mi(sual).com

Thuhmatheh:
Fiamthu tlar hnih-khat lek! Ka sawi ri ngam ang em aw! Ka ngam tur a ni. Ka huaisen kha, fuihpawrh, pawrh tura fuih, … nge fuih tura pawrh sa? Sa hi a lo tui ber mai.

Thupui!
Hmasawn hi ka thupui a ni a, hnam hmasawn hi. Hmasawnna chu lalna hi a ni. Lalna chu thlantlin nihna hi a ni. Chu nihna nei pha lo te tan pawh thlantlin nia inhriatna hi chu nihna hlimthla chu a ni. Chu hlimthlaah chuan hlimna a awm. Chu hlimna chu hlimna hlimthla a ni.

Ram hmasawn nan chuan zawhtë hi chìn tur a ni a, a chi chu amahah a awm. Amah chu lin phawt a, a chi tur chu amah aṭanga lak tur a ni. Zawhte chu rannung, tapchhak lawm ve deuh ṭhin hi a ni. Tapchhak bâk bâka lawm tur khawvêlah va awm suh.

A lin dan tur chu ngaihtuah a ngai lo. Mi mawlhovin an hria ang. An hre lo emaw an tih pawhin hria emaw an inti leh tho tho vang. Chu chu ka chakna hnar a ni.

Zawhte chu khawia mi nge kan chin ang…? Zawhte ling thiam engtin nge ka thlan ang? Kawmthlang hmulphurh chhe zingah khuan kutdawhin ka zu ṭhu leh lawk ang a, ka rawn haw chhoh hunah inlaréng zetin ka sem ang. Mahsé min lo pek tak tak dawn loh avangin hmasawnna sum pawt-péngin chu sum chu zawhte chi atan ka simsial ang. Mualphona tawpkhawk, mi pawhin sawi chhuah serha an neih hi buluk deuhvin ka sawi ngam. Chu ka huaisenna chu zahmawh a ni. Zahmawh chu ka tleina a ni. Ka tleina chu damlai nilum ka ai tluan vena tur a ni. Ka dam chhung ka tlei ve miau chuan pawisawkawk va awm suh.

Pawi a awm loh chuan zawhte chu ka zâwt nghal e…! Ka zawhna erawh ka sawi lo vang.

Zawhte chi mawlh chu a ni, ka nun kaihruaia khalh ngiltu chu! Ram hmasawn nan zawhte chin a pawimawh! Kungfu lo sawi ve chhên suh. Nang ui tang hian khawiah kungfu va chhawr suh che…! Kungfu chu eng nge? ‘Eng’ chu eng nge? ‘Chu’ chu eng i sawina nge? Ziah zawm tur nge zawm loh tur?

Ka mi bumho bawk hian an hria ang chu…! Ka duh duh ka sawi hi a tâwk! Ka hnapui ber a ni. Kungfu, tih lëmah dak-chakna chhuanlamte hmatheh hi chu… …    …   … Eng nge kan sawi kha le?

Ka mi bumho hi ka bum chiangkuang viau nachung hian kei ai an fing ṭhém ṭhūm zuk nia! Bum ni miau hek i! Chu hmasawnna chu kan changkanna chu a ni.

Zawhte chi tur chu i lâwk pâwk pâwk teh ang, suahdur hian. Hnuaipui, ka chalvawm lo chhang ang che! Sawli e, rak tho u law…!  Dánglal, ka baw-ar zai chhawnin hnamte zalenna pialral chu thlúai ang min thlen ang che!

Tlipna:

He thü hi nuihna tur awm lo fiamthu a ni. Nuihpui tlâk loh fiamthu chu thawh tlâk va ni suh. A thawhtu chu, laimi lungmäwl dangte ang bawka nung tlâk ni mah sé, meizang hlap tlâk va ni suh. A hlap tlâk meizang chuan khawia chi ṭiak tlâk takna va pai suh. Zahna te chu khawia mi nge a neih tehlul ang?

Hë rianghlei naunàwnte lennaah hian thawh tlâk loh fiamthu chu thawh ni tawh suh se!

Mi pakhat leh a lo nuih theih te chuan a ṭha aläwm! Nanga lo sawi ve tur eng nge awm? Kei ka nui asin! Ka hrisëlphah bawk ka beisei.

I nuihzat thil hian mi maktaduai chanve leh nuaih zâtve ṭahna a thlen asin! Beiseina neiin nung rawh. Mi dangte an nuih dawn loh chuan, i nuih a zat pawhin, lo ngawi ngam rawh. Ngamna hi huaisenna a ni. Huaisenna chu âtna pawlh-nut ni suh se.

Beiseina hi ka kî a ni.

Thawh tlâk loh fiamthu hi i ngawihpui ngam ang u!

HAHAHA

Ka lawm e.

Similar Posts:

• Hmasawn
• Ram dinchhuah nan Kungfu i zir ang u.
• Thalaite hnena thuchah
• Fiamthu hi
• Tunge ram chu hruai ta ang?

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Tuesday, September 18th, 2012 at 6:29 am and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.