mi(sual).com

Thlasik boruak nawm lai a niin sik leh sa a nuam a, Masi boruak a nam tan tawh bawk nen mipui mimir boruak zangkhai laitak tur nimahse tunlai thilthleng rapthlak chuan Zoram mipui a tichiai a, a ti mangang ani. Ani taka, nitin chanchinbu lianber leh a te ber thlengin nimin lawka hmeichhe naupang kum 14 mi, a thiannu nena an masi bazar hawng lam, tlaia zuruiin an pawngsual chungchang kha an chhuah nitin a. Zan lamah lah LPS leh Zonet lamin an chhuah awllo in tlawmngai pawl hrang hrang lahin an do thu te an tlangaupui a, a then lahin bati chhi a kawng te zawhin, a na thei ang bera pawngsualtu hrem ni ngei se an duhthu an lanchhuahtir bawk nen. Zoram hmun tin, Khawpui leh thingtlang lamah pawh Masi boruak leh titi chu, chu thil thil thleng rapthlak tak chuan a lan hnehin a bik takin chhun enlai ngei a, chutiang thil a thleng chu Nu leh Pa tam tak an ralkhel a, an fanu te him talo a hriatna neiin chanchinbu leh Fakselna lamah pawh chulam thu chu a ri ring hle.

Aw a tam a, dodalna a nasa a, Political party te lahin remchangah hmangin sawrkar chaklohzia, kan Police nepzia te tlangaupuiin Home Minister bang tura nawrin tawhsual tawk naupang khawngaihthlak Lalnunsangi chu a inenkawlna tur tumsak turin leh a chhungte thlenga sumfai tamtham taka tanpui turin an ngen puiin sawrkar nawrna pawh a nasa hle a. Chung thil thlengte avang chuan nitin mai thuthar a awmin MHIP lam lahin a hma atanga an thukhel pawngsual tute Pa thei lova siam chu an thar thawh leh a, Masi boruak ni a mawi lovin thu rothap pui pui rawtna leh aw a tam hle. Kumdang angin Masi bazar te chu nitin la innek luih luih mahse kumdang aiin Masi boruak zangkhai tak chu a awm lo ti ila kan sawi sual awm love. Chu chu tunlai a Zoram boruak anih avang chuan thu dang mitin rilru ah a leng mawlh lo.

Zandang ang bawkin boruak a vawtin, pawn lam erawh a eng nalhin hawi chhuah a nuam hle a, Aizawl veng laili taka In pakhat lian tha tak, a bul vel In dang ang thova mawi taka chei ah chu Mawitei chu thuin ngawi rengin a chhungte an inkhawm vek avang chuan amah chauhin TV a en a, chutia a hmeh kual vel chuan LPS lama MHIP leh MZP lamin tunlai thilthleng sawi hona an neih chu en zuiin a rilru a kawm a, a ngaihtuah zui a. Chutia , mifing tak takin Pawngsual chungchang te, a nghawng te leh a pawi zia te an sawi chu ngaihtuahin Mawitei chuan tha a ti hlawmin hlawkpuiawm ati a, mahse a nazawnga vanduai tawk Lalnunsangi hming an lam thla zen leh a chhungte dinhmun an sawi thla zen chu a tha a ti hauh lovin, chu chhungkaw nakin hnu tur leh chu naupang ina a nuna a hun la tawn tur chu a ngaihtuah zuiin a khawngaihna avang chuan lungchhiain a mittui a tla ta hial a.

Ani taka, a hunlaiin rampum ina an vei leh khawngngaih rawn niin tunlai tak phei chu, chu chhungkua chuan Zoram lainatna changrawn mahse Mawitei chuan chu boruak chu Mizo te kan zia a nghhet lo ang mai hian rei lo te ah a reh dawn a, Zoram mipui te chuan kan theihnghilh vat dawnin hun rei hnuah a tuar tu tur leh hreawmna nunpui tu tur chu a biktakin Sangtei te chhungkua leh amah Sangtei ngei chu ani tih Mawitei chuan a hrechiang a, a khawngaih ani. Ani taka, vawi tam kan Zoramah Pawngsual a thleng tawh a, a thlen apiangin Khawngaihna thu a nazawngin kan chhak chhuakin chu khawngaihna erawh chu thu mai anihzia chu kar lovah a reh thin dan leh a dona kawnga Sawrkar leh Kohhran ngei pawhin hma kan lak tak tak lohzia a tangin a hriat a, kha thil tleng rapthlak avanga a khawvel hremhmuna chang ta tur chu a pawngsual tawk naupang kha anihzia chu Mawitei baka hrechiang tur an awm silo.

Nia, Mawitei baka hrechiang tur an tam bik lovang. Mawitei kan tih hi a hming tak chu Zonunmawii niin Aizawl veng laili taka chhungkaw pangngai atanga seilian leh unau 4 zinga an fanu naupang zawk leh unau a, a tlum ber ani a. Khawsa thei em em nilo mahse, harsa anni lova, a Pa Pu.Lianchhunga hi sawrkar officer leh mifel anih avangin chhungkaw hlim tak leh an mahmawh nei ve thei ,an chhungkua pawh hlim tak leh mi zahkai tak, hmalam hun pawn eng taka ngaih anni. Mahse, khawvel kan hman dan hi kan duhdan anilo tih leh sualna hian kan Zoram hi min chiahhneh tawh ani tih tichiang turin Chu chungkua chungah pawh chuan vanduaina a thleng tasi. An fanu an duat leh an chhungkua, a fiamthu leh chezia avanga tihlim thintu Mawitei chu an chhungkua ang hiala anlo ngaih tawh an Driver chuan vaubehna hnuaiah lo pawngsualin alo khawih fo thin ani awm e. Mawitei chu naupang harhvang tak leh hlimthei tak nimahse rilru dawi chi anih avang chuan atirah chuan a chunga vauna chu a hlauh avangin rei tak a thil tawrh rapthlak pawh chu sawi ngam lovin a awm a, mahse a serh a pana, hnai te a lak tak hial avang chuan a nu hnehah a sawi ta a.

Aw!! an fanu chunga thil thleng an hriat ni te khan Pu.Chhunga te rilru kha ava nain tawrh har anva ti em, an nu Pi.Sawmi phei chu a lung a chhiain a tap a tap a, mahse tihvak ngaihna a awm silo. A chunga thilthleng a sawi lai kha zanriah eikham vel niin an hriat atang chuan Pi.Chhunga nupa chu lungngaiin an rum a, an tap a, an nupa an han inrawna ,
“Kan misualpa chu, Police man tir nghal tur ani”
“Ka kut ngeia vuakthluk kava chak em “
Mahse, thinrim laia thil tih tut tut a thalo tih hretu ni rilru fim mi tih taka Pu.Chhunga te nupa chuan ngaihtuahna fim hmang lova chet an duh lova, an nupa ngun taka an inrawn hnu chuan an fanu nakin hun atan ala tha zawk ang tiin chu thu chu zep thain an hre ta a. Pathian hnenah pawh an tawngtai nasa in ngawih an chuh a, an chhungkaw dang te pawh hrilh lovin an fapa upa ber bakin chu thil pawh chu an hre lo. Nia, Mawitei hmalam hun tur leh nakin hnu a, a mualpho loh nan leh a nun a ngil zawk nan a tul reng ani. Mahse, tih theih chin hi Mihring te hian kan nei a, a bak vak tihngaihna a awm loh chang a awm thin si.

Pu.Chunga te pawh chuan an fanu tana tha ber tur leh a chunga thil thleng ina a nuna nghawng a neih lohnan an chunga chiatna lo thleng pawh chu an ngawih bo pui ta a. An nupa an felin Pathian an rinchhan bawk nen Mawitei pawh chu dimdawi taka enkawlin an theih ang tawkin Chunglam an rawn a, khawvel zawng lam lahin rilru lam Doctor te belin an thiam ang tawkin Mawitei rilru hliam chu thawidam tumin an hmanhlel fo thin. Hun a liam a, kum a vei a, lung delh loh thing delhloh an tih angin Mawitei pawh chu a rawn seilian a, a nu leh pa ten an enkawl uluk bawk nen, Midang hmuhah chuan a hmel a tha nen a nun ah leh a chezia, mizia thlengin midang aia a danglam na a awmlo mai ni lovin, an rualpui ah pawh mite hmelthat tih, fel tih niin an Biakin ah pawh an rualpui ah chuan mite mit fukna ber leh fiamthu changa Tleirawl chhuak thar zinga an duh ber pawla sawi ani fo thin.

A awm viau e, amah Mawitei hrim hrim hi Sailo thlah tih taka , a lian tha a, a vun lah a Sailo ngurpui ngo vuk maiin a nuih duh chi alo ni nen, thiante zingah pawh hlim thei tak leh rilru tha leh kawmnuam tak anih avangin a rualpui te zingah pawh chutia a langsarh leh tunlai tawng taka a “Luck” chu thil awmlo tak pawh anilo. Mahse, Mawitei erawh zawngin a nunah mi hriat lohin harsatna leh buaina tam tak, hun rei tawh tak avanga a thil tawn avang khan a tuar si. A tawhsual tawh tirh te kha chuan hreawm ti ve mahse, naupang tih takah a thil tawn pawizia pawh a hrethiam pha lova. A chhungten an hriata lungngaia an kun an kun pawh khan a hnu lawkah a mize pangngai hlim thei tak bawk kha pu leh in a Nu leh Pa te leh a chhungte tihlimtu ber ani chhunzawm a, chhungte tan fanu duat, Pi leh Pu tana tunu lawmawm ani si.

Mihring te kan seilen hian kan rilru pawh a thang a, ngaihtuahna kan hmang chho va, kan khawvel thlir dan a dang a, chu chuan Mihring puitling leh Puitlinglo a a thliar fo thin. Veng khata chhungkaw rethei fa pawhin mihausa fapa kawm mahse a dinhmun a hriat miau loh avangin rethei hreawm zia a hrethiam fiah lova, mahse a thang lian a, a thian hausa fapa kha chu kawmngeih viau mahse a hlat tial tialin ama dinhmun, a naupan laia nuam atih ve em em pawh kha hreawm tihchang a nei chhoin a dinhmunah a lungawilo fo thin. Chutiang deuh chuan Mawitei pawh chu a rawn thang lian a, a rilru puthmang leh a khawvel tawn a inthlak a, a vanduaina khan vawi tam a nunah hreawmna a thlen ta foin chu thil chu duh vang a awm leh duhloh vanga tihbo mai theih ani silo.

A han tleirawl chhova, ngaihzawng an han hria a, a tan chuan a hriatloh laiin mipa hlauhna a rawn piang vat a, mipa a tih a a, a nel lova, rualpui ten ngaihzawng an neih pawhin tuma hriat thiam phak loh thil avangin a nei ngam ve silo. Virgin tih tawngkam a han hrethiam a, rualpui te phaklo a inngaihna arawn nei a, a in sit a, hlutna nei velo anga inngaiin a rukin vawitam a roomah a tap thin. Zan lamah lah nise, kum tam a theihnghilh tawh kha mumang lamah hmuin vawi tam a muthmun atangin a tap chhuak a, zan a mu thei lova, chu chuan chhunah a nun ti zuaiin school a thulh hnem tir a. A tet lai atanga a thiam pawl ni thin kha pawl 10 anih atangin a zirna a bahlah chho va, vawi tam a fail a, chu chuan zirna lamah ati hnualin a rilru chak leh hriam phu lovin zirna lamah pawh B.A pawh zo lovin a awm phah si.Chutia, zan mu tha silo leh nun ninga a awm avang chuan a rilru leh thil thlir dan a thim a, a thim zawnga thil dawn vak vak te chingin chu chuan a mizia a ti danglam a. A thin a chhia a, a rilru a tet phah bawkin a nun chu beidawnna leh tahna mai niin a ngaih phah thin. Chutiang reng reng a nung anih avang chuan a rilru tih dam nan karlovah zu in a ching chho a, a langin va ti thin lo mahse, a zu ruih avanga a Nu leh Paten an buaipui a, mittui nena an buaipui chang a tam fo si.
Mahse, hetiangah hian ani Nu leh Pa Pathian rawn nasa neih a hlu fo thin. Chutiang chuan Mawitei nun chu danglamin suahsual kawng zawh fo thin dawn mahse Pu.Chhung ate nupa chuan vawi khat pawh an hau lova, Pathian an auh mai bakah Psychiatrist rawn nachang te an hriat avangin an fanu chu a mize mil leh a ngaihtuahna mila enkawl an thiam a, hei hian nasa takin a pui hle bawk. Mizo Nu leh Pa tam tak angin Psychiatrist hi rilru Doctor anni tih hre lovin Mi a Doctor ah ngai ve chu nise tuna a dinhmun ang hian Mawitei hi an chhuah theih hauh lovang le. Ani taka, Nu leh Pa tan chuan thinrimthlak tur khawpa a awm chang a tamin a han ruih te, nileng lenga a mut te leh ho te te a, a thinrim chang te khan riru a na duhin han hauh a, kut han thlak mai te pawh a chakawm chang a tam fo thin. Chu erawh Pu.Chhung ate chuan an ti ngai lova, a tul leh a tawrh thiam tur tawkin an hau a, thu tha an hrilh a, kehthei dawmin an dawm si.

Chutiang vang ania nge, Mawitei pawh a tleirawl tirha kawng thalo lam a zawh teuh nen tunah zawng a rilru a puitling chhova, a tuina lam tak pangpar khawi ti chhovin a Nu leh Pa ten an phurpui nan Flower shop hawngin Aizawlah pawh a dawr chu thiltih pui nikhua a an pan ber ani chho hial a. Mawitei pawh chuan a Nu leh Pa te hlutzia chu a chhut chian pauh leh a hlut a, an zirtirna te chu tha atiin a naupan lai atanga mipat hmeichhiatna chungchang an zirtir te alo zawm thin kha tifuh a tiin abikin amah ang tan chuan a zirtirna dawn ang kha a hlutzia a ngaihtuah letin a hlutzia a hrethar thin si. Ani taka, tiang tawhsual tawk hi chu an sihhnipin buan an chak lova, chuvang ania lepler te leh nawhchizuar ah te an chhuah fo thin.

Chungte chu Mawitei chuan a chhutlet a, a lawm a chutih rualin TV a naupang tawhsual tawk hmalam tur a dawn sak erawh chuan a lainat a, a khawngaih a, a tawrh ang chu eng ang pawn tumlo mahse a tuar ve tho dawn tih a hriatpuiin a mittui hial a tla a, a dang thei silo. Ani taka, Pawngsual tih hi a thu a rapthlak aia nasa in a a rapthlak a, a tuartu nun kalzel ah ngawng a neiin taksa leh rilru tan a pawi a, Chu chu mitam zawk hian kan hrethiam pha silo…
Zoram a tiang tawhsual a tam dan em em ngaihtuah hian Kristian kan nih ngaihtuah chuan a zahthlak a, a hlimchhawn a lo pawrh ve hluai a, tuilian an sawi anga kam leh vat lo hian phak tawkah tan kan lak ani.

Similar Posts:

• Combined Post: Tanpuina mamawh
• Engtin nge ka tih ang?
• Hmeichhe naupang in thil a ru thin
• Ka nau lehkhathawn
• “Ânu, i thi dawn ami?”

Recent Posts:

• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL
• President Trump ka hmuhdan (amah thlawptu lam atangin)

This entry was posted on Monday, December 31st, 2012 at 9:41 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.