mi(sual).com

Bawih, kan inkar thu hi a duh duh chhiar atan ka chhawpchhuak ve tawp asin. Thuziak thiam ni lo a, ka rilrua awm ang ang ka ziak thla tawp tawp a nih hi. Lo thinrim suh aw.

Ka thiante nen phone lei turin dawrah kan kal a, phone dawra kan inhmuh kha kan inhmuh hmasak ber a nih kha. Zep lovin ka sawi pawp pawp dawn. Mite chuan an vawikhat hmuhna-a an bialnute an atchilh nghal thu an sawi thin a, kei chuan kan inhmuh hmasak ber kha’n i bul ami kha tha ka ti zawk!!! Thil kal tawh chu inthenna’n hmang lo ang kan tih kha tiraw? A ho em mai, nang ka lo thlang zawk che kha ka la inchhir eih lo.

Khatia phone dawr atanga kan chhuahdun khan kei chuan heti tak hian ka duh ang che tih ka ring pha miah lo. Mahse hun rei lote chhungin min lo hneh reng si. Ka thiante nen kan inhmuh a, kan titi lai vel khan i pian a nalh hle tih ringawt ka lo ngaihtuah a. Mall atanga kan haw kawngah khan i ril zia leh belhchian i dawl reuh zia bak sawi tur ka hre tawh lo asin.

A tawizawngin sawi tawp mai ila, kan inhrechiang tawlh tawlh a, i bula ka awm a ka hlim theihzia leh, rei lote kan inhmuh loh pawha kan inngaih thinzia te chu i hriat ve vek kha. Keimah chauhin in ka luah a, ka thiante pawh hrilh chuang lovin ka inluahah kan chengdun ta mai kha ania. Bawih, chhiar hrehawm i ti em? Min ngaidam rawh aw, mahse ka puangchhuak lo thei si lo.

Nangmah hi a hmasa ber i ni lo a, i hmaah hian ‘a dang’ pawh ka lo nei tawh thin tihte chu i hriat vek kha. Ka hun kal tawhah inchhirna tur ka neih nual vang kha ania a tir atanga tlang taka ka hrilh vek che. I tan mipa hmasaber ka ni tih ka hria a, I hun hmalam a thianghlim anga ka laktlak ve loh avangin i lakah khan inthlahrun chang ka nei fo thin.

Zanrei pawh sawi lovin nang nen hun kan hmangdun fo a, ka bula i awm chuan thildang ka ngai lo. Office kal dawn thlengin kan ‘khawsa’ dun a, office ban ve leh ka thlakhlelh ber chu nang tho i ni. Nangpawhin engmah sawisel lovin ka remruat ang ang kha i pawm ve mai zel a, ka tan khan i hlu a ni.

Duat pawh ka duat che. I mawina tur a nih phawt chuan, min dil ngai miah lovin ka leisak hmiah hmiah che a nih kha. Ka inchhir ngai lo, a chhan chu maw, thil ka leisak zawh che a kan hun hmandun kha a nuam thei em a ni.

Ka hnathawhna ka chhuahsan hnuah pawh nang chu ka kalsan thei ta lo che a, heti hian ramdang thlengin kan inzui zel chu a nih hi. Kan inhmuh tirha ka mit la tu zawk Nokia Lumia lei lo a, ka phone rinawm ni tura Samsung Galaxy S ka lo thlang che hi ka la inchhir ngai lo a, ka duh tawlh tawlh zawk che.

Kan intawn hmaa ‘a dang’ ka lo neih thin, Nokia 3100, Nokia 5180 leh Nokia 5310 te chu i dah nil a ni e.

Similar Posts:

• H.E.L.P – Min pui thei in awm em?
• Ka zawhna 3 te
• Security Master Code for Nokia
• BSNL GPRS – II(Min pui thei in awm em?)!
• Phone number inhrilh dan hi!

Recent Posts:

• Chiahpuam Part II (Sawrkar hian hmalakna a nei tawh em?)
• Lal Isua Leh Nikodema {Sunday Pual}
• Thihthiap
• KAINA’N MI THAH A HLAUH THU LEH THLAH INANG LO
• Dai hel !

This entry was posted on Saturday, June 15th, 2013 at 12:29 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.