mi(sual).com

Ka fa duhtak,

A hmasa berin ka biak Pathian hmingin i ngaihdamna sang ber ka dil a i lenna van hmun nuam leh mawi atang khan i Nu leh Pa tlaktlailo tak hi ngaihdam minlo dilsak thin dawn nia.

Thiante leh U leh nau ten an hraileng chawia hlimten laichhuat an chhir a, chhungkua a hlim taka an awm ka hmuh hian ka rual awh a zualin i pa sangtean a fapa nausen duat taka a pua a, a awi dur dur thin hmel ka hmuh te hian ka thinlai ati nain ka hnuk ati ulha, nang ngaih ati zual thin a. I Pu Mama fanu Remi pawh khan school a kal thei tawhin A,B,C a thiam tawh a, Ba Ba black sheep te a sa thiam tawh asin. He khawvelah hian cheng ve nila kum lamah in inrual tlang dawn nen nang pawhin i thiam ve tawh awm si a tiin i Nu nen khumlaizawlah vawi tam kan tap a, hunkal tawh a siamthat theih tawh siloh. Mate, he ni alo thlen hian kan rilruah i cham reng tih minlo hriatsak leh la, i lenna hmun mawi leh nuam atang chuan min rawn thlir reng thin dawn nia. Keini i Nu leh Pa zawngin i hmel hmu leh mah ila, kan hre tawh kher awm silo chein eng ang hmel leh pianzia nge i put ang tih pawh kan mitthla thiam dawn silo.

Fa hmasa ber hi chuan an Pa te an chhun duh an tih angin i pianphung leh mizia ah rawn thanglian zel ta la, min chhun dawn nge i Nu lamah i kal dawn tih hi ka ngaihtuah fo thin. Duhthlan theih chu nise sakhmelah zawng i Nu lamah kal mawlh teh, I pa min chhun zawngin i tum a tawi tarhin i mawng bawr a lian anga, san lamah pawh mi vantlang awrh, tawi lampang ini dawn si. I Nu lam i chhun erawh zawngin i vun a hang lo ang, i khan asangin hmel leh nungchangah zawng rualpuite i khum dawn tih ka hai silo, ka mitah chuan. Naupang harhvang tak nge i nih ang naupang ngawichawi leh thuawi tak, i Pa ang i nih erawh zawngin naupang ninhlei tak i ni dawn si. Infiam lam i tui ang nge i Nu naupan lai angin pawn chhuak lem lovin comics leh thawnthubu te i thian anni dawn. I Pa angin ran i ngaina in cricket i atchilh dawn nge i Nu angin thuziah leh lemziah i tuiin i hunawl hnawhkhah nan i hmang thin dawn.

I Pi leh Pu mawlh hi ka ngaihtuahin i awmlo hi hreawm ka ti thin asin, awmla chu an nun ti hlimtu leh ti zangkhaitu ini dawn tih ka hai silo. Tunah zawng i Nu nen nitin hna avanhgin kan chhuah angai a, i Patea leh i Ni phaiah lehkhazirin an awmbo bawk si, khawhar taka nitin in nghak thintu i Pi mawlh hi i tihlimin a khawharna i hnawhkhah sak thin dawn si. I Pu lah hian tar mah nise nitin thenawm khawvengah a lensan a, bakah biakinah hlawhfaho vengin Kohhran hruaitu aiawhin a chhuak nitin a, in a khawhar taka awm chu i Pi bawk ani thin. Ka mitthla erawh zawngin mamte, nitin school uniform nen bal takin i rawn haw nitin a, kan office ah i thiante nen in school bang in rawn kalin canteen ah in ei teuh thin asin, a tak mah ni suh se suangtuahna ramah zawng nitin i school kal ka hruai a lehkha te kan inzirtir fo thin si.

Mamte, min ngaidam mawlh rawh aw. I Pi leh Pu tena thutha tinreng a an enkawl seilen kan ni chung hian i Nu leh Pa te hi bawhchhe thei mihring kan nihzia a lang ani e. Khatia, he khawvel rawn hmachhawn tura siam i nih khan zirlai mai kan la niin kan dawn an la tawi a,kan kum ala naupangin Chun leh Zua nih kan la ngamlo ani e. Mamboih, kan zahpui che vang anilo ania aw, kan kum ala naupang a, kohhranah kan inhmangin i Pi leh Pute lah Kohhran hruaitu aniin mualpho a kan chhungkua kan awm kha kan ngai ngamlo ani. Mahse tha a kan hriat kha alo thalo ani e, I Pu te phei chuan hria se tunthleng hian min ngaihdam theih ka ringlo. I nu nena kan tana tha tur leh kan hlimna tur emaw kan tih kha a lem mai a lo niin, lungchhira min rumtir banglo tu alo ni zawk anih hi.

Engvanga i nunna la nge kan nih tih min zawt la, chhuanlam tha tak tak ka sawi thei anga i mitah erawh zawng i zawhna ka chhan rualin ka en ngam ngai hauhlo ang che. I Nu khan lo paitlang ta che sela , mualphona emaw kan tihkha i Nu nen kan inhmangaihna lanchhuah tirtu ini dawnin kan inkar hmangaihna tizualtu ah i tang dawn zawk tih kan lo hai ani e. Zirlai kan la ni si tih chhuanlam tha a kan lo hmang pawh kha a dik mawlhlo. Kan rin Pathian hian kan nghei a phal dawn lo, kan bawhchhiatna ahte pawh min ngaidam thin a, kan sualna avangin tuar thin mahila min phatsan dawn si lo. Bawhchhiatna avangin lo piang ni mah la nunna petu che chu keini ni lo in Pathian ani tih kan lo hmuh hmaih ani e, a hrim hrim thuah mihringte hi bawhchhiatna avanga kan tun dinhmun a awm hi kan ni lawm ni?

Mamte, an rila rah ngei an nawm nana thattu i Nu leh Pa hi min ngaidam mawlh rawh aw.. I nunna kan suatni alo thlen hian i nu leh pa te hi kan inchhir a, hmu lo che mahila nang kan ngaih a zual ani. Hei i nu nen kan nun a nguiin chaw pawh kan ei peih lova, i pi in a chhan min zawt a, sawi chi ani silo. Mamte, kan va ngai che em, kan lo tisual a ni e.

Nangmah hmangaihtu,
I Pa

Similar Posts:

• Mi beidawng
• Hmangaihtu ngawi chawi
• Hla min thlansak ve asin….
• Lâwm hle rawh!
• Ka Hmangral Leh Thin

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Friday, April 13th, 2012 at 10:51 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.