mi(sual).com

A nih dan ang ang in ka rawn copy ve tawp mai nih hi Vanglaini atangin… Tha ka tih em avangin. Tunlai kan thalai/nu leh pa tam tak nun beidawng taktak a awm mek te tan…….

Thian duh tak, i nunin harsatna nasa tak a tâwk a ni tih ka hriatin, thinlung takin ka tuarpui che a ni. I tawngkam ka hriat hnuhnun ber khan ka rilru a luah reng thin a. I tân tihtheih dang ka neih loh avangin ka lo tawngtaipui ngawt mai che a ni. “Ka tân chuan nun hian awmzia a nei hlawl lo; mi, a thih hun nghaka thichhâwnga let rengte hi ka rilru hian a awt ngawih ngawih thin!” tia i thu min hrilh khân ka thinlung hi a chhun na êm êm a, tlêm tala chhawk theih che hi ka va han duh êm!

I hma lam hun darkar khat lek pawh hi thlân thim ang maia thim chhah niin i hria a. I harsatnaah chuan puitu, rin ngam leh beiseina thar siam thei che i hmu lo tih pawh chiang takin ka hria e. I thinlung paukhauh takin hriat chhuah a duh loh ber mai ‘Pathian hming’ chu, i tuarna chuan a hriatchhuahtir nawn chhen che a. Mahse vawiina i awm dân zawng zawng hi i duhthlanna lo hman sual tawh avanga ba thinna lehkhâ chu a ni tih i hai bik si lo.

“Tumahin min ngaidam thei tawh lo vang; keimah leh keimah pawh ka inngaidam thei bawk hek lo. Duhthlangtu leh sual kawng hawnsaktu chu keimah ngei hi ka ni,” tiin tunge i nih i inhre chhuak ta si a. Nimahsela ka thian, harsatna tawp kan tawh hian a ni, kan mamawh ber chu kan hriatchhuah thin!

Puitu tur dang an awm lohna hmuna kan hriatchhuah fo thin hi a ni kan mamawh ber ‘nunna’ chu. I mamawh ngai hauh loh, a tel loa zalen leh hahdam zawk nia i hriat, i nun mamawh dik tak chu i hmuchhuak tan dawn chauh a ni.

Ka thian duh tak, hei hi hre reng fo vang che. Pathian hmangaihna chuan inchhira simte chu a hnar hauh lo vang tih hi. A kut thirkhena kilhtu leh, krawsa Amah khengbettute tan ngei ngaihdamna a la dilsak thei a nih ngai chuan, i tan leh ka tan A ngaihdamna chu a va nasa lehzual dawn em! A nâka chhuntu ang khawpa chiang leh na chuan he Lal hi kan la hliam em lo vang tih hi ka beisei tlat a ni.

Ka thian, zan khua a lo thim hian khawvar hun a hnai tih hi engtin nge ka hrilhfiah ang che aw. Khua a lo dur a, ruah pawh namen lovin a lo sur ngei a, nimahsela khaw dur leh ruah surte chuan ni eng rawn lan tum chu an dang hlen thei bik reng reng lo asin! Zan thlasik khawvawt hnuaiah hian thlai hringte hian tawm hulna hmun reng an hmu lo va; ni eng lo lan hun chu huaisen takin an nghak ngawt mai a ni. Zing ni eng lo chhuak chuan chung thlai hnaha thlasik daifim, thianghlim em em maite chu rangkachak ang maia mawiin a rawn chhun eng a, khawvel hian a tluka mawi thil dang entir tur che a ngah lo asin!

Mi zawng zawng hi i lakah beidawng mah se a pawi reng reng hlei nem; chu beidawnna chuan nangmah ngei a hneh hma che chuan i tan kawng a la inhawng reng a ni. I lakah miten beisei nei sang viau mah se, nang ber beidawnga i tluk tawh si chuan engmah siam that theih a ni tawh lo vang. Chuvangin ka thian, beiseina leh dawhtheihna hi i sum zawng zawngin lei la, tha thlah hauh lovin rei lo te tal han nghak leh hlek teh. Na tuar chung chuan he zan hi a rei hle na a, zing khua a lo var meuh chuan chung nite chuan min kiansan thin a nih kha.

Tawngkama duhsakna sâng ber ka hlan theih che chu hei hi a ni: Pathian biain rawn fo ang che. Ani’n min mamawh lo, keini’n kan mamawh em avang zawkin. Kan sual avanga inkiltawiha be lo tur pawh kan ni chuang hek lo, mi sualte hlei hlei hian Pathian hnathawh ropui chu hmuh kan mamawh zawk si a. Ka thian, Pathian biain rawn fo vang che. Beisei bote tana beiseina a ni si a.

Similar Posts:

• Lungduh inthenna ram
• THIAN RINAWM
• Hunthar Veng SAY ten Pathian chawimawi dawn
• Thil tha tih
• Happy Diwali

Recent Posts:

• misualdotcommer lehkhabu release: The Mizo Uprising
• A hlet
• Misual lo thleng
• A hun leh a hmun (When in Rome)
• Lo chhiar ve ru

This entry was posted on Saturday, September 15th, 2012 at 12:00 pm and is filed under Advice, Copy Paste, Lifestyle. You can follow any responses to this entry through the RSS 2.0 feed. You can leave a response, or trackback from your own site.