mi(sual).com

Kei hi zin vah hrat ve tak mai, zinna tur hun remchang a awm chuan bawh pelh mang lo thin hi ka ni ve a. Hmun hrang hrang, khaw  hrang hrang hi ka tlawh kual ve nual tawh mai a. Heng ka zinna ram thenkhat te hi chu nuam ve tak tak te pawh an nih ve lain a thenkhat te an nawm na sawi tur reng reng awm lo te pawh a ni ve nawk hlawm tho mai a. Mak ka tih deuh deuh lah ka hmu hnem ve nangian bawk. Tuntum chu ka zinna khaw pakhat chanchin kan sawi ve hrim hrim teh ang.

Hemi tum a ka zinna khua hi khawpui ve deuh mai pakhat hi ani ve a. Rei cham tum a zin ka ni lem lova, a khaw chinchang hriat tum ve pah leh zin thengthawt pah a kal ve mai mai ka ni a. A khua hi tlangram chhengchhe ve tak mai ani a, motorin kan kal a, a khua kan han lut tan chu fur lai lo ni ve deuh bawk nen an kawngpui chu National highway e tilo chuan chhe neuh neuh hi a lo tam phian mai a, a then lai te chu zau tha tak tak leh mam tha tak tak te an nih lain a then lai te chu chei hnum loh leh enkawl ngun loh tih hriat tak mai hian an metal road te chu a lo khawk nian nuan hlawm  mai a, a then lai a diak nal em em a chutihlaiin thenkhat lai te chu a khu nasa leh viau angreng lawi a. Chutiang chuan engtin tin emaw an khawpui chung chu kan han chuang lut ve ta hlawl mai a. Rinai tak chuan an khawpui chu a lo pui ve phian mai a, mahse an khawpui chhung chu atir atanga ruahmanna fel tak awm lo a duh duh dan a a rem lai lai a a neinung deuh hovin in an sak tih hriat  tak mai hian in leh in chu awmze nei vak lo hian a lo in tawksir khup mai a, an kawngpui te lah chu a zim ang hu ah lirthei lah chu an kawngpui phu lo hian a tam lehnghal a.

Tichuan thlenin tur chu ka han zawng ve ta nawk nawk a. Ka lo hriat dan chuan he khua hi tunhma chuan khaw nuam tak mai, mikhual pawhin thlenin an hnawn mai mai ngailohna ni a an sawi thin niin ka lo hria a, mahse chutia chhungte leh hmelhriat nei lemovin thlenna tur ka han zawng ta chu rinnain a lo  vang phian mai a. Thlenna tur ka hmu mai dawn tawh lo emaw ka tih lai chuan veng pakhat , veng mawng lampang deuh a chhungkaw pakhat chuan min lo thleng duh ta hlauh mai a, ka lawm kher mai. Ka thlenin tur ah chuan ka innghat ve ta rawih mai a. Ka han intifai a, rinai tak chuan ka thlenin te chu an lo tha phian mai a. An chhungkua chu an pa ber hovin a nupui fanau ten en a khawsa an ni a. Fapa tlangval ve tan tawh leh fanu tleirawl leh an te ber hmeichhe naupang kum 12 mi bawr vel hi an ni a. An pa chuan sawrkar hna chhete a thawk ve a, an nu erawh in lam a enkawl a, an fa te chu lehkha zirlai vek an ni a. Chhungkaw khawsa thei tak chu ni lo mahse chhungkaw pangngai tak chu an ni ve a. An pa ber chu a tawng duh ve viau mai a . Zanriah kan han ei zawh chuan chinchang te sawi in kan titi vel mai mai a, ka chanchin te  leh eng ti tur a ran kal nge ka nih tih te min zawh hnu chuan an khaw chanchin chu a tlangpui chu min hrilh chho ve ta a.

Pa ber chuan, “ Kan khua ve hi chu a la rei loh hang hu hian kan thang chak ve viau mai a, mahse kan than chak dan hi a hmasawn vak lo chi hi a ni ve angreng a, tihian a nei nei hian in lian pui pui hi an sa a, kawngpui te lah hi a chep zo tawh si a. A nei apiang leh nei lo pawh hian lirthei hi lei an tum vek mai si a, neilo chung chung pawn loan hian an lei a, kawngpui te lah hi zauh ngaihna  a awm tawh der bawk si lo, a hahthlak a nih hi,” a ti luam a. Chutih lai tak chuan an fapa chuan “ Ka pa, ka leng chhuak dawn pocket money tur leh ka bike a petrol man tur min lo pe,” a rawn ti a. Ka thlenin pa chuan, “tlangval hnathawk rual ve pui tawh si mahni pocket money tur pawh pa te in la dil duk duk chu a ni si a aw,” tih pah chuan pawisa chu a pe a, an fapa chu rang mangkheng hian a tek chhuak ta nghal a, a bike an tinung ri lah chu an ring em em mai khawp a, thenawm khawveng te tan chuan ninawm tham tur chu a ni ve hrim hrim  mai. Chumi rual deuthaw chuan an fanu tleirawl chuan, “ Pa, keipawh top-up thunna tur ka duh, mi biak a ngai ,” a lo ti ve nghal zat mai bawk a, a pa chuan phun nang nang chung chuan a pe ve ta nghal a.

Nu ber chuan thingpui tui tak mai min rawn lum sak a tichuan kan titi chhunzawm chho, leh ta zel a, ka thlenin pa chuan, “ Kan sawrkar te lah hi, a chaklo ve angreng bawk si a,kan ram hruaitu te lah hian an ka chauh hian ram hi an hmangaih a,ram leh hnam ai chuan anmani an inhmangaih zawk a , chumi dawt ah an chhungte, chumi dawt ah an party mi leh sa chumi hnu ah chuan ram hi an hmangaih chauh tawh thin a, kan ram leh mipui hi chuan chan alawi  hi kan nei ve meuh tawh thin lo,” a ti chho dap dap mai a. Kei chuan han sawi pui vak dan ka hriat loh avangin a khat mawi tawkin ka lo aw,e, vel mai mai a, thlenin pa lah chuan ala sawi tui dawn chauh mai si a. Chutih lai tak chuan electric a rawn thim thut mai a, nu ber chu mombati chhi turin an buai leh rih a. Ka thlein pa chuan, “ aww, ram hmangaihtu inti heti zat hian kan ram hi an hruai tawh a, power supply hnianghnar takngial pawh tun thleng hian kan la nei thei lo chu a ni si a. Kan ram ah hian kan mamawh khawp tharchhuah nature lui tui khuah tur te hi chu a awm tha ve hian ka hre ve thin asin mawle aw.” An ti zui leh nghal zat bawk a. A dik angreng viau in ka hria a.

Chutah politics lamah min zuanluh thuk pui dawn lutuka hria in Kohhran lamah te enge an dinhmun ka zawt ta zawk a. Ka thlenin pa chuan “ A, kohhran lam hi chu, ka hre thui lutuk lova, Sap hovin kan ram a Kristianna an rawn ken luh atang hian rei vak lo hnu ah hian kohhran pawl hrang hrang hi a ding ta teuh mai a. Khawi pawl mai pawh hian an mahni pawl hi a dik ber hi an ti theuh tawh mai a. Pathian rawng bawlna lam ai mah hian kohhran pawl rawng hi kan bawl tawh zawk hlawm emaw tih mai tur hi a ni a, eng pawl mai pawh hian hian mahni pawl lo ah chuan Pathian hi a awm lo an ti tawh emaw tih mai tur hi a ni a, a member RINGTU inti te lah hian Pathian engkim ti thei, engkim hria,  khawi hmunah pawh awm tih lam hi kan ngaihtuah tawh bawk si lo, alang a mawi atan hian ringtu hi kan inti ve ringawt tawh ni main kei chuan ka hria, a thawhlawm thawh tam thei thei hi kohhran ah pawh hian an tlatlum tawh mai ani, Pathian rawng aiin sakhaw rawng, kohhran pawl rawng bawl tu hi kan tam tawh zawk in ka hria.” A ti chho ta duah mai a . Hetiang lam chu a sawi pui chi dawn loh riauvin ka hre leh ta a, an khawtlang nun lam chu ka zawt ve leh ta zawk a.

Chutih lai tak chuan an information mike atang chuan tlangau a rawn au va, “ Vengchhung mipui te hnena hriattirna kan han puang ange …..naktuk ah thlanmual sam hnatlang neih tur ani a, vengchhung nula tlangval te tlawmngai a hnatlang a chhuak theuh turin kan rawn ngen a che u,…” a rawn ti lauh lauh mai a. Ka thlenin pa pek chuan, “ Khati kha ania, kan khawtlang nun chu i hrethiam nghal mai lawm ni, tlawmngai tur pawhin a ngenin in ngen a ngai tawh a nia, a zah hian a zahthlak tawh ania. Kan thalai te hi meng rei, murei, ei thei, hnathawk theilo, inchei satliah, thawhchhuah nei si lo, kan fapa atang khan i hmu mai lawm ni? Duhzawng hi an ngah si hna an thawk tha peih si lo,  sawrkar hna kher lo hi chu hna ah hian an ngai tawh lo a, kuthna thawh te lah hi an han hmusit ve khanglang leh nghal a, an zahpui awm tak tak a ni. Lehkha an zir a, sawrkar hna an beisei a, lehkha thiam an inti a, lehkhathiam hna hmu lo pawl te ka din e an ti a, lehkha an thiam a nih chuan an lehkha thiamna te kha  hna dang, sawrkar hna kher lo a eizawnna inndap kuak nan a hman hlawm awm hi a nia, ka ngai nep hlawm ania.”  A ti ta deuh zek mai a , a duhtawk mai dawn emaw ka ti a, a lo la duh tawk teuh lo mai. “ Tunlai khawvel changkanna alawm an ti a hei kan fa te pawh computer te kan han lei sak ve a, games khelh nan leh,  thian kawm nan te, hla ngaihthlak nan te, Facebook nan te bak an hman tawp loh hi, tunlai khawvel ah computer hmanga eizawnna tur a tam teh reng nen, kan changkan dan te hi a khingbai teh ania keini khua ve hi zawng. Khawtlang ah te han inhmang ve se an inla pawimawh mghal em em ringawt zel mai bawk si a. Khawtlangah te pawh hian a mi lian lian leh a neinung nung hi an tlatlumin an langsar tawh mai a. Incheina te lah hi an han duh changkang tawh khawp a, keini ang duang chuan kan zo meuh tawh lo chu a ni ber e, an incheina changkang lutuk hi a nei ve lo tan chuan inkhawn te thleng pawh hian a inthlahrun awm rum rum tawh mai alawm,” a ti chho ta zel mai a.

Tichuan Kan inkawm chho zel a,  zan te a lo rei ta bawk a mut zai kan rel ta a.  A tuk ah chuan ka thlenin pa chuan an khawpui chhung chu min fan kual pui ta a. Ka sawi tawh ang khan lirthei a tam si a, kawngpui a zim si a, chu achhapah lirthei dahna tur bik hranpa a awm loh avangin kawngpui sir ah a zau lai deuh ah lirthei an dan del dul mai a, tin mihring kalna tura siam ah lah chuan chawhmaeh zuar te an inpho khat vek ang lawi bawk si a, chu chuan an khawpui kawng chu a ti chep em em mai a ni. Mak ka tih deuh mai pakhat chu an  sawrkar chuan an khawpui chu a chep tehreng nen zauh tumna reng reng an neilo leh an bazaar leh pisa hmun pui chu khawpui chhung ah  a chep lai ah deuh vek chuan a awm mai chu ani. Chuchuan an khawpui lirthei veivak pawh nasa takin a ti tawt in ka hria. Fur lai tih takah khawpui chhungah chuan tuihawk luankawr a thatloh avangin kawnglai a hnawl leh tuihawk luang hmuh tur a tam em em mai a, tin an kawngpui te pawh chu cheithat hlim mah ni se fur khat bak a daih dawn lo tih hriat tak hian a pan hlawm hle a ni.

Ka thlenin pa hnenah chuan khawiah emaw hmun nuam deuh ah I leng khawthawng ve the ang ka ti a kan sawm chu, “ eeeee, kan khua hi khawpui ve riang ruang e tilo chuan han len thawvenna tur park nuam leh tih tham deuh te, nula tlangval han inkawm ve na hmun nuam deu te leh cinema hall te pawh pakhatmah kan nei hleinem. Tihian a nei fa deuh te lirthei nen khawi kawng fal deuh ah emaw an leng thawveng ve a, chu chu khawtlang duty ten an hmuh fuh leh an hnawt darh leh a, kan thalai te hi an khawngaihthlak asin. Kan sawrkar lah hian thalai te tan sport lampang hi a ti a a uar hlur a, thalai sport lam ti ve ngailo a tam zawk te hi a ngaihthah leh bawk si a, buaithlak tak a ni,” a ti chho leh ta zek mai a.

Ka ngaihtuah mai mai a , ka thlenin pa chu pa an thiam tak a nih dawn hi ka ti ta a. Chutiang khua teh hrep chu cham reng na chi niin ka hre talova, mi khua zin ve manah ti a naupang thawmhnaw lei kan tum ve lah chu awi awi awi, ramdang a a man let hnih ai mah in a lo to hlawm a ka lei ngam ve ta mang bawk silova. Tichuan chu khaw mak tak mai ka zinna ram chu a tuk ah chuan an thang-leh-thar ten siam that nachang hre khawp a  an harh chhuah hun a tlawh leh atan kan khaw lam pan chuan ka haw san ta a.

An khaw kawtchhuah kan tlan pelh dawn chuan sign board lianpui lo intar chu ka han en a, “ MIZORAM I CHHUAHSAN TA, DAMTAKIN MANGTHA LE” tih hi a lo in tar kuau mai a.

BigDaddy Hmahmatea
(R.Lalhmangaiha)
Kulikawn

Similar Posts:

• Parking uluk dawn
• Tuipuiral Group YMA ten kawngpui siam dawn
• Kan Kawngte hi…
• BRTF Kawng ve hi le!!
• Ka ti mai mai thin!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Tuesday, March 26th, 2013 at 7:15 pm and is filed under Adventure, Luangliam, More than words, Travel. You can follow any responses to this entry through the RSS 2.0 feed. You can leave a response, or trackback from your own site.