I dam loha doctor i panin i natna i zawt chiang kilh kelh ṭhin em? Doctor ṭhenkhat chuan zawh kher loh chuan min hrilh an tum lem lo. A enkawl dan te, enkawl dam a harsat leh harsat loh te, dam leh tura hun a duh zat te pawh hi zawh fiah ṭhin a ṭha khawp mai. Mahse maw….doctor tam tak chuan thudik tawk lo min lo hrilh ṭhin alo’m maw le!
Kum 2009 khan USA-ah survey an siam a, doctor thawk lai hmun hrang hranga mi an han zawh kual chuan 55% laiin an dam lo-te an dinhmun dik tak hrilh lo-in a aia ṭha deuh ni awmin an hrilh ṭhin tih hmuhchhuah a ni.
Doctor survey zinga 34% chuan dam lo an enkawlnaa tihsual palh a awmin dam lo-te hrilh kher ṭul an ti lo. Chu mai a ni lo – doctor 10% chuan survey an siam hma kum khat chhung khan an dam lote thu dik lo an hrilh tih an inpuang bawk! (He thu hi TIME magazine, February 20, 2012 issue-ah a chuang). India rama kan doctor-te pawh hi han inpuang chiah se hei ai hian kan ṭha bik lo mai thei.
Doctor ṭhenkhat chuan an dam lote rilru tihhrehawm an duh loh avangin an dinhmun dik tak an hrilh lo ṭhin. Beiseina nei chunga natna tawrh chuan dam leh pawh a awl zawk nia ngai an awm bawk. Mizo zingah pawh kan hre ṭhin, dam lo natna khirhkhan vei, dam chhuak thei tawh lo-a ngaih ṭhenkhat te chu an natna kan hrilh duh lo fo a, an chhungte’n an hria a nih pawhin dam lo lakah chuan an zep tlat ṭhin. Zep hi a ṭangkai tak tak em tih erawh hriatthiam a har.
Hman deuh khan Mizo pa pakhat, a ‘pa’ chi ka ti mai a, chhungte anga ka en ṭhin chu, a nupuiin cancer a vei tih hriatchhuah a ni hlauh mai a. Inti ‘pa’ takin a sawi lawng lawng a, a nupui hriat lai ngei pawhin “chutiang natna chu a nia, dam chhuah ngaihna awm lo chi a ni” a ti hmiah hmiah ṭhin a. A nupui pawh chu a hniam nghal rawih rawih a, rei lo te-ah a thi ta reng a ni.
Nikum hmasa lam khan kan thawhpui, kan hotu pakhat chu thluak cancer a nei tih hmuhchhuah a ni a. A-rang-a-rangin USA-ah an zu zaitir a, an zai hlawhtling viau. Engemaw chen chu dam pangngai angin a khawsa zui thei a. A natna erawh a hre chiang khawp mai. “Tunah chuan ka ṭha viau a, mahse ka natna hi a lo lan leh chuan chance ka nei tawh lo”, a ti ṭhin. A natna chu a lo lang leh ta tak tak a, rei lo te-ah a thi ta mai. Mahse a natna hre reng chungin hlau lo awm takin a awm a, a thih hma hun chu amah leh a nupui fanaute tan ṭangkai takin a hmang thei a, a ngaihsanawm ka ti ṭhin.
Hetiangah hian ngaihdan a inang lo nasa thei. Kei chuan chutiang natna ka lo vei palh a nih chuan hriatchhuah a nih veleh hriat ve nghal ka duh. Ka nupui pawh ka chah fel thlap. Mi ṭhenkhat chuan hriat an duh lem lo thung. Engnge i ngaih ve dan?
Similar Posts:
- Natna mak!
- Inkhawm peih loh hri
- Enge in tihtur in inzawt maw?
- Doctor te hi an duham ta lutuk a ni em?
- Mizoram AIDS dinhmun
February 13th, 2012 at 10:35 pm
Ka zawtchik thei khawp mai ka inentir chuan. Damdawi min chawh hi ka google vel thlap zel
Report this comment
February 13th, 2012 at 10:39 pm
Nia Dr. leh Police hi an in ang deuh roh a, dawt an sawi thiam riau………
Police pawh hian an mi man te hi …….. ti la/tichuan…. a fel mai ang…/… i chhuak mai ang….. ets an ti sam puat a, police hmunpui thlen tawh chuan chhuah mai hi har tak a ni thin….. ha ha
Report this comment
February 13th, 2012 at 10:44 pm
Misual doctor ho chai chi a ni e.
Report this comment
February 13th, 2012 at 10:44 pm
U Aduhi ang khi a tha. Kan Doc thenkhat hi dawhkan a damdawi hming melh zauh2 chungin prescription an han ziak a. A tuiawmloh thin.
Report this comment
February 13th, 2012 at 10:58 pm
@1.Aduhi khi a inhmeh lutuk.
Report this comment
February 13th, 2012 at 11:01 pm
#1…
Sawi theih ka nei tlat lo mai a…
Report this comment
February 13th, 2012 at 11:02 pm
hahah Pu PK krismas hman tam deuh tawh hi chuan kan lo fimkhur deuh tawh a ni e
Report this comment
February 13th, 2012 at 11:03 pm
Ukil (lawyer) te, accountant te, politician te, bureaucrat te, engeer te 100% a rinawm turin kan beisei hlawm lova. Doctor annih vangin kan ring tha em em tur ani dawn em ni? Tam ber chuan an oath an la serious viau turah ngai ila. Mahse vai vaia vantirhkoh ang maia ngaih chi ani ngut lovang.
Report this comment
February 13th, 2012 at 11:04 pm
chuan.. natna khirh deuh lo vei ta ila (tawngthuchhelovah) kei chuan hriat vek ka duh ka ring.
Report this comment
February 13th, 2012 at 11:07 pm
Doctor hand writing chhe lutuk hi an chawh loh zawk hi ka lei palh ang tih ka hlau tin, keipawh..
Report this comment
February 13th, 2012 at 11:07 pm
He thil hi hriatthiam a har khawp mai.Natna khirh deuh hi chu hrilh lovin an chhung te hrilh mai hi a tha ka ti.Tihdam theih a nih chuan a nihna ang anga hrilh hi a tha ka ti.Dawt sawi pawh dawt var kan ti tawh mai a niang chu.
Report this comment
February 13th, 2012 at 11:38 pm
Report this comment
February 13th, 2012 at 11:49 pm
(He thu hi TIME
magazine, February 20, 2012 issue-ah
a chuang).??
Medical Representative awm hian kan doctor te hi ati thatchhia in ka hria, an in update peihloh phah ngei ang.
Doctor hna hi hlemhletna nena thawh chi ah ka ngailo, chutiang mi an awm chuan bang rawhse. Kan Civil hospital ah ngat phei hi chuan ka lungawilo ngun a nia aw.
Report this comment
February 13th, 2012 at 11:51 pm
Thudik chat chat hrilh zel tur chuan Counselor ṭha tak an nih tel angai ang.
Nu pakhat pawh a thil ei lai ah U ṭawk note a hmuh avangin a ei tel niin a in hre tlat a…a thil ten ber mai a nih avangin a ek chhuah emaw luak chhuah phawt loh chuan thil a ei thei reng reng lova. A ni telin a cher tial tial a. Ti chuan Doctor pakhat an rawn a, a ni chuan luak chhuahna DD a pe a, tichuan chawhtawlh ah tui a ti tlingin “Hetah hian luak chhuak rawh” a ti a. A chal a dawm sak a, a mit a hup tel pahin chawhtawlh ah chuan utawk note a thlak zauh a, chu chu a luak veleh “Hei i luak chhuak alawm” a tia. Chu nu chu a lawm ta em em a, chuta ṭang chuan a chaw ei te a lo tui ṭha leh ta a, alo thau leh ta kawng kawng a.
A zirtir: Rilru hian kan taksa te hi alo va thunun hneh thei em
Report this comment
February 13th, 2012 at 11:57 pm
Dr Angel@13, TIME Magazine Feb 20 issue hi vawiin (Feb 13) zing-ah ka dawng a, chutah chuan khi survey chungchang khi a inziak.
Report this comment
February 14th, 2012 at 12:01 am
A dik. A hmunpuiah chuan hetiang deuh hian an dawng hma. Yojana march issue pawh a chhuak leh tep tawh ang.
Report this comment
February 14th, 2012 at 12:01 am
Hrilh nghal vek kha an mawhphurhna,a dawng tute’n erawh an lak dan chu an mawhphurhna ani mai dawn lo’m ni?? ‘marawh chu an hrilh a,an hnem a,an thlamuan kha an tih tur pawimawh ber te zinga mi ani tih hi hrelo an tam thin.
I sawi takah chuan hranghlui lampang tawh kan veng zaithiam pakhat chu hman deuh khan a inentir kha cancer an lo ti mauh mai a,an khua ah thi turin a haw phei a. Bei tih dawn nan tiin an rawn in check up leh a,amah pawh a dàng vek tawh tih ah khan midang result nen an lo thlakthleng palh ani tih an lo hrilh anih kha. Dam chiang tak ani. A rei ve leh tawh. Pawimawh berah chuan kan rilru niin ka hria kei.
Report this comment
February 14th, 2012 at 12:05 am
Hmelhriat te nau piang hlim kan en a, hmeltha kan tih loh pui pawh “a va hmeltha ve” kan ti thin tho a ni lawm ni? Tin, vawiin hi valentine’s day a ni lawm ni? Euro pawh kumin a ni tawh lawm ni kha?
Report this comment
February 14th, 2012 at 12:10 am
a hmunpuiah kan awm ve silovc ka han confused deuh mawle, thankiuz
Report this comment
February 14th, 2012 at 1:44 am
Doctor ten dik lo tak a an wrong diognosis chu thu dang nita se..mihring hi kan inang lo viau mai! Ka thianpa pa chu pumpui cancer ani a, a pumpui pawh a paih teuh a! Thih kha a tum lo hrim hrim a, a thuina a dam hma ten hna a thawk vel, kum sawm chuang ani tawh..a la dam tha khawp mai!
Damlo te an natna dik tak hrilh hi a har viau ni tur ani. Tam tak chuan ‘ee..ka cancer anih hi’ ti rilru mahse ‘truth’ kha an hriat chuan an zo lo. 2007 khan complete medical check up ka nei a, ka chhiar chu ‘ka ni suk’ mai, ka sawi thiam lo, ka thlan a tla deuh nghal hluam mai..a chhan chu hepatitis tih vel kha a awm a!! Spanish in a in ziah vak ania..ka mit liam deuh(in ve deuh lai ania!!) non.hepatitic ti lam zawk alo nia..ka thaw huai mai mawle..
Kei ni vanram lam kawng zawh tute tan chuan kan natna ang ang chu hriat mai a that hmel ka ti deuh khawp mai a. Natna te hi Pathian lama min hruaitu ani ve thei bawk e..
Report this comment
February 14th, 2012 at 2:07 am
Rilru hi a lo pawimawh viau mai. Ka thiannu nu hi hmanah leukemia a nei a, Doctr chuan 2 months bak a dam a beisei loh thu a sawi nghal mai a, kan buai viau a , mahse ka thiannu nu chuan thih mai kha a tum lo nasa mai a, a chhungte ram dangah an la awm baw si a, chuan Hospital atangin dam takin a lo chhuak a, kum 2 vel zet chu a dam leh a, a chhungte an lo thleng ta bawk a, vawi 3 hospitala aluh leh na ah chuan rilru takin a gave up ve ta aniang, min boral san ta..
Doctor thenkhat hi chuan an hmuh dan dik tak an sawihreh lem lo a ang.. either way, thihna erawh mi zawng zawng tan ani si. Pathian hi hnaih reng ang u..
Report this comment
February 14th, 2012 at 2:28 am
21 @ Mamboihi chu a tha wfuh ve tlat mai a..
Report this comment
February 14th, 2012 at 2:30 am
Larpa dam maw?. . Ka thawk fuh ve chhun ha ha!
Report this comment
February 14th, 2012 at 2:44 am
mamboih, hei hi ngai ngaithla mai mai rawh..V day present hehe
https://www.youtube.com/watch?v.....38;ob=av2e
Report this comment
February 14th, 2012 at 2:54 am
Norah Jones hi chu ka duh ve tawp… Happy V-day le Larpa..
Report this comment
February 14th, 2012 at 10:06 am
A mihring a zirin hrilh tha leh tha lo an awm thei ang. Mihring rilru dawih deuh mai chuan natna khirh tak, entirnan Cancer a nei tih a inhriat chuan a rilru a a down vek ang a, a dam tur chen a damlo thei ve tho bawk. Chutih rualin mi thenkhat chu an dinhmun accept thlap thei mihring an awm ve bawk a, an natna a zir a an dam hunchhung chhut a tha tak a nun hmang an awm ve thei tho.
Doctor pawlawh hrim hrim vanga natna inhrilh chian loh ang chi hi a huathla la. Kei chu ka dilchhut nasa thin. Durtlang Hospital ah khian kan damdawi eitur hi ei hunah chat khehsa in an rawn chawi a, eng damdawi nge kan ei pawh a hriatloh a, tumkhat chu Nurse ka zawt a, min hrilh duhlo. Doctor chawh che anih hi an ti tawp.
Report this comment
February 14th, 2012 at 10:24 am
Ngaih dan a inang lo thei khawp ang. Damlo dinhmuna zirin hrilh nghal vek chi leh thu khuh deuha hrilh chi an awm mai thei. Cancer te lo ni ta se, amah damlo kha kan hrilh hreh a nih pawhin a chhungte hnaivai hnena thil nih dan dik tak zep lova chiang taka hrilh erawh chu doctor mawhphurhnaah ka ngai.
Tin, mihring nunna chungah hian tu doctor mahin thutawp an hre tak tak lo va, thi ngei tura an sawi dam leh daih si te pawh an awm tho. Chu bakah kan rilru hian kan taksa hi a thunun thui khawp mai a, miin natna khirh tak pawh tuar se a rilruah beiseina neia a tawrh chuan nasa takin dam lehna kawng a zawhpui thei a, keini Kristiante phei chu Pathian rinna nen kan kal phei chuan mitthi pawh kaitho thei chuan eng natna pawh a tidam thei ang tih hi a chiang bawk. Chuvangin, damlo rilru tibeidawng zawnga doctor a tawng vak vak kha thudik sawi pawh ni se a finthlak ber lo mai thei. Thu dik zawng zawng sawi chhuah vek kher hi a tul loh hun a awm..dawt sawi kher lo vin.
Report this comment
February 14th, 2012 at 11:36 am
In comment chu a tha hlawm hle mai.
sheldon@26, i sawi anga damdawi ei tur hming pawh inhrilh duh loh khi chu a ngeiawm tih mai a ni lo, a huatthlala ka ti. Dan leh hrai lam ka hre tam lo naa illegal a nih ka ring khawp mai.
Report this comment
February 14th, 2012 at 11:46 am
A bengvarthlak thin teh e. Kei tehlul hian medical chungchang ka sawi thei lo, mahse pet animal practice-ah pawh hian Vets tan pawh in sawi tam zawk khi a thleng ve tlat si. Damlo (neitu) a zirin thil engkim kan sawilan a tulin a tul lo thei.
Entrinan: Nikum hmasa khan Vai pitar pakhat; a ui zunthlum vei lai, chau tawh tak chu, a dinhmun ka hrilhfiah fe hnu ah; “Doctor a damchhuak leh ang ti raw?” tiin min zawt a. “Ka pi a damchhuah leh damchhuah loh tur tunah engmah ka sawi thei lo, theihtawp ka chhuah ang e” ka ti a. A tap ta mai!
Mi thenkhat erawh natna nihphung kan hrilh thlap a, hrethiam taka doctor zaingai thiam tak an awm bawk.
Tin, Doctor (mimal) a zirin a dang thei viau bawk ang. Ka hna bik ah chuan damlo (neitu) te mizia a zirin thil ka hrilh tlang in, ka thup chin pawh ka nei thin.
Report this comment
February 14th, 2012 at 12:34 pm
Hrilhawm chi leh hrilhawm loh chi an awm ang chu le.
Report this comment
February 14th, 2012 at 2:05 pm
Thil harsa leh fimkhur ngai tak chu a ni phawt mai. Hrilh awm chi leh awm lo thliar thiam hi a har lai tak a ni ang. In dinhmun dik tak hriat in duh em? han tih ngawt pawh ṭhenkhat tan chuan chauh phah hnawk theih a ni dawn a.
Dr. Mahminga Sailo@29 sawi ang khian ran vulh lakah pawh tap mai tawk te an lo awm ṭhin bawk nen.
Report this comment
February 14th, 2012 at 9:25 pm
Ka la sawizo lo, kan sawi leh lawks. Doctor te damdawi min chawh hi Aduhi sawi ang khian ka google thin a, mahse tunhnai atang hian ka ti duh ta lo. A chhan chu adverse effect hi a inziak tlar dul zel a, damdawi hi ei ngam a ram hi a lo awm reng reng lo mai a, a side effect fatal deuh deuh te hi an lo ni vek mai a, nachhawkna mai mai te pawh. Kan zir ve lo anih chuan Doctor in pawilo tura min chawh hi chu ei pawp mai ila te ka ti rilru ta.
Chutihrualin eng damdawi nge kan ei, enge a side effect awm thei tih hriat chu a tha bawk si. Hmanni a Antibiotic min chawh pawh ka google a, mum khat chiah ka ei hman a, ka eizawm ngam ta lo vel mawle.
Report this comment
February 14th, 2012 at 9:33 pm
Kei chuan eng natna hlauhawm pawh lonita ila hriat hma kaduh berang natna tihdam hleih theihloh kanvei a nga engmah kanhre siloin kan chhungten minhrilh ngam bawksilo hian beisei neitakin kan awmang kansum lehpai neihzawng zawng inen kawlnan kanhmang zoanga chhungte engmah nei lohian kanthisan leh thosianga chhungte hirethei takin kandah angtih hikahlauh zawng berani, IPS valka hriat kangaih santak mai chan chin kha ropui kati khawpmai hrawk cancer anitih Guwahati damdawi inah hriat chhuah ania tichuan phairam rilzawk panturin doctor ten antia mahse beisei nasang takchu a awm lem lotih an hrilha e chutia nihchuan kanupui fanaute ka kalsan thuai tawh dawnsia antan kahun zawng zawng kahmang zawkang phairamril zawk a kal chhung tur hunzawng kha kalloin kanupui fanautan kahlan zawk hian kahlim zawkang a tithei tlat maikha ka ngai sangin ropuive hlein kahri a natna an hriat chhuah a tanga thlathum ahchuan mualchua liamtamai renga thlathum chung chu aduh ang ngeiin anupui fanaute tana hunchua hlan hmak maia ni .
Report this comment
February 14th, 2012 at 9:43 pm
@s dala, i sawi dik khawp mai(i comment erawh chhiar a harsa, inzawm tur i zawm lova, zawmlo tur i zawm bawk si..haha)
Kan chhungkua pawhin kan tawng tawh a. Doctor in min hrilh thlap a, ‘enkawl dam ngaihna a awm tawhlo a, in duh chuan damdawi ka chawh ang a, inah in haw mai dawn nia’ a ti a, mahse tiang ringawt kha chuan a harsa ve a, amah in dam a in beisei em em laia a natna chungchang hrilhtu nih khan kan hreh theuh si a, treatment te chu kan la a, a nunna erawh tlem chuan kan pawtsei deuh chauh ani. Senso lam chu thuhran nise rilru erawh a nuam deuh.
I sawi ang a mahni dinhmun accept thlap ngam mihring khi an ngaihsanawm tawp.
Report this comment
April 2nd, 2012 at 2:36 am
doctor te tan hian mihring natna zawng2 hi hriat vek sen anilo.doctor i rawn a chumicu lo ei phawt la chuan chumi hunah chuan rawn kal lh rawh tih te pawh ilo tawng fo tawh maithei…tiag hunah chuan i natna i zawh kha an hriatloh vang ani thei tlat…ti daih ila hmannia k thil hriat cu kan mizo superspecialist(a hming sawi langlo mai ila)pakhat hian a patient natna a hreloa,a ho tir te2 a,a lhkhabu neih zawng2 leh internet thlegin a zawng nghal char2 e an tia lawm
Report this comment