Safe-haven!

January 18th, 2012 9:30 pm by H.Vangchhia

Kan hriat theuh ka ring a, Mizoramah hian a khat tawkin, “Chumi veng luikawrah naute pianghlim thi a chhar a ni,” tih thawm hi a ri leh zeuh zeuh thin. Hetiang a thlen thin chhan nia ka rin chu, nuin sawn a pai a, a chhungte hriat lovin a pian veleh a paih ani thei.

Raipuar hian tui an pai hnem loh chuan an rai lian vek chuang lova, an thuamhnaw avangin an thup thei viau thin reng a ni. Chutiang emaw, chawm zolo tur a inhria ten an fa chu mi hmuh theih tura dahin emaw, luikawrah an paih mai thin pawh a ni maithei. Chhan tam tak a awm ngei anga, a chhan diktak hriat a harsa tawh thin a mahse, pawiber zawk chu mihring nunna nei kan that thin hi a ni.

Hetiang a nau paih thenkhatte chu mithenkhatin la dam an hmuh chang a awm thin a. Chutiang anih chuan khawngaihna nen lain an enkawl fo tawh thin a. Pu Sangthankima (TNT) te pawh entirnan a hman theih ang chu. Chutiang a chhan chhuahte awm ve thin mahse, naute paih tam zawk chu an damchhuak kher lovang. Pian tirh atanga nu leh pa hmangaihna leh duat beisei a rawn “aw-ngek” hawm hawm chuan nulat tlangval pawh hre hman lovin mual an liam mai thin a ni si a.

A pic hi hmuh a hrehawm deuh avangin hetah hian fiah lutuk lovin ka rawn dah a, a aia fiah zawk en hreh lo tan click here

Hetiang naute pianghlim, hmeichhia in emaw nu leh pa ten an enkawl thei dawn lova an hriatte hi sawrkar hian enkawl dan feltak siam ve sela ka ti hle mai. Ram dangah pawh hian chutiang chuan dan fumfe tak naute nu mualpho miahlohna tur siin an duang thin a ni.

United States te angin tih ve theih kher chu tumlo mah ila, chutiang riruang chuan tumna awmse, tihve theih dan a awmin ka ring tlat pek a!

Engpawh nise, United States lamah chuan hetiang deuh hian an ti a, Texas ah kum 1999 atanga khan hmang tanin a hmingah ” “Baby Moses laws” emaw, infant safe haven laws tih niin, state tam takah dan-ah an nemnghet nghe nghe a ni.

State tinin dan hrang nei thliah mahse, an tum chu a inang tlang vek a. Chumi chu naute pianghlim, paih a thi maiturin nunna a chan lohna tur a duan a ni ber a. Nu-in, nau hring sela, enkawl zo dawn lova a inhriat emaw chuan “Safe-haven“, damdawinah emaw, police station-ah emaw, biakin-ah emaw nau piang chu hrisel tha a nih chuan an dah thiang a.

Naute nu hming erawh tuma hnenah tlangzarh a nilova, hremna lakah dan-in a chhan bawk. Tichuan, a lo dawngsawngtute chuan a rang thei ang berin an hriselna an enfel sak a, local child welfare department ah chanchin an thlen nghal vat thin.

Maryland state bikah chuan naute a pian atanga ni 10 a upa a nih thleng ‘safe-haven’ hian an pawm thiang a, state dangah chuan ni 7 a upa thleng a pawm te pawh an awm bawk.

Khitiang ang kilh kelh lo deuh te pawhin, Mizoramah hian naute luikawr a paih ngawt ai chuan an hming thup saka, an naute lo dawngsawngtu turin eng welfare emaw ber hi inhawng sela ka van ti tak em. Hmangaihna leh duat mamawh em em tu naute pianghlim “Aw-ngek” chuai riai riai thin tur ka mitthla hian ana ka ti em asin. Inti ve tho em, lehkha ziakin hming tam tak ziahhnanin sawrkarah hian thlen hial a tha lawm ni?

US Safe-haven laws chanchin tlem:
http://www.childwelfare.gov/systemwide/laws_policies/statutes/safehaven.cfm