mi(sual).com

Source: Pu Vana at Facebook.

He album ah hian thlalak a awm.

15th April : Tukin zing dar 1:20 vel khan Bawngkawn Market bula Assam type building pahnih dawr 6 awmna leh a bula concrete building hnuai dawr pahnih te chu bungraw chuh hman lohin a kang ral vek.

Bawngkawn Market buiding thlenthlak hma deuh Market pan thlakna step an-a awm Assam type building Pu Zoliana (Shillong lama awm) ta leh a kawmthlang chiaha Assam type sethlam-a sak, Pu Rozuala Rokhum ta te chu an kang ral vek a, heng Assam type thenawm chiaha awm Upa Lalrintluanga concrete building chhawng hnuai kawng an a, dawr pathum zinga pahnih te chu kangmei hian man kaiin bungrua a kang ral vek bawk.

Kangmei chhuah tan lai zinglam dar 1:20 vel hian Upa Lalrintluanga fapa tlangval Victor-a chu inkhel enin ala menga, Victor-a chuan “Inkhel enin ka lo la menga, thil tek ri chhek chhek thawm ka hria a, a tir chuan ka va dakchhuak lem lova, a hnu deuh ah chuan a rawn tek ri leh a, kan tukverh darthlalang te chu a rawn eng deuh a, meialh awm tel tlata ka hriat avangin ka va dak chhuak a, Assam type buiding thlang zawk liang zawn vel atang chuan a lo alh tan tawh a, electric te pawh chu a la tek chhuai chhuai a, midang te pawh an rawn harh ta a, kan phek buai ta nghal a ni” a ti.

Kangmei chhuah tanna ni a an sawi Pu Rozuala in hi thingpui dawr atana luah a ni a, cheng nuai khatleh singnga chuang hu bungrua kangral turah an ngai.

Pu Rozuala In nena insi reng, vantlang kawng step ana awm Pu Zoliana buiding hnuai chu Pi Lalrengpuii Ramhlun veng lam mi te chuan thingpui dawr atan an luah a, hmanni lawk khan fridge te an lei thar ve a, an ni pawh hian cheng nuai khat leh singnga man hu vel bungrua kangral turah an ngai bawk. Kawng an lam chu chhungkaw 4 in dawr atan an luah a, chung dawr te chu: 1, Lalnunhrili dawr, a ni hi Bawngkawn veng mi a ni a, pheikhawk dawr a ni. Lalnunhrili te hian cheng nuai 7 man hu vel kangral niin an chhut. 2, Lalniliani dawr, an ni hi Bawngkawn south lama cheng an ni a, cosmetics lam zawrhna dawr a ni ve thunga an ni pawh hian nuai 6 atanga nuai 7 man vel kangral niin an chhut. 3, Haukhuma (Chaltlang lam mi) an ni dawr hi readymade thawmhnaw dawr a ni a, cheng nuai 7 man hu vel kangral turah an ngai bawk. 4, Bawngkawn veng mi Laldingliana dawr a awm leh a, an ni pawh hian readymade thawmhnaw an zuara, bungrua an inlakmuk lai tak a nih avangin nuai sawm aia tlemlo chu kangral turah an ngai bawk a ni.

Upa Larintluanga buiding kawng an-a dawr pahnih te chu kangmei hian a mankai thuai a, dawr pakhat zawk neitu Pu F Vanlalauva Bawngkawn veng mi te hian bungrua an la thar nasa hle a, readymade leh pheikhawk an zuar a, a lo berah cheng nuai 45 man chu kangral niin an ngai. Upa Larintluanga buiding hnuai luah tho, Lalhriatpuii te hi Ramhlun veng lam mi an ni a, Readymade dawr a ni. An ni hian kum hnih vel helai hmunah hian dawr an luah ve tawh a, nuai 7 vel kangral turah an ngai bawk.

Kangmei chhuah hun hi zanreh ni tawh mahse Bawngkawn khawtlang an chhuak khawm rang hle a, theihtawp chhuahin kang thelh hna an thawka thenawm hnaia tui awm ang ang te thiarin theihtawp an chhuah takmeuh a ni. Helai in hi a bit em em a, kangmei chhuah lai hian thli a tam lo hlauh niin an sawi. Mipui pungkhawmin theihtawpa kangmei laka chhanchhuahna hna an thawh lai chuan Fire department lam pawh an rawn thleng ta a, an motor thleng hmasa chu tui a tam lo nge a zo thuai a, a dang a rawn thlenbelh zela mipui leh Fire department te zarah a chhehvela in tamtak te chu an him phah niin an sawi.

He kangmei chhuakah hian thi leh hliamna an awm lo.

Similar Posts:

• Republic in kang?
• Aizawlah In Kang
• Pu Thangruma In kang senghawi hnatlang neih a ni
• School Office Kang!
• Dawr luah man

Recent Posts:

• Ka lawm e, Mi(sual)-nu!
• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH

This entry was posted on Sunday, April 15th, 2012 at 11:24 am and is filed under Mizoram, News. You can follow any responses to this entry through the RSS 2.0 feed. You can leave a response, or trackback from your own site.