mi(sual).com

Chatuan Nunna hi Pathianin mihringte hnena a pek, Eden huana lo lang chhuak, mihringin thuawihlohna avanga a hloh tak kha a ni. He Chatuan Nunna hi Chhandam-te (ringtute) tana thil hlu ber a ni a, Lal Isua rinna aţangin a neih theih a (John 3:16f, Rom 2:7, 5:21, 6:23, 2Tim.1:10), a famkimna erawhchu Vanah a ni dawn a ni (1Kor.15:51-54). Vawiinah hian a tawi thei ang berin chhui kan tum ang.

1. Chatuan Nunna Sawi Nan-a Ṭawngkam Hman-te
OT (Old Testament/Thuthlung Hlui)-ah chuan, Chatuan Nunna sawi nan Ṭawngkam pakhat chiah a hmang a, Heb. Hayyim, nunna, nung, nunnaa nung (Gen.2:7 etc.) tih hman a ni. OT-ah chuan Pathian chu Chatuan Nunna neitu leh petu a nih avangin, Pathian nunna ţawmpuinaah an ngai. Pathian kohna dik tak hria a, sual kalsan a, a duhzawnga nungte hnenah he Chatuan Nunna hi pek a ni a, he leiah hian an tem-lawk mek niin Rabbi ten an zirtir.  NT (New Testament/Thuthlung Thar)-ah chuan, Ṭawngkam 4 lai hman a ni a. Grk. Zoe, nunna, chatuan nunna (John 3:16f, etc. Heb. Hayyim tlukpui). Grk. Aphtharsia/Aphthartos, chhe thei lo, ţawih thei lo, boral thei lo, chuai thei lo (1Pet.1:23 etc.). Grk. Aionios, hun rei tak, chatuan, chatuan daih (Tita 1:2, etc.). He ţawngkam bik hian Chatuan Nunna awmdan a sawifiah lehzual a, hun kal tawh, kal mek, lo thleng tur tia thliar-hran theih loh (no past, no present, no future) a nihzia a tarlang.  Grk. Athanasia, thih theih lohna, thi lo tura ruat, thi lo tur, thi thei lo (1Kor.15:53-54 etc.) tihna te a kawk a ni.

2. Chatuan Nunna Chu Pathian Nun Ṭawmpuina A Ni
Chatuan Nunna chu Pathian laka chhuak a nih avangin a neitu (dawngtu) mihring mizia leh nihna-ah danglamna nasa tak a thlen a, nungchang danglam leh duhawm a siamchhuak thei a. A petu leh neitu Pathian nungchang pawh a ţawm a, a chhawm nghal bawk. Chuvangin, Chatuan Nunna kan tih hi Pathian Nunna a ni ber zawk a nih chu! Pathian Nunna a nih avangin a thi thei lova, a boral thei lova, a chuai thei lova, tawp chin a nei lova, chatuan a daih rêng a ni.

Tirhkoh Petera chuan, “Chi chhe thei lakah ni lovin, chi chhe thei lo lakah leh Pathian thu nung reng leh awm rengah chuan piangthar in ni zawk si a” (1Pet.1:23) tiin ringtuten Pathian nunna kan ţawmpui dan duhawm tak min tarlan sak a. Petera sawi dan aţang hian thil chiang tak lang chu, Pathian Nunna chauhvin thihna hmangin mihringte phuartu sual chu a chhu chat thei a. He Pathian nunna chauh hian Lal Isua nena inzawmna min siam sak thei a, mihring tana Pathian thiltumna hmun (siam kan nihna chhan, kan awmna tur dik tak)-ah min dah thei bawk a ni.

3. Chatuan Nunna chu Hlimna Tawp Lo (Endless Joy) A Ni
Chatuan Nunna chu ‘tawpchin nei lo’ a ni thu kan sawi tawh a. Amaherawhchu, Bible hian ‘a hun rei zawng lam aiin, a hun chhung hlutna, nawmna, hlimawmna leh a awmdan lam’ kha sawi a tum ber zawk. Hei hian Chatuan Nunna neih/chan hi a ti châkawm lehzual a. A chhan chu, Hlimna, lungawina leh lawmna te hi a pawimawh êm êm a. Mi chu hmelţha-in, hausa eng ang mah sela, mithiam tawp niin, ropui hle mah sela, a hlim thei miau si loh chuan awmzia a nei lo. Chaw tuihnai tak tak pawh hlimna a telloh chuan a tui chuang lo. Hlimna tello nun chu a ruak tlat a, a kim lova, hun tawite pawh hlimna tello chu a rei riauvin kan hre ţhin. Hlimna nena hun hman erawhchuan hun rei tak pawh hriat hman lohvin a liam mai ţhin! He khawvelah hi chuan kan hlimna te hi a rei ngai lo, tawp chin a nei thuai ţhin. Kan hlim lah-in hlim lutuk ala hlauhawm zui bawk nen! Hlimna Tawpchin Nei Lo, Chatuan Hlimna chan tluka châkawm chu a awm awm lo ve. Vanrama Chatuan Nunna changa kan awm huna Hlimna Chatuan daih kan chen tur chu hisap thiam phak a ni lo.

Hlimna tellova Kum 1000 hman hrehawm turzia pawh a chhut theih tawh mai awm e! A rei poh leh a hrehawm ting dawn tihna a ni a! Chuvangin, he Chatuan Nunna pawh hi Hlimna tello Nunna a nih hlauh chuan, a lungchhiatthlakin, a beidawnthlak hle dawn a ni! Greek miten, Pathian Nung Nunna ţawmpui a, Chatuan Nunna leh Chatuan Hlimna kan chan tur hi hrethiam phâk lo mah sela, Lawmna leh Hlimna pawimawhna leh hlutna hi hun chunga innghat a ni tih an hria a, hun rei zawng aiin, Hlimna leh Lawmna a pawimawh zawk zia tarlan nan hetiang hian Thawnthu mak tak leh lungchhiat-thlak tak mai an nei a!

Greek mite pathiannu lâr tak, Goddess Arora (Goddess of Dawn) chuan mihringte zinga Greek tlangval hmelţha leh chak tak Tithonus chu a ngaizawng ta tlat mai a! A pa Zeus (Greek pathian) chuan, a fanu hnenah chuan, a tlangval ngaihzawng Tithonus tan thil pakhat a ngen apiang tih sak a tiam a. Goddess Arora chuan, Tithonus chu a hmangaih êm avangin thi thei tawh lo se a duh a, a pa hnenah chuan thih theih tawh lohna chu a dil sak ta a. A pa chuan a thil dil chu phalsakin, Tithonus chu ‘thih theih tawh lohna’ pek a ni ta a ni.

Vanduaithlak takin, Arora chuan Tithonus tleirawl reng theihna tur kha a lo dil sak theihnghilh hlauh ta si! Kum a ral zel a, Tithonus chu a upa tial tial a, a chuai tial tial ta, kum 200/300 a liam hnu phei chuan nun chu thil hrehawm ber a ni ta! Thih duh teh mah se, a thi thei tawh mai bawk si lo! Goddess Arora lah chuan Tithonus hmelţhatna, mawina leh chakna a lo chuai takah chuan a ngaihsak peih tawh si lo! Chatuana tuarna nen-a, hlimna tellova Tithonus-an hun a hmang tur chu… ava lainatawm tehlul em! He Thawnthu aţang hian Chatuan Nunna, Pathian Nunna ngei ţawmpui a, Chatuan Hlimna chang tura min kotu Krista Kohna Hlutzia leh pawimawh kan hre thei ang!

Chutah, kum sangsawm ral hnu-in,
Ni eng mawi takah chuan,
Fakna hun ţan ang a ni ang,
Chatuana zual zel tur    

{{::Excerpted From the Book “Apostolte Thurin” (2002), pp.298-303::}}

Similar Posts:

• Mi Nung Nihna
• Chatuan (Golden Post-na!)
• Tial Tial
• Isua Pathian a ni lo
• Tih nun kan ni (Easter pual)

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, July 14th, 2013 at 2:27 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.