mi(sual).com

Mipa naupang Sikul bâng tlan haw phe hlawp hlawp chu a lo hmu thin tan chuan thil mak a ni tawh hauh lo. Kawnga a tlan pah chuan a Form Kamis bâl tawh lam, a kilh pawh kim lo chu a kilh awm ang ang a phelh pah mawlh mawlh a. A tla dah êm vang pawh ni lovin a hmaa tih tur inchher chhuan nguah chuan a rilru a kap êm avangin a lehkhabu ip leh a thuamte chu a dahna hmun tur takah pawh a dah hman lo.

Hmanhmawh taka Tap lam a pan lâi chuan hriatchhuah thut nei niawm takin pawn lamah a tlan chhuak a, a rawn luh leh chuan thing hi a rawn pawm lut tûn tawh bawk a. Rap chu thing hâk sa a awm loh avangin a lo ruak dum ruap a. Bangrel chu thu chungin pha leh pha loin a dap rak rak a, chemtê leh nawhalh a hai thla hlawl a. A hmanhmawh em vang nge mawni êk chhuak tawh lutuk insum hmelte a pu lek lek. Khawnvartui bawm chu a letling theih tawpa a han thin vel pawha far tur a awm tâk loh avangin Dandawi bur hlui Saidâwi Ûm-a an siam Bati chu a phita hrengtu a chhin pawh phelh lovin a khai linglet thawk a, khawvartui chu a duh aia tam a buak tâk vang nimaw a hmelah chuan pawi tihna a lang lek lek mai. Mahse thulh chuang hauh lovin zei fahran chuan nawhalh chu a thai têk chhuai a, tap chu mei alhin a khuh nghal pup a, a thaw huai a.

A thing pawm luh thingfâka a ther chu hmanhmawh fê-in a thliak leh nghauh nghauh a, tap sira thing hawng inchhep chuan a mei chhem chu a vur nghal hluai bawk a. A chala thlan fim bawl chhuak tiam tiam chu a kut phah chunglam chuan a hui pap a. Chawlh mai a la hman lo tih hriat reng chuan pawnah a chhuak leh a. An thenawm ten Vaihlo pho nana an siam Leikapui-a a nu buh pho sa chu a rût leh mawlh mawlh a. Phurh mai a tum hnu chuan a ding leh hluai a, In chhung lamah chuan tâwk fang a va awm hnuah Têl tin pahnih chu tinkawh lehlam hmawra khai zawmin a rawn kawt chhuak a, a hmel en mai chuan Têl tin khat tui kawt zo awm hmel a la pu lo.

Têl tin chu fual fe hian a rawn kawt haw pâr pâr a, a hnungah chuan naupang bâl paw tha tak hian a rawn zui haw ta hnak hnak bawk a. Chu naupang chu an khaw VCP In hmun laihna vungah a lo cheng chawhnu leh tih a hmel leh a balh dân atang chuan hai rual a ni lo.

An unau chuan an buh phona Leikapui lam chu an pan a. Harsa lo fe chuan chu mipa naupang chuan Emping khat teh meuh Buh hûm chu a phur ta mai a. A nau chu eng thu thu emaw a chah leh hnuah Vêng tâwp lama Pu Lûta buhdengkhawla buh dêng turin a chhuak ta hnak hnak a.

Mualvenga Putar ni tla tur hnung puak zawnga lo thu khawm chuan chu naupang an hmuh rual chuan an lo sawi lai Rambuai chanchin pawh chu chawlhsanin, Pi Buangi Thingpui Dawra Pawisa inchawia thu nileng naupang pa chet dân mak an tihzia chu inthurual fe chuan an sawi nghal sap sap a. Tawngkam pawh an duhtui lo khawp mai.

Chu naupang chuan Khelmual lam chu a thlir dauh dauh a. Chhun lama a School kal pui ten Ball an lo pêt laih laih chu awh hmel zet chuan a buh phurh theihnghilh ta niawm takin tawk fang chu a thlir leh a. Mahse a hmabâka tihtur la kuh tûn mai chuan a bûk hneh em avangin a thiante infiam thlir mai mai chu a tan chuan tih thiang lo tluk a ni.

Pu Chawngkûnga lawm rawihte zingah chuan kan sawi mêk naupang nu pawh chu a tel ve a. Vaihlo loin an nilêng leh zak a. Dik tak huan an khuah na na na  chuan a ni tluka Vaihlo lawh chak an awm kher lo ang. Nu taima pui mai  a ni a, mahse nau thla sarih mi dawn a pai avangin hmun rem lo lama han chet tlat chu harsa a ti ve tan ta khawp mai.

An bân rual chuan a thiante pawh thurual pui zo lovin a haw nghal ta daih a. A thiante pawh chuan an ngai haw lo mai ni lovin an hriatthiam pui em em zawk a ni. Khua atanga fing khat dawna hla-a a nute huana thing chu a pu haw hrâm a, a kal chak lam erawh a thlah hniam chuang hauh lo.

In chu meikhu chuan a lo bawh lûk a. Thei leh thei lo-a mei lo vil ve a fanu chuan an bang chhung lam zawk mau dâp ro tawh chu thliak In a lo tuah hem hem mai. A vâp chu tapah chuan a vum deuh thur bawk a. An bang chu a chhiat tawh em avanga dâp thara pawn lam atanga bel nawn leh an ni nghe nghe. A fanu hnenah chuan a chhanna hriatsa, a pa awmna an zawt leh a. Tlai tina a hriat thin tho, “Pi Buangi thingpui Dawr” tih bâk naupangin hriat belh tur an nei chuang lo. A thuamte a dah fel sawk sawk a, Tap vei lama Ketli ung zeta tui inchhuang chu a kutzung chalin a zuk khawih zuai a, a sa ve thawkhat a ni tih hriat takin a la sawn leh vat a.

A nu inbual zawh hma deuhin naupang buhdeng pawh chu a lo haw leh a. A phur hlânsak mai tur an awm loh avangin an dawhkan ke rem tawh lo tak chungah chuan fimkhur fê-in a hung hmasa a, rang takin Lei lamah a hung rem ve leh mai bawk a.

Tlai chaw an ei lai chuan an In chu a reh thiap mai a. An mitmeng en chuan an thlamuang lo tih a hriat reng mai, sawi chhuak duh awm lo mah se pa ber ruih haw a hun tan tawh tlat a ni.

Nu ber chuan a theih ang angin hmanruate chu a pasal lâk mai harsa deuh turin a sawn fel zung zung a. Chumi hnu chuan inngai tih hriat fe hian Tap chhakah chuan meilum kilin an thu bial a, nu ber chuan a fate sam chu a khawihsak niap niap a.

An unau zinga upa ber chu Aizawl mi hausa Inah chaw ei siamin a phe buai ve mêk a. Dik tak chuan chaw ei hun hi atan chuan huphurhawm thin tak a ni. A chêt fuh lohna chi tin phawrhsakin an hau ta thin a. Chumai duhtawk lovin zu ngawlvei fanu anih thu leh thingtlang mi anih avanga a mawlzia te chu an hrilh awl lo va. Mahse a nû tana sum tlêm a thawn theih avangin a tuarte chu nâ a tiphal chuang lo.

Kawngka ri rak thawmah chuan naupang meilum ai chu an hawi chhuak rual thawt a. Pa ber chuan awn teng tawnga kawngka biang vuanin In chhunga a fate leh a nupui meilum kil chu an thlek vang vang a. A hmel chu a hlim nge a lungngai chhiarthiam har tak a ni. Hlauh hmêl taka mipa naupangin a pa va kaih a tum chu a lo duh bik hauh lo. A kut chu paih leng dawr pahin In chhungah chuan a rawn pai lut chhat chhat a. Vin fê-in, “Eng nge chawhmeh awm?” a ti liam puat a. Nu ber chuan a chawei tur chu a siam sawk sawk a, chawhmeh lah chu Behlawi rêp buhchiar, a buh tam zet maia bai bâk a awm si lo. Pa ber thinrim chuan a nupui leh fate chu a ankhum leh ta chiam mai a, chawhmeh pawh siam thiam lo-ah puhin a nupui berkher a nei a inchhirziate chu a la sawi ta deuh deuh a. A nupui inchhirna zawk chu hria se a thil tihlai chu sim daih duhna hial tur a ni.

Zurûi hnar bawrh bawrh ri karah chuan hmeichhe tap ri faih faih chu hriat hmaih theih rual a ni lo. A chânga a tawng chhuah leh thin avangin a tawngtai tih a hriat theih mai a, a zantin tihdân a ni nghe nghe. A châng chuan a beidawngin thih hial thlan châng a nei ve a. Mahse a fate hmakhua a ngaihtuahin chu chu thil tih thiang a ni si lo.

Sawt tawh lo tûr a nunhlui chu a rilru-in a siam tha nauh nauh thin a. Engkimah chuan thiam a inti lo, Zu in thin anih hre rengin a nu leh pa remti lo chung a inrûktir tlat a. Mahse a tawngtaina chu chhânin a la awm ang a, a pasal chuan zu a la nghei ve ang tih beiseina chu a naktuk hman leh theihna chhan pakhat a ni ta reng lo thei ta si lo! A tak takah chuan naktuk a lo thlen pawha thil engmah a danglam ngai loh avangin beiseibo beisei tih mai pawh a awm hle a ni.

170320130909pm @vtn

Similar Posts:

• Hmeichhe naupang in thil a ru thin
• A ruala nupui 4 nei!
• Broken Pieces
• Meihawl rawh ang u
• Love marriage aiin Arranged marriage kan thatpui zawk ang..!!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, March 20th, 2013 at 7:50 am and is filed under Fiction, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.