September 2012, Mizo(ram) Diary

October 3rd, 2012 9:41 am by chhana

1st. Saturday: Beihrual thla (September) a ni leh ta a, Mizorama kohhran pawl hrang hrangte’n thupui neiin hun an hmang dawn. Presbyterian Kohhran chuan ‘Kristian chhungkua’ an zir ang a, Baptist kohhranin ‘Thianghlimna’ an zir dawn a, UPC-NEI chuan ‘Kristianna leh tunlai khawvel’ tih an zir ang a, Salvation Army chuan ‘Chanchintha hril’, ‘Vantlang rawngbawlna’ leh ‘Mahni inphat’ chungchang an zir dawn a ni.

2nd. Sunday: Tun hnaia ruahsûr nasa avangin Aizawl leh a chhehvel hmun thenkhat heng: Salem Veng, Aizawla H.Lalbiakmawia in, Assam type tlu, Zemabawk Galili Veng leh Falkland inrina bul, Vailui kawr kama in pakhat, Assam type, Mizopa chhiara chhawng thum chim, Chanmari-Chaltlang kawngpuia chhak lam atanga lung tla, Zuangtui Muanna veng leimin, South Hlimen a lungpher tawlh leh Bawngkawn–Durtlang kawngpuia tui lian vak maite a thleng a; hengahte hian vanneihthlak takin thi leh hliam an awmlo hlauh.

3rd. Monday: District & Session Judge, T Saikunga chuan thuthar thehdarhtute kawmin tun hnaia anticipatory bail dil tam tak chu thubuai an neihna kaihhnawiha Superintendent of Police-te’n sorkar ukil hnena information an pek that loh avangin an dilna pawmsak thin a nih thu a sawi. T Saikunga chuan, anticipatory bail dil an awm reng rengin ngaihtuah a nih hmain a tul ang ngaihtuahna atan ni sarih hun inpek thin a nih thu sawiin, “A concern SP-te hearing hun tur hrilh thin an ni a. Anni’n hma an la ang a, accused-te’n bail an dilna pawm loh chhan tur sorkar ukilte an hrilh thin tur a ni,” a ti a; chutih laiin, SP-te’n an tih tur an tih tâwk thin loh avangin sorkar ukilte’n sawi tur an hre tam lo a, thubuai neite ukilte erawh chu uluk taka an inpuahchah thin si avangin bail an dilna chu pek loh theih a nih loh thin thu a sawi. Court thil tum ber chu thu dik (justice) kenkawh a nih thu sawiin, District & Session judge chuan, “Court chuan mi dik lote dik lohna finfiah a, dan anga hrem leh, mi dikte an dikna finfiah a, an dikna humhimsak hi a tum ber a ni,” a ti a; thubuai neite chu thiamloh chantir an nih hma chuan dik lohna nei lo (innocent) anga ngaih tur an ni a, an dikna humsak a tul thu leh, Court chuan langtlang taka tih a duh thu a sawi bawk.

4th. Tuesday: Mizoram Board of School Education (MBSE) chuan an conference hall-ah Mizo tawng hman dan chungchanga inrâwnkhawmna an huaihawt a, Education Minister Lalsawta’n a hmanpui.

5th. Wednesday: Custom, Aizawl hnathawkte chuan Tuirial Airfield Veng, LAD bawlhhlawh paihna bulah saphu kawr cheng vbc. 2.31 man an man. Custom hian an thudawn bawhzuiin saphu kawr hi an châng a, polythene-a pack 52 leh buara bag 2 a vaiin kg. 386.21 hi Lalchungnunga (40) s/o Lalduhsaka, ECM Veng, Saiha, tuna Zuangtuia cheng mek kut atangin an man a ni. Saphu kawr hi Shillong atangin Lawngtea tihin sumo-in a rawn phur chhoh a ni a, Myanmar lama phurh chhoh tura tih a ni. A neitu dik tak chu Nguntea, Halkha dist. Myanmar a ni.

6th. Thursday: Tun hnaia Assam rama Bodo hnam leh Bangladesh atanga lo pêm lutte inkara buaina chhuak kal zel chungchanga hmarchhak mite’n enhranna leh harsatna an tawh avanga lungawi lohna lantir nana huaihawt North East Students Organisation ruahman naa NE pumpuia neih chu MZP kaihhruaina hnuaiah Aizawlah pawh hman ve a ni a; darkar 12 chhung neih tura ruahman a ni chungin mipuiin an thlawp that avangin chawhnu dar 3-ah tihtawp a ni. He band hi Assam-ah chuan band anga neih nilovin kawng an zawh thung.

7th. Friday: Pu Laldampuia (42) h/o Zadingliani (Laltimiti) Sihphir chu cancer natna avangin a boral a; he thihna avanga kal ve Pi Laltimiti unaupa Pu Lalthianghlima (45) w/o Lalzamlovi chu in lamah inbual tura a haw zawk chu bual in chhungah tlusualin a boral ve leh. Pi Laltimiti hian a pasal a sun na a nat dawn tawh tehreng nen a unaupa nat lawk pawh awm lova a’n boral ve leh zel hi a lainat awm takzet a ni.

8th. Saturday: Home Minister, R Lalzirliana chuan September 8, 2012 khan a bial chhunga Keifangah M/s Mabiaki Indane Gramin Vitrak a hawng a, a hawnnaah hian Supply Minister H Rohluna a tel bawk. Keifanga gas agency thar hi Indane Gramin Vitrak hnuaia Mizorama gas agency pasarihna a ni. Sorkar laipui hnuaia Rajiv Gandhi Gramin Vitrak Yojana hnuaiah Mizoramah Keifang, Sangau, Thingfal, Thenzawl, Ngopa, Darlawn leh Chawngte-ahte gas agency dah a ni tawh a; Ministry of Petroleum leh IOC phalna angin, Kawnpui, West Phaileng, Khawbung, North Vanlaiphai leh Kawlkulhahte dah leh tura ruahman mek a ni bawk.

9th. Sunday: ‘Intawng leh ngei ang Aw’ tih hla hmanga Mizote hun rei tak chhung lo awi tawh tu leh hla kungpuingpui zinga pakhat CFL Hmingthanga (45) chu chuap TB natnain Khawbung PHC-ah a boral. CFL-a hi Khamliana(L) leh Tawksungi(L) te fapa a ni. Rokhawlhna avangin lehkha hi Pawl 6 thleng chauh a zir a. A thlen phak tawkah chuan mi vengva ve tak a ni. Kum 1983 ah mipui hriatah a zai tan a, 1991 ah a album hmasa ber a siam a. 1992 ah AIR ah Grade B artist ah a tling a, Radio ah hian hla 30 vel a record a, Grade B High ah a kaisang leh a ni. Mizo lungkuai zawng taka zai thiam leh hla phuah thiam a ni a. Hla hi 100 chuang zet a phuah a. Music Video leh Audio Album 13 zet a siam bawk a. ‘Zaithiam’ tia hriat lar thin a ni a. Hla phuah thiam tak niin hla thu hman leh a thu mil-a hla thluk siam thiam tak a ni bawk. Music lamah hian a tuiin Tuipuiral huap zai intihsiakah te lawmman a lak fo tawh bakah Tuipuiral Beat Contest an neih thin lai pawhin ‘Zoawi Virthlileng Musical Club’ indinin Lead Guitarist a lo ni bawk thin a, lawmman engemawzat alo lakpui tawh a ni.

10th. Monday: Saichal khawtlang Lunglakna Quarry chu a chim a, Vanlalchama (40) chu a awm thleng a chhilh a, lakchhuah nghal ni mahse damdawi in pan pui tuma an in buatsaih lain a hliam tuar lovin a thi. Vanlalchama hian a nupui leh a fate 3 a kalsan. Saichal khaw lung lakna hi an khaw dai maia awm a ni.

11th. Tuesday: Tlangnuam RD Block-te tana infiamna runpui, PYKKA Sports chu Sihphir Community Hall-ah a hawnna hun hman a ni a, Law Commission Chairman, R Lalrinawma, MLA in a hman pui. PYKKA Sports hi Zokhua leh hmun kilkhawr zawka mite, thalaite sports lama tih hmasawnna leh an talent haichhuahna tura sorkar laipui hmalakna pawimawh tak ani. PYKKA Sports hi Sihphir leh Sihphir Venghlun ten an inthlen tawm a; September ni 11-13, 2012 chhungin Tlangnuam RD Block hnuaia khaw 13 te infiamna chi hrang hrang hmangin an inel dawn a ni.

12th. Wednesday: Health Minister Lalrinliana Sailo chuan Zemabawka Cancer Hospital a tlawh a; damlote a kan bakah, Cancer Hospital tihchangtlun zel dan tur leh hmasawnna hna kal mekte a enfiah. Cancer Hospital-ah hian tun din¬hmunah khum 10 a awm a, chungte chu damlo admit-na tura tih a ni lo a, chemotherapy late chawlh hahdamna atana tih a ni a; chemotherapy la hi nitin mi 20-30 vel an awm ziah a ni.

13th. Thursday: Association for Voluntary Blood Do¬nation (AVBD) chuan Aizawl khawpui chhunga YMA branch-te tan I&PR Auditorium-ah YMA thisen pek chungchang inzirtirna, ‘Training of Blood Donor Motivators’ a buatsaih a; YMA branch hrang hrang aiawh mi 80 vel an tel. Training hawnna inkhawm hi AVBD Vice President, Dr PL Ramliana’n a kaihruai ani. Training-ah hian MSACS-a Quality Manager Lalhmingliani Pachuau, SVBD Vice President Dr PL Ramliana, AVBD Gen. Secretary C Lalnunnema leh AVBD Joint Secy. Lalrinkima ten thupui then hrang hrangte an sawi a; sawihona leh zawhna leh chhanna hun hman nghal a ni.

14th. Friday: Serkhan – Bagha road siam naa thil dik lo awm nia sawi a nih avangin heta mawhphur tua puh PWD Engeneer in Chief Lianchungnunga leh Assistant B.Lalthanpuiate chu tiamchin awm lovin suspend annih thu DP&AR-in a ti chhuak. Suspend an nih chhung hian an headquarter tur chu Aizawl a ni dawn a; hetih chhung hian sorkar phalna lo chuan Aizawl an chhuahsan phal a ni lo ang.

15th. Saturday: Mizoram People Forum (MPF) leh Lungleia Baptist kohhran hruaitute chuan Art & Culture hall-ah ram leh hnam hmasawnna beihpui thlakin, inthlanna dik, thianghlim leh felfai chungchang leh sorkar tha chungchang sawihona hun an buatsaih. Beihpui thlaknaah hian MPF Gen.Hqrs General Secretary, Upa Lalramthanga’n inthlanna thianghlim, muanawm leh felfai neih theihna tura MPF tan lak dan leh kohhran, YMA leh tlawmngai pawl hrang hrangte’n an tawiawm dan tlangpui a sawi a; MPF hmalakna chu a tangkai hle tih sawiin, inthlannaah a tul anga tan lak zel a tul thu a sawi. Seminar-ah hian BCM hruaitu hlunte zinga mi, Rev.Dr K Thanzauva’n ‘Ram rorelna leh sorkar tha’ tih a sawi a, Synod Revival Speaker, Lalremruata’n ‘I din thar leh ang u’ tih a sawi a, Baptist kohhran upa, C Zairemthanga’n ‘Ram hmasawnna lungphum’ tih a sawi a, Aizawl Theological College-a lecturer, Rev.Dr K Lallawmzuala’n ‘Ram leh hnam humhalhna politics’ tih a sawi bawk. MPF Secretary, Dr Lalbiakmawia Ngente chuan, Mizoramah missionary-te din kohhran pathum, Presbyterian, Baptist leh Evangelical Church of Maraland-te an awm tih a sawi a; chung zingah chuan ECM leh Presbyterian chu MPF-ah an tel tawh a, mahse Baptist lam an la tel ve lo tih sawiin, BCM chu MPF-ah tel ve ngei se a duh thu a sawi a ni.

16th. Sunday: Pu Chawngtinthanga Parliamentary Secretary chu thisen Cancer avangin Kolkata Apollo Hospitalah a boral. Pu Chawngtinthanga hi August thla tawp lam atang khan a nuamlo tan a, a taksa a vual a, a thak bawk a, a khua a sik bawk thin. Dr Valtea rawnin a ni chuan skin lam entir turin alo rawn a, vun lam thiam te pawh an rawn a, a vun pawh biopsy turin an ti a, biopsy result a chhuah hmain September ni 8 inrinni khan Kolkata an pan thla ta a ni. September ni 10 Thawhtanni, khan Apollo Hospital-ah admit a ni a, damdawi ina an luhni tlai lamah thisen cancer a ni tih confirm a ni. September ni 11 zan dar 7 vel khan ICU-ah dahluh a ni

17th. Monday: Zokhawthar-Aizawl night bus, Benjamin Travels MZ-01 E-2733, Zokhawthar atanga Aizawl lam pana tlan chu Seling pelh hnu, Samaritan home chhakah chesualin, kawng thlangah a ft. 150 vel a lum a; bus-a chuang mi paruk an hliam vek a, thi erawh an awm lo. Hliamte hi Thingsulthliah damdawi inah hruai an ni a, bus hi motor dang nen an insûlpelhna lamah a chesual niin an sawi.

18th. Tuesday: Pu Lalchhanhima Varte lehkhabu ziah ‘Mangchhia’ tih chu Upa S.Vanlalhmuaka Sihphir chuan Pu Chhanate inpui Sihphirah a tlangzarh. He lehkhabu hi 1999 kuma a ziaktupa mumang a nia; fiamthu leh Pathian Thu inpawlh, Vanram kalkawng sawina a nia; lehkhabu tha tak a ni.

19th. Wednesday: Hnahthiala ICDS Project buatsaihin Hnahthial Bazar building-ah Tleirawlte Ni (Kishori Diwas) hman a ni a, Hnahthial khawpui chhunga tleirawl kum 11 atanga kum 18 inkar mi thahnem tak an tel. Inkhawmah hian Hnahthial damdawi-ina doctor, Dr Lalrengpuii Ralte, F Lallawmzuala leh Hnahthial CDPO, K Sangnghaki ten thu an sawi.

20th. Thursday: Saiha District Level Vigilance & Monitoring Committee chu DC Conference Room-ah an thukhawm a; Chairman, CL Ruala, Lok Sabha MP chuan, NREGS inhlawhnain Mizote hnathawh dan phung (work culture) a tihchhiat a hlauhthawnawm thu a sawi. Meeting-ah hian Saiha district-a MLA pahnih – PHE Minister S Hiato leh Tuipang bialtu PP Thawla te, MADC CEM, RT Zachono bakah, sorkar mi pawimawh dangte an tel a; Saiha district-a sorkar laipui programme kalpui dan leh kal zel dan turte an sawiho a ni.

21st. Friday: August 11, Inrinni tlai atanga chin hriat loha bo, Ruth Lalawmpuii (18) c/o Lalthianghlima, Ramhlun North chu tun thlenga a chin hriat a nih loh avangin Ramhlun North community hall-ah a thlahna hun hman a ni. Ruth Lalawmpuii thlahna inkhawmah hian Ramhlun North bialtu pastor, Rev. C Lalsangliana’n thlamuanna thuchah a sawi a; Ramhlun North branch YMA President, R Zonunmawia leh Ruth-i pu, Lalthianghlima ten thu an sawi bawk. Ruth Lalawmpuii sûn nan minute khat chhung ngawi rengin an ding. Hetih lai hian, Ruth Lalawmpuii pa chuan an fanu bo hnua a mobile phone number atanga message dawngtu leh thawntu, Hmingthapari, Chawlhhmun leh a thianpa, Lalchawisanga, ITI Veng te chu hriat nei tlatin a ringhlel hle bawk.

22nd. Saturday: 20th. Thursday zana Synod Camping Center Sihphir a neih atanga a ruih buai avanga tlanbo Lalpuithanga (41) s/o Khualdawla Dinthar chu Camping Center thlang, camping atanga kms khat vela hlaah thi a hmuh a ni. Kalkawng atangin zan thim hnuaia tlan a ni bawk nen kawng sirah a tlan liam ta a nih hmel. A hnuai luikawrah a lo thu tung chu hmuh a ni. A tukhum ding lam pang chu inchi khat velin a kak a; heihi a thih pui ber nia ngaih a ni. A ruang hi a lo khawng vek tawh na a; a rim a la chhiat nasat loh avangin a chetsual hlim hi chuan a thi nghal mai lo a nih a rinawm. A bo zan hian Sihphir YMA OB leh V/C ten zing dar thum vel thleng an zawng a; (hetianga ruang hmuh a nih takah hian an zawn tum hian an hmuhna bul maiah an chawl a; an thlen bak chiah a ni chu a thih nghal lo a nih a rinawm bawk nen pawi an tih thu an sawi) a tukah Branch OB-te leh Section OB-ten an zawn leh hnuah Mizo dana ni sarih zawn tura ruahman a nih laiin a ni khat niah Sihphir leh Dinthar khawtlangten hun rei an zawn hma in an hmu ta hlauh a ni. Nungdama hmuh a ni lo erawh a pawi khawp mai. He chhiattawhna chungchanga tha leh zung nasa taka sengtu Sihphir thalaite chungah Dinthar khawtlang hruaitute an lawm hle.

23rd. Sunday: Mamit khelmuala UPC (Mizoram) thalai pawl, Pentecostal Youth Department (PYD) General Conference vawi 18-na 21st. Friday-a tan chu chu a tiak ta. He conference-ah hian, kum 2013 budget atan Rs. 10,35,000/- an pawm a, kum 2013-a PYD General Conference chu Bilkhawthlirah leh 2014 conference chu Kolasibah nghah an rel a ni. He Conference-naah hian Mizoram UPC kohhran Pandal Structure hmangin Pandal zar a ni a, a dung lam 120ft leh a vang lam 100ft a zau a sak niin, mi 2,500 atang 3000 vel leng tura sak a ni, palai riak lut hi mi 2000 vel an ni. Tin, Conference rawn chhim tu Myanmar leh Bangladesh atang leh India ram chhung Mission Field hrang hranga ringtharte leh ALJC, USA atangte in palai engemaw zat an kal bawk. He Conference chhung hian Speaker heng: Pastor Lalhmunngheta, Upa K.Zoramthanga, Rev. H.Vanlaltlana, Rev Vanlalsipaia leh Upa C.Lalpianthangate an awm a ni.

24th. Monday: Chanmari YMA Hall-ah National Service Scheme (NSS) din champha, Foundation Day vawi 43-na lawm a ni a; Parliamentary Secretary (Sports) S Laldingliana chu khuallian a ni. NSS hi September 24, 1969-ah din a ni a, Mizoramah chuan kum 1973-ah Pachhunga College-ah din a ni. Mizorama college leh higher secondary school hrang hrangah din zel a ni a, tunah hian college leh HSS 76-ah NSS a ding tawh a ni.

25th. Tuesday: Spastics Society of Mizoram hmalaknain, Special Olympics: Bharat chuan Electric Veng YMA Hall-ah rualbanlo naupangte tan ‘Healthy Athlete: Fit Feet Programme’ huaihawt a ni a; Finance Minister H Liansailova’n a hawng. Special Olympics: Bharat Healthy Athlete: Fit Feet Programme-ah hian rualbanlo naupang 120 vel ke endiksak an ni a, an bun thiam zawng pheikhawk leh mawza pek an ni. He programme hmang tur hian Dr Subhash Chandra, Clinical Director, Special Olympic (Asia Pacific Region) leh Dr Hema B Singh, Paedetrician te an lo kal a ni.

26th. Wednesday: Tourism Deptt. chuan an Secretary, Pi B. Sairengpuii hovin Mizoram puma Tourist Lodge thlenna man, ei leh in man rate thar tur an duanga; hei hi kum 2008 a sorkar approved rate an hman tawh atanga thlirin an duang tha hle a ni. Tunah hian Mizoram pumah Tourism Deptt. hian Tourist Lodge leh Highway Restaurant 39 an enkawl mek a; Tourist Lodge hawn mai tur 6 (khawih lai) an nei mek bawk. Heng rate thar an duan chin te hi tunlai thil man to cho zel mil thei ang ber tura ruahman a ni.

27th. Thursday: Ignite Studio, Khatla-ah LPS Comedian Search 2012 vawi ngana chu tan a ni leh ta. Hetah hian Selection Round neih a ni a, heta tlingte hian October ni 4-ah 1st Round an bei leh dawn a ni. Hetah hian mi 93-in hming pe lutin an zingah hmeichhia 6 an tel nghe nghe a. Tel zinga upa ber chu Pu C. Vanlalzuia, kum 74, Thingdawl khua a niin Lallawmtluanga, kum 16, Chhiahtlang khua chu a naupang ber a ni thung. Comedian Search hmasa ber hi kum 2008 khan neih a ni a, khatatang khan kum tin neih chhoh zel a ni. Lawmman hi 1-na Rs 50,000/-, 2-na Rs 30,000/-, 3-na Rs 20,000/- a ni a, lawmman dang tha tak tak bakah top 5 & top 10 te’n lawmman tha tak tak an la dawng dawn bawk. Final hi November thla kar hmasa bera neih tura ruahman a ni a; kuminah hian Lalhruaitluanga Chawngte, B. Lalthlengliana leh Harry Khiangte-te’n intihsiak hi an endik a ni.

28th. Friday: Krishi Vigyan Kendra (KVK) Mamit dist. leh Indian Veterinary Association Mizoram chuan World Anti-Rabies Day (Khawvel puma ui atna hri venna ni) pualin Lengpui V/C hall-ah Lengpui khua a ui vulh tute tan free vaccination an buatsaih a; ui 50 an chiu a ni.

29th. Saturday: Kawnpui leh Bualpui inkar, Kawnpui atanga KM khat vel, Kawnpui quarry piah lawk, Zauou peng bulah Pu Laldawngliana (30) leh a nupui Pi Lalhmangihi (32) leh an fapa Lalramnghaka (10), Scooter number MZ-01/A-3566 a an inphur chu hnamdang khalh (leirawhchan phur) truck MZ-05/2967 chuan a chil-a ka chhawn an thi vek. He leirawhchan phur trcuk hi Silchar lam atanga Aizawl pan a ni a, an chetsualna lai hmun Zauou peng bul vel hi kawng a chhe hle a, kawngchhia hel tuma motor in cut kual velna lamah chetsualna hi a thleng ta mai a nih rin a ni. Accident thlen lai hian a bulhnaiah midang awm an awm loh avangin engtianga chesual chiah nge? annih hriat a ni lo. Pu Laldawnglianate chhungkaw chuanna scooter hi truck ke hmalam leh exel hian a chilhbet hneh hle a ni. Pu Laldawngliana te nupa hian fa pakhat Lalramnghaka chiah hi an nei a, an chhungkua te-a khawsa an ni. Pu Dawnga hi ABCI security Guard a ni a, a nupui leh a fapa te ram kaltur Scooter-a va thlah a tum chu hetiang hian vanduina rapthlak an tawk ta a ni.

30th. Sunday: Tualcheng khua leh Lungphunlian khua te chu Ramri chung changa an inhmuhthiamloh avangin buaina a chhuak a, Lungphunlian panna kawng chu Geletine hmanga bomb chhiat a ni.Hun engemawti lai atang khan he khaw pahnih te hian ram chungchangah buaina neuh neuh an lo nei chho tawh thin a. An inkara boruak thalo chu zual zelin khua leh khua in epna a nasa ta viau mai a ni. An inkar boruak hi a tha zawnga a kal loh chuan thisen inchhuahna a thlen mai pawh a hlauhawm khawp ang.