Kei leh thosi

February 13th, 2012 9:30 am by Nguntang

Muthilh theih loh manah thu hote ka’n ziak tial ve leh mai mai teh ang. Mumang bo thak khawpa mi tui taka an hnar bawr bawrh laia ceiling fan vir en tlawk tlawk reng mai hi MLTP ACT buaipui hne in ka hne ve tawh a ni. “Mami pa I muhil thei lo ami?” ti tur la mutpui ve loh phei chuan ninawm ve tak chu a ni. Thisen, thisen tia bang lova zai hunah chuan zan muthilh theih loh a awm tawh dawn si lo a, chumi hun chu ka nghahhleh phah sawt thin. Mahse eng dang vang a ni lo; heng ka mut theih loh hnar kaitu chu THOSI vang lek mai a ni.

An pumrua lah ba-saike pawh tiat lo, fanghmir aia lian ve chang chang an ni ve awrh a. Chung hote chuan ka muttuina tur an dal a, ka hnar an phal lo a, min la V khum zan tin zui hi chu ka hrethiam thei thlawt lo a ni. Ka V-day hman ve dan chu dang dai tak a ni ringawt. Beng bula vawi khat an rawn V tawh chuan Z an rawn tih leh hun tur hi hreh taka nghah leh chawt a ni mai. Thisen pein ka tlaivar zing khawp mai.

Mahse lehlam zawng taka ngaihtuah chuan min ti luck-tu an ni ve lawi si. Keini ang sakhmel nei mumal lo, hmai sisu zet, arngeng awm nana tha ve satliah hi beiseia zan tin min rawn V khum ve duh chu ninawm viau mah se, a lawmawm ru ve zek tho mai. Ka muthilh phal lova min ui bettu awm chhun an ni ve miau alwm le! Thosi ang hian nula ho hian min han zarin, ka beng bulah zan tin min han V khum se la chuan ka nun a khawloh phah dawn si a. Hetatang hian thil ho deuh ka ngaihtuah chhuak ta a. Chungte chu kan sawi ve ang e.

A chhe lam zawngin: Lung pui pawh lungtein a kamki loh chuan a awm thei lo tih Mizo tawng upaa kan neih ang khan, thil ho te, eng tham vak lova kan ngaih pawh hian kan nunphung a lo tibuai thei khawp mai. Ka tan phei chuan THOSI ringawt pawh hi mut mawh, hnar mawh a tling a ni. An awma thama, hnek hrep ka nap thin. Kei mi tlaktlai lo veh reng ai chuan, an malaria hrik thami hmang hian misual, eiruk thiam ho hi seh se la, malaria vangin pul vek se la, THOSI vangin kan ramin damna a chang ni mai tur! Tun lai zoram khawvel han thlir ila; tawngkam mawi lo ni suh se la, hmeichhe dultawp khi phak, be-ai thang valh tiat lek pawh hi mipa, tisa chakna kawnga insum thei vak lo tan chuan a ngaimawhawm a ni chek ang, naupang kumtling lo pawngsual a thleng fo mai. Nu leh pa tena naupang chhe ena an en, tirhkah rual lek kha thenkhat tan chuan it tham an ni der tawh. A luhai thlak ngawt mai!

Nula uaih tawh chin lahin an neih hlu ber, mihring tobul ni bawk, ‘gateway of baby’ kha zan lam sumdawn nan an hmang a, chengah an chantir zaih zaih tawh a, KS chhuak thar CALL GIRL an lo piang ta! Hmarchate pum khat lekin ka chhung a tibuai thei ang hian, a te te kan veng hneh tawh lo a nih ber hi maw! Paipawn tham lek, no hnih khat lek avanga ngaihtuahna ti buai thei, funte(zu) leh damdawi mum tereuhte pawh hian khawtlang a va chawkbuai hneh tak em! Sawrkar leh tlawmngaipawl tangrual meuha do tham a tling hial a ni. Chu mai a la ni lo, kutphah tia lek, hnar lian leh beng hlai tak chuanna ni lawi si, tangka(sum) umin kan hmanhlel a. A te ber atanga a lian ber thlengin kan in rinawm loh siak a, ram hruaitu(politician) leh sawrkar hnathawkte phei chu ven hneh loh khawpin an huamhap a, hlemhletna/eirukna(corruption) do a, a zung na lama pho ro a lo ngai leh a. Hnawk lo a ram hi a awm tawh lo a ni ber e.

Mipa ho lah hian kan nunna thing, tulthir aia lian hret , inches tam pawh ni hlei lo hi kan thunun thei lo a; zuanchhuahtir kan tum reng mai bawk si. Hmuh tha kan hmuh hlek chuan rul fun ang main a che nghal tulh tulh zel a. Chu thil te tak te, thosi ang maia harhvang hmang chuan nula kap ruamah kan han zuk a; mipa hi khawvela tur nei chak ber kan ni bawk a, thla thum hnu velah belpui tiat lawngin a lo vung/pawng(rai) ta a. Kan han nei duh leh lo vel a. Chu chuan nau tihtlak duhna thinlung hmeichhia a puttir a, hmeichhe tleirawl te te in nau an tihtlak phah a. An tihtlak loh vek pawhin fahrah kan siam belh a ni lek fang a ni. Kristian ram ni siin tual kan that ruih ruih mai a ni. Kan tihsualn hmanrua chu te tak te ni mah se, a rah chhuah a lian hle thung a. Khawtlang leh kohhran ang zawng pawha vei tham a tling a ni.

A tha lam zawngin: Pathian thuah chuan, ‘nakinah chuan lungte pawh an la rawn auchhuak ang’ tih a ni a. A dik tan viau in ka hria. Mi te bera kan ngaih, rilru leh pianphunga mi pangngai phak zan lo leh miretheite an rawn au tan a. Khawlaiah mi ang vak lo te an theih ang tawka Pathian thu sawi hmuh tur an awm ve tan tawh. Mi rethei te te, thingtlang hnathawk te pawhin mi hausa leh thil tithei deuhte rah beha awm reng an tum tawh bik lo. An theih ang tawka sum leh paia intodelh tumin hna an thawk a, hma an sawn tan ve ta hle a ni. Sawrkar kechheh sual pawh an hrethiam ve tulh tulh a, nawr leh haichhuah dan kawng an hre ve tan mek a ni.

Nu hnute hmur te takte kha nausen tan chuan a chaw lakna hnar lian ber a ni a. A mamawh engkim petu a ni. Chutiang deuh chuan, thingtlang hna thawk, nitin tuthlawh huma sum leh pai rit chhuak ho hi hmusit thei kan ni hauh lo. Kan nitin mamawh, ei leh in, min supply-tu te an ni a. Kan fairel bel atanga chawhmeh bel thlenga rawn hnawhkhattu an ni. Anni hian hna thawk peih lo in, buh leh thlaite ching peih lo se la chuan IAS pachal pawh hian eitur a tlachham ve viau ang. Sa leh eitur chidang a tam alawm kan ti pawh a ni thei; chu pawh chu kuthnathawktute ran leh ar vulh leh siam atanga neih tho a ni. Puan thui thiam/peih awm lo ta se, mihausa leh sawrkar hnathawk ho hi office-ah nalh takin an thu hauh lo ang. Saruakin pen humin an thu far hlawm mai dawn a sin.

Chuvangin he khawvelah hian mi pawimawh leh tangkai bik kana awm chuang lo. Kan hmel a inang lo ang bawkin kan neih a in zat chiah lo a ni thei. Kan hnathawh pawh a inang vek lo ang. Thil te ber leh tangkai lova kan ngaih pawh hian engemaw kawng tal chuan tangkaina an nei ve tho. Kei ngei pawh he article min petu chu ka nin em em, ka tana tangkai lo bera ka ngaih THOSI kha zu ni daih a mawle! Politician ho pawh hi inthlan dawn meuh chuan mirethei tia a koh vote khat lek hmanga Lal thei a ni tih an inhria a, an tlawn huam tawh mai a ni. In mamawh tawn lo reng kan awm lo e. A hmel chhia a tha, a ngo a hang, a khal a cher, a te a lian ho hian inngainep bik awm lovin, a thlum a al, a thur a kha pawh inngeih takin I hawp za dial dial ang u hmiang tih hi ka thu tlipna ni rawh se.