mi(sual).com

Kumpui sũl tam pawh a vei hman lo ve,
Dar ang tawngin lawm chibai ka hlan ang che tiin;
Mahse kan thu thlun sa rinawm chuan,
Awmlai nunrawng a dang zo si lo.

Min dâwnpui ve r’u ka lenrual zawng ten,
Ka hlimna leh lawmna ber ka Lelte nunnem khan;
Ţhen lohna ram nuamah intawng leh turin,
Thlafam vangkhuaah min lawi san ta.

I zai ri mawi vang chuan lungngaih manganna te,
Beidawn nun khawharna te chu ka tuar dai thin a;
Mahse awmlai lian lo hrang meuh zawng e,
I zai ri mawi nen pawh e ka dang zo si lo.

Ka Lelte tel lova hringnun hman reng zawng,
Ka zuam mawlh lo ve ka zuam thei mawlh lo;
Lelte nunem kianga ka lawi ve theih nan,
Awmlai nunrawng min hruai ve rawh.

I lěn zual changin i zâlna suanglung khâr,
Hawn leh thin ka nuam ngei e;
I sakhmel mawi ka lawmna ber kha,
Tawn leh ka nuam engtin awm maw?

Mizo zaithiam lâr leh hla phuah thiam, mi tam tak tan phei chuan khawvela zaithiam ber nihna hauhtu CFL Hmingthanga chuan nichin mai dâr 10:25 PM (9th September 2012) khan Khawbung ‘S’ PHC- ah TB natna avangin fam min lo chansan ta.A ruang hi 10th September 2012 hian a pianna khua Samthang-ah vuiliam a ni ang. Mizo hla kungpui buk leh zâr ţha ber chu tihtliahin a lo awm ta a, amah thlak zo awm leh thei tak maw. Zo ri mawi tan chuan engtihzai mah rel theih a ni lova, amah suna kun nghiai mai loh chu tih tur dang kan nei ta rih lo ve. Kan va ui em. Kan uina mittui luang hian bân ni a nei lovang tih pawh a hlauhawm e. Mizo ni tawh phawt tan chuan CFL Hmingthanga hming hre lo nih chu thil inmil lo tak ang mai a ni ţhin kha a ni si a. Amah uina thu hian thisen zungzam nen lam a fan chhuak hneh mange.

C.F.L. duh tak, pialral ram nuam, ţhen lohna ram mawiah chuan hlimten min lo hmuak la e; chutin ţhen lohna biahthu sawiin Lal Nunnema kiangah hlim ten kan la intawng leh ngei dawn nia aw……..

C.F.L-a chanchin tlangpui:

A aw mawi tak mai hmanga Zofate min awi tleitu, thinlung ngeng chhun hawng a, thisen zungzam nen lama min fan chhuak vek theitu, C.F.L-a zai han hriat meuh chuan, kan uai zo vek ni mai hian a lang. “Intawng leh ngei ang aw” tih leh “Ka lung a leng mang e”, “Ngaihlai Masang” tih hla han hriat tawh hi chuan awm hle hle a har tawh thin.

C.F.L. Hmingthanga pa hi Khamliana a ni a, a nu chu Tawkliani a ni. A hming bula C.F.L. a dahna chhan hi, a pa hi Chhangte hnam a ni a, chumi chu ‘C’ hi a ni a, a nu hi Fanai hnam a ni a, chumi atan chuan ‘F’ hi a dah a, ‘L’ hi chu ama hming ‘Lal’ tihna a ni.

Kum 1970, November ni 15-ah Samthang khuaah a piang a. An unau hi 6 niin, mipa 3 leh hmeichhia 3 an ni. Amah hi a naupang ber a ni. An khua Samthangah hian seilian chhovin, an inpui ber pawh a la awm a. Mahse amah hi hmun hrang hrangah a khawsa kual thin a, Aizawl lamah hian a khawsa tam hle. A nupui Zonunsangi nen hian fa 1 an nei a ni.

Amah hi mi lungleng thei mi tak a ni a. Naupang kum 15 vel a nih atanga zai chho tan tawh a ni a, chutih lai te chuan an khaw chheh velah te chuan a lar fu tawh a ni.

Zoram pum huapa a rawn lar chhoh takna chu kum 1993, June thlaah, A cassette Volume – I, ‘Ngaihlai Masang’ tih, Vulmawi Recording, Pu R. Lalruanga’n a released sak a, chu a cassette chu a hit chho hle mai a. Mite duh chi tak hla a lo ni hlawm a. A hralh pawh a tla hle. Cassette hrang hrang siam chho zelin, Zoram dung leh vangah a hla sak apiang chu a lar hneh emem vek mai a, Radio-ah hla thlan hun luah tam pawl tak a ni. Khawpui lam ai mahin, thingtlang lam mite’n an duh zual emaw ni chu aw a tih theih.

A hla sak lar chhoh tlangpui zingah chuan heng, Ngaihlai masang (Vol-I), Roosna hmeltha (Vol-II), Intawng leh ngei ang aw (Vol-III), Ka lung a leng mang e (Vol – VI), I tan ka lo kir leh (Vol- VII) tih te hi an tel a. Radio (AIR) ah hian kum 1994 atangin hla a record tan a, tunah chuan 32 vel zet a record tawh. Lengzem hla lam hi a special-na ber a ni a, a sak ber pawh a ni. A aw hian lung a tileng em em mai a,a thinlung taka a han zai tak tak hi chuan hmeichheho hian an tuar zo ta thin lo a ni ber. Lunglai a fan rawih rawih thei a ni. Radio Artist ah hian ‘B’ High Grade a ni.

A hla sak te hi ama phuah deuh vek a ni a, Cassette Vol-I atanga X thleng a siam tawhah hian ama phuah deuh vek a sak avangin hla 100 chuang zet chu a phuah tawhin a lang. A cassette siam tawhte chu :

1.Ngaihlai Masang
2. Roosena Hmeltha
3. Chhânlet loh Hmangaihna
4. Kũr diam diam
5. Min hriatchhuahtir
6.Lâm dun ang aw
7. Tunge hmeltha ber
8. Hlim la, nui rawh
9. Hla inchhang special 10.Lemchanna Khawvel

Heng a cassette siamte hi kum 1993-2000 inkara a tihchhuah vek an ni.
[ Ref. : Mizo Zaithiam Larte Chanchin by Lalthlamuana ]

C.F.L-a hla thenkhat han tarlang ila:-

1. Bawihte nangnen
2. Chhan let loh hmangaihna
3. Chhuahtlang hmun hlui
4. Duhaisam a kim
5. Dawn tisei
6. Hmangaihna rose par
7. Hmangaihin hmangaihna
8. Hmangaihnaa phuar
9. Hmangaih CFL
10. I mawi chuang e
11. Intawng leh ngei ang aw
12. I tan ka lo kir leh
13. I tlai lua
14. Ka star no.1
15. Ka D tawn hun tur
16. Ka lung a leng mange
17. Kan duhaisam
18. Ka nau vala
19. Ka thian ngaihawm
20. Ka thianghlim tawh lo
21. Khuavang kallai
22. Khuavang chhinchhiah
23. Kan hlim laini
24. Ka hmangaih ber i ni
25. Lanu lungmawl
26. L.D.Hmeltha
27. Min kal san suh
28. Min thlahliam ang che
29. Mitthla alang hlimthla
30. Muttui mangtha
31. Min hriat chhuahtir
32. Nang chauh ka hmangaih che
33. Ngaihlai Masang
34. Phu loh ‘D’ chhai zawng a ho mai mai
35. Phu loh dawn thar
36. Rauthla ‘D’
37. Thang nuihiauvi
38. Tawn ni i awm si lo.
39. Then che ka hlau ber mai
40. Then lohna ram
41. Tah loh mittui tlak
42. Valtin lawri
43. Zo nun mawi
44. Zawlaidi
45. Zokhaw tleitir
46. Kur diam diam
47.Roosna Hmeltha
Etc. etc.etc.

“Ngai chung zel hian e ţhen mai i ţul si a; mangţha mai le ka Lelte Nunnem. Chung khuanu zarah rauthla nun hlim ten kan la intawng leh ngei dawn nia aw. “

Similar Posts:

• Min kalsan suh
• C. Lalzetluanga (JV-a) Fans Tan Thu Lawmawm
• Panlai Nun – CFL-a ngaihsan lai
• Mimi Renthlei – Biahthu
• LD Hmeltha

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, September 10th, 2012 at 11:32 am and is filed under Information, Luangliam, Obituary. You can follow any responses to this entry through the RSS 2.0 feed. You can leave a response, or trackback from your own site.