Panlai Nun – Pawl Li Exam

September 26th, 2012 8:04 pm by Dr Mahminga Sailo

(Vangpui hun nuam, van boruak thiang tak leh ni eng mawi tak mai a lo en chang hian; nunhlui ngaiin chhuihthangvala’n lunglen puan ang ban har ka ti… )

Suihlung a leng, luaithli ka nul…
An hril, an sak, D zun ngaih vang erawh a ni der si lo! Lungleng vawng vawng thei tura Khuanu’n min siam hi a lawmawm rualin, ngaihtur ber hre lova khawhar lenglen ve tawp erawh hrehawm chang a awm fo. Tun tuma ka suihlunglen erawh kan vangkhua leh chhungkua, then-leh-rual te ngaih vanga suihlungleng, luaithli ka nul tak hial thu a ni.

Kum tawp exam
Ka sawi fo tawh ang khan, kan khua chu thingtlang khua, tlang zawmpui neih loh lutuk avanga lirtheiin a tlawhpawh loh, Mizo lalin an awplaia khaw him ve tak ni si a ni. Hun lo kal zelin, khawsak changkang duh avangin mi tam tak te’n an pemsan pheuh pheuh a nih avangin, pawl li exam tur paw’n kan khaw thenawmah kal a ngai a ni.

Tin, heti hi a ni a. Ram lama tang thei tawh lo, ka pi chuan a tuibur fawp ri barh barh chungin; ka zirpui hmeichhe naupang pakhat nen chuan, kan vangkhawpui hnuchhawnin kan khaw thenawm panin kan inzui ve dat dat a. Thlasik khua a intan tawh a, a nuam tawkin khua a dai tawhin, zo kawng han zawh pawh a hrehawm lem lo.

Exam-na tur khua kan thleng
Ka nu nau, ka putea puzawn te inah kan innghat a. Kan innghat fel chiah tihin, ka zirpuite paw’n an thlenna in an pan fel zet chuan khua a har tan ta.

Kan thlen in tukverhah chuan ka dak chhuak a. Ngai teh! Nuhnun/thingfanghma kung lian tak lo rah tuar mai chuan, kan kawmthlang min tingai nghal a. Ka thin a tawt up up a, tawng thei ziazang ka ni ta lo. Ka u leh nau, ka nu leh pa, kan rapchung leh vawk vulh te thlengin mitthla’an a lang zut zut a. Ka chhingmitthla avanga lungleng ka ni tih hria niawm takin, lo far rawh tia ka hrilh miah lo, thahnemngai takin chhingmittui a rawn dir zung zung a. Eng tak chuan min mawlh ni maw? Tap vak ringawt dawn ila, a tihchi der si lo.

Engah nge he khuaah kher kher hian exam a ngaih mai aw? tiin ka inlainat chhunzawm zel a. Mahse, ka putea fapa harh tak mai chuan, loh theih lohin min chhaih buai tan ta a. Kut min han thlak awk awk changin, a pi ber chuan; a nel tan che a nih kha a ti zel bawk si! Min nel avanga kut min thlak zel dawn chuan, ni li chhung nel taka khawsakpui chu ka hreh ru khawp mai. Mahse, Lunglen erawh a kiam ve ta deuh. Exam tura kal e ti lo khan, Lehkha zir erawh tum buai peih ting tang lo.

Ka pa chi seh lam haw
Kan exam zawh dawn tuk chuan, Lunglei khawpuia zankhat riaka ka pa chiseh lam, kan venga haw tlang mai tur chuan min rawn tlawh a. Buhseng ram riah lai a nih avangin, haw hma a duh a. Ka pa ka ngaih leh a ruala haw ka chakzia chu sawi chhuah ka duh si, inleng an awm nual avangin ka sawilang ngam bawk si lo. Thin a tawt tan a, kha a chih leh ta…

Tin heti hi a ni a. Ka sawi chhuah ngai miah lovin, ka thinlung khawhar leh lungleng thahrui chak tak mai chuan ka chhingmit ngeiah chuan entirna rawn lantir lehin, ka pa paw’n ka dinhmun chu hrethiamin, ka exam chu min nghak ta a. Phur takin, exam bei turin ka kal ta.

Khami nia ka exam zo tluka nuam ka tih kha ka hre lo. Kan thlen inah ka let vat a. Ka pa nen chuan ka thiante pawh nghak tawh chuang lovin, a rang thei ang berin kan veng kan pan nghal a. NI 5 chhung chauh ka chhuahsan kan veng ka’n hmu leh chu, sawifiah thiam loha hlimna leh thlamuanna chuan min bawm a.

Pahnihna I ni
Tlai thim thet thetah, kan zirtirtu pa lo haw chuan, kan khua leh khaw thenawm pahnih atanga pawl li exam bei zawng zawng zingah pahnihna I ni e min ti mai chu(h), awih har ka ti a, ka lawm bawk si. Ni 5 chhunga ka lunglenna reng pawh ka hre chang tawh lo. Kan vangkhawpui chu a va’n nuam teh reng em! Kha’ng lai khan kan khawvel a zim a. Mizoram puma pakhatna tih ang vel kha chu kan hre phak lo, a awm tih reng kan hre ngai lo.

Tichuan, lawmthu sawi nan tiin kan ziritirtu pa chu artui pum khat kan pe a. Chumi kum krismas chu hlim leh lawm takin kan hmang ta a ni.

19 Responses to “Panlai Nun – Pawl Li Exam”

1
H.Vangchhia Says:
September 26th, 2012 at 8:09 pm
‘No comment’ anla inti… keiin ‘yes comment’ tiin ka hawng e hairehai

Report this comment
2
Bigsmoke Says:
September 26th, 2012 at 8:20 pm
Pui hle mai….exam lai a zir buai duh ting tang lo pawn pahnihna i la ni thei a nia!!!!! Nge ni a exam zawng2 hi pahnih in ni zawk??

Report this comment
3
H.Vangchhia Says:
September 26th, 2012 at 8:26 pm
#2 I sawi chhuah takah chuan kan nu, tennis a champion tum kha minti hrechhuak hairehai A tumpui tur alo kal loh vangin a champ

Report this comment
4
sheldon Says:
September 26th, 2012 at 9:21 pm
Mahminga chu i ti lunglenthlak hle mai. Kei chu naupan lai sawitur ka hre mumal ve lo tawp mai.

Ka la hriatreng pakhat chu pawl 5 ka zir kum, exam dawn zanin ka pi tuibur ka zu chhin a, a tui kha tlem ka lo lem palh aniang, ka rui ta lawm. Ka luhai, luakchhuak, ek chhuak bawk. Khami zan khan lehkha pawh ka zir thei lo tih chu ka la hria.

Report this comment
5
drake Says:
September 26th, 2012 at 10:03 pm
HV in pan lai nun link lo paste leh bawk se kim ni mai hehehe fth

A va reh ve maw le, @Chemtatrawta ka hnial dawn maw ni le

Report this comment
6
Jacka Pi Says:
September 26th, 2012 at 10:07 pm
Sheldon, Mahminga te naupan lai te chu a la rei lo em alawm, keini naupan ve lai te chu han hriatreng phak chi rual a ni tawh lo a lawm

Report this comment
7
Sihtea Says:
September 26th, 2012 at 10:33 pm
Dr Mahminga chu aw!!! i nau pan lai a, i nun khaw har na chuan
tun thleng pawh in a la thlah thlam duh chuang si lo che a,
i khaw har na hnem tu turin i EVI tur lah, i la hmu rem chang rih si lova.
I hring nun khua chu, a har ve thin hle ang maw?

Report this comment
8
sheldon Says:
September 26th, 2012 at 10:49 pm
@jacka pi..hahaha. A ni tak ang. Kan naupan ve lai kha chu a rei tawh eee!

Report this comment
9
Dr Mahminga Sailo Says:
September 26th, 2012 at 11:15 pm
Awm loh hlanin min lo rel elo?!
@Bigsmoke, a nih duh hmel mang e, hahaha… Mi 40 chuang kan ni ve a, ka exam-pui te an thiam loh vang pawh a ni thei a nia,
@ sheldon and jacka pi.., ka hriatrengna hi ui leh zawhte bak hian an tibuai lo alawm,
@ sihtea… Ka eve tur hi khawiah tuan tak ang maw?

Report this comment
10
Awmtea Khiangte Says:
September 26th, 2012 at 11:16 pm
A ngaihnawmin i van ziak thiam tak em! Kan tetlaia sikul exam kan peih loh theihzia kha… Thiam mah ila kan huphurh ve em em a. Class kal erawh a nuam ka ti thei hle thin

Report this comment
11
Mx Says:
September 27th, 2012 at 12:07 am

Report this comment
12
likone Says:
September 27th, 2012 at 2:00 am

Report this comment
13
Chhuaklinga Says:
September 27th, 2012 at 6:45 am
Nizan khan ka hmu a, ka chhiar chak khawp mai a, ka chhiar hman si lo.

I va ti lunglenthlak ve aw. Kan pawl li exam tur kan han intihtheih zia leh kan phur zia kha min tihrechhuak. Class dang aiin kan han exam hmasa ngei mai a, kan hnuai lam class ho khan ngaisang tih hriat tak mai mitmeng khan min han en ngei bawk a.

A ngaihnawm ka tih chi. Duh aiin a tawi mah mah, han ziak zel teh.

Report this comment
14
evergreen Says:
September 27th, 2012 at 10:05 am

Report this comment
15
Dr Mahminga Sailo Says:
September 27th, 2012 at 10:10 am
@ Chhuakling… Nia ti raw. Exam zawh a, exam zo lo ho bula han intihthawven vel kha a nuam thei ee…

Exam kan zo te te a, buhseng ram riak turin kan insiam nghal a. Krismas lo thleng mai tur hmabak nen, a va’n nuam thin tak awww.. Ngawi teh u, a hranpa ngata ziah tur a awm tlat…

Report this comment
16
Jacka Pi Says:
September 27th, 2012 at 11:02 am
Nizana ka comment zawh atang khian ka naupanlai chanchin ka ngaihtuah ka ngaihtuah ve a, vawiin chu ka lung a leng ta hle mai..tunah zawng nu leh pa pawh nei tawh lo,pi leh pu(nu lam leh pa lam ve ve) pawh nei tawh lo chu kan ni ve ta mai bawk si a,a ho hle mai
Ka naupanlai thil pakhat ka hriat chhuah chu ka toys, nautelem leh tea set etc…te hi ka kalsan tawp ve ngailo,a bawmah ka khung fel leh vek zel, naupang fel tak chu ka ni awm e

Report this comment
17
Dr Mahminga Sailo Says:
September 27th, 2012 at 11:36 am
@ Jacka Pi… Nu leh pa, pi leh pu i nei tawh lo chu ka tawrhpui a che.. Kei pawh, ka pa hian min la dampui ve a, kan inbe zing khawp mai… Mahse, hmeichhe naupang fel tak i ni thin bawk a, i ngaituahawm lo ve…

Report this comment
18
ulawng Says:
September 27th, 2012 at 2:19 pm
Lunglenthlak leh ta raih mai.

Report this comment
19
Dr John Says:
September 27th, 2012 at 8:40 pm
Ziak ngaihnawm khawp mai

Report this comment