“Zodin SBI bula Mahatma Gandhi lim hlutna hi eng nge?” tiin MA kan zir laia kan Professor-in min zâwt a. A hnua ka ngaihtuah leh hian a hlutna chu kan thinlung lamah a lo awm daih a ni tih ka hre chauh a. A lim ngawr ngawr hi a hlu êm êm a ni hran lo, rangkachaka luan pawh ni hlei lo. Pu Gandhi-a thil lo tih tawh leh ram leh hnam tâna a theihna a lo sên zozai te han chhût chuan thinlung lamah a hlu-in, a lim chu thermocol hmang mai mai pawhin siam ta se, a hlu vet vet dâwn mang e.
Mihausa-pa lirthei dah tlar ter tuar, khalh sên loh nei ai chuan thingtlâng-pa tawlailir chu a hmangtu tân a tangkaiin a hlu zâwk ngei ang. Mihausa-pa chuan lirthei hlutna hi a chhût chhuak thiam tak tak lo, a ngah a, a khalh sêng lo va, atân eng nge chuti teh uala a hlut ang ni. Thingtlâng-pa erawh tawlailir chu a neih chhun ngawih ngawih a ni a, a kea vuah tûr bearing pawh harsa taka a zawn hmuh a ni ngei ang a, atân chuan mihausa-pa lirthei panga ai pawhin a hlu zâwk daih ang. Chuti angin sum leh pai pawh hi a ngah chuan chêng 10 hlutna hi an chhût chhuak thiam thin lo, nuai bi-ah an buai avangin. Mi rethei erawh chuan cheng 10 hlutna dik tak a chhût chhuak thiam a, nuai bi hlutna dik tak pawh a chhût chhuak thiam thin.
Miin lehkha thiamin a sâng thei ang ber zir sela, mahni room chhûngah tawm im-in inkhung kerh kerh sela; khawtlâng, kohhran leh a khawsakpui te tâna thahnem a ngaih si loh chuan hlutna eng nge a neih ang? Sum tam tak ziak bo thei tâwka thiamna nei sela, hna sâng thawkin hlawh ringawtah buai sela, a neih rosum te chu midangte tanpuinâ’n ui tlat si sela, ram tân eng nge hlutna a neih ang? Chu ai chuan lehkha pawh zir sâng lêm lo, ram leh hnam tâna mi thahnem ngai te hian mite ngaihsân hlawh lo mah se, an hlutna hi a bûk a rit zâwk ngei ang.
Rangkachak leh lunghlu te hi kan kawt kaiah let rem rum sela eng nge hlutna a neih ang? Chu ai chuan maite pum hnih khat lek pawh khawpuiah chuan a hlu zâwk âwm asin! Chumi avanga thil vâng nazawng hi a hlu e tihna erawh a ni chuang law. Nang leh kei hian eng nge hlutna kan neih ve? Mahni tâna chakai khawrh ngawt hian damchhûng hun tawi te hi kan duhâm hlur mai dâwn êm ni? Ka thiamna sângin, keima ngaihah ka hlutna hi nasa hle mah se, ka ban phâk maia mite ngaihah hlutna ka neih si loh chuan ka hlutna chu a hlu lo tihna a ni ang.
‘Hlutna’ kan teh dân hi kan chhût ngun fo a tha. “Kraws thihna avangin ka hlu-in ka mawi a ni.” Mihring lamah chuan mi rethei leh hnuaihnung ber pawh kan ni maithei, mahse, Pathian ngaihin kan hlu tlat si a ni. Chu chu eng dang vang ni lovin Amah (Pathian) thinlung lamah kan tlâk nat vang a ni. A nih chuan, keini pawh hian hlutna dik leh hlu kan neih theihna’n kan bula mite leh midangte tân kan nung tûr a ni. Khawvêlin a ngaihsân leh a ngaihhlut thil tinrêngte hi han chhût ila, ‘mahni’ sahmim puar nâna beitu an ni ngai hauh lo nia! ‘Hlutna’ hlutna dik tak chu midangte thinlunga hlutna hi a ni. Chumi rahbi hmasa ber chu “Mahni tân ni lova midangte tâna nun” hi a ni.
All the luck...
October 23rd, 2012 at 5:14 pm
ani khawp ma1
Report this comment
October 23rd, 2012 at 5:26 pm
Post hlawhtlingtak a ni e.
Report this comment
October 23rd, 2012 at 6:07 pm
If I speak in the tongues(s) of men or of angels, but do not have love, I am only a resounding gong or a clanging cymbal.
If I have the gift of prophecy and can fathom all mysteries and all knowledge, and if I have a faith that can move mountains, but do not have love, I am nothing.
If I give all I possess to the poor and give over my body to hardship that I may boast,but do not have love, I gain nothing…
Report this comment
October 23rd, 2012 at 6:46 pm
A lo chhuak ta hlawl mai…
Report this comment
October 23rd, 2012 at 7:33 pm
Tha khawp mai
…. Tunlai hian comment a tlem thei riau mai. Post tha tak tak te lo chhuakin thlawpna leh sawizuina te awm ta ngai mang lo se, thu ziak tha tak tak te a thatna leh a hlutna ang in kan hlutpui lo tihna a ni ang.. 
Report this comment
October 23rd, 2012 at 11:02 pm
Thil siamte mawhphurhna pui ber chu a siamtu duh dana awm a ni. thil kan siamin kan siam hmain kan thil siam khan purpose a nei a, chu a mawhphurhna chu a hlen loh chuan kan paih emaw kan hluihlawn emaw thin.
Pathian hian mihring a din khan purpose a nei a, chu chu amah nena len dun(walk with Him) a ni. mihring suala tluk hma khan chu chu kan hmu a, mahse sual avangin mihring nature chu a lo corrupt ta si a…chuta mihring hnena zawlnei hmanga a auh letna chu “Lalpan a phut chudik taka tih leh khawngaihna ngainat leh Pathian nena thuhnuairawlh taka len dun” a ni a.
din kan nihna purpose hi kan hriat tak loh avangin chu min din chhan min hrilh thin a, thuthlung tharah chuan a tawngkam a lo danga chu chu piantharna a ni. mihring leh Pathian union with each other programmeah chuan mihring thar, nihna thar leh ze thar a lo chhuak tur a ni a chu chu mihringin a tih ve theih loh avangin Krista chuan a rawn hlen ta a, chu chu kan rin tikah siam thar kan lo ni a…kan lo leng dun leh thei ta a.
football kan khel a…purpose chu pet goal a ni…mahse a chang chuan mahni lama pass chang kan nei..kan chhuih goal theihna turin. mihring nun purpose chu Pathian nena lendun a ni a..kan len dun theih nan dam a tul a, dam turin kan ei a tul a, kan ei tur kan neih theih nan thawh a tul a…sum a ngai a…chumi kan zawnna chu purpose emaw kan ti mai thin. a ni lo. in pass kual vel ringawt football purpose a ni mawlh lo ve.
ka’n sermon chu le.
Report this comment
October 24th, 2012 at 5:34 am
Pu Vakul chu i sermon tha dap dap ngei mai
Report this comment
October 24th, 2012 at 8:28 pm
Post tha lutuk.
Report this comment