Thal khaw romei zam an kiang a, ruahtuiin hlobet te ber atanga thingkung lian ber thlenga a chawm hun furpui pawh auh din rual loh vin a liam ta. Thlasik khaw vawt inmun tan mek chu khuang chawi thla chuan a her liam san mek bawk a. Chu boruak inthlak mek chu pawn chhuak thei lo tar kun te tan pawh hai rual a ni lo. Tukhumvilik rual pawhin chu hun lo inher danglam mek chu ngawrh takin an puang a, mite hriat loh hlau ni awm takin Chhemhmur phur fal te chuan thing ler chuan kualin vartianah “Sik khaw thiang a lo herchhuak leh ta” ti ni awm takin an aw neih zawng zawng chhuahin an te teng tung a. Chu mai a ni lo, Lailen te pawh an insum zo bik lova, kar hnih khat lek lo awm tura an chet tlatna tur kawngdung leh pialtlep te chu an rawn thlithlai zak zak a. Sangha te pawhin li thuk lam panin awmhmun an sawh nghet a, Bullut leh Kawlhawk te pawh an rawn inlar leh ta.
Boruak inmun chho mek chu tlai ni a tlak apiangin a danglam hret hret a ni tih pawh hai rual a ni lo. Zing ni chhuak chuan lawm a hlawh tan ta hle a; Pa valai khabe sep thiamte kam liam changa zing ni lum ai Rawltharte pawh tuk-thuan ei tura chhungte koh an ngai tan leh ta bawk. Khawvel pang lehlama awmte rorel sak turin Ni pawh khawtlang lam panin a her liam zung zung zel a, chutih rualin Chhawrthlapui pawhin Piallei thim chhun eng tura a rorel hun lo thleng ta chu bawhpelh a tum bik hauh lo. Tin, hun dang zawng zawng aiin thlasik chhung hian Zan-lalnu a nihna chu pholang turin hun a ngah zawk tih pawh a hai nahek lo. A… Zopa mawl ber pawhin “Thlasik ni chu a rei lo” a tih rualin zan a rei thu a sawi zawm nghal zat thei nia. A hmai tibaltu chhumte paw’n kian zai an rel takah chuan Chhawrthlapui chuan lei hringfate mit hmuhah hmai fai taka inlan-in, beiseina siam sak leh inngaizawngte hmangaihna tihngheh chu a tum ber niin a lang. He a thil tum hi a tak a ni ngai a nih chuan a hlawhtling thawkhat ni ngei tur a ni zan Thla eng thlir chunga in pawm vawng vawng an awm nawk mai. He hun hi pangti lum ngahte hlut hun a ni a, tlai ni tla tur thlira leng dun te pawh inhal lo taka thut dun rial hun a ni bawk. Tleirawl vawt ti chu a hmangaih tangah bei chawih chawih mahse chunglam dan an bawhchhiat loh phawt chuan an demawm chuang lo ve, Sik khaw thiangin pangti lum neite hlutna a hriattir miau si a lawm.
Thla hnih khat lek liam taa inmun tan sik khaw thiang chuan a vanglai a hmang mek a. Zana arsi eng pe tuar leh thlasik kawng zam paw riai te chuan awmzia an rawn nei thar leh ta. Sik thlifim thaw heuh heuh te chuan Vantirhkohte ai rawn awh ni awm takin Bethlehem dai thuchah mawlh mai kha sakhaw hruaitute hnenah an rawn puang a, Kohhran Upate’n Zawlnei Mika bu an keu tan leh ta. Veng thlang lam Upa-in “Nula thianghlim a rai ang a…” an tih charh charh laiin veng chhak lam Upa chuan “Kan tan naupang a lo piang a, fapa pêkin kan awm ta a: rorêlna chu a kokiah a chuang ang a: a hmingah chuan, Maka, Remruattua, Pathian Chaka, Chatuan Pa, Remna Lal an ti dawn si a” (Isaia 9:6) a lo ti ve mek bawk a. Zaikhawmte lah chu an tui nangiang mai, vawi sarih zet sak nawn hnuah pawh Thlarau inti chang sang deuhte’n “Mal min sawm turin, van khua’n ro an rel…” ti chungin hla an la hril nawn pap pap a.
He sik khaw thiang hi hun ropui a nihzia Tlaizawng par sen-no nghelh te leh Tlangsam par vul chukte’n an pholang a, Chawngtlai paw’n nu nih tling takin a parzu chu chungleng sava te leh Thehlei rual chenin a fah mawlh mawlh hun a ni bawk. Kawng dunga let pheng phung Changpatte chu van malsawmna ni lo mahse he hun ti famkimtu an ni a, Zawngtah mu pum seh puah pawp pawp tur awm te hi he hun ti hlutu an va ni tehlul em! Zing thawh hlima Kawlbahra han keih lawl lawl te leh hmui rep pawh pawisa lova Bete thar tir han hawp khawlh khawlh te hi he hun nen hian a va inhmeh bik tak em.
Thlasik boruak thiang tak hi hun nuam tak chu nimahse khawsak harsa zawk leh thuamhnaw hak lum tur nei lo tan chuan hun lungngaihthlak a va ni tehlul em! He sik khaw thiang hian lotion tel lova kan vun nihna dik tak tarlangin ngal leh banah ramri ni awm tak a kham paw hruih zel a, Tleirawlte heh sen siah pawh a dim hlek lo mai. He hun hian Kristiante nihna chu pho langin, Thu tak tlansana huau huau lawm kan nihzia te, Van khawpui kal sana ran chaw pekna thlenga lo piang Krista theihnghilh sia rik bung bungna mai duhtu kan nihzia te, Bethlehema A inngaihtlawmna hre chang lek lova hlimhlawp leh nawmchenna nen A piancham kan lawm thin a ni tih pawh a tarlang chiang hle. He sik khaw thian vanglai tak hian Krismas kan hman dan tenawm zia hi kut bungin vanah khian ziak ta se, Beltesazara ruai thehna banga inziak “MENE MENE TEKEL UPHARSIN” tih aia fiah zawkin vanah khian a ziak khat vek ta ve ang.
Sik khaw thiang a lo herchhuah apiang hian he hun thleng thei tura damna kan neih hlut zia ngaihtuah thin ila, Siamtu hnenah lawmthu i sawi fo ang u. Nupa inkara harsatna awm te chingfel a, inngaihdam tawnna nen thlasik boruak hip hun a ni a. Nula leh tlangval te tan pawh chunglam dan bawhchhe lova hun hlimawm hman hun a ni. He hun ti hlutu Krismas pawh hlim taka hmanngin, hak tur nei lote silhfen pek hun a ni. Nawmchenna leh hlimhlawp thil nena Krismas lawm thin te hian Bethlehem-a Nau piang (Messia) zahlohna an lantir a ni tih hre chungin, chunglam lawm tlakin hun i hmang theuh ang u. Sik khaw thiang hun nuam hman nuam vek u le.
November 15th, 2012 at 10:27 pm
va huphurhawm
Report this comment
November 15th, 2012 at 11:17 pm
Va ziak kim thiam dap dap ve aw.
zing chaw iekham a thenawm te kawt a nilum ai a chakawm leh tawh khawp mai, lung a leng mai dawn!
Report this comment
November 16th, 2012 at 9:02 am
Ziak thiam dap dap khawp mai..
.. Ka khawro tan tlat, ka chat tan tihna niang chu maw.. 
Report this comment
November 16th, 2012 at 10:31 am
He thuziak zet chuan, nunhlui a va’n tarlang nasa em! A ngaihnawm, i pawlhmawi thiam bawk si. Thuziak sei lutuk si lovin, i fawmkem kim viau bawk si..
Suihlunglen puan ang bang lo hian, chhuihthangvala hian tlai ni ka leng leh dawn a nih hi…
Report this comment
November 16th, 2012 at 11:22 am
A van tha dap dap tak em! Chhiar a nuam e
Report this comment
November 16th, 2012 at 3:46 pm
Hetiang thuziak hi hlu hle mahse keini ang literature lama sang vak lo tan chuan chhiar tui a har
Report this comment