mi(sual).com

Nidang a ka tih thin angin ka nu inkhawm tur chu ka chei mawlh mawlh a. A thawmhnaw hak tur ka thlan sak mawlh mawlh a. Vanduaithlak takin vawiin chu a kawr rem tur puan chu puan dahna ah chuan ka hmu zo mai lo a. Puan bih khat deuh kan dahna thingrem lian chu ka hawng a, ka rin ang ngeiin a rem tur tak puan chu a lo awm a, ka nu chu ka pe a, a bih hnu chuan mawi ti takin ka thlek vawng vawng a. Inkhawm tur chuan min chhuahsan ta a.

Puan ka lak chhuahna Thingrem lian chu kalh ka tum a, mahse, ka hai chak tlat a, ka hai ta a. A mawng berah chuan ka mittui ti tla sawk thei thil ka hmu ta tlat mai. Ka kutah chuan ka nu pawnfen par hlui chhe zet tawh, a pawp bel thluah tawh chu a awm a, ka melh vawng vawng a. Ka nuho a rethei bakberh a kan awmlai chu ka ngaihtuah chhuak ta uar uar a.

Ka pa hian kum 3 mi lek ka nih laiin a dawn tawi luatah kei leh ka u te pali chu ka nu enkawlna hnuaia seilian turin min chhuahsan a. Ka nu chuan naupang chumchiap mai a fanu panga-te chu harsa takin min enkawl ta a. Kum 10 hnuailam vek naupang panga enkawl a hau tak tur zia hi tun hnu ah chauh ka hriatthiam puiin ka hria. Zan lamah chawhmeh a siam sa vek a, a in su bawk a. Zingah khawvar hma a thovin chaw a chhum leh a, a chhum zawh ah ka muhil lai chu tih harh hlau takin min pua a, bazar lamah hnathawk turin kawla ni chhuak chhiarin a chhuak thin. Kut beng tak meuh meuha pa chhuahsan kan nih avang khan ka nu khan bul tanna tur sum a nei heklo. A ip ah chhe zawr tawh tak chhung chu a en a, cheng thum chiah a awm a. Bazar panna kawngah chuan min paw chungin Pathian tanpuina dilin, mittui nen a tawngtai mawlh mawlh thin.

Hetah tak hian ania Pathian hnathawh ropui lo lang thin chu. Bazar kan thleng a, amah khawngaihtu an lo awm ve nawlh zel a. Chung mite chuan an seat sir ah hmun tlem kian ve in, an chawhmeh lak sa chu a hralh zawh huna sum lu pek turin an lo zawrh tir ve thin. Ka hriat reng chu a bul vela bazar thu dang chuan thingpui leh a hmeh tui tha tha an ei laiin ka nu erawh chuan a fate’n chaw kan nghei a hlauh avangin thingpui no 1 pawh in ngam lovin riltam a tuar nileng thin. Artui chhum hmin sa pum 1 a lei a, a chaw fun dai duk tawh nen chuan kei chu min hrai puar a, a ni erawh chuan tam hnemah a khat tawkin chaw leh chi chauh chu a bar ve zauh zauh thin.

Sikul kal rual ka nih hma deuh chuan ka u te luhna sikul zirtirtu khawngaihnain ka u te bula sikul kal ve min phal saka, ka nu tlemin a hahdam phah ve a, ka ute chu an lawm teh asin. Khatih hunlai khan kum 6 tlinglo chu sikul kal an phallo a, mahse, kei chu kum 4 ka tlin hmain ‘A’ Pawl naupang za dawn zingah khan 23 na ka ni ve. Ka naupan em avangin pawl sawn min phal saklo a, ‘A’ pawl-ah bawk ka thu leh a, primary sikul ka kal chhung zawng pakhatna ka hauh deuh char char a, ka nu kha a lawm thin teh a nia aw.

Ka u-te tlema an lo lei kan a, kum 10 an tlin takah chuan ka nu thawhrim zia chu hriain kan unau chuan ka nu phallo chung sikul ban ve leh bazarah kan tlan chho a, mi chawhmeh kan sale sak thin a, kan sikul pai tur kan hlawh chhuahte khan kan lawm thei thin em em a ni.

Ka nu tan chuan hun pui lo thleng thin te kha hreawmna leh mittui tlakna mai a chang thin a. Sunday School Naupang Inkhawmpui leh Krismas a lo thlen chang a, mi fate chu lu atanga ke ler thlengin thawmhnaw thar nen an in thuam a. Keini unau chuan ka nu bulah thawmhnaw thar kan ngen ngamlo hrim hrim a. Mahse, ka nu tan chuan sawilo mah ila a fate rual awh ruk zia chu hai rual a ni si lo. Ka u te kha naupangte e tilo khan an lo fing thin ngawt mai, ”A nu, Matei hi lei sak la a tawk mai. Keini chu kan ngailo’ tiin a naupang ber, kei chu min kian sap sap zel a, an lo va ropui tak em!

Sikul chawlh apiangin kan unau chuan khawvar hma daiha thovin, bazarah kan kal a, polythene kan zuar thin a. Khatih lai khan polythene zuar kha an tam em avangin dinna tha leh lun chuhin kan kal hma thin a. Khawvar hnuah lokal ve chauh pitar leh nu polythene zuar lokal thinte khan kan awmna hmun thalai chu rawn chuhin, min nam kat dawr dawr thin a. Keini, riltam taka khawvar hma atanga lo ding tawh tan chuan an huat awm duh thin ania aw. Hetia sikul chawlh laia kan unau a kan intuakna chuan kan unau zinga pakhat mamawh- zirlaibu, uniform leh silhfen a lo tum ve thei khan ka nu a tih lawm thin zia kha, a phur tlemin a zan phah si a.

Khatih lai khan kawl a ni chhuak chhiara fate tana hnathawk thin ka nu khan mi pek anih ngawt loh chuan thawmhnaw thar ama puala a lei pakhat mah ka hrelo a. Bata slipper ral lek lek, a hrui thirzaia zawm nuaih tawh chu a bun thin a, pawnfen par pahnih a pawp lai bel fur tawh chu a fen thlak thin. Chu a pawnfen pakhat zawk chu a lo la dahtha reng a, tunah ka kutin ka keng mek a ni si a.

Lungchhe takin ka tap a, kan tana ka nu lo thawhrim zia, retheih zia leh thawmhnaw thar leina tur pawh nei lo a, a fate tana in pe zo, a thin em vanga rual pawl ngamlo khawpa awm thin ka nu chu ka ngaihtuah a, ngaihsanna chang ka lo hrelo kha ka lo va a tak em! Tunah chuan ka tun dinhmun thleng theia min chawi liantu ka nu hi khawvela nu tha ber leh ngaihsan awm ber a ni tih ka hre tawh a ni. A pawnfen par hmaah chuan thu ka tiam ta a- ‘Ka phak tawkin ka nu hi ka cheimawi reng tawh dawn a ni. A mawina hi ka mawina ani tih ka hrereng tawh ang’ tiin.

Similar Posts:

• KA NU PAWNFEN PAR (PART-II)
• Maubawk-a in kangah Naupang 2 leh Nu 1 boral
• Chun Nu Hmangaihna
• Dawn a tawi mang e…!
• Ka nu tan

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, March 25th, 2013 at 7:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.