mi(sual).com

Inthlang ram kanni bawk a, Manifesto hi enge anih kan hre hle awm e. Political Party ten, Sawrkarna an chang thei hlauh anih chuan, an thil tih tur, tihhlawhtlin an tum tur mipuite hnena an puanchhuahna a ni. Kan Lal Isua pawh khan, rawng a han bawl tan a, thilmak eng eng emawte ti a, a han lar tan khan, a pianna khua Nazareth-ah a Manifesto a puang chhuak ve a, Chu chu bible zirmiten, ‘Nazareth Manifesto’ an lo tih chu a ni.

He thu hi ziah ka chakna a rei tawh a, nimahsela, mithiam tak tak an tam tih ka hria a, phuai luai deuhva ziah ka inthlahrung hle a ni. A pawimawh ka tih em bakah, kan tunlai boruak hi a sawichhuah hun tak a niin ka hria a, kan mithiamte cho chhuah nan ka han ziak ve phawng ang e. Comment lamah inthlahrung hauh lovin a famkimlo lai te, a felhlel lai te in rawn sawi belh hlawm dawn nia.

Chanchintha Luka ziak bung 4 kan en chuan, Lal Isuan Jordan luia Baptisma a han chan zawh khan, Setana thlema awm turin Thlalerah ni 40 leh zan 40 zet chawngheiin a awm(fianrial) a. Khatia Setanan a thlem thluk theih loh hnu khan, Thlarau Thianghlimin a lo khat ta a, a pianna khua Nazareth-ah a kal ta a, chutah chuan a tih thin dan angin Chawlhniah chuan Inkhawmna inah a lut a, Isaia lehkhabu bung 61 na kha a chhiar chhuak ta a ni. Thil pawimawh deuh deuh ilo thur chhuak dawn ta I la.
1. A dan pangaiin Inkhawmna inah a lut: Lal Isua Pathian fapa chanchinah khan, chawlhnia buhvui thliahte kan hmu nain, Chawlhni kha a serh em em tih a hriat a, Sakhaw hruaitute kha an thinlung tenawm zia hmuchiang hle mahsela, anmahni avang khan, Pathian biakina inkhawm kha a thulh phah ngai chuang lo a ni.

2. Riangvaite hnena Chanchin Tha hril tura ruat a ni: Helaia Riangvaite han tih hian kawng hrang hrang a huap thei awm e. Juda hoten, Hremhmun thingfak tura an ngaih Jentail te anni a, Setanan a tihretheih tisa leh Thlarauva mi khawngaihthlak, riangvai tak tak te a tih theih ang a, Pathian nena inzawmna nei tawhlo tawh phawtte chu a huap vek, a tih theih awm e. Chung ang riangvaite hnena Chanchin Tha hril tura ruat anih thu a sawi a ni

3. Lalpa Thlarau ka chungah a awm: Lal Isua kha vana hruaichhohva a awm dawn khan, a zirtirte kha, Thlarau Thianghlim tellova rawngbawl kha a phal mai miah lo va, lo nghak tlat turin a ti a ni. Amah ngei pawh riangvaite hnena Chanchin Tha hril tura belruat anih avang khan Lalpa Thlarau khan a chenchilh tlat a ni. Lalpa Thlarauva khat chunga Lalpa rawng hi bawl tur kan ni tih a lang chiang hle a ni.

4. Salte hnena chhuahna thu: Thlahtute bawhchhiatna avanga Setana sala tang tlat tawh te, mahnia talchhuak thei tawh lote hnenah Sal an nihna atanga chhuah zalen tura lokal anih thu a puang chhuak a ni. Hei hian, tunlaia kan thu khel, Ruihhlo bawiha tang(Drugs addict) te, mahni chaknaa chhuak theia inhre tawh lo te, Sum bawiha tang tlat te, Hmeichhiat-mipatna bawiha tang tlat te pawh a huam thei ang chu. Chungtiang sual thiltih theihna sala tang tlat, mahnia chhuah ngaihna hrelote tan chhuahna thu a rawn puang chhuak a ni. Keini pawhin chhunzawm zel a, Setana sala tang nghet tlatte chhuah zalen hi kan tih makmawh a ni.

5. Mitdelte hnena mitvarna thu: Lal Isua khan mihring mihrinna a, mitdel tak takte pawh a tidamin mitvar an lo nei leh a, Chhandamna kawng hmu theilo leh hmu thiamlote tan mai bakah he tisa damna pawh hi a keng tel tih a hriat theih a ni.

6. Tihduhdah tuarte chhuahtirna: Lal Isua Kristaah chuan mi zawng zawng hi angkhat vek kanni a, te bik leh lian bik kana wm lo va, Thlarau nei chhandam mamawh vek kan ni. Sualin a bawih beh tlat, an thiltih thalo avanga an taksaa tihduhdah tuar tu te, Khawtlang leh mihausaten an rahbeh leh an hmuhsit a, an tihduhdahna tuartute tan pawh, chu dinhmun atanga chhanchhuahna thu chu a keng a ni.

7. Lalpa Lungawi kum thu: Thlahtu bulte bawhchhiatna avanga Pathian lungawi lohna hringfate chunga tla kha, a fapa Isua Krista avangin, Lalpa chu a lung a lo awi dawn ta a ni tih thu puan chhuah kha he khawvela a lokal chhan chu a ni.
“He Pathian lehkha thu hi vawiinah hian in hriatah a lo thleng ta,” tiin a han sawi tan a, a tir lamah chuan an lawm viau a, ngaihnawm pawh an ti a, an ka hau niin a lang. Amaherawhchu, a han sawi thui tak zelah khan, Zawlnei Isaia hmanga Pathianin a lo tiam kha amah ngei chu a nihzia a han sawilan chian chhoh zel takah khan, an khaw thingrem siamtu fapa ve mai anihna bak kha an hmuh thiam ve si loh avang khan, Messia anih zia ahan sawi khan, an thin a ur a, tihhlum hial an lo tum ta a ni.

Lal Isua khan Matthaia 10:42 leh Marka 9:41 a ‘Tuisik no khat pe’ pawhin an lawman an chan loh tur thu a sawi kha Doc_Lip-a sawi ang khan a ZIRTIRTE bik, a rawngbawltute leh a hming avanga tuartute lo tanpuitute chung chang a sawina a ni a, Matthaia bung 25 thu a, Khawvel tawpa rorelna ropui a awm huna Pathianin a unau mi teber te chunga an tih leh tih loh azira vanram kai leh kai loh thu a sawi pawh hi, Mithianghlim Lawr hnua, Sakawlh hnuaia Juda ho(Isua Unaute) in namen lova an tawrh a, an tlanchhiat huna, Sakawlh pawh hlau hlei thei lo va, thih huam tak meuhva anmahni lo tanpui hram hram tute Hnamte(Jentail-te) chung chang a sawina niin an ngai.

Amaherawhchu, Mirethei leh tanpui ngai hrim hrim tanpui chung chang thu chu Matthaia bung 5 a Tlang chunga a Sermon-ah khan a sawi lang a. chang 7 ah khan, “Mi khawngaih thei takte chu an eng a thawl e; khawngaih an la hlawh dawn si a” a ti a. Tin, bung 6 ah khan, mirethei leh Kutdawhte hnena thil pek reng rengin, mite fak hlawh duh avanga a langsar leh zau thei ang bera puangzar lovin, a ruk tea pe thin turin min fuih a ni. Miin an hriat a, min fak liam liam chuan, kan lawmman kan hmu zo tawh der a ni. Amaherawhchu, tuman an hriat lohva, min faktu pawh an awm loh erawh chuan, a ruka lo hmu khiautu Pathian chuan, Lawmman min la pe ngei dawn a ni tih thu a sawi chiang hle a ni. Matthaia ziak vek bung 19 ah khan, mihausa pakhat amah zui tumtu hnenah khan, a neih zawng zawng hralh a, amah zui nghal turin a ti a. Chutianga a tih chuan, Vanah ro a neih tur thu pawh a sawi chiang nghal a ni.

Dr.Luka hi miretheite veil eh khawngaih em em tu, a thlawna tanpui tura bawih ho awmna Lawngchawlhna te hrut kual thin niin an sawi a, Lal Isua chanchin a record-ah pawh hian, miretheite chung chang a sawi lang tam niin an sawi.
Thuthlung hlui lamah hian Kan Pathian hian miretheite khawngaih tur leh tanpui turin a mite kha a fuih nasa hle mai a. Deteronomy bung 15 ah hian, a sawi chiang viau mai. A thu an awih chuan, an va luah tur Kanaan ramah chuan ‘Mirethei’ reng reng an awm loh tur thu a sawi hnuah, mirethei an lo awm palh anih pawhin, ngaihthah reng reng lo tur leh an neihte phal taka pe thin turin a ti a ni. Thufingte 19:17 ah khan ‘Mirethei khawngaih chuan, Lalpa a puktir a ni, a thiltih that chu a rul ang” tih kan hmu bawk a ni.

Tin, Thuthlung Thar lamah chuan Jakoba hian a sawi chiang tha viau mai a, bung 1 chang 27 ah khan, “Kan Pathian leh Pa mithmuha sakhaw biak dan thianghlim leh sual tel lo chu hei hi a ni, fahrah leh hmeithaite an hrehawm laia kan leh khawvel bawlhhlawh kai lova inseam thin hi” tiin min hrilh bawk a ni.

Tisa leh Thlarauva mirethei leh bawrhsawm, Sual bawiha tang, mahnia chhuah dan thiam tawh lo tanpui ngaite khawngaih, tanpui leh chhanchhuah hi, he khawvela Lalpa Isua Krista lokal chhan a ni a, keini pawhin chu hna chu thawh chhunzawm zel tur kan ni e.

Sunday hman nuam vek u le.

Similar Posts:

• Kristian chhungkua leh kan tehdan diktawk lo te
• Tunlai ka mutmawh hnarmawh.
• Lalpa Pathianin a mite a ngaihtuah thin.(Sunday Pual)
• Pathiana mihringte dinhmun;
• Tawngtai

Recent Posts:

• Double Adverbs
• News tawi-II
• misualdotcommer lehkhabu release: The Mizo Uprising
• A hlet
• Misual lo thleng

This entry was posted on Sunday, September 16th, 2012 at 2:30 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.