mi(sual).com

(Tawnhriat nei tlem chuan, kan hmuh leh hriat ang ang kan tlangaupui zel mai si a. Min hrethiam a niang chu. Film hlawhtling tak a nih ngei ka beisei)

A vawithum na’n
Khawvel changkanna um pha lo ta reng renga khawsa hi ka nia. Mi tu leh fate’n thian, chhungkua leh chhass te nena hunawl hlim taka an hnawhkhahna thin ennawm enna (theater) hi vawi thum chiah ka la lut pek a. Lemchan ka en ve te lah Mizo mimirin kan ngaihsan loh chi Hindi film ngat an ni lehnghal. Amarawhchu, lemchan ka en tawh te hi hmuhnawm ka tiin, ka inchhir ngai lem lo. Tum lawk miah lovin, kar hmasa khan ka ni te nen ennawm enna runah Hindi film kan en a, hmuhnawm ka va ti teh reng em!

Barfi!
Barfi! chu eng ang lemchan nge a nih a? English film nge Hindi film a nih reng hre miah lovin ennawm chhuahna run chu ka dailut ve tawp a. Ngai teh! Vai lemchang thiam zinga ka lawm ber pakhat Ranbir Kapoor channa a lo ni a, a hmuhnawm ka ring ve nghal tawp a. Chu-a-chhapah a changtunu lang hmasa zawk (Shruti) lah a hmeltha em em bawk si. Rin loh deuhin, Hindi film dang angin zai leh lam dual dual a awm lo, chutih rualin an rimawi awm chhun erawhin beng a fah, lung a dum phian. Lungleng mi tih takah ka lung a leng leh vawng vawng nia!

1972
Barfi chu Darjeeling tlangval bengngawng tawngtheilo a ni a. A naupan laia a nu’n a boral san avangin a pa’n a parawlpui a. Inhriatlawkna nei miah lovin, nula chhe lo tak mai; a sakhming koh Shruti, thla thum hnua pasal nei mai tur nen intawngin, vawi duai lo an inhmu a, an induh hman hle. Mahse, chunnu thu zawmin Shruti chuan a pasal hual neiin Kolkata-ah a awmsan ta a.

Chutia Shruti’n pasal a neihsan avanga khawhar nak alaiin, a pa taksa chaklo enkawl nan sum a mamawh ta. Barfi chuan kawng awlsam ber ni awma a hriat Bank rawk a tum a; mahse a hlawhchham chiang hle.

Tin, heti hi a ni a, a naupan laia a thian kawmngeih tak; Jhilmil, mi hausa tak fanu, pianphunga rualbanlo chu pawisa phuta hruaibo a tum laiin, mi sualin Jhilmil chu an hruaibo mek hi a lo ni a. A hruaibotute hnen atanga chhanchhuakin Barfi chuan an inah a hruai haw ta a. Khawsak a harsat avangin a thiannu chu Kolkata-a pemsan a tum a. Mahse, Jhilmil chuan a zui ve tlat avangin Kolkata-ah chuan an cheng dun ta a ni.

1978
Kolkata an awm hnu reiloteah, beisei loh deuhin Barfi leh Shruti chu an intawng leh ta. Shruti, a nu nawrh luihna avanga pasal nei, an nupa nuna hlimna reng hmu lovin, Barfi a’n tawng leh chu thaw a veng huai dawn emaw tih nak alaiin; beisei loh thil a thleng ta! Barfi thiannu Jhilmil chu a bo ta tlat mai. Chutia Jhilmil zawnga an buai lai chuan, Barfi’n Bank rawk a tum leh Jhilmil hruaibo a tum avang thubuai nei a nih avangin Police-in nangchingin an man leh ta. He harsatna karah hian, Shruti chuan Barfi a hmangaihna bansan mai lovin a thianpa tan theihtawp chhuah a ni.

Mahse, Sruthi tan khuarel a nunrawng ta tlat mai. Rin loh takin Barfi leh Jhilmil chu an intawng leh ta. Pianphunga rualbanlo ve ve ni mah se, an kara hmangaihna chuan nghet takin a phuar bet a. Jhilmil tana Barfi hmangaihna dik tak parvul tawh chuan, Shruti nu hmeltha leh khawsak tha tak mai chu hnawlin, nula piangsual tawng fiah thei lo leh dam chhunga buaipui ngai tur chu tiam tlat e a tihpui ta zawk a ni.

Tichuan
Hai ang tara, kelsam an put hnu chuan; Barfi pawh upa hri avangin damdawi in khumah a mu bal a. Jhilmil chuan thlahlel leh lungmuang takin Barfi tang a bei hlen a. Chu hmangaihna parmawi, Shruti tana thikawm tak, mahse Barfi a hmangaih avanga hmangaihna vanduai changtu Shruti chuan; hmeichhe naupang a nih lai atanga a duhthusam a hmangaih ngei pasal nei a, ani nena he khawvel nun par chen, tura a beiseina thamral mai tur chu ralkhat atangin zawitein a chham melh melh a.

Kan tawnah
He lemchan hian, thui tak min ngaihtuah tir a. Kristian nula leh tlangval, nupaa insiam tura kan inneihin, Biak Inah Pathian leh kohhran hriatpuia kut insuihin thu kan tiam a. An thutiam te, awlsam taka sut leh an tam avanga chhugkaw kehchhia leh fahrah an tam em em chhan hi ka ngaihtuah a, a pawi ka ti.

Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin tih hi vawngin nunpui ila. Chu hmangaihna dik chuan nupaa insiamin, chhungkua din ila. Kan rama sual tam tak hi siamthain kan pumpelh ngei ang.

Thubehchhan : https://en.wikipedia.org/wiki/Barfi!

“BARFI!” />

Similar Posts:

• HACHIKO
• Hmangaihna hi enge a awm zia aw?
• Hmangaihna
• Slumdog Millionaire
• Hmangaihna (Keima Version)

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Thursday, September 27th, 2012 at 9:00 pm and is filed under Luangliam, Movies and Videos. You can follow any responses to this entry through the RSS 2.0 feed. You can leave a response, or trackback from your own site.