mi(sual).com

1st. Thursday: March 4 (Pathianni) zan thleng awh tur KTP General Conference vawi 54-na chu Lothazawl, Thenzawl-ah tan a ni ta a. A ṭan zan hian Pandal-ah palai lawm inkhawm neih a ni a, Central KTP Leader Rev K Lalpiangthara’n inkhawm a kaihruai a ni. KTP General Conference vawi 54-naah hian thupuiah ‘Isua Krista – Khawvel mamawh chhanna’ tih hman a ni a, speaker atan Rev. C. Lalsangliana an hmang ang.

2nd. Friday: Chapchar Kut ni a ni a; Mizoram district hrang hrangah ropui thei ang bera hman a ni. A hmanna pui ber Aizawl-ah chuan Lammual-ah zing dar 11.30 atang khan nileng awhin ropui taka lawm a ni a; Pu P.C. Zoramsangliana, Art&Culture Minister chu Kut Thlengtu a ni. Chief Minister Pu Lal Thanhawla chu Kut Pa a ni a; Mizoram Larsap Pu Vakkom Purushothaman chu khuallian niin, Pu Som Kamei, NEZCC Director chu khual-zahawm a ni. He hunah hian Chapchar Kut leh Miss Chapchar Kut thlan an ni a. Mister Chapchar Kut-2012 chu Tv. Saihmingthanga Sailo, Bungkawn Branch YMA a ni a, Miss Chapchar Kut chu Nl.Lalbiakzuali, Republic Vengthlang Branch YMA a ni. Pawisa Rs. 10,000/- (singkhat) leh certificate hlan an ni.

3rd. Saturday: Kawng hrang hranga mau tangkaina inhrilhhriatna atan leh humhalh kawnga mipuite thanharh zelna atana buatsaih Mizoram Bamboo Day hmasaber chu Aijal Club-ah hman a ni a; CM Pu Lal Thanhawla’n a hmanpui. Mizoramah hian mau kan neih thatzia te, mau hi hausakpui tham kan rohlu a nih ziate, mahse, tun thleng hian Mizorama kan maute hi kan la hmang tangkai tawk loh si ziate hahipin kan sawi ṭhin. He hun hian rah ṭha a chhuah ngei kan beisei tur a ni. Bamboo Day hi kumtin Chapchar Kut ṭiah tukah hman ṭhin tura ruahman a ni. Hetih lai hian World Bamboo Day chu 18th. September (ka birthday) a ni tih lo hre tel mai mai ta ila.

4th. Sunday: Bawngkawn police station staff-te chuan Selesih-ah Mc Dowells Rum um 398 leh a neitu Zoremsangpuii, Chhimluang khua nia insawi leh Zodinsang a, Keifang khua nia insawi te an man.

5th. Monday: March 5, 1966-ah India sipaite’n jet fighter hmanga Mizoram an bomb champha, ‘Zoram Ni’ tia vuah chu Zoram Ni Organising com¬mittee huaihawtin hman leh a ni a, Millennium Centre atanga Vanapa Hall thleng kawng zawh a ni.

6th. Tuesday: MPSC chuan Planning, Economics & Statistics Service Junior Grade tur lâkna result a ti chhuak a; Mary Lalrinchhungi d/o RC Thanga, Zotlang,Aizawl leh Isak Lalmuanpuia Chuaungo s/o C Lalsawta, Upper Republic-te an tling.

7th. Wednesday: Lawngtlai atanga Chawngte panna kawng a Mampui khaw dáiah 407 truck, MZ-07 1302 chesualin, kawng thlangah a lum a, motor neitu, Lalrinzuala Sathing (43) s/o. Zathanga, Mampui chu a hmunah a thi. Thu dawn danin,motor hi Lalrinzuala hian a khalh a, kawngpuia a inherna lamah kawng thlangah a tla ani. Motor thlakna hi a awih viau a, ft. 250 vela lum a, a chhe hneh hle ani. Motor-ah hian chuangve dang an awm lo.

8th. Thursday: Planning Board Member Secretary, PLThanga chuan Hlakungpuimuala Orchid Sanctuarya tlawh a, naubán zinga Mizoin hming koh dan bik kan la neih loh naubánte hming phuah tharna hun an hmang. Naubán hming phuahna inkhawmtawitê hmanah Khawbung Forest RO, Lalṭhazuala’n nauban hming phuah tur chanchin a sawi a; PLThanga chuan, nauban chikhat (Sub-family -Epidendroideae, Tribe- Arethuseae, Sub-tribe- Coelogyninae) chu ‘Zomawi’ tiin a hming a phuah a ni.Orchid Sanctuary-ah hian nauban chi hrang34 seng luh tawh a niin nauban bul 2,000 aiatam khawi tawh a ni.

9th. Friday: Serchhip khawpuia lirthei neitu intelkhawmte chuan Serpchhip khawpui chhung kawng chhe lutuk avanga lungawi lohna lantir nan zing dar 8:30 aṭangin No Vehicle Day an hmang a, sorkar motor tih loh, lirthei veivâk hmuh tur a awm lo. He nawrhna hi tlai dar thumah tih tawp a ni.

10th. Saturday: West Phaileng Jt. YMA leh West Phaileng bial KṬP ṭangkawpte chuan Aizawl Civil Hospital-ah thisen unit 64 an pe a, a petute hi mipa 56 leh hmeichhia 8 an ni.

11th. Sunday: Mizoram kohhran chhunga a hmasa ber atan Mizoram Baptist Kohhran (Baptist Church of Mizoram) rorelna sang ber ‘Assembly’ chuan Dr R.L. Hnuni, (w/o Rev. Dr. K.Thanzauva) Principal, Academy of Integrated Christian Studies (AICS) chu Rev. Dr. Raltawnga Chhakchhuak, President, Baptist Church of Mizoram chuan Minister atan a nemnghet ta.

12th. Monday: Pu Lalhmingthanga Chhiahtlang Chhimveng a khawsa (47) puitu beiseia a au chu ṭhenawmten an hria a; an va kal nak chuan biak theihin a lo awm tawh lo. Pu Lalhmingthanga hi amaha khawsa a ni a, a hnute ding lamah chemtea vihna hnuhma hmuh a ni. Serchhip damdawi inah lak phei nghal a ni na a, a hliam tuar lovin a boral. Hemi thil thleng chungchangah hian Serchhip Police Station ah FIR thehluh a ni.

13th. Tuesday: Kolasib Venglaia VL Rawna in, Lalchhuanmawia te luah lai, Assam type chu bungrua chuh hman awm loin a kâng ral. Kângmei a chhuah tan lai hian inah tumah an awm lo a, fire department lamin thelh tumin bei mah se, an thelh mit thei lo a ni.

14th. Wednesday: Mizoram khawthlang lama khaw pakhatah (hming thup) tlangval pakhatin ar thisen a dawt lai hmuh a ni. He tlangval hi Aizawl lam mi niin he khuaah hian hnathawkin nikum lam aṭanga awm a nia; ze danglam tak a neih avangin ṭhenawm khawvengte nen pawh an intlawh vak ngailo. Hemi zan hian he khua-a hmeithai pakhat chu a fa mipa naupang kum 8 mi leh kum 5 mi te nen an mu tawh a, thawklehkhatah an bathlara an broiler ar te chu chiaiin an ri ta sup sup mai a, chutianga thawm a awm takah chuan an ar te chu zawhte emaw sazu ten emaw an tibuai a nih ringin nu ber chu a zuangtho nghal a, an kawngkharpui hnaih lam bang feet 4 vel chu dap bang pan angreng tak a ni a, bangawng lian angreng tak a awm bawk a, pawmlam bathlar light an tih en avangin bangawng atang chuan an arbawm leh pawnlam chu a langchiang hle. Kawngkapui hawng ta mai lo chuan bangawng atanga pawnlam a han bih chuan an inchung tlangval kum 26 vel mi chu Ar in bulah chuan a lo ding reng maia ar pakhat hi a lo man bet a, chutia a en lai chuan ar lu chu awlsam fahran hian a thuai bunga ar nghawng lubung chu a fawp ta ngawr ngawr mai a ni. Chu hmeithai chu a thil hmuh chuan a rap em em mai a, hlau hle mahse insum hman lovin a te tuar a, ar thisen dawt mektu tlangval pawh chuan a thil tih lai chu chawlin bangawng lam chu a rawn en zawk a, a mengsen rum a. A thil tih lai chu a tih chhunzawm leh hmiah hmiah mai a ni. Hmeithai nu te thawmah chuan ar thisen dawt mek tlangval hringtu nu, inchung lama awm chuan thawm rawn neihin “enge ni ta” tiin arawn au va, ar thisen dawt tu tlangval leh a nu hi hmeithai te inchung room pakhatah an nufa chauhin an cheng a inchung chhuat hi thingphel a nih avangin thawm a inhriat theih hle a ni. Ar neitunu chuan hlau thlabar tak chungin inchung nu chu rang taka rawn chhuk vat turin a au a, a ni lah chuan a fapa chu pan nghal mai bik talo chuan thenawm ho chu a pun kual ve leh phawt a, chutih chhung chuan ar pakhat chu la chhuak lehin awlsam te bawkin a lu chu a thuaibunga a thisen chu a dawt leh ta ngawr ngawr mai a ni. Inchung nu pawh a rawn kal hnai hle tawh a,”Bawiha..bawiha..engthil nge i tih tak le..ava mak em bawiha” arawn tih thawm chu inhnuai hmeithai chuan a hria a, chu tlangval chuan a bula chartin phel bung chu la in a ma nu ngei chu a vaw ri ta chawrh chawrh mai a ni. Inchung nu chuan “bawiha bawiha i nu ka ni e..a na lutuk..a na lutuk minchhan rawh uuuuu”..a ri chawrh chawrh zel tho a, a chang chuan a hnuk ri hrawih hrawih bawk. Hemi hnu lawk hian thenawm pa pathum an rawn lang ta. Chu tlangval chuan a nu chu a awmah thut betin a lo rek bet tlat a. Thenawm pa pathum te chuan chu tlangval chu a nu lak atang chuan pawhthen an tum a, a chak zia chu mak tak a ni. Patling pathum chuan chu tlangval chu bawhbetin an man bet thei ta hram a ni. He tlangval chet dan hi a mak in a rapthlak hle mai a, mitam tak chuan ramhuai thiltih a nih an rin laiin Medical lam thiam te erawh chuan rilrulam natna/mental desease chikhat a ni a, an hlauhawm em em a, an thil tih hi an hre ngai lo a, khawngaihthlak letling tak an ni a, enkawl theih an ni a, an dam mawh hle thung niin an sawi ve thung.

15th. Thursday: Champhai Zotlanga cheng Lalengmawia (17) S/o Roremliana, chuan Champhai Zotlang hmeichhe naupang kum 8 mi a lo mutpui thin tih hriatchhuah a nih avangin mipui thinrim in Lalengmawia te chenna in an thiat a, an mahni chhungkua hi an insaseng hman. Thudawn danin Lalengmawia hian he hmeichhe naupang hi nikum Christmas hma khan hmeichhe naupang te ekin chhungah a lo khawih tawh a, chumi hnu chuan khawih lo vang vangin kumin January leh February thla vel khan midang awmloh laiin hmeichhe naupang te inchhung leh hmun remchang dangah te a lo khawih fo mai tih hriatchhuah a ni. In thenawm hnai an ni a, Lalngmawia hi hmeichhe naupang te inah hian a lenglut fo a, an in nel em em a, khatia an inkuaha an han inbawh vel khan a chakna sosangin a khawih leh mai thin niin Lalengmawia hian a sawi niin thu dawnna chuan a sawi. March ni 12 Thawhtanni khan victim hmeichhe naupang leh a nau te chuan Lalengmawia hi paper an dil a, pawngsual tawk hmeichhe naupang leh a nau hmeichhe naupang ve tho kum 6 mi leh an thenawm mipanaupang kum 6 mi te nen chuan Lalengmawia chuan an piah lawka DIET office thlen hma thlam chhungah a luhpui a, hetah hian a khawih thin hmeichhia hi a khawih leh ta a ni. A khawih zawhah chuan naupang pahnih dang te chu an tih anga ti ve turin a ti a, Lalengmawian a hrilh ang chuan an ni pawh chuan an ti ve ta a ni. A tukah mipa naupang hian a serh na atih avangin a chhung te a hrilha thil awmdan an han zawh chuan he thil hi an hrechhuak ta vek a ni.

16th. Friday: Computerised Embroidery Institute of Technology buatsaih, Fashion Fusion 2012 chu Zarkawt Recreation Centre-ah neih a ni a, Mizo model ṭha ber berte’n zirlai 15-te kutchhuak thawmhnaw chi hrang hrang an pholang. Fashion Fusion hian hlut a hlawh hle . He hunah hian lawmman sem nghal a ni. Lawmman dawngtute chu: Best Garment Construction -Lalremtluangi, Most Creative – Helen Zonunpari, Best Craft Endorsement – Lalremruati, Best Collection – C Lalremruati, Queen – Dane Vanlalthari te an ni.

17th. Saturday: Aizawl Bishop, Most Rev. Stephen Rotluang a chuan Khawruhlian dáia Catholic kohhran enkawl, Kalvari Tlang (Tawngtai Tlang) an tih chu a hawng.

18th. Sunday: Chhimtuipui District UPC Conference Hqrs. Biak In, Saihaa tunkar Ningania ṭan tak chu hlim taka hman a nih hnuin a ṭiak ta General Treasurer Rev. Lalmalsawma Sailo chuan Conference hi hmanpuiin hruaitu inthlan a neih pui a, District Board a telpui nghal bawk.Kum 2012-13 chhunga hruaitu turin heng mite thlan an ni:
District Superintendentt. : Rev. C. Sihmo
Disttirct Secretary : Rev. HC Mangliana
Distruct Treasurer : Rev. WL Thanghre
District Board chuan kum 2012-13 chhunga Department hruaitu thar ruat nghalin pastor atan Evan Robbin MH Thanmawia chu a la thar bawk. Chhimtuipui District hian hma an sawn nasa hle a, sum leh pai mai bakah member lamah an thang chak a, tunah hian member 10000 (singkhat) an pel tawh nghe nghe a ni.

19th. Monday: Pitarte Tlang, Republic Vengthlanga Hawla Indoor Stadium chu Home Minister, R Lalzirliana’n a hawng. Hawla Indoor Stadium hi NLCPR sum hmangin kum 2008 khan M/s Suvidha Infrastructure, Guwahati ten an sa ṭan a, tender chhanna pawisa zat vbc. 9.18 a ni. Stadium hi chhawng li, sq.metre 432.065-a zau a ni a, table tennis hall, martial arts room, gymnasium, basketball leh badminton court-te a awm.

20th. Tuesday: North East Games 2012 chu Chief Minister Lal Thanhawla’n Rajiv Gandhi Stadium, Mualpui-ah flag pawt pharhin a hawng. Games hawnna inkhawmah hian Assam Minister for Sports & Youth Welfare, Ajit Singh pawh rawn telin thu pawh a sawi ve nghe nghe. NE Games 2012-ah hian hmarchhak state-te an rawn tel kim theia; tihian infiammi 1,006 leh official 180 an awm ta a ni.

21st. Wednesday: Lunglei SP hnuai a District Special Branch-te chuan Zoramsiami d/o. Budea, Thenzawl inti hnen aṭangin parvon spas mum 40,000 an man.

22nd. Thursday: World Water Day a ni a, he ni pual hian PHE department buatsaihin Vanapa Hall-ah ‘Siktuithiang Kût’ hman a ni a, State Planning Board Vice Chairman, Lalkhama’n a hmanpui. He huna thupui chu – ‘The world is thirsty, we are hungry’ tih a ni.

23rd. Friday: Zirtiri Residential Science College-a NSS Unit leh Career & Placement Cell chuan an College Hall-ah an zirlaite tan career guidance chungchangah awareness campaign an buatsaih a, SBI AGM hlui, Lalṭhuama’n ‘Entry into Banking Services’ tih thupui leh NEDFi lam mi, Lalthianghlimi’n ‘Entrepreneurship Development’ tih thupuite an sawi.

24th. Saturday: World TB Day a ni a, Aizawlah chuan I&PR Auditorium-ah Health Minister, Lalrinliana Sailo hoa hman a ni. He hunah hian kum 2011 chhung khan TB nia rinhlelh mi 2,300 inentir zinga mi 1,253 chu TB vei an ni tih hmuhchhuah niin, a vei zinga 86% tihdam an nih thu tarlan a ni.

25th. Sunday: Bairabi hmar venga unau hmeichhe naupang pahnih – Lalruatfeli (9) leh Hmangaihkimi (6), d/o Lalhlimpuia te chu Bairabi bul Tlawng luiah an tla hlum. Anni hi chhungkuaa kal anniin anni unau hnih hi tuiah hian chengin piah deuhah an va inbuala; an lo let leh lam chu an chesual ta a ni.

26th. Monday: Kolasib DC, Niharika Rai hoin a office-ah Tuikuk raltlante Kolasib district-a lak lêt dan tur chungchang an sawiho. Ruahmanna an siam dan chuan Kolasib district-ah hian Tuikuk raltlan chhungkaw 628 dah tura ruahman a ni. Tuikuk raltlante hi May/June velah Kolasib district-a dah ṭan tura ngaih a ni a; meeting chuan\ inpuahchah dan turte an sawiho a ni. Ruahmanna felfai tak siam a nih theih nan, department tinte chu lo inbuatsaih lâwk a, an inbuatsaih dante March 28-a DC-a thehlut turin an ti bawk. Kolasib district-a Tuikuk raltlante dah zat tur an ruahman dan chuan, Bairabi Awrpuara Vengah chhungkaw 50, South Chhimluangah chhungkaw 150, N. Thinglianah 157, Rastali-ah 80, Dilzau-ah 55, Pangbalkawnah 45, Meidumah 46 leh Bukvannei-ah 45 dah
tur a ni a; an vain chhungkaw 628 an ni.

27th. Tuesday: Ni thum chhung awh tur Mizoram Secondary School Games 2012 chu Ramhlun Sports Complex-ah ṭan a ni a, School Education Director, Lalhmingthanga’n a hawng. Kumina Secondary School Games hi a ṭum 30-na a ni a, infiamna chi hrang pakuaah zirlaite an inel dawn a, district tina sikul 176 aṭangin zirlai 822 an tel dawn a ni

28th. Wednesday: Mizoram Assembly budget session, March 20-a ṭan chu zawh a ni a, chawhnu 12:45-ah Speaker, R Romawia’n tiam chin awm loin a titawp. Tun ṭum session-ah hian April-July, 2012 chhunga Mizoram sorkar hman tur sum pass a ni a, starred question lut 220 zinga 33 House-ah chhan hman niin, unstarred question 152 chhan a nih bakah, bill pahnih pass a ni bawk. Tun ṭum budget session-ah hian sorkar kum kal meka sum indaih lohna phuhrûkna tur, Supplementary Demand for Grants Rs. 7,83,33,00,000/- leh sorkar kum thar, April aṭanga thla li chhunga sum hman tur Finance Minister-in a put luh, vote on account Rs. 16,63,11,66,000/- chu pawm a nih bawk bakah bill pahnih – ‘The Mizoram (Preven tion of Government Land Encroachment) (Amendment) Bill, 2012’ leh ‘The Mizoram Municipality (Declaration of Assets and Furnishing of other Informations) Bill, 2012’ te sawiho an nih hnuah pass anniin; sorkar laipuia dan ding lai, ‘The Employment of Manual Scavengers and Construction of dry latrine (Prohibition) Act, 1993’ Mizorama hman vena tur resolution pawh pass a ni bawk.

29th. Thursday: Police department hnuaia Crime & Criminal Tracking Network & System (CCTNS) project hna thawk turin Mizoram sorkar leh Rolta India Ltd, Kolkata te chuan thuthlung an ziak. Inremna thuthlungah hian Mizoram sorkar aiawhin Home Secretary, K Riachho-a’n hming a ziak a, Rolta India aiawhin Sr. Divisional Director, MK Govinda’n hming a ziak bawk. CCTNS hi Mizoram police department computer hmanga thlun zawmna tur niin, sorkar laipuiin sum a tum vek dawn a ni. Rolta India hian cheng nuai 704/- in a bun hna a thawk dawn a, Mizorama
police station tin, SDPO office, SP office leh Police headquarters-te chu computer network hmanga thlunzawm vek
tum a ni. Rolta India hian installation an tih dawn bakah, a thlawnin kum thum chhung an enkawl zui dawn a ni.

30th. Friday: Lunglei Art & Culture Auditorium ah Zohnahthlak Inpumkhatna Seminar Lunglei Academy of letters, Lawngtlai Academy of letters leh Chhimtuipui Academy of letters te tangkawp buatsaih chu neih a ni a; Pu P.C Zoram Sangliana, Art & Culture Minister in a hmanpui. Inkhawm hi Pu C.Hrangdula, President, MAL in kaihruaiin, zirchianna thu ziak “Zo hnahthlak inpumkhatna-Pipute infiamna atangin” tih Pu K.Hrekunga, President, LAL leh “Zo hnahthlak inpumkhatna – Pipute thawnthu atangin” tih Dr. Chawngkhuma Chawngthu, President, CAL ziak atang te in hnam inpumkhatna atana tangkai thu ngaihnawm tak tak ngaihthlak a ni bawk.

31st. Saturday: 9th World Junior Taekwondo Championship,Sherma El Sheikh, Egypt, 4th – 8th April 2012 chhunga khelh turah India aiawh turin Johny Vanlalruatsanga Under 63 kg category, Thinghlun khua, tuna SAI hostel-a awm mek chuan New Delhi a chhuahsan. A rual hian RK Bungaraj(Kerela) under 59kg-ah, Depika Sehrawat(Delhi) under 42kg-ah leh Shreya Singh(UP) under 68kg-te an kal bawk a ni. Johny hian nikum 2011 khan National Junior Taekwondo Championship Jharkhan-a neihah khan Gold medal a la a, National/Regional Championship-ah gold 2 leh silver 1 la tawhin, nikum khan National Camp-ah awmin Olympic qualifying te pawh a khelin a vanduai ta hlauh a, Olympic a thleng pha ta lo a ni. Tun tumah hian Taekwondo Federation of India(TFI) medal la thei ngei tura a beisei zinga mi a ni a. Tun tuma a khelh danah TFI lam an lungawi chuan Korea lamah Training turin an thawn anga. Chumi hnuah Asian Junior Taekwondo Championship 2012, Vietnam, May thlaa neih turah a kal leh nghal ang. A ni hi Mizoram a pet sangber record (9 feet a sang) break tu a ni nghe nghe.

Similar Posts:

• Tuichangralin district an duh ve
• Karimganj District khaw 56-in Mizoram chhunga rinluh an dil
• 2013-ah Sorkar tha
• ADC pathumin President hnenah MP seat 1 dil tum
• Hnahthial-ah MAP 400 chuang an lut

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Saturday, March 31st, 2012 at 9:30 pm and is filed under Mizoram. You can follow any responses to this entry through the RSS 2.0 feed. You can leave a response, or trackback from your own site.