mi(sual).com

Chu mipa naupang, a kum phu lova fel chuan a ‘toy’ neih ve chhun thingbung te chu a ching let a ching let a, khawih ngun tih hriat tak mai chuan chung thingbungte chu an tliang hlarh mai a. Ama tawk chuan a tlei ve em em a, naupang awh ngah rual, Mizo naupang silai lem leh football pheikhawk pawh awt ve em em rual, amaherawhchu, a kum phu lova a rilru a puitlin avang chuan engmah beisei nei pawhin a lang hauh lova.

Chhuatah chuan amahin tlei takin a neih chhun te te chu a khalh kual a, naupang tam takin khalh sen loh an neih hnu pawha cheng sang chuang man ngena an tah a, chhungte an tih mangan laiin Rinfela erawh chuan, a neihchhun thingbungte chu lungawi takin a khalh a; naupang dangin ‘transformer, octimus prime, money in the bank’ tia bazara chhungte thawmhnaw an uai ngawng ngawng laiin ani erawh engdang ngai bik lovin a neih ang ang chu a khal a, chung a thingbungte chuan an kawm hlim ve tawk em em a ni.

Tichuan, kan titi ta melh melh a. A kum phu loh chuan a lo fel zek lehnghal a. Kan titi chhoh dan lah chu puitling leh naupang indawr pawh kan ang lo, puitling pahnih titi te pawh ka inchan rum rum a, kawng tam taka ka tluk lohzia ka hriatchhuah phah ta a.

1. “Rinfel, kum engzat nge i nih tawh a, i toys te chu thingbung mai mai a ni sia, a dang a aia tha te i awt em?”

“Kum 7 ka ni ve tawh a; aaa….awt ve thin tho e..mahse awt viau mah ila maw, adang leina tur kan nei si lova, a puin mi in a sakna atanga a thingbung min hawnkhawm ania, vawiinah pawh TMB tur min lo hawn leh dawn a, nangin JCB hian lei min lo pe anga, keiin ka lo va phurchhuak zel ang a…..”

Naupang chumchiap mah ni se, chhungkaw khawsak chuti taka a hrethiam leh thingbung mai mai mah ni se, TMB thar a nei tur a hlimzia atang chuan a hmathlir en zia(optimistic)te, naupang dang ang lo taka khualtelem puia min sawm a, ama ta ngei pawh min hmantir a tum nghal mai danah chuan midangte tana a inphal zia chu ropui ka ti hle a.

2. “Anih chuan, hei hi ka pe ang che chu, i duh em?” ka tia, naupang lawm thil atan liau liaua ka kensak chu ka pe a.

“Ka lawm e aw. Mahse, hei hi engtia tihtur nge a, ka van hrethiam lo. A pi leh a pute ka hrilh anga, fel an ti ngawt ang che. Lo leng ziah la, kan inkawm ziah dawn nia aw. Thian kawm tur hi ka nei ve ngai si lo a, a puin hna a thawk bawk si a, min kawm ve peih chuan lo leng ziah laa aw. .”

“He naupang chu lawmna chang hria mihring anih reuh hi a, a va ropui em” ka ti vawng vawng a. Lawmna chang kan hriat tawh loh hi chuan kan hringnun hian chuai lam a pan tulh tulh thin si a. Ka thilpek pawh chu a hman dan a thiam loh avanga min zawh mai te chu ka ngaisang zual hle a. Hriat loh pawh hria anga awm hram tum lova, thiam tum tak maia min han zawt ngam pawh chu ka ngaihsan phah lehzual hle mai. Ka hawi kual a, lengchhuak a thian va kawm kual hman pawh chu a lo ni hauh lova. An inchhung chu a kutah a lo awm a, inchhung te chu fel thlip thlep lo mahse tlaia a pi leh pu hnathawk haw inbualna tur tui, thukah lum mai theih tura thingfak pathum nena a lo inrem khap ka hmuh chuan chu naupang ka ngaihsan chu a zual hle a.

Nileng deuh thaw chuan kan in kawm a, lei kan lai thul, a chang leh keiin JCB ka khalh a… Tlaia a pi leh pu hnathawk haw an rawn thleng chu hlim takin a lo chiau au a, a pu TMB rawn hawn chu hlim takin min rawn hmuh a, an tuilum pawh a lo so ve mek a. Tichuan, thulengvak chauha ka hriat, chu naupang chanchin, lainatawm leh khawngaihthla la tak mai chu, a pu inbual hlan chuan a pi chuan min hrilh ta a.

Similar Posts:

• Kan 2013 kumthar ni kan hman dan tlem :)
• Social Networking Sites (SNS)
• Misualte zawhna
• Kan thawnthu-I
• Tunge mawhphur ang!!!

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Wednesday, December 19th, 2012 at 10:12 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.