahmanna an siam a, heng a hnuai ami te hi zawhfel a ni tawh a ni:

1. E-Way Bill : Hralh chhawn leh tura Mizoram chhunga bungrua lakluh reng reng hian Taxation Department atangin road permit (Way Bill) a neih zel a ngai a, he way bill hmang hian Department chuan sumdawng ten diktakin tax an chhun luh leh luh loh an enfiah thin a ni. Department Officer ten he Way bill hi sumdawngte hnenah an pe chhuak thin a, way bill hmang hian bungrua chu check gate kaltlangpui a ni thin a ni.

Taxation Department chuan e-way bill system a hmang thar ta a, he system-ah chuan Department Officer tena Way Bill an issue thin chu tibo in, Department inrawlhna awm miah lovin sumdawngte chuan internet kaltlangin way bill chu an generate zung zung mai a ni. E-Way Bill hi paperless a kalpui a ni a, air ticketing system ang deuh hian eWay Bill chu print chhuah kher ngai tawh lovin e-way bill number hmangin bungrua chu checkgate ah an kaltlangpui thei tawh a ni. SMS integration pawh dah tel nghal a ni a, e-way bill an generate leh check gate-a bungrua an kaltlangpui veleh sumdawngte chuan an mobile-ah confirmation SMS an dawng zel a ni.

2. E-Return : Taxation Department hnuaia in register sumdawngte chuan thlatin emaw thlathum danah – hetiang man zat hi bungrua ka hralh a, hetiang zat man hu hi bungrua ka la a, hetiang zat hu hi hralh bang (stock) ka nei a, hetiang zat hi Sawrkara tax ka chhunluh tur chu a ni tih anmahni a an tarlan zel a ngai a, chu chu return file tiin sawi a ni thin. Finance Department order angin sumdawngte chuan Return form chu Taxation office atangin an lei chhuak a, chu chu an filled up a, an tax pek tichiang tur challan nen Office-ah an thehlut leh thin a.
Taxation Department chuan e-return a peihfel ta a, hemi hmang hian sumdawngte chuan (an duh chuan) Office-a return form lei kher ngai lovin, internet kaltlangin return hi an file thei tawh a ni.

3. E-Payment : Sumdawngte chuan return an file ruala Sawrkara tax an chhunluh tur zat an tarlan chu challan hmanga an chhunluh a ngai a, Challan hi Taxation Office atangin an lei a, an countersigned tir zawhah Treasury ah an thehluh leh a, treasury a challan number an pektir zawhah, Bankah pawisa chu an dah lut thin a. Mi an tam deuh phei chuan tax chhunglut tur hian ni hnih nithum lai te hman a ngai thin.

Taxation Department chuan State Bank of India nena tangkawpin Internet atanga tax pek theihna tur an lo peihfel ta a, SBI a internet banking account nei tawh phawt chuan internet kaltlangin tax hi engtik lai pawhin khawi hmun atang pawhin awlsam takin an pe thei tawh a ni.

4. E-registration : Sumdawng tu pawhin Taxation Department website www.zotax.nic.in kaltlangin registration form chu online in an filled up thei a, a print out chu supporting document nen Taxation Office-a an thehluh a ngai thung.

Heng a chunga e-services pathum e-return, e-payment leh e-way bill te hmang thei tur chuan sumdawngte chuan Taxation Department atangin User ID leh Password an lakchhuah a ngai a, he system generated user id & password hi vawikhat hman hnuah sumdawngte chuan an thlak ngei ngei a ngai thung. Heng e-services te khi Taxation Department website www.zotax.nic.in kaltlangin a hman theih a ni.

Department pakhat hmalakna chungchang mai mai mah nise a chhawr tangkaitu tur ber chu mipui mimir an nih avangin inthlahrung tak chungin ka rawn post ve a ni e.

This entry was posted on Tuesday, January 3rd, 2012 at 11:00 am and is filed under Information, Mizoram. Both comments and pings are currently closed.