Mizo Commercial Pilot hmasa te !

February 5th, 2013 7:27 pm by lushai_er

by Dr. Zokuma Vety [L]

Chanchinbu hrang leh ziak-mi kan pung zel angin hriat sual pawh a awm ve zel a. The Aizawl Post, 8^th Oct 2004 chhuakah pawh khan Tv.Michael Lallawmzuala, Pu Rothuama leh Pi P.C Lalchhandami, Ramhlun N te fapa, Air India-a commercial Pilot a nih tak thu, a thlalak nen an rawn tarlang a. A lawmpuiawmin Mizote tan pawh chhuanawm tham a ni. Chutih rualin Ramngaihzuala, Venghlui Indian Airlines a lo thawk mek tawh chu Mizo zinga Commercial Pilot hmasaber tiin a rawn ziak bawk a.

Tunhma kum 40 hmalam khan Mizo Commercial Pilot pahnih kan lo nei daih tawh a. An chhangkhat luat avangin , tunlai thangthar te tan hriat fuh loh pawh thil awm thei ani hial tawh reng a ni. Anni pahnih hi tu zawk nge hmasa zawk tih pawh hriat chian a har tawh a, an inhlat lo tih erawh a hriat theih a.

Capt. Sanghmingthanga Chhangte :- Pu Kela, Zotlang (Lunglei) fapa hian kum 1962-ah Civil Aviation Training Centre, Allahabad atangin Commercial Pilot License a lo la tawh a ni. Tea-Garden Sapho zingah Asst. Manager cum Piloth hna rei vak lo a thawk a. Kum 1966-1988 (Kum 22) chhungin India Airlines Coorporationah thawkin darkar 12,000 (Singkhat Sanghnih) lai boruakah a thlawk hman a ni.

Mizoram Sawrkar hnuaiah Director, Civil Aviation hna a chelh lain kum 1993 khan a lo boral ta a ni. A nupui fanaute pawh Aizawlah an la awm.

Thangvela Sailo :- Ani chanchin hi Rev. Zokima’n Hnehtu Daily 28^th July 1996 chhuakah a rawn tarlang a. Muallung khaw lal chhungkua ami, Laldosanga fapa Lianhnuaia Sailo fapa a ni a. A pa hi Burma Sipai (Chin Rifles) ah tangin a ban hnuah Maymo-ah an khawsa zui a. A thihsan hnuah a Nu hova seilian chho ta a ni.

Kum 1961-ah Burma Sawrkarin United Kingdom-a Pilot training tura a thlan hmasak zingah telin, kum 2 chhung a zuk training a. Kum 1980-ah Sawrkar leh Civil Pilot te an intih thiamloh avangin a ni chu a bang ta a. United States lamah kalin Commercial Pilot hna a zuk thawk ta a. Kum 1989 khan Africa (Uganda) lama tanpuina hna an zuk thawh lain, thlawhna khawl dik loh avanga chetsualnaah a zuk thi ta a ni. A ruang pawh U.S.A-ah 1^st October 1989 khan vuiliam ani ta.

Thangvela Sailo hi Mizo(Sailo) hrin ngei nimahse, Karen-ho zinga seilian niin, Karen mi nupui-ah a nei ta bawk a. Burma-ah chuan Mizo dang nen an inpawh vak lo niin a lang. U.S.A-a a zuk awm hi chuan a zuk Mizo hle ni ngei tur ani, Dr. Rev. C.L.Rema te nupa zuk zin tum khat chuan Mizo kalkhawmna hmunah lo tel ve in an zuk hmuh ve ngei thu a sawi a ni.