mi(sual).com

( Mahni tawn ngei atanga tawngkam , rilru khawih veng veng, theihnghilh theih tawh miah loh hi in nei ve thin em? Mi ropui leh milarte kamchhuak hningthang tak tak aia kan nuna thu sawi thuk em emtu anni ve fo asin…)

Tleirawl tirte ka la nih lai hian hahipa kan lo sawi thin phawngpui tlang lawn turin sikul chawlh laiin ka nite nupa leh ka naute nen kan thawkchhuaka. Hah takin Sangau atang kein kan kal ngat ngata, Thaltlang lamah Jeep road a awm tih hre heklo, tlang bul thut kan thlen chuan a feh kawng zawk, kal harsa lam chu kan zawh ta a. A chho ulh em em maia a hnim pik bawk nen, ni sen sa hnuaiah kan lawn tauh tauha. A tawpah chuan Far Pak hmun zawl thengthaw nuam tak chu kan han chuang chhuak ve ta hlawla. Keimahniho tih loh tumah dang tlawhtu an awmloh avangin khuavang kal lai an sawi ang mai hian alo reh tlawk tawka. Hnim eng thulh sang pui pui mit tlin tawka lo cham put leh ni kang tha fahranin a chhun en rulh dil kang chahna khuar zau zet maite, thli fim thaw heuh heuh leh van dumpawl thiang kak avangte chuan thlalak kan phurin Camera nen hlim takin kan tlan kual ruai hlawma. A tawpah chuan thingkung tar tawh tak pakhat, zar buk tha deuh bulah hian thla la turin kan ding thapa, thing va nghen pah tuma ka insiamrem lai chuan hniam tea thing phek lo inkilhbet hian ka mit a la zawka, ka’n en chian nak chuan chalk var ni awm tak hian chianglo riai, chhiar theih chang chang hian….’Kan la ngai dawn mang e khuareiah…‘ tih hi alo inziaka…

Pawl sawm ka zir kum hian kan zirtirtu pakhat ka hnaih leh ngainat em em mai chu a pasalin a boral san hlauh maia. Kan class teacher anih avangin ral turin sikul naupang kan kal dawna. Venglaia dawr lian tak pakhatah ralna pangpar kan pawisa thawhkhawm atanga lei turin ka thiante nen kan kala, dawr chu a lun bawka kan zi nuai nuaia. Kal tlai kan hlauh em avang chuan kan pangpar order vel buaipuitupa chu kan tur seka, a tihfel hnu chuan ‘Eng sticker ber nge in duh. thlang ula..’ a tia, mitthi ralna pangpar la lei ve ngailo tih takah  chutiang chu a tul tih pawh ka lo hre lova. Ka thiannu vengva tak pakhat chuan bawma mi pakhat chu a zu lachhuak nawlha, a en zauha ‘hei hi ni mai rawh se’ tih leh bel a rual nghala, kan chhuah pah chuan vawikhat a pangpar ken chu ka zuk melh zawka, sticker-a thil inziak, kan Madam pasal duh leh hmangaih em em, mahse a zu in nasat tuar lova boral ta, chatuana a hmuh tawh ngailoh tur, a student ten kan tuarpuizia lantir nana kan thlahna hnuhnung tur tawngkam (kan thlan tak ) chu ,  ‘Nghilhni i awm dawnlo…‘ tih hi alo ni a…

College kal rual ka ni ve tawha, rual awh a na ve si a, unaua upa ber te ka lo ni bawk nen, neih phak bakin Punjab leh Haryana khawpui intawm Chandigarh lama zir zawm turin Lunglei atang ka pa nen kan intek chhuak vea. Mahni inah pawh tawm deuh chawt thin, zin hrim hrim hreh em em leh Vairengte pawh la pel ngailo tih takah a vawikhatna’na vairampur zuk thlen thlak duai mai chu ka huphurh ngiang maia. Mahse ka tum ruh ve laklawh tawh bakah, nu leh pate remti chiahlo, ngaihngam zan lo chung kal lui ngat tur ka ni bawk nen ka inti pachang lui hram hrama, thu sut leh chi ziazang a ni tawh lo. Sumo-a kan chuan phei bauh bauh lai chuan ka lungleng lawk, helhhawlh leh phur ru bawk si chuan rilru lak pen nan ka phone ah zoram ngaih hla ka ngaithla veng venga. Ka pain ‘Bawihte Lunglei lan tawp theihna ber anih saw…saw..en teh ‘ a tih ri chuan min ti harh zawka, a kawh lam ena ka hawichhuah lai chuan ka phone chu alo ri deta, pawl sawmpahniha kan English teacher, ka ngaihsan leh ngainat em em mai text , “….i wish u well, be a Daniel in Chandi...”  tih chu ka zuk hmua.

Zirtawp tlai a ni a, ruah a sur cherh cherh avangin pawn chhuak lovin keimahin roomah ka thiante movie ka lak thar hmuhnawm hmel zet chu enin blanket lum leh eitur nen ka lo intuituah vela. Chutia keimah chauha movie romantic tawk mai tui fahrana ka lo en lai chuan kawngkhar chu tuemawni hian an rawn kik karh karha, peihlo angreng tak chung chuan ka han tho chhuak tham thama, muangchanga zi mar chung hian kawngka chu ka’n hawnga. Ka rinloh deuh mai hian ka la hmuh ngailoh tlangval sa chhe ve tak pahnih hi chauh hmel zet hian an lo dinga, ka meng phawk nge ka hmel nur tak an hmuh vang, engmah pawh ka sawi hma chuan a cher sang zawk, hnung puak rih hmel tak aktupa chuan tawngkam no lo fahran hian “Kya hum aapke rum mein DDT ka spray karwa sakte hain?” a lo ti nghal vara…

Duhtawk hrih phawt ang, a sei lutuk dawn, han sawi ve liam liam teh u lem…

Similar Posts:

• MHIP thuchhuah
• Tlanchhe chunga post!
• Thliahtheih Par
• Bird of Paradise
• Mizo tawng tlem i zir lawk ang

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Sunday, September 2nd, 2012 at 3:25 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.