mi(sual).com

Thuhmahruai
Hun Hnuhnung Chhinchhiahna (Mt.24:1-44, Lk.21:7-19, 25-36, etc.) tia Bible-in khawvela chhiatna râpthlak chi hrang hrang thleng tur a sawi tuna thleng ţan mek chanchin kan sawi dawn a. Heng zingah hian khawvel awmdan phung (van lam)-a harsatna thleng mek te, lirnghing, nâtna chi hrang hrang mak tak tak thleng ţhin te, leilung da zel te, ţâm (famines) râpthlak tak thleng ţhin te, mipui suatna (population reduction) thleng tur hlauhawmzia te, indona (war) thleng thut thut leh tam tulh tulh te, nuclear ralthuam hlauhawm zia te, biological weapons râpthlak tur zia te, hlauhna leh thlabârna (terror/fear)-in khawvel min tuam dan te kan hawl thuak thuak dawn a ni. Duhthusamin ka khawih hman lova, belhchhah ngai leh tihdik ngai awm apiang chu chhiartuten inthlahrung lova comment lamah belh zel turin ka ngen nghal che u a ni. Chhiatna râpthlak tak lo thleng tur kan sawi tur te hi, thilthleng tunlai ber ber (latest) an ni lova. Kan sawi ai hian kan dinhmun hi a chhe zawk ngei ang tih hi ka rindan a ni mah mah.

A thui lutuk dawn avangin, sualna lo pung zel te, sakhaw dinhmun tlahniam ta êm êm te, fundamentalist/fanatic-ho hlauhawm zia te, Kohhran chhunga chawh-pawlh nun lo hluar ta êm êm te, Krista der/zawlnei der rawn pung zel te, zirtirna dik lo (pluralism) rawn hluar ta te, Pathian thu pawm dan dal tak (liberalism) avanga thlarau lama kan hniam tawh zia te, Setana biakna & Setana pawl (Satanism) hial pawh a hring a hrana hmuh-theih a nih tawh thu te chu remchang dangah kan khel leh zawk turah ngai ila.

1. Ozone Layer Pawp Mangan-pui
Ozone Layer hi Oxygen chi khat Ozone 03 a ni a, Ni leh Lei inkara mel 6-30 vela lei tuamtu boruak a ni. Ozone hian Ni aţanga direct-a nizung hlauhawm tak (ultraviolet ray) lo kal chu a lo dang a, mihring leh thlai te ngeih tawk chauhvin a pechhawng leh ţhin a ni. Kum 1985 khan Chhim lamah a pawp tih an hmuchhuak a, reilote ah Hmar lamah a pawp tih an hmuchhuak leh a. Siamţhat ngaihna a awm silo, a pawp zau tual tual si, scientist leh sorkar-te an mangang êm êm a ni. Mithiamte chuan he Ozone hi Meikhu lam chi (factory, motor etc.) effect avanga pawp a ni, an ti.

2. Asteroids (Arsi Vakvai) Hlauhawm
Asteroids ten khawvel an rawn sut mai hlauhthawnna hi Mithiamten an neihna a rei tawh a. Asteroids hi kan awmna Lei aia lian fe fe, 8,000 vel zet awmin an hria a, heng aia tê zawk phei chu sang tam tak a awm an ti. An kawng (orbit) hi an bo emaw, an insut palh emaw chuan kan awmna khawvel (Earth) tan an hlauhawm êm êm dawn a. A dan dan tur awmchhun chu hydrogen bomb hmanga lo kah-darh emaw, thildang hmanga lo hruaikawi emaw a ni. He Asteroids pakhat danna atana senso tur hi Dollar Tluk leh dingawn engemaw zat a ngai dawn a. India ram hi chu kan Economy dinhmun-in a zir loh avangin Asteroids pahnih-khat bak chu kan dang thei lovang. Kum 1989 March 23 khan Asteroids pakhat chuan kan awmna Lei hi a rawn pel thuak tawh a, hawlh-tlanga Mel 1 bial vel chauh-a lian a ni. December 1992 pawh khan a rawn pel leh thuak tawh bawk. Heng Asteroids te hian engtikah tak kan awmna Lei hi rawn su ang maw?

3. Global Warming (Khawlum Zual Zel)
Global Warming hi mitin hriat leh buaipui a ni. Kum zabi liam ta aiin a let 2-in tun kum zabi hi a lum zawk thu Scientist ten an sawi a. Hetianga khawlum zelin a thlen mek leh a thlen leh zel turte chu Ţam râpthlak leh khawkheng avanga chhiatna râpthlak a ni. World Food Programme sawi danin tun kum zabi chhunga khawlum/khawkheng avangin heng ram- Angola, Burundi, Congo,  Eritrea, Ethiopia, Guinea-Biasan, Kenya, Liberia, Mauritania, Rwanda, Siera, Somalia, Sudan, Tanzania, Uganda, leh Zambia ah te chuan Ţam râpthlak tak a thleng, an ti.  Hetianga khawlum hi a zual zel a nih chuan Chhim tawpa vur inchhek-khawm nasa tak, tuifinriat chhungril thleng tawh (molten stage)-te chu an tui ang a, Tui lian (Flood & Tsunami) a siam ang a, Tuifinriat kama awm khaw tam tak a chimpil dawn a ni. Khawlum zual zel vanga tuifinriat chhunga vur tuiral mekin a effect nge, Himalaya tlang pawh a hniam sawt thu an report bawk a ni.

4. Sik Leh Sa (Climate) Mumal Tawh Lo
Sik leh sa mumal tawh loh thu hi khawvela Sik leh sa chanchin zirmi (Climatologists)-te chuan an buaipui tawh hle a. Khawvela Sik leh sa mumal tawh lohzia hi a ngaihna hriat harsa an ti a, “Sawilawk theih loh (un-predictable) a ni e”, an ti tawp. Sik leh sa (climate) chungchanga rindan tak ngial pawh an sawi thiam tawh lo hi a mangan thlak hle. India ram chhungah ringawt pawh hian State ţhenkhatah chuan Climate-in awmzia a neih theih tawh loh avangin Loneituten harsatna lian tak tak tawkin, an nunna hial an inlâk (suicide) phah fo a nih hi! Kan ramah tak ngial pawh, Nipui, Thlasik, Fur leh Ţhal ten an hun an hai an hai ta mai te hi thil mak a tling ta!

5. Air Pollution & Acid Rain
Air Pollution & Acid Rain hi khawvelin a buaipui tawh hle bawk. Meikhu avanga boruak bawlhlawh chuan Acid Rain (ruah thur) nasa takin a siam a, hei hian mihring leh thlai nasa takin a nghawng a. Boruak bawlhlawh (air pollution) hian Suan (lead) a siam a, boruaka suan lo pung tual tual chuan Thisen sâng (high BP) a tipung nasa hle bawk a. Zirbing miten an chhut dan chuan, boruaka Suan insiam hi Motor khu aţangin 90% a insiam a, Factory khu aţangin 80% a insiam a, Thil hâl khu aţangin 75% a insiam an ti {Meizûk pawh hi mahni kawchhunga thil hâl angah ngai nghal ta ila}. WHO chuan Europe khawmualpui khu Pollution avangin Dil, luipui leh thlai hmun te chu Acid rain hian a tichhe nasa zual tih an hmuchhuak. Kan Zoramah ngei pawh hian chik taka zirbing (research) ni se’ng chuan, hriselna kawnga kan tlâkhniamna chhan zingah hian Air pollution hi a tel ngei a rinawm. Kan nâtna hrang hrangte pawh hi a tam zawk chu pollution vang a nih ngei a rinawm hle a ni.

6. Leilung Da Zel
Leilung da zel chungchang pawh hi Leilung chanchin zirmi (Geologists)-te chuan an buaipui tawh hle a. An chhut danin, minute khat zelah ramngaw Acre 150 chereu ang a ni, an ti a. Kum za liam ta chhung khan kumtin thlaler hi 50% in a pung a, hei vang hian leilung, lei ţha ni ţhin kha, 50% chu Thlalerah a chang tawh a ni, an ti bawk. Kan Zoram zimte pawh hi en ila, Thlaler-ah a chang chho mek a, thlai thar tlem sawt zia leh leilung dâk tawh zia hrechiangtu vek kan ni awm e. Eng chen tak min daih ang maw?

7. Lirnghing A Pung, A Nâ Tulh Tulh
Bible-in “hmun hrang hrangah lirte a nghing ang” (Mark 13:8) tia a lo sawi lawk angin Lirnghing hi a kum telin a pung chho zel a, a nghing zing tulh tulh a, a thawk nâ tulh tulh bawk niin a lang.  Wikipedia hian lirnghing thlen tawh dan hi a record ţha-in, a up-to-date ţha khawp mai. Hrechiang duh tan hetah hian en zui mai nise- https://en.wikipedia.org/wiki/List_of_earthquakes, < a href="https://en.wikipedia.org/wiki/List_of_20th_century_earthquakes" target"_blank">https://en.wikipedia.org/wiki/List_of_20th_century_earthquakes, https://en.wikipedia.org/wiki/List_of_21st-century_ earthquakes#2012.  Tun Kum zabi 21-naah hian vawi engzat tak nghing ang maw? Kum 12 kan kal dawn chauh a ni mai si? N.E. India-ah ringawt pawh kum 2006 khan vawi 23 lai lir a nghing tawh bawk (TA-GupShup: CHIBAI, 13/1/2010,5:58 pm).

8. Nâtna/Hripui Râpthlak
Khawvelah hian Hripui tihdam theihloh, a duh hun huna thleng thei chi hi 13 vel a awm a- Ebola, Marburg, Junin, Sabia, Oropouche, Yellow Fever, Rift Valley Fever, Machupo, Lassa, Dengue, AIDS, HTLV, Hanta te hi a lâr zual te an ni. Tin, TB, Malaria, Cancer, Cholera leh Lung lam ţhatlohna (heart-attack) lam chi hi tunlaiin a rawn hluar thar leh tlat, an ti. Ram changkang USA ah khuan Kum 1979-86 inkarah khan HIV+ AIDS vanga thi mi 15000 an awm a, tunah khu chuan AIDS vang hian kum tin mi 179,000 vel an thi angin WHO chuan a sawi a ni.

Zirmite chhut dan chuan (hlui deuh tawh mahse) Khawvela AIDS vei zat (AIDS Cases, TIME, December 15, 2009):- (1) N. America- 1,890,000, (2) Latin America-8,400,000, (3) Caribbean-930,000, (4) Sub-Saharan Africa-66,500,000, (5). N. Africa & Middle East-610,000, (6) Western Europe-1,500,000, (7) Eastern Rurope & Central Asia- 870,000, South & South-east Asia-9,700,000, (9) East Asia & Pacific-860,000, (10) Australia & New Zealand-75,000. Kum 1999-2009 (Kum 10) chhunga Nâtna Thihpui lâr zualte:- (1) ARI (Avute Respiratory Infection)-5.4 millions, (2) T.B. –4.1 millions, (3). Diarrhoea-4.3 millions, (4) Hepatitis B–4.2 millions, (5) AIDS–4.5 millions, (6) Diabetis-3.5 millions.

Achunga tarlan nâtna tam zawkte khi chu engemaw hun lai kha chuan umbo tawh anga ngaih a ni a. Mahse, tun hnu hian an rawn inlâr thar leh a, hriat fuh pawh a har bakah, hriat fuh meuh chuan a lo thawk nasa hman viau zel a, Doctor-te pawh an mangang hle ţhin a, awlsam taka an enkawl dam ţhin kha, an enkawl dam thei mai tlat ta lo a nih chu! Bible-in Hun Tawp Dawn hnaih-a “Hri-te a lêng ang” (Luka 21:11) a tih hun hi kan thleng ţan ta a ni mai lo maw? tih chu mi tam tak-te Zawhna a ni ta!

9. Ţam (Famines)
Morris Williams, Executive Director, World Food Council, USA chuan, “Kum 2004 aţang khan khawvela mihringte hian ei tur kan indaih lo ţan a, kum 120 a liam hunah chuan Ţam nasa tak kan hmachhawn dawn tih a chiang hle”, a ti. Kum rei vak lo liam ta-ah khan Superbugs (Killer bees, Five ants, Locusts) te an puang nasa a, Asia, Africa leh Latin America te an bei vak a, Thlai leh thawmhnaw-te an ei chhe nasa. Africaa Mali khuaah chuan Khau (Locusts) 12 lekin Vaimim Leilet Acres 2-a zau chu ni 1 lekah an ei zo vek! a râpthlak hle. US Based Earth Watch Organization chuan, Ramngaw ţha tak tak ţhin kha Sq. Km. 260000 lai Thlaler deuh-thaw ah a chang tawh a, nitin hectars 6,000,000 thlaler-a chang mek ang a ni a, minute 1 ah Ramngaw acres 150 chereu zel ang a ni. Kum 100 liam ta chhungin kumtin thlaler hi 50% in a pung a, America, Asia leh Africa Continents-a buh leh thlai chinna ţha tak tak ţhin pawh kha mangan-thlak khawpin a da tawh a ni, an ti!

10. Population Reduction (Mipui Suatna) Awm Dawn!
July 1980 daih tawh khan Edmund Muskie, US Secretary of State chuan, “Kum zabi 21-na hnu lamah chuan khawvel mihring hi Billion 6 (6,000,000,000) chuang kan awm tawh dawn a, leilung leh ei turin min daih tawh dawn loh avangin mihringte hi suat-ţhen kan ngai dawn a ni,” a ti! He Mihring tam lutuk harsatna (Over-Population Problem) sutkian nan hian Hmanraw 2  rawt a ni a, chungte chu– (1) Birth-Control (til reh & chhul paih/ţhuipin!), (2) Population Re-duction (mipui suat/tihlum/tihbo) emaw, te hi Tihdan Ţha Ber (best method) nia a hriat thu President hnenah Thurawn a pe a. He Thurawn hi mi pawimawh tam takin an thlawp hle. Thlawptu zingah hian – Roberts McNamara, President, World Bank, Thomas Ferguson, Head of Latin America, US State Deptt Office of Population Affairs, Richard O Hinger, Democratic Congressman, New York, Harland Cleveland, International Director of Aspen Institute for Humanistic Studies, Colorado, Gen. Maxwell Taylor, Commander-in-Chief of the US Armed Forces, Prof. Garrett Hardin, Ecologist, University of California, te chu a langsar zualte an ni.

He Population Reduction hi heng ram rethei zual – El Salvador, Vietnam, Africa-ah te hian hman nghal theih tura beisei a ni. He Population Reduction atan hian Eng Hmanrua Nge an hman ang tih an sawihonaah- (1). Ei tur pek loh, ţam tir (famine), (2). Biological/Chemical weapons hmanga suat, (3). Birth-control hmang uar tura ram hrang hrang President/Prime Minister-te thupek, tih te chu an lungrualna a ni. Prof. Hardin chuan khawngaihna leh lainatna nei miah lovin, “Let the starving millions die,” a ti a, Thomas Ferguson pawhin, “The quickest way to reduce population is through famine or disease (biological weapons),” a ti tawp mai a ni!

11. Indona (War) Râpthlak Tak Thleng Dawn!
Indona hi kum liam ta (kum 6000) chhung khan khawvelah hi vawi 14500 aia tam a thleng a, Maktaduai 4000 velin an thih phah tawh anga chhut a ni. Tunah chuan thiamna leh finna a san tawh êm avangin, Khawvel Indopui hi thleng ta se, Kum 6000 liam ta chhunga thi zat let engemaw zata tam khi darkar reilote chhungin an thi hman tawh dawn a ni, an ti.  Kum 1945 aţang khan Indona tenau hi thleng reng anga ngaih a ni a, Indona lian tham hrim hrim pawh hi vawi 150 vel a thleng tawh a ni.  Bible hian ram hrang leh ram hrang indona chauh hi a sawi lova, “hnam hrang leh hnam hrang indona” (ethnic war) hi a hluar hle dawn a ni, a ti zawk (Mark 13:8). Mizoram zimte-ah pawh hian “ethnic war or ethnic issue” hian kian zai a rel dawn lo a ang viau mai!?  Dr Gill, NT scholar lâr tak chuan, “Lal Isua hian synonymous phrase ţawngkam (Greek. Basileia, kingdom) a hmang a. Hei hian ‘Romans against the Jews and the Jews against the romans’ a sawina a ni” a ti a. Chuvangin, “Ethnic war” (hnam hrang leh hnam hrang indona) sawina angin scholar-ten an pawm tlangpui.

US President hlui Ronald Reagan chuan, “Mihringin, Indona atana hmanrua a siamthar-te reng reng hi hmang lovin a dah mai mai ngai lo. Sorkar hrang hrangte hian Nuclear/Chemical weapons kan nei vek tawh si a, Nuclear hmanga Indona hi a thleng ngei dawn a ni tih hi thil chiang sa a ni,” a ti tawp bawk. Khawvela thuhriltu hmingthang Rev.Dr. Billy Graham pawhin, “Tunlai khawvel dinhmun hi ngun taka ka ngaihtuah hian, ram hruaitute ţawngkam leh ngaihdan-te ka chhut chet chet hian, Nuclear bomb hlauhawm leh râpthlak taka an intin reng lai hian, engtin nge remna leh muanna hi khawvelin a neih theih reng reng ang? Remna leh muanna thu sawi hian awmzia a nei dawn lo tih a chiang reng a ni,” tiin a beidawn thu a sawi tawp a ni.

12. Nuclear Râlthuam Hlauhawm Lutuk!
Nuclear weapons hi khawvela Indona hmanraw hlauhawm ber a ni tih hre rengin, khawvela Sorkar ten an siam tam tulh tulh a. UNO in Nuclear ralthuam siam a phal tawh loh hnu pawhin a rukin an la siam zel a. Tunah hian khawvelah Nuclear bomb Megaton 10,000 zet a awm tawh anga chhut a ni. Heng zinga 90% te chu Europe, America leh Asia-ah te tla tura buatsaih lawk diam tawhte an ni a. An zinga 10% te chu Africa leh Latin America etc.-a tla tura siam an ni bawk. USA khuan Nuclear weapons 25,000 a nei a. Pakhat phei chu Megaton 9 laia rit a ni (Kiloton 1000-Ton 10,00,000=Megaton).

Kum 1945-a Hirosima (Japan)-a an thlâk kha Atomb bomb a ni a, TNT Kiloton 12 leka rit a ni. Tuna Nuclear bomb an siam te reng rengah hi chuan Atom bomb ang kha chu a cap (a tih-puahna) ang lekah an hmang tawh a ni. Hirosima ah khan mi 1,40,000 lai an thi a nih kha. Russia siam Nuclear bomb SS18 phei chu Megaton 50-a rit te an ni a, Hirosima-a Atom Bomb let 4000 zeta chak a ni tihna a nih chu!

Khawvela Sorkar-te Nuclear weapons neih zat tlangpuite (latest a la ni lo mah mah):- (1) USA–25,000 Warheads, range 13,000 km, (2) Russia–22,500 Warheads, range 13,000 km, (3) UK–21,380 Warheads, range 13,000 km, (4) France–860, Warheads, range 13,000 km, (5) China–850 Warheads, range 13,000 km, (6) India–165 Warheads, range 13,000 km, (7) Pakistan–125 Warheads, range 13,000 km, Israel–112 Warheads, range 13,000 km, (9) Irag, Iran, N. Korea, Libya ten Nuclear weapons an neih thu leh an siam thu an tarlang bawk. Achunga tarlan Nuclear Warheads ho khian an dahna aţangin Khawi ram pawh a kap pha/thleng thei vek bawk a nih chu, a mangan thlak hle mai!

13. Biological Weapons. Hrichhia Ralthuamah Hmang!
Biological Weapons (bio-chemical weapons) hi Nuclear Weapons aia hlauhawm lo zawk a ni na a, a ţangkai zawk mah turah an ngai. Scientist-ten a chhan an sawi-ah chuan, “Sorkar khan, an target bik ram, hmun leh mihring kha nâtna leh tûr (bacteria, virus, fungi & poison) hmangin a rukin, ngawi rengin an bei thei mai dawn a ni,” an ti!  Biological Weapons-ah hian inkaihchhawn theih nâtna tuihri (cholera), smallpox, viral haemorrhagic fevers, plague, nerve gas (sarin, staphylococcal, botulinumtoxins, mycotoxins, fungi) te a tel thei vek a ni. A chunga tarlante khi an tui tlan lai-ah emaw, an chaw ei tur-ah emaw an dah/phul ang a, an hmelma-te tihlum nan an hmang mai dawn a ni. Khitiang Biological Weapons khi Vietnam Indo-ah khan US-in a hmang tawh a, Irag pawhin Kurds a beih khan a hmang tawh bawk.

Kum 1995 March khan, Japan mi Aum Shinkikyo chuan Tokyo khawpui-ah Sarin Nerve Gas hmangin mi a bei chiam a, reilote chhungin mi 12 an thi a, 5,000 te chu hospital-ah an admit hman avangin chhanchhuah an ni. USA leh Russia chuan Smallpox Virus hi Biological Weapons atana hman theih turin an dah ţha reng tawh tih an zep lo. Kum 1995 daih tawh-ah khan, KGB Officer-te thurawn angin Smallpox Virus hi Russia chuan Scientists leh Technicians 60,000 rual chhawrin Biological Weapons Tons 20 a siam tawh thu leh Secret Laboratory, Army’s Virological Centre, Zagorsk, Russia-ah a dah ţhat thu hriatchhuah a ni.

Biological Weapons an hman lâr zualte hnathawh dan râpthlak tak hi tlemte i lo en teh ang:- (1). Pneumonic Plague hi chuap lam nâtna, enkawl vat loh chuan ni reilote chhunga thihna thlen thei a ni, (2). Typhus (Typhoid chi khat) hi khawsikpui hlauhawm ber, micro-organism avanga awm, malaria tih loh-ah chuan mi suat hnem ber a ni, (3). Butulinus Toxin hi tûr chak ber chi, Cyanide aia 300-a chak zawk gm 180 chauh pawh North America-a awm zawng zawngte tihlum thei a ni, (4). Nerve Gas hi convulsions (khawng), thawktheihlohna leh thihna second 30 chhung leka thlen thei a ni. Hei ai maha chak zawk leh hlauhawm zawk chu China-in a siam tih Prophetic Alert, December 1999 chuan a tarlang.  Tichuan, Biological Weapons hi a senso a tlem a, a tlawm zawk bakah, a zangkhaiin a Thawk chak bawk si a, an tum mihringte chauh a khawih thei bawk nen, a ţangkai ber dawnin an hria a, Sorkar hrang hrangin a rukin an siam nasa tawh hle tih US CIA leh FBI ten an report a ni.

14. Nuclear Hmanga Indona Awm Ta Se?
Nuclear hmanga Indona hi thleng ta se… A râpthlak dan tur kan suangtuah thiam lo mai thei. Mithiam-te sawi hi i lo ngaithla teh ang. Dr. Herbert Abraham, Radiologist, Harvard Medical School, Hardvard University, USA chuan, Nuclear hmanga Indona awm ta se, mihring tluk leh dingawn aia tamin nunna an chan nghal ang a, hemi zat bawk hian hliampui an tuar ang. Dam khawchhuak tana a râpthlak tur zia chu– (1) Boruak thianghlim leh tui thianghlim a awm tawh lovang, (2) Ruah pawh Nuclear ruah-in a sur ang, in tur pawh tûr a ni mai dawn a ni, (3) Nuclear puak intawk leh inhlap velin thlipui nâ lutuk a siam ang, (4) Boruak sa lutuk (intensive radiation) chu tuar chi a ni lovang, (5) Khawvela Nuclear bomb zinga 30% chauh pawh puak se, mel 100 bial vela kang thei zawng zawng deuh thaw a kang ang, tuite pawh a so but but thei ang, (6) Meikhu chhuak chu atom maktaduai 300 a tling ang a, thli chhem kian theih loh a ni ang a, thla engemaw zat chhung chu chhum a zing phui mup ang a, ni a lang tawh lovang!

(7) Thla khat chuang khawvawt lutuk avangin mi tam zawk chu kan khur hlum ang, NUCLEAR WINTER a inţan dawn chauh ang, Hydrogen bomb puak khan vaivut khu nasa tak a siam ang a, meikhu awm lo pawh nise, thla engemaw zat chhung chu vut khu a zing phui mup tho vang, (9) Nâtna chi hrang hrang, hrichhia a lêng ang a, hrichhia hian dam khawchhuak tam tak a suat leh ang, (10) Radiation effect-in mit a khawih chhia ang a, ni lo chhuak chuan tûr hlauhawm tak (ultra-violet ray) a rawn keng tel tawh ang a, radiation nen an ţangkawp ang a, mit tan leh vun tan hlauhawm tak a ni ang, (11) Thla 2/3 hnu-ah chuan Vawt-in dil zawng zawng a hmet khal vek ang a, ramngaw zawng zawng thlalerah a chang vek bawk ang.

(12) Boruak chhe fuankhawm (nitric acid) chu vansangah km 15 velah a invawrh-chho ang a, Ozone a han sut chhiat belh leh ţeuh ang a, nizung tûr (radiation) chuan direct-in lei a rawn chhun ang a, Skin Cancer nâtna chu tlang hrilêng ang lek a ni tawh ang, van pawh a lang dumpawl (blue) tawh lovang a, a lang Eng (yellow) tawh zawk dawn a ni.  (13) Thla 3 hnu-ah chuan ni êng lang ve tawh tura beisei a ni a, mahse, ni êng pangngai anga ngai-awh leh tur erawhchuan kum 15 vel a duh ang! Tui thianghlim leh boruak ţha nei tur phei chuan damrei nghah thil a ni tawh ang. Chuvangin, a dam khawchhuakte tan pawh Damlai Hremhmun a ni ringawt ang a, thih tho an hmabak dawn a ni (Cf. Zak.14:12, Mal.4:1-2).

15. Hlauhna Leh Thlabârna-in Khawvel Tuam
Khawvel hun tawp dawna chhiatna lo thleng tur zingah Hlauhna leh Thlabârna (terro/fear) hi a tel tlat mai (Lk.21:26). Hun tawp dawnah chuan Hlauhna leh thlabârna-in harsatna nasa tak min la thlen dawn a ni. US ah sawn chhiat-thut te, tharum thawhna te, tualthahna te, intihhlum te, pawngsual te, inrawk leh invau, hriselna chungchanga hlauhthawnna ten Khawpui leh Thingtlang-te a tuam vel a. Hlauhthawnna-in an khat tih News and World Report chuan a tarlang.

Kum 1999 November daih tawh pawh khan, Pentagon Computer-in “Russia Missile-in US a rawn bei e” tia a report avangin an buai a, US chuan a sangawizawnpui Britain, Germany, Italy, Belgium, France, Cannada te chu hrilh-in Missile leh Nuclear bomb phurtu zawng zawngte chu Russia kap tura inralring turin a hrilh vek hman tawh a, US President an bepawp thei lawk silo, an vanneih a siamin Computer-in a lo hresual a lo ni a, an him ta hrâm a ni! A pawi teuh khawp mai.

Tunah khuan Russia chuan darkar chanve lek chhunga America khawpui hrang hranga sur thla tur Nuclear bomb 7500 a tinzawn reng a, US pawhin Russia khawpui hrang hranga tla tur Nuclear bomb 9500 a tinzawn ve reng bawk. New York leh Washington phei khu chu ram hrang hrang Nuclear bomb 64 ten an tinzawn reng a ni, hengte hi Hmehna (button) pakhat lek hmanga kah chhuah theih vek an ni! Nuclear bomb vang pawh ni lem chuang lovin, engemaw Hlauhna avangin keini Mizoram tak ngial pawh hi kawngkhar leh tukverh-te kalh lova thlamuang taka mu ngam hi kan tlem viau tawh lo maw? Ram changkanga thleng mek angin, Mizoram khawpui ber Aizawlah ngei pawh hian, rukru leh misual hlauh vanga mut-ţhat ngam loh chu thuhran nise. Mahni rila rah ngei, mahni fate hlauh avanga thinthi-a mu ngam tawh lo nu leh pa hi engzat tak awm ang maw? Hei hi Pathian min hriattir a ni tlat mai si a, a dik ngeiin ka ring bawk!

Chhiatna Lo Thleng Tur Atan Hian I Inpeih Tawh Em?
Sam ziaktu chuan, ringtute dinhmun ngheh-zia leh duhawm-zia hetiang hian a sawi a, “LALPA ringtute chu Zion tlâng, tihnghin rual loh, kumkhuaa awm reng tur ang chu an ni. Tlâng chu Jerusalem vela a awm {reng} angin, Lalpa chu a mite velah a awm {reng} ţhin…Leilung hi lo danglamin, Tlângte hi Tuifinriat chhung daihah insawn mah sela, kan hlau lovang. A tuite chu ri hum humin phul bulh bulh mah sela, a fawn nasat avangin tlângte hi nghing dur dur mah sela, kan hlau chuang hek lo vang…”(Sam 125:1-2, 46:1-3), tiin.

Pathian thu-in a sawi ang khian, lalna te, thuneihna te, thiltihtheihna te, thil lo la awm tur te, nawmsakna te, sum leh hausakna te, nulat-tlangvalna te, hlauhna te, manganna te, hrehawmna te, thihna te, lungngaihna te, tihduhdahna te, ţamna te, saruakna te, hlauhawmna te, khandaih te, leh harsatna te hian Lal Isuaa rinna nghat tlattute chu a tibuai ve ngai lova, tui luang kianga thing phun ang a nih avangin a hnah a hring reng a, khaw lum a hlau lova, khawkhen kum a pawisa lova, rah a ţhulh ngai lova, a hun-te ah a rah zel ţhin a ni (Rom 8:35-39, Jer.17:7-8). Engnge i dinhmun dik tak le? Nangma mimal-ah emaw, in chhungkua-ah emaw, khawvel pum huapin emaw Chhiatna râpthlak lo thleng tur leh tawk tur anga i ngaihtuah hian… i zâm ţhin em? A nih loh leh, Malsawmna sum leh pai te, hlawhtlinna te, thuneihna te, lalna te i lo chan-in Pathian nge ropui chang nangmah?

Kum 2007 khan Pathian Thlarauvin ka hnenah thu a sawi a, sawichhuak ngam lovin ka hup-bet tlat a. Tunah hian ka sawichhuah a ţul tlat. Zofate hi Lalpan min hmangaih a, min duhsak êm êm a, London aţangin missionary tirin, min rawn zawngchhuak a. Tunah chuan Chanchin ţha avangin khawvelah tisa leh thlarauvah hriat-hlawh khawpin kan lo hmingthang ta!  Mahse, tunah hian “Thilpetu (Pathian) ni lovin a thilpek (malsawmna) kan buaipui zawk” ta tlat mai! Min hmangaihtu, min zawngchhuaktu leh mal min sawmtu Pathian nung kan theihnghilh ta!  Hmangaihtu Pathian rilru kan hliam nâ lutuk!  Kan inhriat-chhuah theih nan Eiraltu min pe a, thlarau leh tisaah kan ral mek a, kan kang mek a ni.

Kohhran hrang hrangte hi han in chhut chiang ila, member leh hming ziak kan pung tulh tulh a. Thawhlawm (thilpek) leh kohhran project leh activities  pawh a tam tulh tulh. Missionary leh Pastor leh fulltime worker leh evangeslist kan tam tulh tulh bawk. Chutihlaiin, mimal, chungkua leh kohhran te hi han inenchiang ila, thlarau lamah erawhchuan kan awngrawp tulh tulh a, kan hniam tulh tulh a, kan va pachhe ta em!  Zep chi a ni tawh lo!  Chuvangin, Zoram-a ringtute min sawisa a, min diriam a, min khawih-harh turin kan rila rah ngei, kan fate chu Setana’n ualau takin a hmang ngam tawh a nih hi!

Setana’n kan hmangaih ber ber (nupui/pasal/fanu/fapa)-te hmangin min ti-hrehawm a, a duhtawkin min sawisa ta! Pathian thu nung chuan, ringtute dinhmun ngheh-zia leh hlauh tur a awm lohzia min hrilh mawlh mawlh laiin (Sam 46:1-3, 125:1-2), nu leh pa tam tak chuan, mahni rila rah ngei kan fanu leh fapa te, nupui te, pasal te hlauh avangin, zanah pawh thinthi-in kan mu ngam tawh lova, mahni nupui leh pasal-te chungah pawh kan thla a muang zo tawh lova, mahni inchhung lumah tak ngial pawh riak ngam lovin, Lal Davida angin fate hlauvin bihrukna zawngin, hmun him lam panin kan tlanchhia a ni lawmni?  Hawh u, Zoram nu leh pate u, ringtute u, a tlai luat hma leh thim-in min nan hma hian, kan dinhmun chhiat zia hi hria-in i harh-chhuak thuai ang u. Lalpa hnenah i kir leh ang u.

Similar Posts:

• Burma
• Bomb neih a mamawh!
• Tunlai khawvel
• Vawiin hi Hiroshima chunga Atom bomb an thlak kum 65 a tlinna
• Tunlai mit ka hlei chakna leh eng eng emaw!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, November 4th, 2012 at 6:30 am and is filed under Economics, Event, Health, Information, Lifestyle, Mizo Society & Culture, Mizoram, Nature, News, Religion. You can follow any responses to this entry through the RSS 2.0 feed. You can leave a response, or trackback from your own site.