«
»

Panlai Nun (chhunzawmna)

June 27th, 2012 11:00 pm by Dr Mahminga Sailo

(Nuihza si, insum ngai bawk siin kan tawp em ni kha? :-) )

Akhuuiiit eng-gal

Pawl li kan zirlai tho hian, kan rualpui pawl thum zirlaiin geometry-a thumal pakhat a lam sual ve chiang khawp mai. Acute angle, Obtuse angle.. tih te kan zir thin kha. Mathe zirtitu’n lehkhabua tihtur awm chu, hei hi eng angle nge? tiin a zawt diat diat a. An thenin an sawi dik a, a thenin an sawi dik lo. Mami zawh hun a thleng ve ta. Mami, exercise number 2, sub number c kha eng angle nge? tiin kan zirtirtupa’n a zawt a. Mami chuan, angle lem a en vang vang hnu chuan, akhuuiiit eng-gal a’n ti mai a(h). Kan zirtirtupa’n, ‘a dik loooo, akhuuiit eng-gal pawh a awm bawk lo a ti a. Keini inla zirsang deuh ho kan lo nui ru ker ker… :-)

Bii Eihchhi Siii ngat ziritritu kan nei thar

Pawl nga kan zir kum chuan, Lunglei atangin zirtirtu thar kan nei hlauh mai le. Lunglei atanga rawn kal kha chu kan ngaisang em em khawp a(h). Kan rualute zinga pakhat chuan, office-a kan zirtirtute titi a lo hre ru niin. Rang takin zirlai kan thutkhawmnaah rawn tlan pheiin, kan zirtirtupa chu a bawn khawp mai Bii Eichhi Siii ngat a ni maw le a ti. Keini lah chuan, B.A kha kan hriat chhun leh ngaihsan ber kha a ni si. Bii Eichhi Siii ngatin min zirtir tur kha chu kan phur khawp a. Class tan hmaa, kan head master-in inhmelhriatna a neih hnuah erawh, kan zirtirtupa thar chu BSc (Bachelor of Science) zawk a ni tih kan hre chauh! ;-)

Miss kan nei ve ngai lo, Pi kan nei thin

Thingtlang naupang chuan, sir, miss tih te hi sap sikula lut te’n, an zirtirtute an kohna turah kan ngai, kan chuhpui hran lem lo. Kan zirtirtu te pawh, an hming bulah Pu/Pi kan telh mai thin.

Pawl ruk kan nih kumin Hindi zirtirtu nula kan nei ve ta hlauh mai. Nula ngo leh, tarmit (thalai mit) bun vah hi a ni a. Keini erawh chuan Pi **** kan ti leh daih. Ani lahin a sawisel lem hlei lova. Kan khuaa a thawh chhung khan; nula a-pumpa si kha, khawtlangin kan pi vek.

Vai englo thunna

Khawpui boruak hip ngailo ta chu, kan thamawl ve tawp a; thatna mual mual erawh a awm. Kan khuaa dispensary-a thawk te’n, an chenna bul leh vel tifai turin min han sawm a. Kan hlawh tur erawh kan hriat avangin hrehawm kan ti lem lo. Kan hlawhchhuah chu eng dang a ni law.. vai englo thunna (Condom) a ni. Kan hman dan erawh a tangkai, min tihlim em asin!

Tlain nem a ni a, hnathawh a kan hlawhchhuah vai englo thunna ngei chu kan hampuar te te a, mualah kan beng luih luih zel. :-P

Furkhua a nih laiin vai englo thunna hi kan hlimpui lehzual. Ruah a’n sur ngheng a, a han ta maw tihah tuihawk luankawr kan pan a. Vai englo thunna kan pawtfan te te a, tuihawk kan thun thin. A fan nasat theih em avangin tui tin khat deuh thaw kan thun a. A fual pur pur a fual pur pur a, a’n puakkeh pup mai kha kan lawm em em a. Nui bawk bawk chungin, tlaikhua kan hmangral thin.

Lungleng kan kiu vawng vawng…

Chhim lamah chuan, Pathian ni zingah inkhawmin Sunday sikul kan kai nghal vek a. Chawhnu erawh kan awlthawng viau thin. Middle sikul kan kal ve chinah chuan, lengzem han sak vawng vawng te kan uar tan a. Ka putea’n Ukulele min tuksak chu Pathian ni chawhnuah chuan ka awrh chhuah deuh ziah.

Thiante nen bawlhmuntlang hmawng kungah kan thu fer fawr a. Lengzem hla tinreng hrut kualin, ngaih ber tur pawh nei miah si lovin, lungleng kan kiu vawng vawng thin. Lalthakima hla atangin, Daduhi Khiangte hla te, kan hriat ang ang kan sak kim meuh chuan, hun chu kan tumtawi ve mai thin.

Tuangtuah leh vaube parvul karah, khiang-zik mawi te’n an no hring nghel a. Ralkhata tuklo khawhar lo tu-ku-ruk loh loh nen, ngirtling awtliang fel fawla lo kiu vang vang te; tuklohram dai hruttu thlifim thaw heuh heuh kar’an…

Tuar thiam a har, D ruk neih chu,
Hmangaih biahthu hrilh ngam si lo;
Thinlaiah a ruk te’n ka vawng khawl thin biahthu,
Mahse, lungdi tawnah ka hlan ngam lo che..

tia duhthawh tak maia kan zai vawng vawng lai te kha aw.., a va’n ngaihawm thin em!


“Bawlhmuntlang”

Phur thuta chhunzawm leh atan… ;-)

Similar Posts:

Recent Posts:

This entry was posted on Wednesday, June 27th, 2012 at 11:00 pm and is filed under Lifestyle, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.

32 Responses to “Panlai Nun (chhunzawmna)”

  1. 1
    sisen Says:
    June 27th, 2012 at 5:52 pm

    FIRST :P Khai aw…darkar chanve chhung zetin comment tu an awm lo :-O Chhiar ang awww

    Report this comment

  2. 2
    Sandman Says:
    June 27th, 2012 at 5:57 pm

    haha a rual in post pahnih a lo chhuak palh a nih hi… re-schedule leh nghal :D

    Report this comment

  3. 3
    Saitawk Says:
    June 27th, 2012 at 11:02 pm

    @Sandman a che leh ta e! (Y)

    Report this comment

  4. 4
    sheldon Says:
    June 27th, 2012 at 11:56 pm

    Inkhel a hnai tawh sia, naktukah Mahminga post hi chu ka chhiar mai ang :-D

    Report this comment

  5. 5
    Mx Says:
    June 28th, 2012 at 12:09 am

    Hahaha, Vai englo thunna khi kan kan beng ve thin :-D
    Tui kan thun thin a, a leng hnem thei rap mawle :-P
    Thenkhat chuan vai z**** kawr te anti mai thin ;-)

    Thlalak khi a va’n mawi e (Y) lung a ti leng tlat…. (Y) :-)

    Report this comment

  6. 6
    H.Vangchhia Says:
    June 28th, 2012 at 12:31 am

    Vai englo thunnaah khan, “tu tui thun hnem thei thei,” kan ti thin a. Khanglai kha chuan tuikang nghak a tlaivar zak zak hunlai kha ania… chhungte’n tui an ren ropui mai si a, a spy theih khawp mai hairehai ;-) :-P

    ZEF zawipawl lar tak thin a, an bass pakhat (Pu Hming bass-a nilo)pawh thlanmualah mi arpa chal an phil chu an kang (fry) vei sur sur a. A neitute anlo kal ta mai… chu ZEF a an bass hmanhmawh lutuk chuan arpachal lu, a chhuang nen vek chuan a hmawm thaks…tlanchhiat pahin a dawlh thla uak uak ani awm e hairehai :-P ;-)

    Report this comment

  7. 7
    lushai_er Says:
    June 28th, 2012 at 3:08 am

    B.Hc te chu in tunlai tawh zawk anih chu, kan hun lai chuan B.A Sc. tih loh chuan pitar ho khan an hrethiam thei thlat lo :)

    Report this comment

  8. 8
    Dr Mahminga Sailo Says:
    June 28th, 2012 at 7:37 am

    @ Mx.. Thlalak khi march thlaa ka lak a nia. Hmanhawh luat avangin, duh ang paw’n ka la hman lo, kan tlan kual zuai zuai si a..
    @ Hv.. Ar lu a dawlh ru uak uak lai chu ka hmu chak e.. :-D
    @ lushai_er.. BASc.. (Y) :-D kan veng pitar paw’n, Pu Rohminga hian, athakmetrik a thiam riau an ti asin tiin, mathematics zirtirtu chanchin an sawi ve nasa… :-D
    Tukchhuah nuam vek u… (C)

    Report this comment

  9. 9
    PKfanai Says:
    June 28th, 2012 at 8:06 am

    A ngaihnawmin a hlimawm hle mai. (Y)

    Report this comment

  10. 10
    saint sammoo Says:
    June 28th, 2012 at 8:50 am

    thuziak zangkhai tak a ni.. Good post.

    Report this comment

  11. 11
    Phivawk Says:
    June 28th, 2012 at 10:27 am

    Tha dap dap khawp mai (Y)
    Vai englo thunna hi a lo pawimawh em a ni ;-)

    Report this comment

  12. 12
    Chhuaklinga Says:
    June 28th, 2012 at 11:02 am

    Hahaha.. Ngaihnawm lunglenthlak hle mai. :D Hla sak/zai chungchang khii.. Thian ho 10 velin mahni lunglen zawng zawng hla chi hrang hrang kan han sa nuiah nuaih mai thin kha aw.. A record ngaihthlak tur awm se, a mak awm mang e. :P

    @7, hahaha.. Ka pi pawh khan BA science a ti tlat pek a sin. Lunglenthlak lutuk.

    ṭen ṭen

    Report this comment

  13. 13
    Dr Mahminga Sailo Says:
    June 28th, 2012 at 11:12 am

    B.A ngaihsan lai a ni bawk a. Kan zirtirtu pakhat boral pawh kha, a thlanlungah Lal****** Tlau B.A tih an ziak lang a. Ka nu’n (fam) a chhiarsual pek a. Tlau hnamah hian, Tlau-Ba a awm hran kher elo? a ti a. Thlanlung ziaktu a nui nasa teh asin… :-D

    Report this comment

  14. 14
    Chhuaklinga Says:
    June 28th, 2012 at 11:23 am

    ^^.. Min tih nuih huk chu le. Hahaha :D

    ṭen ṭen

    Report this comment

  15. 15
    Kher Kher Says:
    June 28th, 2012 at 11:27 am

    Chhiar nuam lehpek hle mai (Y)

    He thingkung hi a rah tha ang reng khawp mai.
    https://i1106.photobucket.com/a.....d2a/Dr.jpg

    Report this comment

  16. 16
    Dr Mahminga Sailo Says:
    June 28th, 2012 at 11:38 am

    # 15… (Y) A lo rah hman der tawh a ni maw?… :-P :-D

    Report this comment

  17. 17
    mama Says:
    June 28th, 2012 at 11:44 am

    Vai englo thunna :-P :-P

    kan inah krismas kan thleng a, thlanglamah bathlar thim deuh lai hi a awm, U Vala pek chuan “helaiah hian U R*** leh U M***i te an inti, U R***a’n kawmthlangah peni kheis a paihthla lai poh ka hmu” a ti ta, kawmthlangah chuan kan chhukthla a peni kheis chu kan han zawng tak tak a nih kha, kan hmu lo :-P

    Report this comment

  18. 18
    Kher Kher Says:
    June 28th, 2012 at 11:46 am

    #17 peni kheis :-P Awm ang thei phian a :-)

    Report this comment

  19. 19
    Dr Mahminga Sailo Says:
    June 28th, 2012 at 11:54 am

    # 17… Karei leehh… :-D

    Peni kheis… :-P Ka lo mangnghilh tep alawm le.. ;-)

    Report this comment

  20. 20
    Chhuaklinga Says:
    June 28th, 2012 at 11:57 am

    @17, (Y) peni kheis tih khi a hming ori. a ni chiang, ka hriatpui che :D

    ṭen ṭen

    Report this comment

  21. 21
    sheldon Says:
    June 28th, 2012 at 12:55 pm

    Chhiar a hahdam, min ti nui :-D

    Report this comment

  22. 22
    houdini Says:
    June 28th, 2012 at 2:09 pm

    Vai englo thunna ka chhiar thlen khian kawmen ka châk lutuk a a kawmensan. Ka chhiar chhunzawm leh nghâl ang.

    Keini paw’n in tih ang chiah khian kan hampuarin tui te kan thun ve ṭhin tho. Mahsé vai englo thunna ti mai lovin vai z**g khêsi (case) ti deuh hlïrin kan sawi. #5-a mi sawi ang deuh khian vz káwr tia sawi chang kan nei bawk.

    A va lunglenthlâkin chhiar a va nuam tak em (Y) .

    A hnuaia ka thil ziah ka la hmu hman zak zak vêl. Ka chhiar zo ve. A va ngaihnawm tak êm tih ka sawi, a hnuaiah khuan. :-)

    Report this comment

  23. 23
    houdini Says:
    June 28th, 2012 at 2:11 pm

    Ka chhiar zo ve. A va ngaihnawm tak êm.

    Report this comment

  24. 24
    Dr Mahminga Sailo Says:
    June 28th, 2012 at 2:18 pm

    @houdini… In lo ti ve thin tho elo? A hunlai kha chuan Peni kheis kha chu tangkai ve tak a ni, saitawka’n tunlai khawvelah hmang tangkai hman lo mah se… :-P

    Chuan, Peni kheis-ah hian, tihpuar belh lova, a awm ngai tawpa tuivawt thunin, khawi/khalh mai mai a nuam bawk… :-D Sawi chi a ni em aw.. ;-) A hmawr, hnute hmur ang deuhva awm ve hi, mi thenkhat chuan an hne/fawp thin, tak tak… :-) Mahse, tunlai rilru kawi/herh erawh tuma’n an pu lova, put nachang lah an hre hek lo.

    Tehkhin chi a ni em kaw hre law… Kan naupan laia Peni kheis kan buaipui ang mai mai hian, Zu te pawh hi buaipui mai mai ta ila, ti teh hluai hian do a ngaih kher ka ring lo, kei misual hian… ;-) Sual chu a awm teh meuh mai a; chutih rualin sual tipunluntu erawh a hmangtu/titu an ni fo… (N)

    Report this comment

  25. 25
    houdini Says:
    June 28th, 2012 at 2:28 pm

    #24 A hläwm tàwpna khi ka duh tawp (Y) . Zu hi vzk ang mai maiin khàl ve ta ila chu kan ram hi a thawveng hawk tùr! Ha ha ha! Nuih pawh a za lutuk lo ve, a thinrimthlâk tel deuh tlat.

    Kohhran hian zu kan ngai pawimawh vak lo tùr hi min ngaih pawimawhtír phêt a tum a ni ber e. Zu khapna dàn (N)

    Report this comment

  26. 26
    Lamji Says:
    June 28th, 2012 at 2:36 pm

    #17, peni kheis..ni dawn tak maw khah…ha…ha….! Ka va’n nui nasa ve lee… :D:DPeni kheis hampuar te chu Vanapa Hall ah concert naah kan ben luih luih thin kha. :D

    Report this comment

  27. 27
    Lamji Says:
    June 28th, 2012 at 2:43 pm

    Past i sawi sa sa,ka comment hmasa nen a inzul em mai ka’n chhunzawm lawks… :)

    Vawi khat Vanapa Hall ah concert hi a awm a,kan thian ho in kan kal. Kal huaina kan ti ve khanglang, Sandy’s Old Monk ngei mai kha kan khulh,gallery ah,a front a a opp zawnga tlem te platform awmah khan kan ding tlar a,kan rui phur kha kan han lam uang tak tak anih kha. Lu,koki istyle te khan… Live telecast in an lo pe chu niin…a tuk ah tumah pawn kan chhuak lo. :)

    Report this comment

  28. 28
    Dr Mahminga Sailo Says:
    June 28th, 2012 at 2:55 pm

    @ Lamji te thian ho chu lee(h)… :-P :-D In lam chu en ve a chakawm mang e… :-D

    Report this comment

  29. 29
    malsta27 Says:
    June 28th, 2012 at 3:00 pm

    :-D :-D …………ziak ngaihnawm thiam ang reng thin (Y) (Y) .

    Report this comment

  30. 30
    lrpa Says:
    June 28th, 2012 at 4:54 pm

    Naupan lai hi a lo nuam ber mai..pawl 2 nge 3 ka chiang tawh lo..school kan tlan bo a..lung no kan ei vak! alkatra thial, CRP motor acid liah ruk, synod press bawlhhlawh paihna a suan zawn, suan te kha kan thial mum vel a..haha..! a hlauhawm zia hi kan hre leh hnuhnawh reuh zia!!

    Report this comment

  31. 31
    chhangte_ll Says:
    June 28th, 2012 at 6:25 pm

    Nia mawle, duat taka ‘Ma Bill-tea, Ma Bill-te‘ tia kan koh thin pawh William Jefferson Clinton lo zuk ni daih a :-S

    Report this comment

  32. 32
    century child Says:
    June 28th, 2012 at 7:14 pm

    A ngaihnawm lehpek hle mai (Y)
    Tuangtuah leh Vaube parvul..tih para khian ka lung a len riau ;-(

    #27 :-D:-D

    Report this comment

Leave a Reply

You must be logged in to post a comment.