mi(sual).com

Lalnunzawma, ‘Zawmtea’ chu ruihhlo ngâi, sual tinrêng vanga lungin-ah pawh vawi duailo lo tang tawh a ni a, khawtlang pawhin an ningin an ngaisang lo kher mai. A nu leh pa te tak pawh hi an nulat-tlangval lai pawh a vawi tam tak a ţha lo zawnga lo thâng ve hat tawh ţhin kha an ni a, a lehlamah chuan Zawmtea hetianga a khawsa ta mai pawh hi a demawm lohna lai a awm ve tho mai.

Hmeichhe naupang kum tlinglo a pâwngsual avangin thla thum lâi lunginah alo tâng tawh a, tin, a zuruiin buaina a siam avangin vawi dûai lo sipaiin an lo man tawh bawk a ni . Damdawi, a taksa in a mamawh hauh loh, mi tam takin an ei ngam loh, an kawmthlang hmeithâi pitar takngial pawhin a ei ngam loh chu inti pa taka ei ţhin a nihn vang ringawt pawh hian mihring dangte aia danglam bîk a ni tih chu hai rual a ni awm lo ve. Tlangval thla nei lo zantina thlawk ziah ţhinte zingah tel vein thil thlum aiin thil kha lam a ngaina thung. A pian a nalh a, a hmel pawh a ţha; mahse hmelţha titu erawh an awm lo thung. A naupan lâi chuan an veng YMA Chhang Lîdar a ni ţhin a, nungchangţha lawmman pawh vawi hnih lâi a lo dawng ve tawh. Kohhran Naupang pâwl, Junior department-a a awmlai a Pu Sanglianthanga hla a inzaisiakna an neih ţum pawhin lawmman pakhatna alo dawng ve hiâl tawh a ni.

Kum 17 a nihin an chhungkaw khawsak a harsat êm avangin a zirlai a chhunzawm thei lo va, a nau neih chhun hmeichhia, an khaw  sâp sikula pawl thum zirlai chu nitin a inhlawhin a chawm ve ţhin a. A nu leh pa te hi biak in thleng ngai hauh lo anni a, a pa phei hi chuan lunglen zual deuh chânga la ‘chuti hlauh’ thei mai, zu nghei hleithei lo a ni. An inchhungah hian Pathian in hmun a chang thlâwt lo a ni tih chu Zawmtea hi a hrechiangtu ber chu a ni ve ngei ang. Zing ni chhuak chuan mi tamtak tan beiseina thar a her chhuahpui laiin Zawmtea tan erawh beidawnna leh lunngaihna chhumpui, beiseina ni zung ten an chhun tlang zawh ve loh chu a rawn lang ţhin a. An inchhungah chuan a tlei zo lo va, pawnah hlimna zawngin a hun tam zâwk te chu a hmang ral ţhin a ni.

Zilh loh fa tam takte zinga zilhloh fa a chhun a zana a han in liluh tâkah chuan, Daniala ianga Pathian biakbuk lam hawia ni khata vawi thum tawngtai te chu sawi loh, inkhâwm tura sawm pawhin ui puar koh ang hlauh a ni tawh. Chûng boruak hrisello zette avang chuan an inchhunga mikhual lo tak, ‘zu’ leh ruihtheihthil dangte chu a rawn kâwm ngeih chho ţan ve ta phian mai a. A mitmeng a rawn danglam chho ve ţan ta a, buh manto ei phâk lo tih takah a taksa te pawh chu zawi zawiin a awngrawp ţan tial tial a. Kum tam pawh a vei hmain a hmangaih êm êm ruihhlo ngawl chu a vei ve ta reng mai! Inah chaw a ei tlem telh telh a, an buhzem erawh a phai chak hle thung. A damlo lova, damdawi erawh a ei chawl lo thung. Sum neih a sam a, hmanral pawh a sam bawk. Tun hma aiin a sual a, tun hma aiin khawtlangah a lar thung. Tunhma aiin inchhungah zilhna thu ţha a dawng hnem zâwk a, mahse, tunhma aiin a luhlul zâwk thung.

Khawtlang mipuite chuan a hmelhriat nih pawh an duh lova, kawng kâwia intawh châng pawhin biak loh hram an tum ţhin. A zu inpui ţhin te leh a ţhian kawm ngei zual bik tlêmte te tih loh chu kâwm duh tu pawh a hmu zo meuh tawh lo. Miin mi tling lo leh hmantlak lohvah ngai ţhin bawk mahse, amah aia khawtlâng nun hrechiangtu hi an tamin a rinawm loh. Nu leh pa tam takte chuan inleng atân pawh an duh lova, chu mai ani lo, an tu leh fate pawl tir pawh an phal ngai lo.

Zawmtea chu ‘misual’ tia khawtlangin an koh rawn mah nise, a rilru a ţha in a thilphal hle a, a nun a nêmin a zakzum hle bawk. Vawi engmaw zat a piangthar ve tawh a, mahse, an chhungkaw nunin a zir loh êm avangin rei a daih ngai chuang lo. A nu leh pa ten an zahpui thei hle a, a thil ţhalo tih avangin vawi tam tak an hau a, a chang leh an vua a, mahse, awmzia a nei thei chuang si lo. Inchhungah a awm tlêm a, vawi tam tak pawn lamah a riak chhuak ţhin a ni.

An khuaah chuan mi hausa tak pakhat, ‘Pu Luaia’ an tih mai chu a awm bawk a. Pu Luaia hi an awmna tlangdunga Mizo awmte zingah chuan lehkha thiam hmasa niin, an veng  BDO a ni. Kohhran leh khawtlângah a inhmang hle a, YMA-ah committee member niin, NGO pawl hrang hrangah pawh a thawhhlâwk ber pawl, a cheng bâwr vuantu a ni bawk. ‘Pathian ram zauhna’ atana pawisa pek leh Missionary chawm lamah te pawh thahnem a ngai hle a, a sum leh paite chu Kohhran ţhat nân leh khawtlang ţhat nân a sêng hnem thei hle a ni.

Mahse, Pu Luaia hi eiruk hmang a nih avangin sorkar-in an chhui mek lai a ni a, mirethei sum tur chêng maktaduai tam tak a tihchingpen mai bakah danlo anga thil a tih ţhin avangin sorkar chuan amah chhuitu tur mi an ruai hial a ni. A neihnun êm avangin a fate pawh an khawsa nuam hle a, ţhian an ngahin anmahni tlawntu leh ngainatu pawh an ngah khawp mai. A nupui chu eng hna mah thawk lovin inah a awm tawp a, awmpui pawh pa hnih lai an nei. An khawsak a sâng a, khawtlângah pawh zah an hlawh hle a ni. Mamawh neite chuan an chakkhai lak nan a in chu an hmang ţhin a, ţhalai pâwl leh nu-ho pâwl te pawhin pawisa an mamawh chuan a hnenah an rawn tlulut tawp ţhin a ni. Mahse, hêng zawng zawng te hi hming chhernân maia ti ani a, a thinlung tak tak erawh chuan Kohhran leh ram hmasawnna rahbi zuan khûm a ama ţhatna tur leh an chhungkaw chawisanna chu a ngai pawimawh ber thung.

A hna a thawh ţhat loh êm avang leh sorkar sum tam tham tak chingpen chungchangah a inhnamhnawih ve avangin vawi hnih lai lunginah alo tâng ve tawh a ni. Kohhran zahawmna leh ropuina chu hmaikâwrah hmangin chung a hmingchhiatna te chu alo hliahkhuh tawh ţhin a ni. Kohhran leh YMA te chu bihruk nâna hmangin a phenah chuan a duhzawng leh chak zâwng te chu a ti mai ţhin a ni.

Nikhat chu vanduaithlak takin a Awfis bâng an in lam pana a haw chu chhan leh vâng pawh awm lovin, nikhaw hrelovin a tlu tawp mai a. A bul hnaia mi awm te chuan buaipui nghâlin damdawiin hnai berah an hruai nghal a. Mahse, chhan hman a ni tawh lo! A ruang chu khawtlâng mipui zawng zawngte chuan an lo hmuak a. Kohhran a mi pawimawh ber ber te, Khawtlanga mi challang tak takte, Pastor leh officer te chuan nasa takin an sûn a, a ruang tlaivârpui tu pawh an ţhahnem hle a ni. Khawtlâng chuan an ui thu hlir an tlangaupui a, chaw ngheiin a ruang chu an menpui a, ropui takin an vui liam ta a ni.

Thla hnih hnuah chuan……

Zawmtea chu ‘Over Dose’ avangin khawlaiah chuan a lo let bal mai a. A bul hnaia nu leh pa awm te chuan a buaipuitu ber nih hlau niawm tak chuan a lang pha lo chin lai aţang chuan an lo  thlir ţhap a. Chutia buaipuitu leh chhantu pawh nei lova a tâl a tâl lai chuan tlangval pakhat, damdawi alo tihpui tawh ţhin, Sangtea chu a rawn kal hlauh mai a. Ani chuan rang takin a buaipui nghâl a. A kâah a thaw lut a, a awmah a nem a, a hmingin a au tuar tuar a. Mahse, chhan theih a ni tawh lo! A tlai tawh a ni.

Tichuan, eiruk hmang leh nula kawp lawr ţhin, khawtlang tana hna ţha tak tak thawktu anga lang, khawtlângin an ngaihsân leh an chhawr ţangkai êm êm, Pu Luaia ruang chu ropui taka vui liam a nih laiin amah ang thova misual, chhungkaw rethei tak leh ngaihsanawmloh tak aţanga lo chawrchhuak, zu ruih hmang leh mi pâwngsual hmang, tlangval Zawmtea chu buaipuitu leh sûntu pawh nei lovin khawlâi chârah chuan ui ang maiin a thi ta a ni.

Mat 23:27       “Lehkhaziaktu leh Pharisai vervekte u, in chung a pik e! Thlan hnawih var, pawn lam mawi taka lang, a chhung lam erawh chu mitthi ruhte leh bawlhhlawh tinrenga khat angte chu in ni asin.”

Luka 11:39   Tin, Lalpa chuan a hnenah, “Nangni Pharisaiten no leh thleng pawn lam chu in silfai thin tak a; in kawchhung lam erawh chu hlepruk leh sualin a khat si a.”

© Dustin Lalkulhpuia

Similar Posts:

• Information mike
• Paws mai mai
• Mipa Vs Hmeichhia
• Pawngsual (RAPE) rate atangin, “MLTP hian kan khawtlâng hi hmeichhia leh naupang tân a ti him” tih chi a la ni em?
• A tak ram khawiah nge?

Recent Posts:

• misual.com tih tawp a ni dawn?
• SIH HUAI NEI (True Story)
• TLEIRAWL HMANGAIHNA
• January 2017, Mizo(ram) Diary
• ZOLÛTI LEH PÛK HUÂI

This entry was posted on Sunday, January 6th, 2013 at 12:31 pm and is filed under Fiction, Luangliam. You can follow any responses to this entry through the RSS 2.0 feed. You can leave a response, or trackback from your own site.