Ngaihtuahna nu bulh hual vel karah rilru fim tak i put theiha

July 21st, 2014 3:10 pm by Charice_mizo

Ngaihtuahna nu bulh hual vel karah rilru fim tak i put theiha,
Diklo zawk ni awm taka chhal talh che an tumin,
Tungchhova kal mihring zawng zawng rin loh i hlawha,
Mahni inring tawk tlata, an rinlohna che i ngaihhnathiam cheu si chuan;
Dawt puarpawleng leh khualthuthang nuihsan maia,
Thudik arpa chan hun i nghah fan tlat theih chuan,
Huat i hlawh pawha huatna vauchher ve lova,
Tawngthei sabawp mana thiam inchantir i tum hauh loh chuan.

Duhthu sam thei ni la- duhthusam khawvel ngawta cheng si lovin,
Suangtuah thei ni la- suangtuahna lipuia pil si lovin,
Hnehna lawmawm leh chhiatna lungchhiatthlakin an nan hun chea,
Lemchangtu pahnih ang leka i ngaih thuhmun theih chuan;
Nangma kamchhuak ngei hmanga chimawm taka an beihlet chea,
Phatmawi tum hauh lova i beng i dawh mai thei anih chuan;
I nun pum hlana ilo dinchhoh thil hlu te an kehchhiat vek pawha,
I hmanraw ngai te vek hmanga i din that leh theih chuan.

Thawklehkhata hloh duak theihna thil atthlak taka,
Chhut chiang lova i neih thil hlu zawng zawng i thapa,
I hloh vek hunah, bul tan tha leha
I chan tak ui vanga i rum hauh loh theih chuan;
I tha leh zung leh hriatna ten an peihloh san hnu chea,
Tumluihna hmanga ila sawmkhawm fo theih chuan,
Beidawng suh ang che nangmaha awmchhun tumruhna talin,
“Beidawng suh aw” tia a fuih theih hram chhung che chuan.

Mipui sahawk zingah pawh zahawm taka i tawng theiha,
Mi ropui te thian ni chunga mi hnuaihnung te i kawmserh phah lohva,
Thenrual tha leh hmelma ten i lung an tih hnur ngailoh chuan.
A loa luakchhuak ni si lova mitinin an rin chein,
Ngaihdamna pailo hun hi thil thaa i hnawhkhah theiha,
Mitkhap kartin intlansiakna hi chawl lova i beih chuan,
Lei leh a chhunga thil tinreng hi rochung tlak ilo ni anga,
Chu chang a ni lo- ka fapa, mipa diktak ilo ni ang!

Similar Posts:

Recent Posts:

2 Responses to “Ngaihtuahna nu bulh hual vel karah rilru fim tak i put theiha”

  1. 1
    chhana Says:

    A tha viau lo’mni?

    Report this comment

  2. 2
    Hriatpuia pa Says:

    Rudyat Kipling’s ‘IF’ nen a inang hle mai. I bei nalh ka ti.

    Report this comment

Leave a Reply

You must be logged in to post a comment.