mi(sual).com

Tho hreh takin khumah ka let ka let a, âr a rawn khuang chiah a, barakhaih ang mai in khumah ka ding ta hluai a. Ârpa ka ngah tehreng nen, chu Ar khuang danglam bik na chu enge?

CHU ÂR CHU: Zing tina khuang thin, tuktina chaw ka pek, ka duat em em, ka ar zinga ka ngainat ber a ni, fa chuam anga ka enkawl, fa tlumber anga ka duat a ni. Tukkhat chu kawhmawhbawlin âr dang a chuk chiam mai a. Chaklo leh naupang zawkte bula awmdanmawi zirtir ka duh avangin ka arpa huaiber bulah chuan ka khung lui ta a. A hlau ngang mai!! A lu thukru in bih ruk a tum a, pakhat zawk lahin dimdawihna tel map lovin a mawng ah tak mai chuan a pet ta lauh lauh mai a. A sualhuai zawk ta na na na chuan a nawp ta nek a, a hnehsawh ngei mai. A râk teng tunga, ar dang hriat ah tlawmzawk nih thu puangzar in a iak ve ta vak vak mai a. Ar dang ho paw’n an lawm vang nihmiang an lo kawkawdak ve noh noh mai bawk a. Khami tuk kha chu kan chhung kan bengchheng ngei mai!! Chuan eng tin zel?

TLÂWMAH A LA: Tlawmzawk nih chu a la na ngang mai!!! Ka’n la chhuak chiah chu, a zum zât mai a, Âr dang bulah pawh awm duh miah lovin, âr la dang lah a ngaihsak tawh hek lo, a sim chiang hle ah ka ngai mai a!!! A tuk khua a lo var a, a khuang ka hre ta hauh lo mai, ka zawng chiam a, ka beidawng der a ni!! Khawi lai ah emaw lo thi palh a nih takin ti in chhung chhungin thenawmte ramah kan zawng luih luih a. A ruang rêng hmuh tur a awm lo a, a thawm lah hriat tur a awm tawh hek lo!!! Pûâl lenga thlangtla an sawi ang vang vang in a reh ta vawng vawng mai a ni.

KA LUNG A LENG: Thla hnih a liam. Tuktin ka tukverh bianga thlawk kai a khuâng âl âl-a min kaitho ziah tu, ka hmel a hmuh apianga thian te tlansan a min pan dat dat thin, ka âw a hriat apianga khuan chak ziah mai, ka Pisa ban hun awm vel a rawn haw ve ziah thin a ni. Mahse, Tunah chuan a awm tawh lo, ka khua a har ta takzet mai!! Ka ngaih em avangin zingah te hian a lo chhâwn mial takin ti in veng mawng lamah te ka zuk khuang ru vel thin a, a chang leh arnu kak ang hian ka kak ve chiam chiam mai thin!! Hmelhriat ten “U Zra kan huan ah a rawn khuang thin, U Zra hi tun lai chu a kâk vak vak zel” ti a an sawi hlau chung chungin, KTP leh YMA a ka OB nihna hre ran in a rukin rei fe chu ka khuang ru ta tang tang a. Mahse, Thla khat a liam a, a ngaihna a awm tawh ngang lo, a tawp nan ti in Chhingaveng nena kan in ri na ah ka ngam tawka ringin, ka va khuang leh hrâm a. Ka âr chu ka mangtha zui ve ta nge nge a.

BARAKHIAH: Ni 22.05.2012 zingkar khuantevik a ni a, tho hreh takin khumah ka let ka let a, ka piancham 25.05….. ka thleng tep a, a lawm nan eng thiltha nge ka tih ang tih ka ngaihtuah lai mek a ni. Âr a rawn khuang ta!! barakhaih ang mai in khumah ka ding ta hluai mai, ar tam tak zinga chu ar khuang berkher chu tu khuâl âr nge ti in hmuh thuai thuai chakin beiseina nen ka buai ta nuaih mai a!!! Kekawrte nen ka zuang thova, khum tlansanin, kawr ha hman lovin, kawmthlang te kawmchar ah ka pit liam phei puat a.

HEIDENRIAL: Barakhaih, kan in tawng ta phut mai!!! A ni, a mah ngei mai kha a ni!! A ni pawh min han hmu thut chu a lawm tih hai rual a ni lo!! A tûka, leî a thai, min rawn pan, a khuang leh ta!! Nunphung a khaihlak zo, ka lâwm luatah ka khuang palh ta!! Ti ta rau rau ti in insumna tel eih lovin thinlung takzetin ka khuang zui ta a, a ni lah a phur sauh sauh, min chhawn ve zel in, kan in khuan chawk ta piap piap mai le!! ka la duhtawk lo, a tih ang chiah mai chuan uar takin lei te chu ka’n thai ve vel a, kan in thai nat hleih hle mai!!! Chu mai a la ni lo, a lâwm ti zual turin ka nihna zawng zawng dahtha in arnu kâk in kan kâk leh ta zat zat mai a!! Kan hlim hle mai. A râu ka chan kha a lak lawh em mai bawk a, a tla tha phian a, mi mitmei pawh ka veng duh ta tingtang ta lo va!!! Chutia ka han in khuan thawl deuh hnu chuan kan in pawm haw ta hnak hnak a. Patling a pumpa zingtiana ti teh kûnga arpa han pawm chu kan boruak hrelo tan chuan a mak ngawt ta ve ang.

FAPA TLANCHHIA: Bible ah fapa tlanbo a awm a, kan chhungkua erawh in fapa tlanchhia kan kawl thung!!! Fapa tlanbo hawng leh chu tlawm takin, inthlahrung dêkin in a lawi leh a, kei ni erawh, tharum thawh chakna thinlung nen a lo hawng mauh mai. Mak tak mai in Sîâk sei tak a rawn hawna, a ruangâm pawh lian sawt a, a khauh tung a, a rit nalh mai bawk a!!! Insual zir hrim hrimin a bibo emaw tih theih rum rum tur a ni!! Chutah, ichhungah a awm rei duh lova, a mah sawisa tu chu cho namen in a cho talo!!! Buaina ral a lian hi a ni ta ber mai, a lo thlen a tangin “thelh ru thelh ru… insualtir su…” tih thawm in a zui a. “Ârnu dang tam tak kan nei a, i duh duh hi bawh lâwr la, i û nen hian chuan insual lul su khai” ka han tih ngial paw’n, phuba phuba ti in a khuang mawlh mawlh mai!!! A ngaihna a awm ta hauh lo, dimdawina tel lova nghaisak a, zaktaka intihmualphona kha a paidai thei ngang lo. Engtin nge ni zel ang? A û hi kan hralh mai loh chuan….

ÂR THUFING: Khawvel a kan awm chhung hian rethei zawk leh harsa zawk te, thiamlo zawk leh diklo zawk pawh an ni thei, hnuaihnung zawk leh chaklo zawk an nih avanga, hnehsawh tak leh hnuaichhiah taka chin lem neilo a kan insawp a kan innawp mai thin hian rah thalo zawk a chhuah fo a. Mi teber tepawh dinchhuah hun nei ve thei, zângkhua bungbut tir tute an ni ve thei tih hriat hi a pawimawh a, Ârpa chanlai ti a lalhrawt hi thil tih chiloh tak a ni tih thu hi min rawn hawn ni ta ber in ka hria!!!

Similar Posts:

• Birthday tak tak lawm ang u
• Rahtea
• Ka thu chhut kan tarlang ve lok!
• Hmangaihna
• Khuangvaw lar

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Friday, May 24th, 2013 at 8:32 pm and is filed under Lifestyle, Luangliam, Mizo Society & Culture, More than words. You can follow any responses to this entry through the RSS 2.0 feed. You can leave a response, or trackback from your own site.