mi(sual).com

(A chanchin ziah tur dang ka hrelo, mahse hei te tal hi…)

Saikuti Hall khat tlata sikul naupang pungkhawm te chuan beisei nei takin Stage lam chu an melh thupa. Thenkhat zauthau leh hawklak zual te chu an te ring hlawm hle. Aizawl lam atangin zaithiam lar intelkhawm ‘Tripwire Entertainment (TE)’ tih hmingpua an lo kal vang a ni. Chhun pachang mah nise Hall chu a thim deuh thuapa, stage erawh a eng tha hle thung. Tunge zai hmasa ber ang tih chu mitin rilru luahtu anih hmel hle.

Ka thiante nen kan thutnaa  hlim taka kan lo nuih vel lai chuan kut beng ri a rawn ri ta hluah hluah mai. Kan la hriat than vakloh tleirawl chhelo tak hi nuisangin a rawn pen chhuaka. A zahzum hmel tehlul nen a hawiher chu a confi bakah a chezei riaua. A la zaithiam reuh em em zui. A hnua a hming kan han hriatchian chuan ‘Mimi Renthlei’ alo nia. Mimal rokhawlhna adt avangin TE member te chu an lo kal kim thei lova. Mahse kan lo nghahhlelh em em Gnat leh a nupui (hlui) an rawn penchhuah meuh chuan kan lawm a kim tho mai.

A hleitlin zia an lo sawi thin Gnat chu a takah chuan mit ti tlai tham a ni. Ka hmuh vawikhatna mah nise a huhang nat zia chu ralkhat atang pawh chuan hre theiin ka inhria.  A nupui Florence lah chu a hmelthain a duhawm hle maia. A zaithiam ve a ni tih pawh kan lo hriat loh lai chuan aw ngaihnobei leh ngaihla tak mai hian….

“….Biahthudi zawng kan tiam naa,

Ka ring zo lo i tawngkam mawi leh tha,

Kei mimawl mai hian, ka phu lo che

Dawn reng i ti tam mai thlawn…”

tih chu mawi takin a’n thlawh vang vanga, a kiangah chuan amah duat hmel tak hian Gnat chu lo dingin nalh fahranin alo pui ve bawka. Kan naupan leh mawlmang ang ang chuan kan luangliam tlang kher mai.

Chutah Gnat chuan a hla ‘hit’ mawi em em, ‘Ngaihzual’ chu lungrun takin an thlawh ve ta thunga. Audience te a chawk phur thiamin mipui thutna lama a’n rawn tlankual vel te chuan boruak a ti ‘hot’ zual ngei mai. Lo au rawih rawih tawk lah bo lo. A zai tawpah chuan engemaw hi a vawr tur thu leh a lo dawng apiang stage-a a koh chhoh tur thu a sawia. A vawr rual rual chuan an lo phusa nghal luai luaia, minit engemawti hnuah chuan kan sikul ami pawl kaw zirlai, hmeichhe tleirawl pakhat hi kut beng hluah hluah karah a ko chho ta mauh maia.

Keini chu thuthmunah kan lo ip chawih chawiha. Zah hmel takin Gnat-a bulah chuan a han dinga, ani chuan nelawm leh nuisangin alo biaa. Engtin tak ti ang maw tia kan lo ngaihchan thup lai chuan ka theihnghilh theih tawh loh tur thil a thleng ta. Mizo mipa zinga duhawm ber pawl, hleitling, hmeltha leh zaithiam bawk si, a lar vanglai tawng chho mek leh mi tam tak ngaihsan hlawh chho mek Gnat Lalrinchhana chu, tu khawkha hriatloh high school naupang thau bing biang, tarmit bun, chhuan tur nei bik lemlo tak hmaah chuan a khup lehlam tihniamin zawimuangin a thingthi taa….

Kum sarih lai liam tawh mah se khami tuma a thusawi mawlh kha, hmeichhia tawh phawt tan chuan tuiral lohna rual a ni lo. Tunah a awm ta lo chu a ni mai si, hringnun hi a va mak ngai em !

May you find comfort in the arms of God…RIP Gnat!

Similar Posts:

• Gnat
• Mizo singer Gnat Lalrinchhana is dead
• Fanghma Leh Nunhlui
• Mizo Idol/Icon etc ka hmuh ve dan
• Ka nau hla thenkhat!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, January 16th, 2013 at 8:00 pm and is filed under More than words, Obituary, Whatever. You can follow any responses to this entry through the RSS 2.0 feed. You can leave a response, or trackback from your own site.