A Hawlphum tih hmingpu lehkhabu hi a ziaktu Thara Tlau in a sawifiah dan chuan, “Thawnthu Tawi 10 + 1 Funkhawm a ni a, a vai hian phuahchawp vek a ni”.
He lehkhabu ka han chhiar chu India ram hmun hrang hrang hi ka fang kual in mi hrang hrang hi ka tawng ni ber hian ka inhria. Surat atanga Mumbai train ah textile factory a union leader nen kan titi a, Champhaiah Burma lama kan unau ka lo tuamhlawm a, nipui laia Bangalore Mizo inkhawm hun hai hi a lo hman tangkai theih hle mai tih piah lamah mihring hi kan dinhmun azirin kan lawmna leh lungawina te hi a lo inanglo thei hle tih ka zirchhuak a. Chu mai a la ni lo, Kolkatta a “thiani te veng” ah ka va leng zuai a, Bollywood a Assistant Director thian tha tak ka chhar a, Pune ah hotel tlawm si, thianghlim si zawngin ka vakvel bawk a.
A tawngkam hman hi chhiar a awlsam a, a thawnthu pawh a tunlai hlawm khawp mai. A saptawng tak chuan “contemporary novel/short story” a ni ber ang chu. A tam zawk hi chu “Hei hi chu a tak tak a ni ngei ang” tih khawpa awihawm a ni. Thawnthu tawi funkhawm a ni nachungin zirtir erawh a nei tha em em hlawm si. Kan nu leh pa te chawimawi hi a thawha kan thawhchhuah tur a nihzia te, dan kengkawhtu te hi mipui kan ni lo tih te, mihring te hian khawvel thil engmah hi chapopui tur kan nei lo tih te leh sum tel lo chuan inhmangaih reng pawh hi a lo har khawp mai tih thlengin.
Mahse, han ti teh ang. Thawnthu zawng zawng hi first person a ziah vek a ni a, a changtupa pawh hi amah Thara Tlau vek hi a ni a, hming dang pawh a hmang chuang lem lo. Hei vang tak hian thawnthu tawi funkhawm ai chuan mahni thiltawn tawh ziahchhuahna a ang lek lek thin. Amaherawhchu a character te hi an inang lo em em hlawm a, thawnthu ka chhiar a ni tih ka hrechhuak leh thin.
A Hawlphum hi lehkhabu tereuhte, ngaihnawm deuh, chhiar awlsam leh zirtir nei tha tak a ni. Tawngkam khat lekin sawifiah rawh min ti ta se ka chhanna tur chu “Inchhirawmloh” a ni ngei ang.
Thara Tlau hi Dena Bank Officer niin tunah hian Surat, Gujarat ah a awm a, hei hi a lehkhabu hmasa ber a ni e.
Similar Posts:
- Tlau chanchin
- Thawnthu Tawi Inziahsiak – kar hnih a la awm e
- Lilith – Adama Nupui Hmasa Ber
- Lehkhabu ngaihnawm
- Ngenna
January 17th, 2012 at 10:09 am
ka chhiar ve dawn a maw ni le?
Report this comment
January 17th, 2012 at 11:41 am
Arngeng hawlphum enkawl dan tur lampang emaw ka ti dawn a
Report this comment