Ngaihdan Siam Ngawt Thin Hi!

May 14th, 2014 9:00 am by Dr Mahminga Sailo

Ti ve chhin ang hmiang
Khawtlang nun chungchang hi ka ziak khat khawp mai a. Tun tum chu a thawh thawhin thawk teh se, ka rilrua’n a lang ve tlat. A thupui kalh zawng ni awm takin keima ngaihdan ka’n ziak ve dawn a ni si a! Ngaihdan tha leh fing zawk, zawmtlak leh nunpui tlak a lo chhuah ngei ka ring tlat. Mi(sual) zinga inpawh taka titi pawh a khat ta e..

Rel Station
He Rel Station hi Mizoramah hian a tam riauin ka hria a. Tin, Mizoramah chang ka ni bik law, hnam hrang hrang zingah pawh a tam; mahse Mizo chungchang bika sawi ta ila. He Rel Station hi Rel Station dang ang ni lovin Rel a tlan ngai lova, mahni thenawm, thian leh rawngbawlpuite ngei ngei, chanchin a chhe zawng leh er zawng kan sawi zuah zuah na hun leh hmun hi Rel Station ka ti mai. A tawi zawngin: Mi reltute inkawmna hmun hi Rel Station

Thil nihphung hriat hma hauhva sawi chiam…
Hei hi chin dan tha lo tak niin ka hria. ‘Chumi chuan chuti chuan a ti…’, ‘a sawi tak asin..’, tih mai maiin ngaihdan kan tungding chawp a. Mita kan hmuh lem loh pawh kan sawi tlawr chiam chang a awm thin.

A ruh lang rawtin sawi ila, nula leh tlangval inngaizawng chungchangah pawh a chin chhuaka hre zik tluak hauh si lova – ‘an awmdan atang hian thil diklo a awm tawh hrim hrim ang, a theih loh hrim hrim’ tia an chungchang zel dina sawi chiam chiam te hi an awm leh thin. Mi nun vaw chhetu mai an ni. Mi thatna duh tak tak chuan duhsak takin, hawihhawm leh zaidam takin a zilhhau mai thin.

Spa-a thawk (k)an sel em ni?
Mimal ngaihdan a diklo ka ti hauh lova, ka pawmpui tam tak a awm. Mi hnathawh chungchangah pawh duh aiin ngaihdan kan siam hma thin; a pawi. Kan rin ai hian midang nun kan zim chep thei tih hre fovang u.

An ni vek ka ti hek law; Mizoram sawrkar hnathawk, mipui sum chanai eiru thei kan ngaihsan em em, a tul pawha nupui pasal vawn lai nei reng nulat-tlangval nun chen duh kan sel ngam si lova; ‘tinge Mizo nula, mahni in lum chhuahsana mahni leh chhungkaw chawm tura hmun hla taka kala hnathawkte hi ral khat atanga kan sawi chiam chiam zel hi le?

Lo chesual tawk zawng an awm teh meuh mai, amarawhchu Spa-a thawh hrim hrim kan sel luai luai a. Mahse, kan Zoram hian hnathawh tur min pe seng der si lo. Tin sawrkar leh an thil buaipui tawk ho leh mawlzia te hi hre vektu kan nih si hi. Hetia mi hnathawh chungchang kan sel luai luai hian mi fel tak tak nun kan tichep a. Spa-a thawk thenkhat phei chu an phak ang tawkah leh hunawl neihah pawh khawtlang leh kohhrana inkiltawih theih khawpin kan chhuah chhe thin. Thahnemngai tak, mahse hna dang thawh tur hmu remchang lova, inkiltawih ru renga hna thawk hi an awm teuh asin!

Kan sawiselna kawng thenkhat zawng a dik teh meuh mai; mahse sawiseltu tam zawk hian sawisel thei kan ni em tiin kan nun inenlet ve fo ang u hmiang.

Senior-te tawngkam
College kan kal laiin, kan senior thenkhatte’n zirtirtu thenkhat sual leh khirh tia an sawi an sawi chuan, kha zirtirtu kha kan en dan leh ngaihdan a dang fo. Mi khirh leh khekrek chu an awm teh meuh mai, mahse zirtirtute sawisel vak vak hi zirlai tha leh nungchang entawntlak an ni lo tlangpui!

Ka thuziak pakhatah ka sawilan tawh kha. Khuai nun hi zir ila. Kan khawtlang, kohhran leh chhungkaw tan hian thahnemngai taka thawkin, midang tana malsawmna (khawizu thlum tui tak) nih i tum teh ang u. Infak arek (tunlaiah chuan inbawl kan tih hi) kher lo hian kan thatna inhmuhsak thiamin, kan tlin loh leh fellohnaah inzilhhau zawk thin ila. Midangte tan kawng engemaw talin malsawmna kan ni thei dawn asin.

Sawiseltute ka sawisel tho niin a lang ta, duh tawk mai ang. Ngaihdan in sawi hmain he thu hi chhiar nawn bawk ula..

Sawisel suh u, sawisela in awm loh nan.. – Matthaia 7:1

5 Responses to “Ngaihdan Siam Ngawt Thin Hi!”

1
H.Vangchhia Says:
May 14th, 2014 at 9:17 am
Eizawnna zahawm nei tur chuan mahni kan pawimawhin ka hria. Kan hnachelhin minti zahawm ngawt lo va, kan hnathawh danin minti zahawm a belhchian min dawl tir thin zawk niin ka hria.

Mizo-ten “hna hniam” kan tih ang leh “hna sang” kan tih ang hi kei chuan hnechelh inang lo maiah ka ngai ta. Eng hna mahni a mal kal thei lo va, a hnuai ber ang a kan ngaih a tang a a chung ber a kan ngaih thleng hian inzawm vek leh mal kal thei pakhatmah awm lo a ni tlat.

Spa employee a ni emaw IAS a ni emaw, engineer, dâktawr a ni emaw, IFS a ni emaw lamah thlir ngawt hi a fuh lohna chen a awm. Hna zahawm tak tur zahawm lo deuh a chhuahtu kan nih theih lain mi in a eirawngbawl hnathawk pawh ni ila kan hna a kan rinawm a, kan taihmak a hlim hmel kan put sarh reng chuan hna zahawm tak thawk kan ni thei tho. Hairehai

Report this comment
2
saint sammoo Says:
May 14th, 2014 at 5:30 pm
Hna zahawm tak anga lang hi zahawm lem lo takin a thawh theih a.. Hna hniam nia kan ngaih pawh zahawm takin a thawh theih..

Report this comment
3
chhana Says:
May 18th, 2014 at 1:30 pm
Mizote hi chuan thil hi kan inti hre hrim hrim alawm.
I thil post chuan ngaihtuahna a ti thui khawp mai.
A tawp i kharna bible chang chung chiaha mi khi a fuh top.

Report this comment
4
Dr Mahminga Sailo Says:
May 19th, 2014 at 5:42 pm
Comment a tam hauh lo nangin, comment chhunte lawmthu ka hrilh a che u..

Mak deuh mai a ni, kan tana tangkai tur ni bawk si lo; chu achhapah midangte rilru tina thei tura tawng nuam ti hi kan tam tlat, pawi tak a ni.

Report this comment
5
Pakak Says:
May 22nd, 2014 at 10:15 pm
kan tana hlawkna ni miah si lo, thil trul lo kan ngaihtuah peih hlawm em a ni….tin, ka ngaihdan chuan ti a, midang ngaihtuah miah lova mahni ngaihdan thra ber emaw ti te kan la tam lutuk atin ni

Report this comment