mi(sual).com

Nula hmeltha leh nungchang duhawm Chhingpuii zawng tu nu leh pa mah hian an fa mo atan an iai mawlh hlawm lovang. Kan khua, In 200 (zahnih) vel teh meuh ah pawh nula chhuanvawr, kohhran leh khawtlang thilah pawh kan lek lam ber a ni a. Nula dang te zawng awm ve teh meuh mah se Chhingpuii lakah zawng eng ruai an ni hlawm lo.

Kan khaw thenawm, Zabuk nula hmeltha Chawngpuii nen khaikhin an ni fo. Mahse, tlangvalte leh pa hote reng reng chuan, “Chawngi hi zawng a hmeltha in a itawm chiang thlawt a lawm, mahse duhthlang thei ni ta ila Chhingpuii ai chuan a buk a zang deuh zawk ang,” an tih ka hre thin.

Nia, chuti khawpa hmeltha leh nungchang duhawm a thang ta fam chu, khaw hrang hrang atang hian amah rim tur leh zawlthluk tum hian an rawn thawk chhuak teh chawk a. Aizawl atang meuh pawhin mi hausa pui pui hi, motor nalh tak tak hian an rawn kal ve leh nawlh thin bawk. Amah neih tum a cham chilh ta tlat te, an neih sum hmang a zial thluk tum ta tlat te lah an bang hek lo.

Chu’ng mi te chuan amah, Chhingpuii, chu neih tum thin teh mah se, chhan eng eng emaw avangin beidawngin an haw leh mai thin. Chubakah, Chhingpuii chuan pasal neih mai a la tum loh zia tlang kam atangtein kan lo hre ve leh zel a. Nimahsela, I.A.S. Officer pakhatin a rawn biak tum chuan Chhingpuii’n a duh loh thu tawng kam a thlah awm reng an sawi ta lo!!.

Tlangval a thukhawchangin, kan khaw nula chhuanvawr Chhingpuii, I.A.S. Officer meuhin a rawn rim ta mai chu, an innei ang tih mawlh ka lo hlau ru thin. Chhingpuii chu eng ang a hmeltha leh duhawm pawh ni teh reng se, Officer satliah pawh ni lo, I.A.S. Officer meuhin rawn be ta mai chu, a tan zawh hi ka lo ring lo ve em em mai a.

Kan thenawm nu, nu kam tam Zalawmi phei chuan an in sawi rem loh hi a’n ring lo khawp a. Chhingpuii nu leh pa te sum duh lutuk in ama’n duh lo mah se an tirh luih tho tho a rin thu kan in a rawn chuankai pah hian a sawi sek mai leh nghal a.

Chhingpuii’n inleng dang lam tak a neih thu chu nula leh nu ho titi tui ber a ni chho nghal a, tu pawh mai chuan an inneih loh reng kan ring hlawm lo. Kan khaw tlangvalho hlei hlei chuan kan run emaw tih mai tur hian a ruk takin kan lo engto ve em em hlawm bawk a. Kan cho rual loh, kan ngam rual lohin Chhingpuiii a rawn rim ve ta mai chu kan khuaah ngei pawh chuan kang lang ta sawt hian kan inhre hlawm hial mai.

Kar hnih zet zawt a liam hnu, kan Officer-pa in a palai a rawn tirh a chinah hnu phei chuan kan khawtlang chu a nghawr hian a nghawr nghing dawt dawt hi a ni ber mai! A rukin tlangvalho kan insawh tau a, kan helh a, tumah rengin eng dang kan ngaihtuah thei ngang lo a ni mai e. An in a zan tin chuangkai thin ho pawh in len luh en ah kan en tawh hlawm lo. Chhingpuii chu uiin a rukin lo ngaizawng ve hlawm teh mah ila keini dan zawh rual a ni si lo. Pasal nei a kan hmuh phak loh a awm tur a ka’n suangtuah ringawt pawhin chu chuan min run em em mai!!!

Rinlawk ang ngeiin Chhingpuii te chu an in sawirem ta!!!!

He thu hi kan khuaah Chhingpuii te chhung leh kua tih loh ah chuan a hre hmasa ber pawl ka ni hial ang.

Chhingpuii te in leh kan in hi inhnaih vak lo mah se, kan intlawhpawh em em thung a. Anni chu Venglai ah pawh, a laili lai takah, chhuah chhawng at in an awm a, kan khua ah chuan a awm thei pawl tak pawh an ni pha. Keini erawh veng thlang lam deuh, Tawitaw Kawn ah kan awm thung. Chhingpuii te ang em chuan nei ve lo mah ila a khawsak ziaawm pawl erawh kan ni ve.

An in atang chuan kan in chu lang pha chiah lo mah se, a in auh vau vau phak thung a, Tuibur hmuamda kal pawh a ni em lo.

Ka hriat phak chin atang tawhin Chhingpuii te nen chuan in len pawh reng reng thin kan ni. Engtia han in ti tlangnel viau nge kan nih ka hre chiah lo na a, ka pu (ka pa pa) te hun lai atang tawh a lo in unau a, lo inti chhungkhat kan ni tih ka nu min hrilh ka hre thin. Chi leh kuang lamah erawh in unauna tur em em kan neih ka hre ngai lo.

Amah Chhingpuii nen pawh tet te atanga inhre tawh, in nel em em kan ni. Unau ang tak tak chuan in en chiah lo mah ila, kan in nel a, kan inpawh a; an in a ka tlangnel ang bawk in ani pawh kan in ah a tlangnel ve em em. Ka chhang chiah Rotuaki nen an in rual chiah a, kawm pawh an in kawm ngeih. An hming pawha in ko lovin “Ka thian” ti ngatin an in ko thin. Engkim inhrilh tawn a inthurual reng reng an nih vangin an in ngai tawn em em a, Numami (Rotuaki) phei chu a han riak chho cham chi reng a.

Tun a a pasal neih tur thu ah pawh hian Numami chu a rawn ve fo a, ka nu leh pa te hrilh angin Numami chuan a inlengpa chu nei turin a sawihmuh ve thin. Chhingpuii erawh chuan a hreh thu leh nulat a la chak zia a sawi mai thin a, mahse, a nu leh pa te thu hnial erawh a tum hauh thung lo.

Numami nen an in kawm ngeih em vanga tuna a pasal neih tur te pawh lo hre ve vat ka ni reng a.

Nau te ang a en in, innel viau thin mah ila, pasal a’n neih dawn meuh chuan chi leh kuang a in-unau-na tak tak a lo awm lo bawk a, chuta chhapah a ruk tak a ka lo ngaihzawn ruk thinna rilru nen, Chhingpuii chu ka ui vawng vawng a. An inneih ni tur chu ka lo huphurh ve em em mai a ni.

Zing kara an thutlukna Numami hrilh tur a kan in a a rawn kal lai te chuan ka lo thlir reng a. Ni dang ang in hlim hmel pu in thatho hmel sarh lo mah se, zing thangah pawh a hmel chu a lang no hnap tho mai. A han che vel reng reng chu a nu zam mai a, Zing daifim ang mai a thianghlim ser, a vun paw sen phak te chu ni dang zawng aiin a lang no leh zual emaw tih mai tur a ni.

Numami nen eng eng emaw sawi a an ti ti melh melh lai chuan ka lo thlir vawng vawng a, chik leh zualin amah chu ka’n en chiang a. A hmui, zohniar kaih luh an sawi ang mai a duhawm, vani an rah ang mai a sen hlar mai te chu a pasal tur, hmeltha bik lo tak, fawh chul mai mai tur a’n ni mai dawn ta chu a nia le(h)!! A awm bawr, vawng tha leh lawh tak mai te chu a hriat ngai hleih loh, phai vai ho zing a awm reng thin, tan a’n hlan kumkhua tur te chu ka ngai ngam lova, ka ui tak meuh meuh a ni.

Ni e, pasal a nei dawn a nih rau rau pawh in, a lo berah kan khua hi chu pel lo se la, a tih dan dan a la awm. Chu tih a hnekin, hla te khua ah, a nih loh vek pawh in, khawi lai vai ram pilril ah emaw an awm bo daih emaw kha a ni ang a. Chhingpuii, tlangvalte sep rawn, pa ho ti ti ti tui tu ber a awm tawh lo tur chu kan khaw tan chuan channa nasa tak a va ni dawn teh lul em!. Kan vang khua ti mawi tu ber leh ti nuam tu ber kan chan tur chu a tu a te mah hian kan ngai ngam lul love.

Kan in ah chuan rei pawh awm lovin a haw leh nghal vat a. Ka nu leh Numami chuan ei rawng an bawl sawk sawk a, an peih fel a tukthuan kan ei hnu chuan ka pa ho in chul ram a thlai rah ilo vai tur in an liam ta dial a.

Fehrehsan a nih meuh chuan ka mutna atang chuan ka tho chhuak tham tham a, khum kianga ka tairaw tiang chu ka’n ban a, tukverh ah chuan ka chhungte liamna lam chu ka thlir vang vang a.

Hemi ni hian midang zawng chu sawi tawh ang khan chul ram ah kal a. Kei erawh nimin piah kan lo vat ka ke ka tih hliam vangin ka la che thei vak lo a, in ka lo nghak a ni.

Rei vak lo tukverh bula ka din hnu chuan ka in her a, ka ke chuan min tur deuh ut ut avangin khum ah chuan ka va inthawlh tha leh a, ka khua chu a rawn sik leh deuh er er a ka hriat vangin puankawp chu ka’n thuah belh bawk a.

Ka mu fel awrh tih ah kawngkhar chu a rawn ri rak a. “Ka thian,” tih pahin Chhingpuii a rawn lut a. Ka lo chhawn vat a. Ka mutna lamah chuan a rawn phei a, “Awi.., U Val, nangmah chauh i awm e law? Khaw’nge midang?” a ti a. A sam chu a’n huih thuak a.

“Chulramah an kal hlawm a nih kha, hei vawiin chu an nula in in ka nghak a nih hi”, nui chung in ka ti a. Chhingpuii chuan nui chung vekin, “Mipa ho zawng an chhuak a ni maw chu! Ka thiani chu puan ban puiah ka duh a sin le” tih pah in a la hlum leh laduang rawn ken te chu a phawrh a.

“Aw, keiman ka ban pui che ‘nga ni mai lawm”, nui vur vur chungin ka lo ti leh a. Chhingpuii chu a nui rah rah a, “Awi, U Val, i thiam ve tak tak dawn a maw ni le! Chubakah, i puan ban te chu a tlo dawn ami?” a ti a. A nui har har a. “Eng ah nge maw a tlo loh ngawt ang le, Numami puan pawh keima ban vek a lawm!”, nui tha duh vak lo chuan ka lo ti a.

Puan chu kan bang dun ta poh a.

Ka ban zawh sak hnu chuan a puantahna sir ah mutna min siam sak a, tah chuan ka lo mu a.

Rei vaklo a’n khawn dap dap hnu chuan, “Awi, U Val, en teh, pasal hi neih leh loh mai ka duh”, a hmui tih sawih ne ne pah chuan a ti hluai a. Kei chuan nui hak pah in, “Engah ngawt maw, Chhingpui? Nakinah ila inchhir hle mai tur a sin”, ka lo ti let var a.

A themtleng rawlh lai chu a chawl dat a, a hma zawn chu a’n en ngat ngat a. “Hmelhriat ngai hleih loh, inngaihzawn pawh awm hawt lova han inneih ngawt mai chu (h)!” a ti sap a. A melh ngai a melh reng a, a ngaihtuah ding hle tih a hriat mai.

A insum hle chungin a mittui chu a rawn far thla fap a. Kei chu ka lo ngawi reng a, han hnem ngaihna reng ka hre lo. Nakinah chuan amah vek chuan, “Awi…, ka rilru hi a hah ngawih ngawih thin a sin, nulat hi ka la thlahlel ve tho bawk si a!” a nui lui hram hram a. “Tunah pasal neih hun lutuk ka la ni bawk si lo”, a tih chhun zawm a. A aw te chu a khur deuh a, a lawi lek lek bawk a.

Kei chu ka la ngawi reng a. Ka mutna atang chuan ka’n thu chhuak a, a dar ah chuan ka va vuan a. Ani chu a lo thaw hak a. “Chhingpui, I lung chu a awi lo ang tih chu ka hriat pui che a lawm. Mahse, I chhungte hian i hmakhua an ngaih vang zawk a lawm”… Chu thu chu sawi a hrehawm kher mai. Amah chu ka’n en a, a mittui al lo tling pam a.

Mittui kar atang chuan a rawn hawi phei a,a insut feih feih a. “U Val, ka hre tho a lawm… Mahse, ka ngai hlawm dawn lutuk tur che u hi ka ngai ngam ngang lo a ni!!”, tih pah chuan ka dar ah a lu a rawn nghat a.
A ngik feih feih a, a mittuiin ka kawr awm a rawn tih huh te chu ka hre thei. Ka insiamrem hret a, a hnungzang a kuah liam in a dar ah chuan ka vuan a. Inthlahrung ru tak chungin a sam sei ngil siau chu ka’n chul sak a.

A taksa, min si thuak tu, lum ham ham in min rawn ur chu ka hre thei a. Ka rilru a insual nasa kher mai! Ka’n ngaihtuah a, a ruka ka lo ngaihzawn thin zia te chu han hrilh phawng mai ka duh rum rum a. Nau ang a ka en hleih theih loh, a ruk tak a ka lo ngaihzawn thin chuan u ang tak tak chuan min en bik lo tih hria. Mahse, keimah leh keimah chu ‘Hetiang rilru bawlhhlawh hi a pu tur a ni lo’ tiin ka in hau mawlh mawlh a.

A tap chu a bang tawh na a, a la insut faih faih a. A hmai erawh ka awmah a la phum reng tho. Ka’n insiamrem leh deuh a, a khabe ah chuan ka dawm a, a hmai chu ka’n chawi kang a. “Chhingpui, mi han en teh, i rilru nat tur zia chu ka hriatthiam pui lutuk che a sin. Ni e, i nu leh pa te, i u leh nau te pawh i la thlahlel lutuk ang. Mahse, I tan….” ka sawi zawh hma in ka hmui chu a rawn hup a.

Ka mitah tak a rawn en a, a mitah chuan mittui a la tling pam a. “Awi…, U Val, chu lam a ni lo, chu’ng te chu a ve lek chauh a ni. Chu’ng zawng aia pasal neih min ti hreh tu chu nangmah ka kalsan tur che hi a sin”, a’n ti ta a le(h)!!!!!

Ka phu deuh zawk a, ka bing chum chum bawk a. Amah chu ka’n n thin, a mit sen ram leh a hmeltha duhawm lutuk chuan a uang lo tih leh dawt a sawi lo tih a ti lang reng mai si. Rei pawh min en ngam lovin a hmai chu ka awmah a thuk ru leh nghal a, a khur dar dar a.

Ka hamhaih hneh lutuk chu tawng ngaihna reng ka hre lo. A ruka ka lo ngaihzawn, pasal nei lo tur a ka lo duh ruk ngawih ngawih, phu hlawl lo a ka inhriat vanga ka rilru pawh ka hrilh ngam loh chuan chutiang chuan min ti si!!!! Sawi tur ber hre lova ka hawi heu hau lai chuan amah vek chuan min rawn en ha pah hian, “U Val, I duh loh zawng ka sawi anih chuan khawngaihin min ngaidam ang che”, inthlahrung awka tak mai hian a rawn ti leh a.

A hmel, duhawm leh tha mangkheng chu ka lam hawiin a eng phet ni mai hian ka hre tawh a. A hmai zang thal ha chu ka’n thlir chiang leh zual a, a duhawm ngang mai si!! A heh, sen no chek mai, fawh vawng vawng chakawm zet chu ka’n en leh a, ka hmai bulah chuan a rawn thaw lum ham ham a.

Ka insum zo ta ngang lo…….Aw Lalpa….. min ngaidam ngang mai tehhhhhh….!!!!!

This entry was posted on Thursday, February 2nd, 2012 at 10:00 am and is filed under Fiction. Both comments and pings are currently closed.