mi(sual).com

Ka NU nen kan inbia
Kum 2008 May thla Pathian ni vawihnihna a ni a. A ngaitein ka chenna hostel room tifaiin ka insingsa fel vel a. Ka mobile phone a ri ral ral a.

Hello.

E, I van nihlawh tak ve ka NU, tukin zing chu ina awm ve ka chak hle mai. Happy Mother’s Day ka ti a. A lawmzia min hrilh hnuin phone a dah nghal!

A mak lo ve, ka NU hi, zonu tih takah phone-a han tawng tui tam vak tur a hre ngai lova, rin loh deuhin kan inbe tawp daih thin. Chu-a-chhapah a natna tawrh avangin duh angin a tawng tha thei vak lo bawk nen.

Mother’s Day
Thingtlang khawchhuak tih takah Birthday, Mother’s day tih ang reng hian kan chhungkua hi min tibuai ngai lo, ti ila; a pawimawhna kan hriat loh vang pawh a ni mahna. Kan hriat ve chhun Indipenden deis ni(Independence Day)kan hriat kha a ni mai a! Pathian zarah zirna in sang te belin mi ningkhawng kan hre ve tan a. Ka NU hian min ngainat leh min duat thin em avangin ni bik rau rauvah Mother’s Day hian min hneh ta ber a ni.

Inah ka awm si lo. Ka NU tan engemaw tal tih thain ka hre bawk si. Ka u ka va bia a. Naktuk hi Mother’s Day a ni a, ka NU tan engemaw tal kan lei sak ve dawn maw’n le? Chawmhlawm berin thilpek lei tur sawi chhuah hi ka inthlahrung viau na’ngin ka rilruah a cham ve tlat si ka ti a. Ani chuan, e a tha lutuk alawm, a nachang kan lo hre lo va, tin Mother’s Day a nih pawh kan lo hre lo zawk a. Min hrilh hria a, a lawmawm e. Mahse, hei naktuk a ni mai si a, thilpek tha deuh lei pawh a that nen, a remchang ang ang ka lo lei mai ang e a ti a. Tichuan, inrinni tlai ah chu ka NU tan samkhuih a leisak ta.

Samkhuih ber kher!
Ka NU hi zonu, zo hnathawk rim ni mah se, a sam erawh a mawng vaw pha tawka seiin a zuah char char a. Samkhuih hi a hmang tangkaiin a hmang tam hle reng a. A fate’n Mother’s Day puala, samkhuih kan pek khan hlutna hlu tak a lo nei reng a. Mother’s Day denchhena ka NU thilthlawnpek kan pek hmasak ber leh hnuhnung ber a ni tlat!

Hemi kum atang hian Mother’s Day hian ka tan awmzia a nei leh zual a. Midangte tana thilthlawnpek ho leh hlu lo ber angin lang mahse, Mother’s Day a lo thlen hi chuan, ka NU leh samkhuih kan pek kha rilruah a lang rauh rauh thin. Ni, thilthlawnpek ropui leh manto zawng a hlu ngei e, mahse a petu leh a dawngtu te thinlung tluka pawimawh erawh a awm miah lo.

Bible-a NU thenkhat te
Isua Krista ringtu, a zirtirna zawma Bible thu pawm tan chuan Bible bawk hi kan thu lakna leh innghahna a ni lo thei lo. Kan sawi thin, Evi avanga Adama’n Pathian hnena puhchhiat tur a zawn ruaina chhan te; Jakoba’n a pianpui unaupa leh a pa a bum theih nana tanpuitu, a nu avanga Esauva nun hrehawm takzia te; Sari’n an awmpui nu/an pa hmei (Hagari) hnena Pathian thu nghak hman lova chi a thlah tir thawt thawt a, a hnu maia amah vekin a hmumawh leh lawi si te kha. Pathian thu zir lo tan zawng, Sunday silkul-a kan zir bak hriat belh ka nei si lova, sawi uar kan tum lutukna ah kan sawi sual ang tih ka hlauhlel lo ve.

Chutih laiin, Mosia nu, nu fing leh rem hre takin a fapa Pharo-a, Aigupta lal ina seilian si, Israel fa a nihna hloh miah lova a enkawl thei si te; hnamchawm nula huaisen Estheri, amah leh hnampui te zawng zawng chhanchhuahna thawk thei khawpa huaisen hun hria te; Ruthi anga nu rinawm leh chhungte hmangaih em em mai te khan nu te ropuizia an va tarlang chiang em! E khai, sawi tur an va tam em!

NU te u, in sipisial e…
Ni, Khuanu’n awmnem leh nu takin a siam che u hi, in hman thiam poh leh a tangkaiin thil in tithei mai a nih hi maw. In seih leh tum deuh hmak avang mai te hian chhungkaw thil rel a tluangin a buai thei tlat. Hmeichhe nihna bik in neih hi, a dik leh tangkai zawnga in hman chhung chu, pa taka zui tur che u in kan inpeih reng e. Tin, hei mai a ni law, sual lamah lah, hreh chung chunga ‘I tih dan dan le Mami nu’ han tih mai hi a awl thin si.

Ka NU ka hmangaih che…
NU nei tawh lo tan chuan a hrilhhaithlak viau mei thei. Chutih rualin kan tana an hlutzia erawh kan damchhungin a dang tawh chuang lo’ng.

Koh mai theih NU la nei te u, in tana theih tawk baka rilru ngaihtuahna seng a, nunkawng dik zawha in hlawhtlin theih nana, in tana tawngtai thin, In NU te hlutzia kha ngaihtuah nawn fo u la, hmangaih let hi an phu. Kan tawngkam, nunphung leh chezia zawng zawng hian, ‘Ka NU ka hmangngaih che‘ I ti fo ang u.

Similar Posts:

• Mother’s Day
• Father’s Day pualin
• Ka hmangaih che, ka hmangaih fo ang che.
• CHHIAHTE-A THAN HLA
• Hmangaih hnena thuchah

Recent Posts:

• Davida Kha ‘Pathian Thinlung Ang Pu’ Kan Ti Thei Dawn Emni
• SETANA CHU FING TAK LEH NÂ TAKIN A CHE ȚAN TA E!! (Setana Pawlten America Sorkar Dân Phalna-in Setana Biak In Hawnna/Hlanna An Nei)
• David Bowie a boral
• SUNDAY SCHOOL KAIKIM LAWMMAN KA LA LEH TA
• December 2015, Mizo(ram) Diary

This entry was posted on Saturday, May 12th, 2012 at 3:30 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.