Jona hi Pathian Zawlneite zinga chhiar tel ani ve tlat mai a. Pathian thu awih duh lovin Pathian tirhna loh lam daihah te a han tlanbo chung pawhin, Zawlnei hlawhtling tak chu ani ang reng lawi a. A chanchin chu kan hre tlangpui a, sawi chipchiar ka tum lem hran lo va, amaherawhchu, ‘Engtizia nge ni a, Pathian aw meuh hre si a, Pathian meuh thu pawh awih duh lova, a tirh lohna lam pan ta luah luah mai nge maw anih reng le? I lo ngaihtuah tlang dawn teh ang u.
Thlahtu bul Evil eh Adama ten Pathian thu awih lova, Bumtu Setana(Rul) thu an lo awih tak avanga mihringte chunga Pathian thutiam anchhia alo tlak takah khan, Pathian chuan a Hmangaihna nasa tak avangin Mihringte chhandamna tur kawng alo buatsaih lawk diam a. Rul thlah(hetah hian chi inthlah lam kher nilovin, Setana thuawihna avanga Pathian fa ni thin Setana(Rul) thlah kan lo nih takna zawk kha) leh Hmeichhia(Evi) fa hrin kal zelah mipa chi tel lova hmeichhia bawk Mari fa hrin Pathian fapa te indo tur thu leh Setana(Rul) thlahte chuan, chu hmeichhe thlah lo piang tura chu thisen an chhuah tur thu leh chu hmeichhe thlah ami chuan Rul chu a Lu a tih thitlin tur thu a lo tiam lawk diam a.(Genesis 3:15). Tichuan Pathian thiltum pui ber(ti ta mai ila) chu, Hmeichhe thlah atanga Khawvel hnamtin lo thawven lehna tur din chu alo ni ta a, Hmeichhe thlah kal zel atang chuan Abrahama a han thur chhuak ta chat mai a ni.
Amaherawhchu, helai thu hi ngun taka kan chik cheuh cheuh chuan, a indo tur dik taka te chu, ‘nang in’ a tih, Setana(Rul) leh Hmeichhe thlah ‘chu mi chuan’ a tih Isua Krista hi ani tih a lang thei awm e.
A buaithlak taa chu, Abrahama hnena Pathianin, “Nangmahah chuan leia hnam tin an la thawveng ang,”(Gen 12:3, 22:17), a tih lai taka hi Abrahama thlahte hian an man fuh hlei thei ta tlat lo mai a, Pathian khan anmahni chauh kha emaw a ngaihsak leh a thlan an inti a, a thlan chhan taka kha an hre chang ta tlat lo mai a, anmahni leh an chi/hnam atanga khawvel Chhandamtu lo chhuak tura kha an hmu thiam ta tlat lo mai a, Pathian thu tiam reng reng kha, anmahni tan chauh emaw an ti ta tlat mai a, Jentail te kha Pathianin a hmangaih ve leh a ngaihsak ve kha an ring pha ta tlat lo mai a ni.
Chumi rilru kal zel atang chuan Jona te lai lai hian, Pathian khan Ninevi khuaa Assuria Jentail ho kha a chhan chhuah duh tak tak kha a ring pha lo va, Tin, an hnena Pathian thuchah va puan lek phei chu Judami tan a tiha tih ngeih lohah a ngai ni ngeiin a lang ta a ni. Tin, khatianga an Sual thu va sawikhum kha, a hlau ve hrim hrim thei bawk ang chu. Judapa thlirna atang chuan, Ninevi khuaa Assuria mi Jentail ho hnena Pathian thuchah va puanchhuah duh loha hnial tlat kha a a thiam awmna a awm ta tlat a, Pathian pawh khan, an Juda rilru put phung a hrechiang bawk si a, Jona pawh kha hrethiamin, a umzui tang tang niin a lang ta a ni.
Jona lah khan, a tawpkhawk a, Pathian thuchah ava puan chhuah lah khan, tlanchhe pahin a puang a, an sim tak tak a ring hek lova, Pathianin meipui hmanga a han hrem a, a hal kang hluah hluah tur kha hmuhnawm thlir taka thlir a tum a nih kha.
Jona bakah hian Zawlnei Isaia te pawh kha Jentail-te hnena a chanchin tha puang tur khan a tir bawk a ni(Isaia 42:6, 49:6,22)
Kan Lal Isua he khawvela mipa chi tel hauh lova, hmeichhiain a rawn hrin tirh lai vel a Baptistu Johana khan a hnena Baptisma chang tura lokal Pharisai leh Sadukaite kha, “Rul thlahte u” a ti ang phiar phiar a!. Khatia Isua Kristaa Pathian Program ropui tak tihhlawhtlin leh tihfamkima alo awm takah khan, Pathianin a fapa amah avanga he khawvel hnamtin leh chitinte engthawlna tur hmeichhe hrina a lo pianna tur atana a hnam thlan Israel fate kha an pawimawh ber tawh lova,(Rom 1:16, 2:9-12). A hnam thlan Juda-ho lahin an lo haiin an lo hnawl ta lehnghal a. Nimahsela Pathian Program chu a tlawlh thei tak tak chuang lova, Judami anga lo piang Isua Krista avangin he khawvel hnamtinte tan Pathian nena inzawm lehna kawng alo inhawng leh ta a, He khawvel hnamtinte hnena a Chanchintha puang darhtu hmasate kha, Pathian hnam thlan Abrahama thlah ziding Juda ho vek an lo ni ta tho tho a, an martar thak ta vek lehnghal anih kha.
Tunah chuan, Pathianin Juda ho hnena mawhphurhna a dah thin kha, a Fapa Isua Krista avanga ‘a fa duh tak te’ lo ni ta, Isua Krista ringtu Kristiante koah a lo nghat ve ta thung a, (Matthaia 28:18-20, Marka 16:15-18, Tirhkohte 1:8). Pu Petera te lai lai khan, a tirah chuan an hreh tauh tauh hle laiin, Pathianin Inlarna(Vision) hmuhtirin Jentailte hnena Chanchintha puangdarh turin a tir miau si(Tirhkohte 10:11). Pu Paula lah chu, ‘Jentail-te hnena a thuchah puang darhtu a bel ruat’ a lo ni ta zel si.(Tirhkohte 9:15). Pathianin Eng hmanga chhun thlu a, a man chhan lah kha a han hrechiang em em khawp a, “Krista mi man chhan chu ka man thei dah law maw,” tiin a umin ka um zawk a ni.(Philippi 3:12) a ti bem mai.
Krista ringtu Kristian tawh phawtte chu, Pathian hnam thlan Israel thar, Pathian fapa Isua Krista ‘Mo’, a ro luahpuitu turte kanni a, He khawvela chu Chanchin tha chu puan darh zel a, Kan Pathian Lal ram din zel hi kan kova innghat ani a, Vana Vantirhkohte pawhin an thawh theih loh a ni. Abrahama thlahte angin Sakhaw dang betute leh ringlo tute, hnam dangte kan en dawngin, kan hmusit ve mai tur ani lo va, Pathianin anmahni tieng tur leh chhanchhuak tur hian kan kovah mawhphurhna a nghat ani tih hi I hre thar leh ang u.
Lalpan a thu malsawm rawh se. Amen.
Similar Posts:
- Isua leh Muhammad
- Beiseina siamtu thawhlehna
- Nang Malsawmna Ni Ang Che
- Jona Vang Emni Ninevi Khua Kha An Sim? {Sunday Pual}
- Jona Hun Hnuhnung {Sunday Pual}
(Y)
November 4th, 2012 at 9:17 am
Chhiar i1a.
Report this comment
November 4th, 2012 at 9:30 am
^Nia, chhiarin lo comment rawh u. Inkhawm ban lamah ka rawn zawm ve leh ang che u.
Report this comment
November 4th, 2012 at 9:33 am
Thla 2 liam taah khan Jona Chanchin hi ziak tumin outline ka siam a, ka rilru-ah thildang a lut leh ta zawk a, ka dah tha ta rih a. Tukin zinga Thupui ka han hmu thut chu… ka phu zawk mai a! “Khaih aw…Pu PK-an min lo ziak khalh ta a ni maw?” ka ti rilru a. Mahse, ka han chhiar thla zel a, i rawn thai lang zeuh zeuh tho na a, kan “Focus” a lo in-ang lo hlauh mai! Ringtu mimal tin-te hnena Thlarau Thianghlim hnathawh dan hi chu a mak-in, Pathian thu hi chu a va hausa em! Remchangah ka rawn puitlin ve turah ngai ila.
Report this comment
November 4th, 2012 at 9:46 am
Ka chan loh lamzawngin min her pui daih chu le, a ngaihnawm hle tho mai.
Report this comment
November 4th, 2012 at 11:18 am
Report this comment
November 4th, 2012 at 12:25 pm
Dr.John, han chhunzawm ngei tum hram teh, post pakhat ringawtah a famkim mawh thin si a. @Chhuaklinga, mi la dai dar loh lam deuh han hrut ve te hi tul tlat hian ka hre deuh thin a.
Report this comment
November 4th, 2012 at 12:31 pm
A va han ngaihnawm tiah tiah ve aw! Historical background lam nena han sawi dap hi tha ka ti thin khawp mai, a chiang bik a ni…
Isua hrista hun nen i her mil thiam hle mai bawk. Bible reference i lo parenthesized thlap thlap bawk a rilru a ti hahdam hle mai.
‘Keimah lo chu Pathian dang reng reng i nei tur a ni lo’ tih vawng nghet em em thin tute – pathian dang biak chu sawi loh Rome sorkar dan pawh zawm tha duh mang loa kawlhsen leh buaina siam ching ho, Isua Krista’n a lo hmachhawn kha kawng danga ka ngaihtuah chian chang hian ka lainat thin khawp mai… Pa leh Fapa leh Thlarau Thianghlim sawmna hi a va hlu tak em!
Report this comment
November 4th, 2012 at 1:37 pm
Jona han tih mai hian mi thenkhat chhuanlam a tan chuan tha ve tak chu nih hmel lo ti daih teh ang NOI.
Report this comment
November 4th, 2012 at 1:46 pm
Ziak chiang bawk a, Hnam sakhua te hi an inhlan thei tawh mai lo maw? Nge an chhiar ngai lo le…?
Jona chung changah chuan Nghapui kawchhunga dama a han awm thei hi a mak ka ti ngawt thin mai….
Report this comment
November 4th, 2012 at 1:47 pm
Pu Pka nge nge, sanday pual a rawn thawh tha thin mang e aw!!!
I awm na ram ah khan, Jona tih dan
ang kha i va ti ve em lovang chu maw.
A ni kha chuan ninevi khua-a mi
te khan, sim ma lek se la Pathian
in hrem se la tih kha a duh tlat.
Pathian nen an ril ru, a in per san
chiang leng lawng khawp mai.
Report this comment
November 4th, 2012 at 2:50 pm
Tukin zing inkhawmah Jona chung chang hi ka sawi a. Ninevi khuaa a kal duh tlat loh chhan kha, a hlauh vang lam aiin Jentail ho a hmangaih loh leh a en hran em em vang anih ka ring leh zual ta, thih kha a hlau vak lo em mai. Lawngah khan,”Mi la kang ula, tuifinriatah hian mi theh chhuak rawh u” a ti hmiah ngam a. Tin,Pathian hnenah pawh khan,”Lalpa, tunah ka nunna hi mi laksak turin ka ngen a che” a ti ngam leh bawk.
Report this comment
November 4th, 2012 at 3:07 pm
A tawpah khan Pathian khan Jona kha a daikhalh hnehin Jentail te a hmangaih ve tho zia kha a lantir thiam hle bawkin ka hria. Jona kha a Um (thlai zam) thi avang mai mai khan a thinur hle mai a, Pathian hnenah khan thih hial a dil a ni. Khatah tak khan Pathian khan Jona kha a chhuah chhal ta a. A siam leh a than tir pawh ni hlei lo Um mai mai a tihhlum sak avang maha Jona thih duh hial khawpa a thinrim chuan, Ninevi khawpui Pathian siam leh thantir mi sang hlira sang(nuai) chuang awm, tam tak phei chu naupang leh nausen pawisawi lo, ding leh vei pawh thliar hrang thiamlo te Pathianim a khawngaiha a ngaihsak zia tur kha a hrilh ve ta thung a ni. Pathian rorelna hmaa kan din hun hian mahni felna hmachhuanin ding dawn ta ila, min hnial dang hnehin, thiam thu sawi ve tur kan van awm e.
Report this comment
November 4th, 2012 at 3:51 pm
A ngaihnawm in a fiah tha thin hle mai. Sunday ti hlu tu i ni e. Bible thu tamtak ngaihnawm takin min hrilhfiah thin hi a lawmawm tak zet. Jona chanchin hi thawnthu ang in kan tet laiin ka nu in min hrilh thin a, ngaihnawm hi kan han ti thin khawp a
Report this comment
November 4th, 2012 at 4:01 pm
Jona chan chin han chhiar hian,
Juda ho ril ru put hmang chu
hriat theih in a lang ruak in ka hria.
Hnam dang te kha chu, Pathian in
a hma ngaih ve lo tur ah an ngai a ni
ber mai. Khaw vel hnam tin
hnaen ah, Pathian chung nung
ber chan chin puang zar tur leh,
a mah biak dan tur kal hmang kawh
hmuh tu tur-a a hnam thlan an nih
kha, an hre lo a ang khawp mai.
Hei kei ni mizo te zing ah ngei pawh,
kei mah ni hnam bik chauh hi khaw vel-a, a chan chin tha hril tur a
a ruat bik a koh bik ni a in ngai a,
huai sen tak a sawi pang pang pawh
an awm ve nual tho hi a.
Thla rau bo ral tur lai nat na nei
miah lo Jona ang kha kan nih ve
vaih chuan, Pathian thil tum
hnial kalh tu kan ni thei tlat.
Report this comment
November 4th, 2012 at 8:01 pm
Report this comment
November 6th, 2012 at 9:33 am
A tha lehpek e
Report this comment