mi(sual).com

(Tunlai chu Part-a then a lar deuh tlat. Then ve ngawt teh ang.)

Pakhatna : He khawvel hmachhawn tura tap chunga ka pian chhuah laia min chhartu, ‘Veng sang Pitar’ an tih mai kha tunge ni ang le..? (A hrechiang tura ka ngaihte chung lama thawn chhoh an ni tawh hlawm si a.)

Pahnihna : Naupang sawngnawi tak ka ni chung khan ka nu duhtak khan min ‘Feh san’ lo thei si lova, ka tui a hal apiangin ka pi-in ‘Zéma’ (James?) nu hnute chhim turin min paw chho thin a ni awm e.. Tunge Zema Nu kha ni ta ang le..?

Pathumna : Sikul kal rual la ni lo mah i la, min awmtu mumal awm ta lo chu ka U-te sikul kal kha ka zui ve mai thin, ni vui zo ve hek lo, ka muhil ziah. kan khaw Zirtir, Sialhawk lam mi Pu Chuau-a khan min paw hawin an inah khan ka nu feh hawin min rawn lam mai thin, Pu Chuau-a an tih mai thin kha Tunge ka hrechiang chak ngawt mai.

Palina : Naupang tualchai rual ka ni ve ta. Kan khaw dai a Ram hâi (Theihai te chi ?) kan lawh tumin ka tla palh a lawm le.. ka ban ruh hi a tliak a, a ruh them te pawh vun pawnah a rawn pir chhuak a ni awm e. Ka U in min paw haw a. Ser tih tham leh ban kawi teng tung pawh awm hauh lova min siamrem saktu, Pa Kawla an tih mai thin kha tunge a nih ka hre chiang chak ngawt mai.

Pangana : ‘Inbual-ni’ a ni a. Kan inhnuaiah Motor kawng lem siamin ‘Chartin bung’ khalha kan thianpa nena kan vûû.. tui lai takin ka nu chawhmeh zuar zo lo haw chuan inbual turin min rawn kova, chhuanlam ka ngah kher mai… A hnu deuhah chuan, “… Lo chho vat rawh.. Sahbawn rimtui ka lo hawn a nia..”. Ka thian kawm leh ka motor lem pawh ngaisak hman miah lovin rang em emin ka tlan chho nghal a… kha ta Sahbawn rimtui kha eng sahbawn tak ni ang maw..?

Parukna : Pawl sarih ‘Board Exam’ ka hmachhawn ve ta. PC Girls School kha kan Centre a ni a, Kan hnung tlara thu (Saikhama-kawn naupang?) sam kir deuh hlek, samtawnna sena sam tawn thin, ka mitsira ka melh apianga lo nui sen sen thin, kan Exam chhung zawnga an hnung deuh a zui tih mai loh chu, tunge a nih ka zawt chhuah ngam tak loh kha… ka hrechiang chak ngawt mai.

Pasarihna : Ka nu hi ‘Mihlim’ an tih ang chi kha a nia. Mikhual thuhril leh veng mawng lama khuang ri kha kan chhungkua aia a ngaihpawimawh zawk thin vang te pawh a ni fahming. Ka rualpui ten mei an zuk hmain zu ka in tawh. Pawl kua ka nih kum khan school Form hrang hrang Pali ka ha hman. Ka hming leh Hnawhchhuah tih kha a inhmeh riau. Lehkhathawn tawi te, “… I chanchin chhe lam an sawi zawng zawng pawh hi dik vek mahse.. Ka hmangaih tho che..” (Fr. M) tih te mai min thawntu kha tun thleng pawh hian tunge a nih ka la hre chak.

Pariatna : Khawvela nupui fel ber ka nei a, Pathianin Fa duhawm tak min pe a, kan fatir pian zan a, “Hei le.. Baby of R*****, Female, kg 3.800.. hmuh theih maiah chuan pianken dik lo leh danglamna hmuh a ni lo..” kawngka a rawn dak a, khi thu rawn sawitu Nurse AW kha mawi ka va han tak em… Tunge a nih ka hre chak ngawt mai…

Similar Posts:

• Sikul kan inkaltirna te hi an tha tawk em?
• Intawng leh ngei ang aw!!
• La hrelo te tan
• Motor i hlau ang u
• Thlanmual

Recent Posts:

• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2
• Burma-ah ka zin Part – III
• Mizo Technical Graduates (Architects)

This entry was posted on Thursday, June 21st, 2012 at 3:30 pm and is filed under Ask | Help | Suggest, More than words. You can follow any responses to this entry through the RSS 2.0 feed. You can leave a response, or trackback from your own site.