1. Thu Hawnna:
2 Lalte 2:23-24-a kan hmuh angin, Zawlnei Eliza vana hruaichhoh a nih hnu chuan, Elisa’n a ai awh-in rawngbawlna a chhunzawm țan a. Jeriko khuaa tui in tlak loh a tih-thianghlim hnu-in, Bethel-ah Pathian be turin a chho ta a. Kawnga a kal lai chuan, mipa țhalai rualte chuan an lo nuihzat-in, an lo deuhsawh a, “Nang lukawlh-pa, han chho tawh, nang lukawlhpa han chho tawh” an lo ti a.
Elisa thinrim chuan țhalai rualho chu anchhia a lawh a, chuveleh ram lam ațanga Savawmnu 2 lo chhuakin mi 42 lai mai an rawn seh hlum ta mai a ni! Zawlnei si, a thin a va chhe ve? Ţhalai-ho țawngkamah hian thil inzep lian tak a awm a ni lo maw?
2. Lukawlh-pa:
Mizo Bible-ah, țhalai mipa-ho sawi nan hian, “naupang” a hmang a. Hei hi hriatsual palh a awl mai thei. Helai thu-ah hian, “naupang/țhalai” sawi nan hian Heb.getanaim na’arim, hman a ni a, hei hian mipa kum 15-30 a huam. 1Sam.16:11-13-a kan hmuh angin, Davida chu “naupang” (Heb.gatan) a ni a, Savawm leh Sakeibaknei-te bei tlaka tha nei rual a ni daih tawh a ni.
Ţhalai-ten Zawlnei Elisa an deuhsawhna țawngkam “lukawlh-pa” tih hi zirchian a țul khawp mai. Juda mipa-te hi atlangpuiin, lusun vang tih lohvah chuan lu (sam) an met khat a, khabe hmul thlengin an zuah țhin. Tin, Juda-ten nâtna (hri)-a an hlauh ber leh Pathian anchhia ang hiala an ngaih chu “phâr hri” (leprosy) hi a ni. Phâr nâtna hri-in a ken tel (affect) pakhat chu sam/hmul a tlakawlh vek țhin.
Bible scholar-te chuan, Zawlnei Elisa hi kum 25 vel niin an chhut a, phâr nâtna (Pathian anchhe dawng) vang a nih loh chuan a sam tlakawlh deuh vek tur chuan a kum a la tlêm lutuk a, lu a sun bawk si lo nen, thil danglam leh mak tak a ni reng a. Ţhalai rualte hian Elisa hi tar ala ni si lova, kum 25 mi lek lukawlh chu phâr hri vei, phâr hri ințanna-ah an ngai niin a lang.
Hetiang a nih avang hian, Juda-te chuan “lukawlh-pa” tia in koh chu, “in hmuhsitna leh in deuhsawhna țawngkam-ah” an hmang zui ta hial a ni (cf. Isaia 3:17, 24). Phâr leh lukawlh-te hi Pathian anchhe-khumah an ngai a, Elisa pawh hi Pathian thuawih lo, Pathian hrem mek, misual, a dera Zawlneia inchhalah an ngai tihna a ni. Ţhalaite hian, pawnlam landan ringawt thlir a, Elisa nih loh pui an nih tir a, Pathian Zawlnei kha misual leh dawheh taka ngai a, hmusit tak leh deusawh taka an tih avangin Pathian thin a alh a, Elisa hmangin action a la ta a ni.
3. Han Chho Tawh:
Zawlnei Elisa hma-ah hian, Zawlnei Eliza pawh kha Pathian be turin Bethel-ah a lo kal ve fo tawh țhin a. Chuvangin, Ţhalai rualte hian Zawlnei Eliza Bethel-a a lo chho an hmu țhin a, Ţhawnga leivirin a lak bo chungchang pawh an lo hria a. Mahse, he țhalai rualte hian Zawlnei Eliza kha Pathianin țhawnga leivir hmanga a lak bo a nih an ring lo tih an țawngkam-ah hian a lang tlat mai! Ţhalai rualten Elisa an deusawhna țawngkam, “han chho tawh” tih hi, Scholar-te chuan, “Eliza angin Bethel-ah te chho la, dawt-in Ţhawnga leivirin vanah a hruai chho ta an la ti ve dawn che nia! Dawheha-te putu in ni” an tihna a ni e, an ti. Ţhalaite țawngkam-ah hian Elisa mimal taka hmuhsitna leh Pathian, thilmak-titu chona lian tak a tel a, an țawngkam hi a nâ-in a lo râpthlak hle mai!
4. Savawm-in Mi 42 A Seh Hlum:
Ţhalai rualte hian Pathian an chona leh Elisa an hmuhsitna hi a nâ bawk a ni ang, action pawh a nâ ngiang mai! Bethel-a Pathian be tura Elisa chho tur an deusawhna țawngkam hian, Pathian awm an rinlohzia leh Zawlnei rawngbawlna an ngaihnepzia a tarlang chiang hle bawk. Sawi tawh ang khan, Zawlnei Eliza vana hruaichhoh-a a awm kha an awih loh zia leh Pathian thiltihtheihna an hmuhsit zia leh nuihzat zia pawh a lang chiang bawk (cf. 2Tim.3:5).
Tichuan, Elisa pawh a tuar ta ngang lova, țawngkam chhe dang hmang lovin, Pathian thu-in a lo sawi lawk tawh chu hmangin, anchhia a lawh (chham-khum) ta a ni. Scholar-te chuan, Leviticus 26:21-45 thu, “Mi kalh zâwnga in awm a, ka thu in pawm loh chuan in sualnate a zirin… ramsa-te ka rawn tir ang a, chu chuan in fate a lâk sak ang che u…” tih hi Elisa’n a chham chu a ni e, an ti.
Zawlneiin Pathian thu a chham zawh veleh hian Savawmnu 2 chu ram lam ațanga lo chhuakin, țhalai mipa ho chu a rawn seh nghal bawrh bawrh a, mi 42 lai mai a seh-hlum ta a nih chu! Pathian an chona man leh Pathian Zawlnei dik tak an hmuhsit leh deusawh man chu a rapthlak hle mai. Tunlaia Zorama chanchin kan hriat turu tak, Setana biaknaa inhnamhnawih țhalaite pawh kha an sim loh chuan an chan tur chu a lang sa reng mai.
Setana betute 3 khan, kumin-ah thla 2 chhung ringawtah Biak In 3 suasam-in, Bible thianghlim-te hial an hâl a nih kha (Dt. 30.4.2012-ah Kolasib Vengthar UPC (NEI) Biak in, Dt. 2.5.2012-ah Thingdawl-ah Roman Catholic Biak in, Dt. 8.5.2012-ah Kolasib Vengthar Presbyterian Kohhran Biak in). Pathian biakna hmun thianghlim emaw, Pathian ringtu dik tak-te emaw sawisak, hmuhsit leh deusawh hi Pathian mit-naute khawih ang a ni, direct-in action a awm ngei ngei țhin.
5. Tlipna:
Khawvela Mission history te, Church history-te hi chhiar ila, a lang leh lang lova Pathian engahmah ngai lova hmusittute leh Pathian ringtute tiduhdah a, deusawh țhintute chungah hian kan Pathian nung hian hmuh-theihin action hi a la ngei ngei țhin tih hi sawi tur a tam mai. Missionary-te ngainep a, tiduhdahtute (Orissa & Mizoramah, etc) chunga Pathian action lak dan chu sawi ngai lovin a râpthlak zia kan hre vek a ni.
Juda mipa țhalai-ho ang maia, pawnlam landan ațang chauhva mi teh ching, Kristianna phaw atana hmang a, Kohhran hi hmanruaa hmang a, bihruk nan-a hmang a, pawnlam chauh Kristian hi Pathianin ro a relsak hun a la thleng dawn a ni. Tisa-a chan chau zawkte hmuhsitna te, harsatna siam sak a, an ei tur leh chan tur chhuhsak te hi Pathian pawi sawina a ni. Pathian rawngbawltu tak tak-te hmuhsitna leh Pathian thiltihtheihna ngaihnepna hi Pathian pawikhawihna lian tak a tling.
Ngaihtuahzui atana țul tak pakhat erawhchu, Zawlnei Elisa anga, “Pathian thiltihtheihna a lanchhuah theihna tura Pathian tirh Savawm ko-chhuak thei” hi Zoram rawngbawltu zingah hian engzat tak awm ang maw? tih hi zawhna pawimawh tak chu a ni ta!
Have A Blessed and Worry-Free Sunday!
Dictionary:- Eliza=Whose God is Jehovah, Elisa=God his salvation, Jeriko=Place of fragrance, Bethel=House of God.
Similar Posts:
- Jona Leh Ringlo Mite {Sunday Pual}
- Kei ang mitdel, ke pahnih bul
- Lal Isua Leh Amen! {Sunday Pual}
- Thalai ramveitute intawkkhawm dawn
- Chatuan Nunna {Sunday Pual}
Nia, Like tur dik tak hi Like a ngai a...
May 13th, 2012 at 7:49 am
A ngaihnawmin a tha hle mai
Report this comment
May 13th, 2012 at 8:26 am
Eh! Ka first vel….
A lawmnan ka’n belh ve hram teh ang. Helai savawm seh issue hi subjective leh objective taka thlir tur niin ka hria.
Thalai rual ho khan an sual man an tel a, chawplehchilha boralna an chungah a lo thleng tih chu a fiah mai a. Mahse a objective zawnga thlir chuan heng thalai rualte hian khatih hunlaia an society ziarang leh an mindset a tichiang hle a. An nu leh pa-te leh khawtlang nun atanga an zirchhuah kha an nunah a rawn langchhuak (manifest) mai a ni tih a chiang em em a ni.
Chawplehchilhin kha generation kha boral ve kher lo mahse, an sim loh chuan an boral ngei ngei dawn a ni tih he savawm seh issue hian a tichiang. A chhan chu Pathianin hmasang atanga (Mosia hunlai) a lo vaukhana kha a takin a lo thleng tlat a ni (cf Lev 26:21-22 & 2 Chro 36:16).
Hei hi tunlai generetion-ah pawh a la dik tho. Kan thalaite an setanic kan tih kan tih rual hian mahni lam inbihchian hi a hun takzet tawh a ni. Nu leh pa, pi leh pu, kan society setanic zia hi kan thalaite-ah hian a rawn langchhuak (manifest) mai zawk a ni. Setanic ho hian an sual man chu a hmu khawp ang, keini (setanic inti lem lo) pawh kan sim loh chuan kan boral ve tho dawn.
Lal Isua’n engtin nge a tih kha?
‘.. chung Galili rama mite chu chutiang thil an tuar avangin Galili rama mi zawng zawng aiin misual bik niin in ring emni ? Ni suh e, ka hrilh a che u, nang ni pawh in sim loh chuan chutiang bawkin in boral vek ang’ (Luka 13:2,3) a ti a nih kha.
Report this comment
May 13th, 2012 at 8:29 am
A thain belhchian a dawl hle mai. Tin, mizoram cöntext a i rawn la lut hi a fuh hle bawkin ka hria. Pathian hian sual leh inhnehchhiahna a pawmzam mai mai ngai lo. Amah cho lek phei chu…
Report this comment
May 13th, 2012 at 9:44 am
E khai va ziak tha ve! Upa Zawlnei Eliza leh Upa Zawlnei Elisa chanchin atangin Thlarau chawm thei tur Pathian thu bihchhianna min hlui a nih hi. Pu Donald-a comment hian a ti phuisuih leh zual.
I tlip dan pawh a RELEVANT khawp mai. Hei tak hi nia a titute tan a tha lo ka tih kha ni.
Elementary ka kal laiin kan awmna area-in tui lian kan tuar a. Chu tulian tanpuina tur atan chuan Bible Society of India-te hi an lo fehchhuak ve a. Chutah chuan Holy Bible hi an sem a. Kan chakma thiannu (amah chu Buddhist) hian a lo dawng ve palh hlauh mai a. Buddhist a nih avangin Bible chu a duh lo hle a. Hostel a thleng velah mawng ek hruk nan Bible chu a lo hmang ta a lawm le! Ni khat hnu velah sikul lo zawm thei leh reng reng tawh lo turin a pan ta vak a nih kha. Pawi tak a ni, pawi tak! Pathian hi kan suangtuahna mai mai pawh hian cho lo ila a HIM ber mai!
Good Post.
Report this comment
May 13th, 2012 at 10:37 am
A ngaihnawm hle mai, a thupui tur i vuah thiam bawk a.
Pathianin amah ringtute lo hmusita, lo tiduhdaha, an nunna hial lo laksaktu te chunga ACTION a lak zinga rapthlak ber nia lang chu chunghoten LAL ISUA an lo rin hi ni ve tlatin ka hria.
Report this comment
May 13th, 2012 at 10:43 am
A va tha kher em!… Ka rin loh lam daihah min luh pui lehnghal(Y)
. Pathian Ni hman nuam vek u…
Report this comment
May 13th, 2012 at 10:52 am
Pathian hi dodal ngawt chi a ni lo; a thu(Bible) pawh a nung a ni. Amah dodaltute chu an tlawm zel ang.
French Philosopher ropui tak, Voltaire-a chuan Bible hi tihbo tumin nasa takin a bei a,hman lai thawnthu(History) ang leka chhuah a tum hial a ni. Mahse,a thih atanga kum 50-na,1828-ah chuan Geneva Bible Society chuan a In leh a Press chu Bible chhut nan an hmang ta hlauh zawk.
Lew Wallace-a paw’n Pathian rintlak loh zia ziah a tum mek laiin tihdanglamna a dawng thut nge ni, a tawngtai thut a,Kristiante tana thu ngaihnawm tak,’Ben Hur’ a ziak ta hlauh zawk a nih kha.
Report this comment
May 13th, 2012 at 2:44 pm
Savawmin an hnar a seh bul vek dawn emaw ka tia, rin loh lam daih a min hruai luh chu…a tha khawp mai
Han belh ve leh hram ila..
“Mi thenkhat sual chu a langsar a, an tuar nghal bawk thin, thenkhat erawh chu a lang lawk lem lo va.” I Ti. 5:24
“Tin, mi fel mah chhandam hram hram a nih chuan Pathian ngaihsak lo leh mi sual chu eng ang tak maw?” ! 1 Pe. 4:18
Report this comment
May 13th, 2012 at 2:54 pm
Tawn-hriat ve aw..
Vawikhat chu, Puanthui thin, ‘chhungkaw Pa ber’ pakhat hian Pathian kohna leh a thilthlawn pek ngai nep leh deusawh tak hian, “Mahni kut ngeiin ka thawk chhuak dawn, Pathian thilthlawn pek ka mamawh lo” a ti vel pang pang a.
Loan la-in, puan a thui ta a, karkhat a thui hman meuhlo ang, an chhungkua-in, ui-thak, leh panchhia in a han bawm khat tak tak mai a, a mawngtam pan khat vek bawk si, puanthui turin, thu thei tawh bawk si lo, nu ber pan khat bawk si, fate pan chhia in bawm khat vek bawk si…an han mangang mai mai a sin.
Report this comment
May 13th, 2012 at 3:28 pm
He lai a savawm seh chung chang hi a extreme mah mah em aw ka ti thin a,mahse Pathian hi a extreme hle a lo ni tih erawh tunah chuan ka lo hre ve ta!
Report this comment
May 13th, 2012 at 3:40 pm
Thuthlung hlui hunlaia Pathian kha chu a duh rum thei ngawt mai. A hnam leh chi ang zawnga suat buaih buaih te kha a tih dan a nia. A Fapa Isua Krista Mihringa alo chana mihringte dinhmun dik tak amah ngeiin a rawn experience vek tak hnuah hian kan va han vanneih phah lel lawl tak em. Mahse, he khawngaihna hun hian tawp chin ala nei anga, khar ala ni dawn.
Report this comment
May 13th, 2012 at 5:04 pm
Sunday hi chuan ka buai nileng thin a, Post pawh ka vil hman lova a zahthlak hle mai…
Report this comment
May 13th, 2012 at 11:00 pm
Dr John, i ziak tha lutuk.
Ni e, Pathian hmangaihna hi a intense zia ka hre fur. A thinrimna leh thikthu chhiatna pawh hi intense ver ver tak a ni ang tih hi chhut tel thin a tha.
Report this comment