mi(sual).com

Democracy zalenna a awm theih nan Burma sawrkar tharin anmahni dodaltu tlang mite nen inkah haina Peace Talk nei tura keini Chin (Zo) fate a han dawr takah chuan, keini pawhin kan hnam pum ngaihdan lak khawmna leh hmalama kan hnam tan chak zawka hmalak leh thawh tlan dan tur sawihona Emergency Conference chu zalenna sualtute’n huai hawtin khawvel puma threndarh kan mifing/mithiamte leh politics-a tui tak tak mite an han koh khawmnaah chuan tling lo chungin ka tel ve thei hlauh mai a.

India rama kal a ngaih takah chuan Conference chung chang thu ni lo thil dang ka rilrua lo lang hmasa ber chu Mizoram hmuh chakna hi a ni ber mai. Chin State kan chhuah sanna a rei tawh vang pawh a ni thei a, Mizoram zawk hi mahni in chhung khur anga ngaihna hian rilru a lo luah hman tawh si a.

Kan awmna Canada atangin England khawpui London-ah chuan kan han hah chawl phawt a. London atang chuan Air India-ah ka han chuang ta a. Air India-a an staff te hi vai nutling pui pui, vin deuh deuh hlir hi an nih hlawm avangin Air Canada te, China Air Line staff-te nen passenger an enkawl dan a lo dang khawp mai a, a innawm hleih khawp mai.

Air India na na na chu passenger tam ber chu vai an ni ber bawk a, invin leh inhnial nawk nawk chungin Delhi kan lut a, chuta tang chuan Calcutta kan han thleng chho ta a. Canada ram ka chhuahsan hmain Mizoram House chu internet atangin ka zawng a, address pawh ka kawl ta nghal thlap a. Airport kan han thleng chu le, tum loh takin vai taxi driver pakhat hian min lo duat ta em em mai a, hotel thlenna tur thlengin min buaipui tak avangin Mizoram House chu pan ta lovin, Mizoram House ka thlen theihna hun tha tak chu ka chan phah ta a ni. Hun remchang a la awm leh em ang chu.

Lengpui, Aizawl chho turin Air ticket ka han book ta a, Kingfisher thlawhna a lo ni a. December ni 13, 2011, zing dar 11 velah chuan Airport ka va pana ka Mizo puite hmuh chak ngawih ngawih leh hmuh tum tlatin ka han chhuak chu, Mizo nula hmeltha nalh tak tak leh hawihhawm tak takte ka han tawng ta hlauh mai a, ka chanchinte min han zawt a, ka han hrilhfiah hlawm a, min duat ta em em mai a.

Ka mi tawh hmasakte kha ka chuanna tur thlawhnaa chuang tur an lo ni lo hlauh mai a, ka chuannaa chuang tur Mizo dangte min han zawnpui leh a, vanneihthlak takin kan han zawn hmuh thar nula/tlangval ho chu ka kohhranpui Lunglei Baptist thalai ho an lo ni hlauh mai leh nghal a. Ka mi hriat zawngte pawh kan han sawiho tlang nghe nghe a, min duat bawka ka thla hi a muang em em a, Burma ram ka chhuahsan hnua min boral san ta, min hringtu ka nu leh pate nen intawng leh ang chiah hian an mahniah ka han inhngat chat mai a. An hming min hrilhte kha ka hamhaihin ziah nachang ka lo hre lo va, an address-te nen ka kawl hman lo hi ka inthiam lo hle.

Thian te’n ka bag-te min khai sak chungin Kingfisher han lutin ka han chuan ve chu!! London atanga Calcutta thleng kan rawn chuanna an staff ho leh an service system hi a lo danglam daih a. China Air Line-a nula nalh tak tak leh hawihhawm tak tak ho ang kha Calcutta leh Lengpui kar service-ah an lo hmang hi mak ka ti tak zet a. Mizoram ka thlen lohna a lo rei tawhin, mahni hnampui hmuh chaknain ka lo rawp tawh bawk a, lepchiah vang ni hauh lovin, chutih laia ka rilru lo luahtu ber chu, Mizo nula ngei thutpuia han titiho ka chak ber mai a ni. Chutiang ngaihtuahnain ka rilru a luah khah tlat lai chuan, min diriam bertu ni awm ang hrima ka en vaipa ka bulah a lo thu ta tlat kha chu kan zinna lam tluang atan a va lucky lo ber ve aw tiin lungni thei thlawt lo chungin ka han thu ngawi hram a.

Mahse, tihngaihna a awm si lo. Vaipa chu Mizo tawngin ka han kawm hram a, Mizo tawng a thiam loh avangin Sap tawngin kan in be ta a, “Mizoram nuam i ti em?” tiin ka han zawt a. “An society leh social organization-te hi ka ngaisang a, ka duh em em a ni,” tia min chhan malh malh laiin induhthawhna rilru a lo chhuak bawk a, kei chu Mizoram mi chu ka ni lova, Burma atanga lo kal ka nih thu leh, kan tawng hman pawh a tlangpuiin a inan thu leh hnam khat kan nih thu te, British kut hnuaia ram pathum awm, India, Bangladesh leh Burma tia kan inthen thu leh kan tenau miah lo a ni tih thute ka han hrilh chu mak a ti a. “Ka lo la hre ngai lova,” tiin a lawm thu min han hrilh takah chuan, Mizo nula ka thutpui lo kha Pathianin hnam dangte hnenah kan hnam chanchin puang tura a remruat a ni ang tiin keimah leh keimah ka inhnem leh hramin ka inhriat chhuah phah ta a ni. Chutih lai chuan India hmun dang leh Calcutta to Lengpui/Aizawl service system a danglamna hian ka rilru a luah ta daih a. Eng vangin nge.…? tia ka han ngaihtuah chhuah chuan kan Mizo society hi vai hovin an lo ngaisang ru hle a ni tih hi a result ka hmuh chhuah chu a ni ta a ni.

India ram hmun danga an service-ahte chuan an vai thawmhnawin an inthuam vek a, Calcutta to Lengpui Kingfisher-ah chuan an staff te hi nula no leh nalh tak takte niin, an silhfen pawh Mizo thuam chu ni lo mahse, sapho thuam dan leh tunlai Mizo thalaite inchei dan hmeh thlapa an han inchei ka ngaihtuah hian Mizo society leh kan standard hi a rukin min zahin special deuhin an service a ni ang tih hi keima suangtuahna leh ngaihdan a ni a, a dik kher lo mai thei a, Air Company a zir pawh a ni thei bawk. Darkar khat leh minutes 20 chhung vel chauh hnua Mizoram Lengpui khua kan han thleng ta mai a, mahni ram leh hnampuite han hmuh chu duhthusam a tling ngei mai.

Conference huaihawttute’n Lengpui-ah chuan lehkha pheka ka hming fiah tawka ziak kengin min lo hmuak a, motor-in Conference hmunpui chu ka han thleng a, a nihnihna chu ka tel ve hman hram a nih chu. Niruk chhung chu Conference tluang takin kan han hmang a, duhthu samin khawvel hmun hrang hrang atanga lo kal khawmte leh Mizoram chhunga lo awmsate, Burma ram atanga lo kalte nen chuan lung si tak leh hlawhtling takin kan hun chu kan han hmang a. Kan hun tawp zan chuan kan zing ami Pu Victor Biak Lian tlawmngaihna zarah Mizo zaithiam Mimi Lalzamliani leh C. Luri thianpa te Music group hmangin intih hlimna hun kan han hmang chu kan tlai hlawm khawp mai. Chumi hnua rilru leh nun ram lo luah khat hman leh chu, Zawl khawpui ngei hmuh chak thuai thuaina hi a lo ni leh ta a. Kum sawm pakhat lai hmuh tawh loh Zawl khawpui pawh khawi maw lai lai chu hai rual lohvin a lo thangin a lo danglam hman a, lung a tileng vawng vawng bawk. Taksa ngei leh mit ngeia ka tawn hriat, hmuh hrehawm ber mai chu Traffic jam leh kawng chep em em hi a ni ber. Tun tum Aizawl, Mizoram ah ka thil hmuh lawmawm bera ka ngaih chu a mipui mimir hi kum sawm kal ta nena tehkhin chuan, kawng engkim maiah an lo thangin an lo puitling sawt hle tih hi a ni. Kum 2000 kum thleng Aizawlah ka awm a, chutih lai chuan taxi driver-te hi an vin em em a, hman hrehawm anni thin, tun tum chu taxi 15 aia tlem lo kan hmang a an lo hawihhawmin an lo changkang em em a ni. Taxi driver ho hian Mizoram hmel an lo ti mawi hlein ka hria a. Vawikhat chu Khatla atangin Bawngkawn thleng taxi pakhat kan la a, kawng lakah hmeichhia pakhat a lo chuang ve a, a chhuk dawn chuan pawisa pek a han tum chu, driver khan keima hnenah, “Ka pu, engzatnge ka lak ang?” min han ti a. “E khai, nangman tawk i tih zat zat la mai rawh,” tiin ka chhang a. Ka han sawi duhna chhan chu, min zawt lovin a la thei tho naa, a hire tu thu a han neihtir der pawh chu hawihhawmna leh capital service standard a lantir vena a ni. Hetia Aizawl taxi service changkan dan leh Aizawl standard a han pholang hian ka rilrua ngaihtuahna thar min neihtir a. Chu chu hei hi a ni, mipui tana Taxi service ho hi an lo pawimawhin hnam mizia tilangtu an nihna kha ka han chhutin ka han zah em em hman a ni.

Ka lung min dumtu ber dang pakhat chu, Aizawl khaw chhungah hian ka hun neih chhunte hmang tangkai turin hmun pawimawh deuh deuh leh mipui pun khawmna deuh deuh ka han fang ve a, vai leh khawchhak unaute nen an in chawhchawrawi khepkhup mai a, mahse, tunhma kum sawm kal ta lam angin hmel leh tawng inthliarhranna hmel reng reng hi hmuh tur a awm lo hi lung a tiawi ber a, kan hnam hi kan puitling tawk e, ramri (boundary)-in min dai dang mah se, hnam thuah kan chiang tawk tawh e, tih kan han ngaihtuah hian mi hriatpui loh lawm avanga mittui thlengin a tla a ni. Tun hma kum sawm kal taah kha chuan mahni thisen zawmpui ramriin min dai dan avanga, “Burma mi, Ngahpih ho,” tia inau chhuahna khan, kan unau tamtak trih chung leh raltri chunga awm pemna dang nei mai si lote chu, mahni thisen zawmpui unau ngeite ram Mizoram-ah harsa ti em emin a lo khawsak tir a, kan biak chung Pathian mithmuhah chuan thinlung lairil tina vawng vawngtu a ni ngei thin ang le. Tunah chuan kan lo puitling ta, unau thisen zawmpui thuah kan chiang tawh tiin thla a muang em em a, a chhan ber chu, Zo hnam veitute thahnem ngaihna au aw vang a nia, an au aw chu Lalpa beng hriatah a va han mawi dawn em!!

Kum 1990 vela Mizoram ka rawn luhtirha ka hna thawhna ka pi leh pu zawng zawng chibai buk ka han tum a, thenkhat chu hun a chep em avangin ka tlawh hman lova, ka hnathawhna hmasa ber Zarkawt a mi Pu H.T Hrangkhuma (amah chu a lo boral tawh a), Mizoram ka ke rahna hmasa ber leh malsawm bul tanna tiin a la dam ka pi Pi Zokailiani leh a fapa pahnih Pu Lalrengpuia, Pu Lalramhluna, a fanu pahnih Pi Mimi, Pi Lalhmachhuani (Chhuantei) te chhungkim takin ruai kan han theh thei hi ka lung a kim em em bakah Pathian thatzia kan han sawiho tak tak mai chu kan biak chung Pathian pawhin min lawmpui ngei ang. Mizorama kan awm laia inthlahrung leh zakzum taka kan khawsak laiin Lalpa hming avanga hleih nei miah lovin kawm kara kan chen mai mai phal lovin, Pathian thua min lo chawmhlawmtu Electric Veng Baptist Kohhran te zinga tawngtaina hun te ka han dawng thei leh, Fapa anga min lo enkawltu Upa C. Thanmawia te chhung nen Lalpa fak tlangin an chhungkua nen chaw kan han kil ho leh thei hi ropui ka tiin Pathian hming ka fak hle. Khawchhak lam atanga lo chhukthlate hi Mizoram Kohhran tamtakah kan zalen thei vak ngai lova, inhmuhsitna hian Biak In kawng a khar hnan thin, mahse, Electrict Veng Baptist Kohhran erawhchu mi beidawng leh tanpui ngaite tanpuina kawnga Pathian mitmei enin an taima hlein en hranna leh hmusitna an lo nei miah lo hi ka theihhngilh ngai lo, Pathianin malsawm zel rawh se. Kum sarih (7) chhung in luahtu enin min en phal ngai lo. Kan in neitu Pu T Chalthanga te nupa hi an tar hnu a, an in mawitaka an lo sa chhawng thei ka hmuh hian mite khawngaih leh tanpui tute chunga Pathian malsawmna hi tar leh tlai a awm lohzia ka han hmuhchhuah hi ropui ka ti bawk.

Sawi tel loh theih loh, keimah ngei malsawmna dawng tluka ka ngaih, Mizoram ka awm laia khawchhak lam mi awmpui tute, Pathian biakna atan zalenna nei ve lo laka Pathian thua ka rawngbawl pui thin pahnih zinga Pu Thang Pian Khupa chuan MAP ah Arsi pahnih a kokiah a lo bel hman a. Chu bakah Thuampui vengah anmahni in lo nei hmanin an in chhung ngeiah chawhluite kan han kil tlangin Pathian thatzia kan in share tlang theia, ka thian dang pakhat Pu Rev. (Dr) L. M. Andrew hi Mizoram Bible School Principal leh a neitu a lo ni hmante hi ropui ka ti lutuk a, Pathian tihtute hi an tana a duhsakna sangber malsawmna nen a vur thin tih min chian tirin Mizoram ka zin kawng min tihlawhtling tirtu ber pakhata ka neih bawk a ni. Pathian hi a va’n tha thin em!

Aizawl, Mizoram ka thlen huna ka hmuh leh tawng ngei ngei tura ka dah sa, hunin min daih loh avangin Pu KeiHawla Sailo, Pu C. Chawngkunga, leh Pu R. Thangmawia te in ka leng hman lo kha an hriat chhuah hunah ka chungah an vui ngei ang tih hlau chungin ka kalsan hlawm hi pawi ka ti hle mai.

December 27, zing dar 10 vela chuan Norway lam chhuk thla tur ka thianpa nen Taxi driver fel deuh mai kan hmang a, kawng tluanin Mizo hla mawi tak tak min play sak pahin Aizawl khawpui chu kan chhuahsan ta a. Tlawng leihlawn kan thlen chiah chuan Mizoram ngaihna rilru hi a lo lian ta thut a, ka ka ngeiin ring deuh hian tum lawk awm lovin, “Mangtha, Tlawng lui,” tiin ka au chhuak a ni. Taxi driver fel deuh nen chuan ui chung leh phal lo tak chungin, “Tluangtakin, mangtha,” kan inti ta a. Air Port chhungah chuan kan lut ta a, ka rawn chuanna bawk Kingfisher chu kan han chuang leh a, ka thianpa nen ticket la rual kan nih avangin Mizo nula thutpui kha chu beisei theih pawh a ni ta lo a ni. Mizoram tlang leh ram mawi tak tak mai chu kan pel zel a, a tawpna lam chinah chuan lungleng dan hi sawithiam pawh har tak mai, taksa chunga vurtlang daha taksa min hip vawt vawng vawng ang mai hi niin ka inhre ta a.

Thlawhna atanga kan chuanpui Mizo nula/tlangvalte nen hanin thren tur chu nun hian a phal duh lo khawpa, lung a han leng nghal maia, lunglen luatah Mizoram House pan tura rilru lam control hnehtu awm hian min hruai kuai hneh hman ta a, Mizoram House thlen loh chu a ni thei lo. Mizoram House lam rilruin a hawi ta tlat. Mizoram House kal tum awmte ka han zawt kual hlawma, tawng tam mang lo hmelpu Pu Zodingluaia (Ditea) Ramhlun South nen chuan taxi kan la dun ta a. Ka rilru chuan keimahin taxi chuan man ka tum vek ang tiin ka hauh sa a, amah a lo tuan rang zawk a, a lo pe hmasa daiha, han pek let ka tum khan a la duh ta lo reng renga, amah zawkin min tum sak letling ta daih a. Kan titi tui hle a, tawng mang lo hmel pawh a lang tawh bik lova, kawm nuam em em hi a lo nia, Mizoram House-a thleng ve Mizo dangte pawhin mi hi an ngaihsak em em a, kham lo chungin zankhat chauh kan riak tlanga, December 28, 2011-ah anmahni’n taxi te min chahsakin min thlah liam ta a. Airport ka thleng phei chu lung a leng duh em em a ni.

Kingfisher leh Aizawl khawpuia ka thil tawnte kha ka mitthla leh rilruah a lo lang khat leh vek thin a, hriatpuitu awm lo hian Mizoram leh Mizo mipuite ngaihna hi a lo lian hman a, hun hi dan theih leh thlawhna hi khap theih ni ta si lo bawk nen hian.

Mizoram I duai love, I pachang e, Chin (Zofa) zawng zawngte leh Zoram khawvel entawn tlak leh zirtheih khawp ni turin tang fan fan ang che aw! Zofate tan hma la zel ang che, kan in tawh leh hunah thu tamtak kan sawiho leh dawn nia, tuna tan MANGTHA tiin Calcutta atang chuan ka thlahliam ta a.. Ottawa, Canada

buannel.com

This entry was posted on Saturday, February 4th, 2012 at 12:00 pm and is filed under Copy Paste. Both comments and pings are currently closed.