“Mate, a nu chu a lo haw tawh dawn lo”, tiin ka kianga ding patling pakhat chuan a fanu paw chungin a mittui a hru fap fap a. A hmel atang chuan a lungngai a ni tih hai rual a nilo.
“Kapu, i farnu mi ?”, tiin zawhna ka pe thuai a.
“Aw…ka farnu…..ang maia ka en, ka engkima engkim ka nupui a nia”. Sawi vek a duh, mahse a thei lo. A mittui hnam tuam chungin harsa ti takin, “Hei hi kan fanu neih chhun a nih hi”, tiin a belh leh hram a.
Awmlohna turah ka awm tih ka inhria a, “A ni maw, a va’n pawi ve, hahadam takin a chawl ngei ang tiraw”, tiin kalsan zai ka rel ta a ni.
A hma zan lampang duh aia ka in hnem deuh avangin hemi tuk kher kher hi chu thawh har ka ti hle mai. Ka chuanna tur Sumo lah chuan a tum ram pan turin ‘tuibur hmuam da’ chhung lek bak hun a nei tawh lo. Hmanhmawhtaka ka insiam zawh chuan Sumo Counter chu thlasaphulin ka va thleng thei hram a; a hnuhnung ber ka inpeih takah chuan kan tum ram lam pan chuan kan lir chhuak ta a ni.
Ka kianga passenger pakhat chuan ka inthlahrung ang tih hlauin ka beng bulah zawi sap hian a rawn phun ser ser a, “Thianpa, kan lo nghak rei tawh che asin, passenger dang pawh an thinrim lek lek tawh a; ‘a lo thleng ve tep tawh ang’, tiin ka lo hnem hlawm a”.
A aw ringawt atang pawh chuan han zuam chi a nilo tih a hriat a, a sam ther leng velin ka beng a’n tai zeuh paw’n ka taksa hi mur maktaduai chuangin a mur ni berin ka hria. Ka hawi chhuak a, a hmel ka en a, mitkhapkarah ka mitmeng hian khaw dang hawi zai a rel thei tawh lo. A dik tak chuan he ka hringnun khawvel hi he nu aia sawi danglamtu hi hring ka chan tirh ata ka la tawng lo.
Kan titi a, thu ho tak tak kan sawi a, a karah NLUP chungchang kan zep tel bawk a; a hmang thiam leh thiamlo inkar hlat tur zia chu a sawi nasat ber a ni. Engpawh sawi ila, min chhanglo anih vek pawhin a ‘seih’ chuan ka lawm a ti kim tawk em em bawk.
Kan sawi duh zawng a inangin passenger dang biak nan hun kan neilo dun hle a, khawkar kawnga chaw einaah leh thingpui inna velah pawh kan inzui chawt a ni ber mai.
Karloah kan tum ram chu kan hnaih ta hle a, a thlen nan darkar tlemte bak hun kan nei tawh lo. Hun remchang a ni tih hriain khua kan thlen hunah pawh kan inhmuh zel theih nan address-te ka’n dil a, min pe a, kei paw’n ka pe a. A address ziahna lehkha them chu a bo palh hlauin ka ipte chhungril berah chuan ka ak tha hmak mai a ni.
Ruah tla sep sep chuan kawng a ti nalin driver chuan fimkhur a ngaih thu a sawi chamchi reng a. Ka thiannu thar pawh chuan driver chu tlan muang tur leh fimkhur tura a chah mawlh mawlh lai chuan thawklehkhatah thawm ring tak chuan ka beng a verh hawk a, ka mit hmuh pawh chu a thim zui ta nghal bawk.
Ka mit ka men leh hmasakna ber chuan min va’n tihrilhhai tak em, ka bulah chuan nurse pathum leh doctor pakhat hian min lo hual a, ka marphu chu uluk tak hian an lo ngaichang reng chu niin. Chutia ka harh leh chu an lawm em em a, damlo dang buaipui tur chuan min kalsan ta a.
Chanchin ka han ngaihchan chuan Sumo khan kawng thlang feet zahnih teh meuh hi min lo lum pui tehreng a nih chu. Passenger zinga panga chu a hmunah ka pawh chhawnloin an lo boral nghal a, chung zingah chuan ka thiannu thar pawh chu a hming langsar ber zingah a lo tel nghe nghe.
Chu thu runthlak em em mai ka han hriat hnu chuan ka nun ram hi a chau hnawk a, mu-leh-mal pawh ka nei theilo. Tih-tur leh tih-loh-tur pawh hre hrangloin ka bing muai muai a, ka hliam a nat em avangin kar hnih chhung chu pawn chhuak loin khumah ka mu nghe nghe a ni.
Tichuan zawi zawiin ka dam chho a, ka rilru hmasa ber chu ka theih veleha ka thiannu thar fam changta thlana kal chu a ni.
Chutia ke-a ka kal theih hnu chuan ka lo tum tawh ang ngeiin thlanah chuan ka va zawng ta a, kan zinkawnga a address min pek ang chuan thlan tharlam ho chu ka chhiar thla zel a. A tawpah chuan ka hmu ta…
‘KAN THEN TAK’
BRENDA L. DANIEL
KUM – 24
THIHNI – 14.8.2011
Ka mittui chu dan rual a nilo, midang hmuh hlauin ka inthup hram hram a. Damkawr tih takah chakna ka nei tlemin ka thinlung kehdarhin min khawihna chu a na vawng vang bawk si. Chutihlai tak chuan ka bula patling tawng ri chuan ka beng a rawn verh zawk a, “Mate, a nu chu a lo haw tawh dawn lo……….”.
Similar Posts:
- ACCIDENT IN SONAPUR
- “Ka pu, tlem back la”
- Aizawl-Lunglei Sumo Accident ah 2 thi
- Ngaihsam
- Mizo in vai kut tuar
March 9th, 2012 at 6:05 pm
Ngaihnawm dawn lutuk. Chhiar ang! misual.com-ah fiction a tlem tawh lutuk a, tun lai.
March 9th, 2012 at 6:13 pm
Tawi kim tha hle mai. Hetiang hi a ngaihnawm ka ti.
March 9th, 2012 at 6:17 pm
A ngaihnawm hle mai. A lungkuai a, rilru a khawih khawp mai. I ziak thiam lutuk. Han sawi belh vak tur pawh ka hre lo.
March 9th, 2012 at 6:23 pm
I van ziak thiam e!! A ngaihnawm lutuk
March 9th, 2012 at 6:24 pm
A tawifel, I ziak thiam khawp mai, khitiang a tawi fel deuh, ngaihnawm bawk si ziakthiam hi ka mi ngaihsan zawng tak an ni ve tlat!
Ka lawm e.
March 9th, 2012 at 6:47 pm
A ngaihnawm e..
March 9th, 2012 at 7:02 pm
I chanchin emaw i sawi tia… Chanchawp maimai alo nimaw… Ngaihnawm khawp mai. adangleh..he2
March 9th, 2012 at 7:02 pm
A dang pawh han ziak zel teh, ngaihnawm hle mai, tawi fel tha khek khawk khawp mai.
March 9th, 2012 at 7:09 pm
Vin ngaihnawm ve
March 9th, 2012 at 7:12 pm
Ngaihnawm ang reng
Para hmasa pali te khi prologue/epilogue ang a a kal anih chuan a thawnthu kal dan adik chiah lo ka ti ve mai mai!
March 9th, 2012 at 7:15 pm
Nikum August thla ah sumo a accident leh dent loh ka’n en phah chu le. min bawl. hehe
A thupui hi, “Minu” ti lovin “Mi nu” tih zawk awm tak…
March 9th, 2012 at 7:20 pm
Ekhai…. a va ngaihnawmin ngaihtuah a va tithui ve le.
March 9th, 2012 at 7:24 pm
Ngaihnawm khawp mai…mahse zawhna hi in pek chi a mi?? A zawha inzawh chi ni zawk lo maw??
March 9th, 2012 at 7:32 pm
a van han tha kher ve le e.a ziaktu hian talent chu a nei chiang a ni…..
March 9th, 2012 at 7:45 pm
Zin chhuah chang te hian, accident in lo thi ta mai ila, tih hi rilru a a rawn luh det chang a awm. Fate hrilhhai hmel mitthlaah a rawn lang uai uai thin. Rilru(emotion eh?) a khawih che e.
March 9th, 2012 at 8:01 pm
huiham
March 9th, 2012 at 8:08 pm
A thupui hi Minu ni lovin, Mi Nu (Mi nupui) tih awm tak nii a lang a, Mizovin zawhna kan pe ngai meuh em ? ” Ka zawt..” tih ni ta se. “I farnu mi ?” tih hi, ” I farnu em ni ?” tih ni leh ta se, hahadam hi chu tihsual palh, ‘hahdam’ tihna. “Hmanhmawhtaka” tih hi hmanhmawh leh taka hi inzawm lo se, “Thlasaphul” hi “Thlansa phul kaia” tih te ni se….ka lo ti ve mai mai
March 9th, 2012 at 8:20 pm
Accident khan shock kha la harhchhuak tha lutuk lo anih hi.. Bakah mi lusun lailai a..dikthlap te chu phut chinang…haha..
March 9th, 2012 at 8:25 pm
March 9th, 2012 at 8:26 pm
NLUP buaipui leh sawi tur hre ṭeuh atan chuan i ṭhiannu chu ala naupang hret a nih khi
a kum ziah cute i tum mah mah ni… tihloh ah chuan a ṭha thawkhat e 
March 9th, 2012 at 8:30 pm
#17 Hetiang mi phunchiar hi ka like…….
March 9th, 2012 at 8:33 pm
@17 ultra like
March 9th, 2012 at 8:42 pm
para hmasa ho..4na thleng khian italic ni se a nalh dawn asin mawle…ka va ui
March 9th, 2012 at 8:47 pm
Last sentence khian i talent tha lutuk a pho chhuak chiang hle mai. A hun a dik a, lungngaihna scene-ah tak hnuk tiulh dang i rawn dah leh hi tihpalh mai chu a ni lo. Hetianga short story ngaihnawm, fun kim leh lungkuaia i ziak thei a nih chuan literature khawvelah hian i mikhual lo tawp mai.
March 9th, 2012 at 8:49 pm
Comment #17 khian a chhiar uluk bik hle tihna. A post tu tan a lawmawm khawp ang.
March 9th, 2012 at 8:56 pm
va ngaihnawm reuh e
March 9th, 2012 at 9:04 pm
Misual.com i rawn ti zangkhai ta deuh in ka hria. Tunlai chu a heavy ru riauin ka’n hre ngawt a, midang an ni em chu ka hre lem lo.
Ngaihnawm ka ti, ngaihtuah tur i ti tam bawk e.
March 9th, 2012 at 9:42 pm
“Minu mawng ka lo hmangaih” tih a ka chhiar palh chu..!! Ka chhiar sual nasa hle mai…!!
March 9th, 2012 at 10:05 pm
Ngaihnawm reuh hle mai. Tawi te si a kim thlap lawi a. Ngaihnawm tak tak.
March 9th, 2012 at 10:22 pm
Ka lawm e..advice min petute chungah hlei hlei…’to err human is human’ an ti, a dik…ka tihsual chu a awm mahse ka hriatlonate khi erawh inchhiar zau ka mamawh a ni tih min hriat rengtirtu lo chang mawlh rawh se… Jai Hind..
March 9th, 2012 at 10:26 pm
A ngaihnawm khawp mai a, “mate, a nu chu a lo haw tawh dawn lo” nangmah aiin khi mite pafa khi ka khawngaih lutuk-i central idea zawk a ni ang tiraw? Mahni inchan hian a na hma khawp mai.
i prologue hi lrp-a sawi ang hian a attractive viau nachungin a, story bul emaw ka ti hman tep a, i Sheldon chet tlat.
March 9th, 2012 at 10:42 pm
‘to err human is human’ may be read as ‘to err is human’…tisual leh ta…
March 9th, 2012 at 10:58 pm
ngaihnawm khawp mai
a tawi e . a kham awm loh . . i khung kim hle bawk sia . 
March 9th, 2012 at 11:04 pm
March 9th, 2012 at 11:06 pm
Ozima(comment number 21na): I sual em mai aw.
Comment number 17na mi khi i hriatchian a nih avangin i thur kher a ni maw. Ka hrilh dawn. Nakinah i len hunah i ngawi reng mai ang.. 
Vawiinah hian thu lawmawm tak an hria a, a lo uang ve mai mai a nih hi. Comment number 24na leh 25na mite phei hi chu an lawm viau ang. Naupang harsatna han solve theih tluka nuam leh hlu an tan a awm theih lo vang!
Ka OT ta deuh.
VanlalOzima vang a ni… 
Hetiang thuziak hi chhiar nuam ka ti vak lem lo. Hei erawh ka chhiar ve thuak thuak..
March 9th, 2012 at 11:20 pm
Thiem thu sawi thei kan ta nawh!
A ngaihnawm reuh phian e.
March 9th, 2012 at 11:22 pm
Post tha tak ani..!1 A ngaihnawm in rilru a khawih hle mai…!!
March 10th, 2012 at 2:12 am
A ngaihnawm lungkuai hle mai.
March 10th, 2012 at 2:52 am
Tha teu teu. Thiam fii nii.
March 10th, 2012 at 3:09 am
Mi nu nen sumo ah in lo ck a ni maw? A reng reng thu ah khi nu khian mi nu a ni tih a hrilh miah na che nge? ai zas dai
March 10th, 2012 at 11:07 am
A ngaihnawm hlee mai
March 10th, 2012 at 10:46 pm
Minu a nihna i thailan dan chu a va nalh tawk reuh tiu teu ve.
March 10th, 2012 at 11:24 pm
Minu tak2 (hmeichhia nilovin) a nih duh hmel riau mai……..
. Thu ziah a ngaihnawm hle mai.
March 11th, 2012 at 1:40 am
“Hmangaih” ni lovin “ngaihzawn” tih a dik zawk ka ring.
January 9th, 2014 at 3:20 am
Ziak tha hle mai. Chhiar a nuam dap dap e
January 9th, 2014 at 1:11 pm
44.
Kan inngaizawng reng reng lo; ka lo hmangaih hman zawk a lawm.
45.
Ka lawm e.
March 9th, 2017 at 5:44 pm
He fiction hi 2007 vel khan khawiah emaw ka chhiar a, a ziaktu pawh ka hre tawh lo. Mahse a cppy hmuhleh mai tur a awm tawh si lova, tin ka chhiarna magazine kha a lar lo nge, a thawnthu ka la hre chiang sia midang hriat atan ka duh bawk sia, ka hriat ang chhun chhun ka lo ziak leh tawp mai. A ziaktu diktak phalna pawh ka la lem lo nachungin a lo hmu anih paw’n a thinrim em lo turah ka ngai ve tawp.