Thluak vawrh nazawng a fuh kher lo! :p

December 7th, 2012 12:21 pm by kawlhawk

Ka thenawmpa, ram nek talent dawng tha zet mai, chawrche ve tak, tawng thei zit-zet phian bawk si hnena — thenawm tha/ fel/ hrawn nuam ber lawmman (zo arpui lian tha nelh-nawlh) lawmthu nen ka’n pe chiah mai chu(h)!… a manhla teh asin aw…!!!

Kan venga zu zuar hlun, VC/ YMA/ JAC/ VDP te’n an vau chiam pawha zuar lui ngat ngat reng, pa kawlh-sen leh luhlul zet mai — ZU daptu pawl hruaitua kan han ruat tlat mai chu(h)!… kan tifuh teh asin aw…!!!

Kan thianpa, phakar namen lova phakar, thiante neih ei tum reng renga meng kar, khawlaia intihbuai nikhua pawha tlanchhe hmasa ber, a him chin atanga thiante bihthla thin hnena — thiante tana mi inpe zo ber, huaisen ber, hmangaihna ngah ber lawmman (Zu um 1 leh Ui sa kg 1) kan han hlan thut mai chu(h)!.mis.. kan inchhir lo teh asin aw…!!!

Tuna ka nupui 3-na ni mek, nu ropui ve tak leh thenawmte rel nuam ti zet, pasal te zahna chu sawi loh rahbeh tum ran mi hnena — ka nupui neih tawh zinga zaidam ber, tawng tlem ber, pasal te zah thiam ber lawmman (chukz zeuh phaha rangkachak thi) ka’n awrh tir hnap mai chu(h)!… kan hlim phah teh asin aw…!!!

Kan chhung deuhreuh, bazar-a thil zuar, a zawrh ang lei dawna dawr loh nuam si lo, buk dik hmang duh bawk si lo hnena — kan chhungte i nih vang ni lovin, i buk a dik em avang zawkin ka dawr thin che a nih hi… ka’n ti mai chu(h)!… a zia teh asin aw…!!!

“Hmeichhe vau loh leh vau sam loh chu an pawng tual tual” tih changchawi a, khawvel mihring piang tawh azawnga tha ka tih ber leh ka hmangaih ber (ani pawhin min hmangaih hle bawk) hnena — nang lo pawh midang an tam… ka’n ti mai chu(h)!… ka inchhir teh asin aw…!!!

(⊙o⊙) {{{ Ka fapa, zu mai ni lo drugs ruih ching hnena — “Duata, nang hi chu ka hmangaih bik che a, na tak pawhin ka hau phal lo che asin… kut ka thlak ngai hauh lo ang che. I hmel te hi a tha a, lehkha i thiam thei a, i duh chuan i fel em em a, hetianga i awm hi satan-a vang mai a ni e. Hmangaihnain ka en che a, ka tawngtai sak thin bawk che a, i fel ve leh mai ang… ti a, aw-ka nem damdiaia thu ka’n hrilh niap niap thian mai chu(h)!… a sawt lo teh asin aw…!!! }}}