A Thar Leh Thin…

December 6th, 2012 1:52 pm by Dr Mahminga Sailo

Zirna runsang belin
Khatia zirna runsang bel tura ka then leh rualte’n ui leh chhuang ru ve tak sia min thlah hnua, hostel-ah nursery zirlai ang maia dining hall-a chawthleng tuai vira hmui tuvu hluah hluaha lirthei kan khalh hun lai khan maw, bialnu reng reng ka nei ngai lo! Senior zawk te’n, ‘Tunge I bialnu’ an tih chang a, ‘ka nei lo’ tih fo kha chu thu hran, bialnu neih loh avanga min nuihsawh thin phei kha chuan a tlawmthlak ve thin a sin. Bialnu pawh pakhat tal pawh hmu zo lo bika ka lar ta mai kha lunglai reng a dam thei lo. Engemaw chu tih a ngai a ni.

Thingpui dawr
Kan college atanga hla vak lovah thingpui dawr a awm a. Kan u te an chawlh thin avangin, tlai lamah hi chuan ka thianpa nen kan inzui phei ve fo thin. Tin heti hi a ni a, rawlthar nun tluang ve ta na na na chu min duhsaktu ka tawng ve zel a. Dawrnghaktunu pawh chuan min duat em em thin a. Fel ka va’n ti thei tak em! A chang phei chuan sawhchiar te min khilai thin a, ka lawm ve em em thin.

Dawrnghaktunu fanu
Dawrnghaktunu chuan fanu a nei tih kan u te’n min hrilh thin a, hmuh erawh kan hmu ve ngai lo. Tin, dawrnghaktunu leh a pasal hmel en ngawt chuan, fanu hmeltha nei tura beisei chi pawh a ni lem lo. Chubakah, nula kawm ai chuan an nu leh pa te bula titi nuam ti mi tih takah, nula pawh chu hmuh ka chak ngai lem lo va. Amarawhchu, kan u te’n fiamthua, ‘in inhmeh ngawt ang’ an tih fo chuan, kei rawlthar thaza rual chu min tiphur ve tlat nia!

Hei zet chu…
Pawltlak thla a intan a, khua pawh a thlasik ruih tawh a; tlai nitla pawh a engmawi thin hle. A ngai tein kan thian dun chuan dawrah kan inzui phei a. Dawrnghaktunu kuhva hring chu zei lo tawkin ka khehpui ve a. Krismas laia kan exam tur huhphurhawmzia te kan sawi a. Dawrnghaktunu chuan, ‘kan inah te in lo hmang dawn nia’ a ti a. Kan va phur teh reng

Ngai teh, dawr chhak lam atang chuan, aw tham no nalh tak mai hian, ‘Nu, chaw ka chum zo a, eng chawhmeh nge ka siam dawn?‘ a rawn ti a. A nu chuan, ‘a that chu, hei chawhmeh siam tur ka lei rawn la rawh‘ tiin. Keini thian dun chuan engmah danglamna nei lem lo chuan kan titi chu kan chhunzawm zel a.

Chhei raw le, dawr kawngka ka en phei chiah chu, khawilam tleitiri nge ni le? Dawrnghaktunu fanu an tih chu a ni ang em? Ka rin aiin ka lo melh rei deuh nge ni, ka thianpa titi pawh chu ka lo hre chiang pek lova. Chu tleirawl ngaihnobei tak chuan engemaw tak hian ka tisa, rilru leh ngaihtuahna a hip khawm nghal vek ni berin ka hria. Hei bak hian ka sawi thiam lo, ka sawi buangbar palh ang tih ka hlau!

Bem rawh… bialnu pawh ila neih ve loh kha..
Dawr atanga kan haw chuan, ka thianpa chuan, ‘kha nula kha I bem tur a ni‘ a ti tawl mai a. Duh ru ve tak, phu lo inti tak chungin, ‘ekhai, keini ang te chu min duh ve nang’ ka’n ti liam mai a. Amarawhchu a hmelthatna leh duhawmna zunzam chuan hriatloh karin zaman hmawng ang min lo phuar reng tawh si a. Thianpa thu pawh hnial tawh lo vin remchang kan zawng ve ta..

Krismas buhfai khawn ang…
Rawlthar inlakpa ve tan laia krismas buhfai khawn tura han chhuah chu ka hreh khawp mai a. Mahse, ka chhuah chhan erawh a tha em a, ka inlakpa-na zawng zawng chu hnawlin, dawl zawrin ka zawra ni ber awm e. Rin ang ngei chuan dawrnghaktunu fanu chu a hmaa ka hmuh aia nalh zawkin a rawn inchei emaw tih tur a la ni zui. A hnunga ka’n zui te chu ka lai nghal emaw ni, nge hriatloh mi hian a rukin min chawikang thin pawh ka hre lo. Ke pen reng a zangkhai a, hmuh theih apiang te chu an mawi em em vek mai nia…

Awm zel tur…

Similar Posts:

Recent Posts:

19 Responses to “A Thar Leh Thin…”

  1. 1
    badboy Says:

    comment ta che u maw1e :-D

    Report this comment

  2. 2
    MamiPa Says:

    ngaihthlak nawm dawn chauh a i ti tawp hma emai :-P

    Report this comment

  3. 3
    Tonix Says:

    rawn chhunzawm vat mai chi,a ngaihnawm dawn chauh e

    Report this comment

  4. 4
    Jacka Pi Says:

    Tih tawpna tur lai i va hre ve :-P

    Report this comment

  5. 5
    sheldon Says:

    Mahming, ka la chhiar hman thlawt lo mai..

    Report this comment

  6. 6
    century child Says:

    Aw lo chhunzawm rawh zanin ngeiah :-)

    Report this comment

  7. 7
    mamboihi Says:

    Chhei raw… Mahminga’n bialnu a nei ve dawn e! ;-) Kan vaiin lawmpui nan kut beng ang.. (8) :-D (F)

    Report this comment

  8. 8
    Dr Mahminga Sailo Says:

    Comment a lo awm ve tawh elo?! :-O :-D

    @ sheldon… Muang changin le.. :-)
    @ Jacka Pi… Tianga tih zeuh zeuh loh chuan.. ;-)
    @ Mamboihi… Rawl lai nun a nih khi.. :-D

    Report this comment

  9. 9
    blackmagicwoman Says:

    Krismas buhfai in khawn chuan em i phur ve nge bag in i khai? …e khai….rawn chhunzawn vat rawh..min ti vir tawk lek. :-)

    Report this comment

  10. 10
    ChhanaPa Says:

    Mahminga hi a insawi ang ni lo hian a luck ru phian ang! Nula duh chi a ni tlat.

    Report this comment

  11. 11
    Dr Mahminga Sailo Says:

    blackmagicwoman… Kan thiante kha an fel a, an zei bawk a ni awm e. Dawrnghaktunu fanu nen khan engmah min khai/phurh tir lo va, an hnungah kal pahin kan ti ti melh melh… (U) :-D

    ChhanaPa… Tawnhriat nei tam zawk in inthup a, ka neih chhun chhun hi kei hian ka phawrh zel si a, ka kawrawk tep tawh.. :-D

    Zirtawp ni hman nuam vek u… (U)

    Report this comment

  12. 12
    Dr. Sangtea Khiangte Says:

    A va tha ve…kei chu a chhunzawm dan tur rin lawk ka nei kiau mai a(h)..he3..Eng chen nge a rawn inpuan dawn I LO THLIR ANG.. (Y)

    Report this comment

  13. 13
    Dr Mahminga Sailo Says:

    @ Dr. Sangtea Khiangte… Ehh, thawnthu ziah laiin, a ziaktu rilru an hre lawk ngai lo… :-D (H)

    Report this comment

  14. 14
    PKfanai Says:

    Thu i chhep nalh vel hle mai. Love story pawh ziak la, i ziah ngaihnawm dawn hi. Tlangval zakzum deuh hì chu an mitmei atang leh anmahni duhtute mitmei hi thianthate hian an lo man chak khawp mai hi a lo nia. Hrethiam mai em? I bèm sual hauhvin ka ring lo. I zah deuh leh i thianpa chu hrilh tir hmiah rawh, nang aiin a sawi thiam ka ring(lai ve dawn hek lo)

    Report this comment

  15. 15
    Awmtea Leo Khiangte Says:

    Awm zel tir vat vat teh a

    Report this comment

  16. 16
    Dr Mahminga Sailo Says:

    @ PKfanai.. Ka lawm e.. Nia, thiante hi an tangkai dawn khawpin ka hre ta.. :-)

    @ Awmtea.. Mi(sual).com hi a reh lutuk a, tum loh leh tul lo thleng thleng ka sawi fo dawnin ka hria.. Mahni insumtheihna hi ka sim leh zauh thin. :-D

    Report this comment

  17. 17
    sihal Says:

    He thawnthu ril lutuk hi a va ngaihnawm ve aw, chhunzawm leh ngei chu a ngai anh..
    kei sihal eiru khaweng ngamlo pawh ka uk atang min hnukchhuak tlat mai :-P

    Report this comment

  18. 18
    Dr Mahminga Sailo Says:

    @ sihal… Ka va’n lawm em.. (Y) I hming leh i fiamthu han thawh zauh lah a inhmeh em em si… (Y) :-D

    Report this comment

  19. 19
    victor hnamte Says:

    Mahni chauh a, han awm a, han chhiar keuh keuh chuan, a ngaihnawmin, a nuih zathlak hle mai. Dr. mahminga nge nge

    Report this comment

Leave a Reply

You must be logged in to post a comment.