mi(sual).com

Kan naupanlai chuan, Sunday Sikul hi ka ngaipawimawh thin khawp mai a, Kaikim ngei ka tum tlat thin a. Tin, thawhlawm pawh ka ken theihnghilh ngai hauh lo a ni. A chhan chu Kanu min kaihhruaina anih piahlamah, Kumtawpa Sande Sikul lawman sem hunah ‘ Kaikim lawman’, ‘Thawhlawm thawhkim lawman’ leh ‘Honours lawman’ te lak ka tum tlat thin a ni. Ka tum ang ngeiin, damloh deuh chang pawhin ka thulh ngai lova, ka kai kim hram hram thin a, Khawdanga zin chang pawhin, ka va zinna khuaah khan an sande sikulah ka kai tho a, secretary hnen atangin lehkha ka la a, ka hawn a, kan kohhrana sande sikul secretary ka pe hram hram thin a ni.

Chuti taka tum ta nafam chuan, kumtin hian Lawmman pawh ka hui kim deuh ngei ngei thin a ni. Primary atanga Juniora ka kaichhoh kum tak mai hian, hming an ziah fel hnuah, Kumhluia Lawmman kha an han sem ta alawm le; Ka hmingpui chiah mai, Fanai ni ve bawk(Kei pakhup, ani hniarcheng ani naa, F.tih ringawt kan dah ve ve thin a)kha a awm a, ani kha kei aiin kumkhatin a naupang a, Junior-ah an sawn ve lo va, Primary pawlah ala thu a. Tichuan, Primary lawman an han puang ta a, Ka hming an han puang a, Kei Junior-ah ka lo thu tawh si; ani kha Sunday sikul kai tha ve fu thin, mahse kai kim ngai lemlo leh lawman pawh dawng ngai lemlo ani na khan, amah kha anih hmel ta riau mai si a, kan buai zo ta. Kapa kha Kohhran Chairman ani a, Kanu kha Primary zirtirtu ani bawk a, Sande sikul Superintendant lah kha, kapa U ania, mahse, a puangtu(Secretary) tak khan min duhsak vak lemlo a, Kanu leh Pa te ho an tawng huai vak ngam tawh si lo, ka lawmman lak ai zawng zawng chu, ka hming puipa chuan, a hui ta vek mai si a, Naupanlai chuan, rilru ana duh ngaih ngaih khawp mai. Khati tak khan ka rilru ana ang tih kha hrethiam sela chuan, Ka pa pawh khan Kohhran impumkhat nana min Sacrifice mai lo khan, mawi leh mawilo pawh thlu lovin, min tan duh awm e. Kanu pawh kha ka dem deuh tho mai; keimah zawk ka ni tih a hre reng a, mawi leh mawilo a dawn lutuk avangin a tawng huai ngam si lo, Ka hmingpuipa lahin, “keichu kani theilo” tih a tum tawh bik si lo! A pawi khawp mai, naupang rilru min hliam thuk khawp mai.

Johana bung 3 chang 16 ah hian, “Pathianin khawvel a hmangaih em em a, chutichuan a Fapa mal neih chhun a pe a, amah chu TUPAWH a ring apiang an boral loh va, chatuana nunna an neih zawk nan” tih ziak kan hmu a. Keima hming, “Pathianin PkFanai a hmangaih em em a” tilo va, ‘Khawve’l ahan ti pawp mai hi ava han tha tak em ve aw! ‘PkFanai’ ti ringawt sela chuan, midang an lo awm ve nual dawn si a, keimah nilovin ani zawk ani thei mai ang em aw? Tiin, kan tim dai mai ang a, ani khan alo chuh ve bawk si leh, amah tantu an awm nual si phei chuan, a buaithlak khawp ang. Nimahsela, tu mimal hming mah sawi lovin, Khawvel a address pawp mai a, ”Kei chu ka tel ve lo emaw, kei chu ka ni thei lo vang” tuman kan ti thei lova, min huap zo em em a ni.

Han chhiar zel ila, “amah chu PkFanaian a rin chuan” tilova, amahchu, TUPAWH a ring apiang ahan ti leh nghal phei hi chu, a va han Ropui em ve aw, ‘TUPAWH’ ah chuan kan leng vek a, “Kei chu ka sualna a ril tawh em mai a, min huap pha ve lo ang a?” tithei tumah kana wm lo a ni. “Keimah nilovin, ani zawk(ka hmingpuipa) ani ang a? tia Confuse lah a awm thei hek lo; ani pawh, kei pawh, nang pawh, mihring tawh phawt chu min huap zo em em a ni.

“Chutia TUPAWH tih anih chuan, min huap ve ngei mai a, muangmara la rin ve a, la zui ve tur anih chu” kan ti rilru em? Africa rama Missionary pakhat chu, a thusawi ngaithlatu midum pakhat chuan, a thusawi chu a awih em em thu leh nakin lawkah chuan, Kristiana la inpek ve mai pawh a duh a inrin thu a hrilh a. Missionary rawngbawlpui, arammi evangelist chuan, “Thianpa nang leh kei hi kan pahnihin ramhnuaia kan kal laiin, Sakeibaknei tawk ta thut ila, nangmah rawn seh a tum lai takin in inkarah rawn tlazepin, “Unaupa, I nun chhanhim nan tlanchhe vat rawh” tia au chein I nun chhanhim ta ila, ka chungah I lawm ang em?” tiin a han zawt ta khauh mai a.

Chu African-pa chuan, “Teh reng mai, I chungah ka lawm tak zetin, ka hmangaih ngawt ang che” tiin a chhang a. Chutah Evangelist chuan, “Engtikah nge ka chungah I lawm ang a, min hmangaih ang? Nakin deuhah emni ang?” tia ahan zawh takah chuan, chu Africanpa chuan, thil awmzia chu a man thiam ta a, “Nakinah nilovin, tunah ngei hian, Lal Isua chu ka Lal leh chhandamtua pawmin ka zui nghal e” a ti ta a ni.

“Ngai teh u, tun hi hun lawmawm chu a ni a; ngai teh u, tun hi chhandamna ni chu a ni” (II Korinth 6:2)

Similar Posts:

• Sunday Pual- Temporary Home
• Father of Mizo Sunday School Union Pu Zalawra chanchin
• A, AW, B hla
• Pu Chala Sikul chhuak ka nia (Vawiin ka Birthday pualin)
• Hmangaihna vang a ni (Sunday Pual)

Recent Posts:

• How to locate your misplaced Android phone
• KUT HNATHAWKTU TE TANA HAMTHATNA
• Mizoram Electric Power Dinhmun Leh Hmalakna Te:
• YMA
• Hringnun thim lam

This entry was posted on Sunday, March 10th, 2013 at 6:18 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.