mi(sual).com

Tun angin miin phone an la lek sup sup lo a, facebook te phei chu a siamtute pawhin a hming pawh an la phuah lo ang. Computer hming kan lamrik awm ka hre ngai lo a, thirhipthei erawh chu kan hria. Thirhipthei chuan thir a hip thin a, perek hlui, tuihawk luankawr ami te kan hip chhuak nelh nelh thin. Tuihawk luankawra perek ringawt kan khamkhawp loh chinah tuikhur luiah kan kal leh nge nge thin.

Khatih lai khan kan tan chuan tuikhur lui chu lui pui tak mai a ni a, kan lui neih chhun a ni bawk. Mualpui lui, chite lui leh sihpui lui te kal rual kan la ni lo. A bul vel chu a tawn tawnin a la ngaw a, thingkung lian tak takin a hual vel a, kan kal chang chuan lasi te ramhuai te pawh kan hmu thin. Chu’ng kan ramhuai hmuhte chu a kal ve lo hnenah kan sawi a, ngaihnawm ti em em in an ngaithla a, kan kal loh tum a nih chuan a kalte chuan an hmuhdan chu a hmaa kan hmuh ang deuh  chiah chiahin an han sawi a, keini chuan hlau leh ngaihnawm ti takin kan lo ngaithla ve leh mai thin.

Lui pui tak mai a nih avangin a hnar atanga a mawng thleng zawhchhuak thei nih kha thil ropui tak mai leh thianzaho zinga insawitheihna tham a ni. Khatih lai khan ‘U Vanro-a’n tuikhurlui hi a zawhchhuak tawh mawle’ tiin kan chhuang thei hle. Tun hnu hian ka han en leh a, a hnar chu kan veng lungrem tuikhur a ni mai a, chuta tang chuan ka han thlir thla a, a kam vel a, thingkung tam zawk a lo awm tawh lo bawk a, a langtlang thla rul a, a mawng kan tih mai, arhuan kawng pawh chu a zu hmuh tlang theih vek mai; Mahse kan hun lai kha chuan lui pui tak mai a ni a, zawh chhuah mai mai theih a ni lo. A mawng  thlen dawnah lengkir sang tawk a awm a, hruia uaithlak a ngai-kan ti thin!

Kan Tuikhur luiah khan kan naupan lai hun tamtak kha a luang ve a, sikul kan chawlh chang te, kan ban hma changtein kan kal fo thin. Sava tui tlan a rawn thlawk sup sup thin a, rual u deuh te phei kha chuan thang an kam thin a, chutiang thang chu lui dungah khan a intlar thla thluah a ni. Vawikhat chu U Mapuia thang en tur ka zui a, eng sava emawni hi a lo awk a, a mei min pe ve nghe nghe.

Khatih lai, kan naupan lai rau rauah pawh kan naupan lehzual lai kha chuan tui te  kha a la tam a, keini ang rual han chen mai na tura tling kha hmun li hmun nga laiah a awm a, a chang phei chuan sangha te tak te tete kan hmu thin.

Vawikhat mau hmanga kahchik siam hmanga arbo veng naupang zawng zawng tang tang awma kan han indo mai kha chu kan va pui mep mep em. Khatianga hun hlimawm kha amah tuikhur lui pawh khan a tawng zen zenin ka ring lo a, tun hnuah phei chuan a tawng leh tawh kher lo ang. Tawngchhuak ve thei se eng tak sawi thin ang maw.

Kan veng lo lampang(Damveng lam) kha ‘ral leh lam’ kan ti mai a, ral leh lam neitupa chu a sual lutuk sairawkherh lian tawk a nei a, a huana lut a hmuh chu a perh pawp zel, tia hlau em em chung khan buk sakna tur thingtuai leh mau eng ilo vel sah ruk kha chu kan thulh chuang pawhin ka hre lo.

Vawikhat chu kan veng lam thingkung lianpui zarah khan U Vanroa’n hrui a thlung a, chu a hrui thluna uai chung chuan ral lehlam a va inthen thlen theih a, rual u deuh ho kha chu an uai sup sup a, nuamti em em khan  an khek rawih rawih a, nawm hmel ti viau mah i la ka uai ve ngam ta lo.

Hun a liam a, kan lo leikang ta deuh a, kan tuikhurlui kam vel pawh chu a lo chereu zel a, a pawhtu lui te,  zawngte tuikhur kan tih thinte pawh  leiminin a chhilh hnu ah chuan chakai vung chhuah terh turh thinte kha hmuh tur a awm ta lo a, Uchang sawt sup sup thinte pawh kha a awm ta lo; Kan duh ber  thirchhia erawh a tam hle.

Khatih lai khan thirchhe zawn chu naupang pawntona chi khat ang a ni a, nuam kan va ti thin em. Buara ip lian pui pui, keimahni ai lian lianah khan thirchhia kan thun puar luah a, a hmunpui lam panin kan hnungpuak chho pur pur thin. Vai thirchhe zawng hnena hralh chuan a hlawk lo tih kha kan hre ve kar a, a hmunpuiah kher hralh hram kha kan tum thin. A hmunpui kan tih chu Kulikawnah a awm.

Kan thirchhe hralh haw lam kha kan va pawk thei thin em, vur rawng sen ngei mai fawp larh larh chungin kan veng lam panin kan han zuang khawngkhawbai thla auh auh mai a, kekawr ipte lehlamah pawisa nawi kan la ak ri raih raih a, kawl sunhlu zial(kan tih mai) kan lei ang a, Pu Ramtea te inhnuaiah kan zu ru leh mai dawn a ni. Kawl sunhlu zial hi zuk tak tak theih vak pawh a ni lo a, vawi hnih khat fawh hian a thi zel a, kan kheh a, kan ei leh nge nge thin; Mahse chuti chung chuan zuk kan tum ve ziah tho, meizial ang deuha a inzial tlawn et vang kha a ni ta ve ang.

A chang chuan thirchhe zawng tura tuikhur lui kan thleng hi kan thukhawm tel tel a, Lal David-a’n zahmawh a sawi a, thirchhe zawng hman lo lekin kan ngaithla thin. A sawi ngai hlir a sawi a, ‘han sawi leh teh’ kan ti deuh chhen zel tho.

Vawikhat kan thirchhe zawngin vawkte thi kan hmuh tuma inbailemchhuanna atana lak rawttu kha tu ber nge  ni ta kha aw?  Lo lain inbailem chhuanna atan lo hmang ta i la…, ka ngaihtuah let leh pawh hian ka chil a la haw thei.

Chutiang chuan kan lui pui pawh chu hun kal zelin a hrut ral ve hret hret a, kan pan lai nun a luan ral meuh kha chuan luang turin chakna pawh a nei tawh meuh lo. Hnawmtin phuri nu a ni ringawt tawh mai. Tun lai naupang hi infiam turin tuikhur luiah kalpui tum ta i la mak an ti ngawt ang.

A luidunga naupang hlim khek rawih rawih thinte kha hnawm leh tawpin a luahlan zo a, tuifim taka luang ri ve her her thin te kha hmuh tur a awm ta lo. Ka beiseina neihchhun chu hei hi a ni- naupangin tualchaina’n an hmang ta si lo a, sava an ngam deuh mahna tih hi. Chuti a nih loh chuan kan tuikhur lui kha a khawhar dawn em mai si a!

Similar Posts:

• Nuai khat chuang man Tuikhur chu!
• Veng Tlabirh
• Bawp lehlam an chhar leh tawh
• Police Modernization
• Chhawrtui Khua hmingput chhan

Recent Posts:

• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..

This entry was posted on Sunday, August 19th, 2012 at 6:00 am and is filed under HAHAHA, Lifestyle, Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.