ABELA LEH KAINA TE THIL HLAN

October 19th, 2014 12:30 am by PKfanai

Tin, Lalpa chuan Abela leh a thil hlan chu a lawm a; Kaina leh a thil hlan erawh chu a lawm ve lo va. Tichuan Kaina chu a thin a ur em em a, a hmel a lo dur ta khup a. Tichuan Lalpa chuan, Kaina hnenah chuan, “Enga tinge I thin a ur? Engati nge I hmel a lo dur tak? Thil I tih that chuan lawm I hlawh dawn lo vem ni? I tih that loh erawh chuan Sual chu kawngka bulah a bawk reng a ni; a duhzawng chu nangma hnen lam a ni; a chungah thu I nei tur a ni,” a ti a. (Gen 4:4-7)
Engvang nge?
1. Kaina chuan a rem chang chang a rawn la ve ngawt; Abela erawh chuan, a ran vulh zinga a piang hmasa leh a thau tha tha a thlang kher.

2. Pathianin Evi leh Adama te bawhchhiat tirh atanga an tan chhandamna kawng a lo buatsaih sak , Kalvary tlanga a fapa Isua Krista inthawina hlim thla, sual thawi nana ran thisen chhuak ngeia inthawi kha a nih laiin, Kaina hian chu lam chu a va ngaihtuah thleng phak lo.(Heb 9:22)
Mihringte thu loh zia leh a lo dawngtu Pathian tilawm pha a ni em? Pathian duh zawng leh lawm zawng a ni em? Tih lam kha a pawi mawh zawk tih a lan tir chiang hle.
Kaina thilhlan ve ngawt hi Pharisaite tawngtaina ang chauh a ni, Lalpa a tilawm zo lo tlat. He mihring atanga chhuak ringawt atanga thil tha tih tum ve tang tang na, Pathian atanga nun danglam leh nun thar neih vang ni si lo, hian Pathian a tilawm zo lo a, mahni thatna hmanga Pathian tihlawm zawh inrinna, leh Lal Isua thisen hmanga sual silfai hmasak phawtna tello pawh a, tling leh tha ve tawka inngaihna, a bik takin Mihringte mit hmuh lang thei lam, mihringte mit hmuha tha awm ang taka lang, thinlung chhung erawh Thlan khur chhunga miruang tawih lung ang chauha tenawm nisi hian, Pathian a tilawm zo ngai lo a ni.
Pawi ta em em chu, Kaina hian tih loh ai tih ang chauh chauh a, a lang a mawi maia, ti ve che che a, Pathian hnena a thil hlan Pathianin a lawm lo tih a hriat khan, a lung awi lova, Pathian lakah a hel a, a Unaupa ngawih ngawih pawh vawhlumin a that duh hial ta a nih kha. A lungchhiat thlak tak zet mai. Pa Pathian tilungawi zo lo thil tha ve tih tumnain, Sual lian zawk a hrin phah a ni.
3. “Sual chu kawngka bulah a bawk reng a ni”. He thu hi a lo ril hle mai a, a hebrai tawng bul lam han chhui chet chet phei chuan, ‘hattath’a hmang a, chu chuan awmze pahnih (dual meaning) a lo nei thei reng mai hi a lo nia.
a) Pakhatnaah chuan, Kaina khan thil pawlawh tak leh, a hming ve mai maia a tih a, amah midik leh tha ni hauh si lova, mitha leh dik, tling tawk anga inngaia, Thisen chhuak tello pawha, Pathian lung tiawi thei tur awm anga a inngaihna kha, Lalpan a lawm lo a, a pawm lo tih a hriat khan, inchhira insiam that tum lam aiin, thin ur leh tih tauhah a la a, Pathian lakah a hel a, a unaupa a huat phah a, a rilru put hmang hmu vektu Pathian chuan, Kaina rilru kha a thaloin, a hlauhawm hle a, thil pawi tak a khawih thei dawn tih hriain a lo khap lawk a, kha a rilru kha tak kha remchanga lo la var a, Sual puitlinga chantir turin, Ram sakawlhin a sa seh tur a veh hnai hriau hriau ang hian Setanan a lo chang reng tihna a ni a.
b) Tin, a awmze dang lehah chuan, “Sual thawina tur chu I kawngka bulah hman theih maiin a awm reng a ni” tihna a ni thei chiah bawk. Sual thlemna a lo sosan tak taka, Mihringte chakna hmanga hneh hleih theih loh hun a lo thlen chang pawhin, Sual inhneh tir let der lovin, Sual thawina atana inhlan, kan inchhira kan Sim chuan, min ngaidam a, min lo kuangkuah leh tura inpeih reng, Van Lal fapa kan sual thawina atana inpe zo thak chu a awm a ni. Hetah pawh hian, Pathian hian Kaina hi a lung nih lohna leh rilru helna te, a nau a huatna leh tihhlum hial a duhna thinlung kha kaltlang pui zel lovin, inchhirin sim sela, Abela angin thinlung thianghlim leh tih tak takna nen, kan sual silfai nana Lal Isua Krista thisen hlu tak a chhuah tur zia entir nan ran thisen hmangin inthawi ve se, tia a la thlem tang tangna a ni thei bawk a ni.
Eng nge zir tur kan neih le?
i) Simna tello leh thuawihna tel silo a, a lang a mawia thil tha va tih ve vak tumna hian Pathian a tilawm zo tak tak lo.
ii) Lal Isua Krista thihna leh thawhlehna tawmpuina leh kaltlang lo chuan, Pathian lawmzawngmi nih rual a ni lo a, a theih hek loh.
iii) Sualna leh bawhchhiatna a nasat zawh poh leh, Khawngaihna a nasa ve thin. Eng ang pawhin lo chapoin, lo hel thinin, Lalpa chu lo sawi chhe thin mah I la, dawhthei takin kawngka bulah min nghak reng a, inchhira sima kan hawikir a, a hnen kan pan hun a lo nghak reng thin.
In ngai tlawm leh thuhnuai rawlh taka a hnen panin, Lalpa ngaihdamna dil I la, Amah atanga chhuak ngei chuan, bul I tan ang u le.
Lalpan a thu malsawm rawh se. Amen.

Similar Posts:

Recent Posts:

14 Responses to “ABELA LEH KAINA TE THIL HLAN”

  1. 1
    TheHumanBot Says:

    Sunday pual chu ni mahse, pawi lo mai turah ngai ang.

    Report this comment

  2. 2
    PKfanai Says:

    Kan site hi duh sak hmasak hram hram ka tum thin a, Sunday pual te hi Inrinni zanah te ka han submit ve thin a, Sunday chhunah ka han nghak vang vang a, ka nghak chhuak dawn ta lo nia ka hriat hnuah, Fb group a Admin ka nih ve na lamah ka Post leh nge nge thin. Mahse Fb leh misual.com chu a in anglo em mai, a pawi chuang lo ve. Hei ai hian active deuh ila chuan, thil post pawh a phurawm deuh ang maw le. :-S

    Report this comment

  3. 3
    TheHumanBot Says:

    A dik khawp mai:)

    Report this comment

  4. 4
    Dr John Says:

    Tha khawp mai. Pu PK-a nge nge.

    FB lam kha ka lo chhiar zuai a, ka hmanhmawh deuh a, ka comment ta lem lova.

    Pathian thu hi chu a thuk-in a ril tak zet zet a ni. I Bible chang khel mek khi mi tam takin thlirna tlang hrang hrang atangin kawng hrang hrangin an chhui a, a ngaihnawm-in a bengvar-thlak tak zet zet a ni.

    #2 “Sunday pual te hi Inrinni zanah te ka han submit ve thin a, Sunday chhunah ka han nghak vang vang a, ka nghak chhuak dawn ta lo nia ka hriat hnuah, Fb group a Admin ka nih ve na lamah ka Post leh nge nge thin… Hei ai hian active deuh ila chuan, thil post pawh a phurawm deuh ang maw le…” Amen! Heidenrial! Over-Lai! (H) ;-)

    Report this comment

  5. 5
    chhana Says:

    A tha hle mai. Kaina hi ka lo lainat deuh thin a; tunah chuan ka hrethiam ta.
    Comment na lama i sawi khi a pawimawh tawpkhawk. Diary ka post thin hi fb lamah pawh ka submit thin tho a; mahse, kan site-ah hian ka thehlut hmasa ber thin.

    Report this comment

  6. 6
    PKfanai Says:

    A lawmawm e. A lunglen thlak riau thin, tan i han la tlang leh dawn teh ang u hmiang (F)

    Report this comment

  7. 7
    blackmagicwoman Says:

    Pu PK, Pathian pek che, i thuziak hi thra ka ti lutuk a, nangmah dil hmasa lovin ka Facebook wall ah ka share ve tawp a nia. Midang chhiar ve atan ka it sia. Mahse hemi misual link hi ka dah a tho a.

    Report this comment

  8. 8
    PKfanai Says:

    Blackmagicwoman, Min encourage hle mai, ka lawm lutuk e. Hmanni khan Fb news group pakhatah Presbytery Khawmpuiin Kohhran Upa 7 lai mai engemaw avanga an chawlhtir thu ka chhiar a. he thu “Sual chu kawngka bulah a bawk reng a ni…” tih hi ka quote a, Fimkhur a ngaih zia ka va comment ve a. Pu Isaac (Ku Chawnghilh) an, ka hming mention in, awmze pakhat dang a neih thu hi a sawi lang zauh a. A tuk zinga ka quiet time ah ka study ta ngar ngar a, hei hi a lo piang chhuak ta a ni. Ku Chawnghilha hi chu ka U en deuh tlat kha a nia.

    Report this comment

  9. 9
    Bucko Says:

    Abela khan Kalvari tlang a thisen chhuak kha a ngaihtuah thleng pha bik tihna ami?

    Report this comment

  10. 10
    PKfanai Says:

    Bucko, rin thu lo chuan sawi ngam a har ang. Amaherawhchu, Pathian khan Adama leh Evi te hnenah khan, Rulin Hmeichhe thlah ami ke artui a la chuk thitlin tur thu leh Chu hmeichhe thlah ami chuan Rul lu a la vuak thitlin sak ve thung tur thu kha a lo sawi tawh a. Adama te nupa khan an fate kha an hrilh ve fo a rinawm. Tin, Kaina leh Abela te tan khan An pa Adama bak kha chu Puithiam anga an thilpek/hlan lo dawng tur an awm hmel loh a. Kaina kha chuan, a hming chauh chauha a va ken/hlan thin laiin, Abela erawh kha chuan, Pathian biakna tak tak thinlung puin, a thar hmasa leh a thau tha tha kha a rawn keng thin a ni. An hriat ngei chu a rin awm.

    Report this comment

  11. 11
    Bucko Says:

    2. Para 1 khi ka rawn zawh chhan ber a ni. Helai thu hi tunhma atang tawhin ka ngaihtuah ve fova,Pathian hian a ruahmanna kalvari tlang thleng phak hi Adama emaw Evi emaw KAina te unau emaw hnen ah hian a sawi kher ka ring lova. Nimahsela Kaina thilhlan thlai chungah a lungawi lova, Abela thil hlan thisen chungah a lungawi hi mak ka ti thin hle a ni. Bible han chhiar chian chuan Abela chuan a tha ber ber a thlang a, Kaina erawh chuan a tha ber a thlang ve lem lo a ni tih a hriat a. Chuvangin Pathian hian ti ve mai mai chungah a lawm lo a ni tih lantirna tha tak pawh a ni en ka hria e.
    Post tha e. (Y)

    Report this comment

  12. 12
    PKfanai Says:

    Nia, i rawn sawi hi chu a nihna lang chiang sa deuh ber chu a nia. Pathian hian Khawvel sual thawina tur atana a Fapa Van ropuina zawng zawng kalsana, Kalvary tlanga Maichama a hlan tur hi a ti mai mai lova, a tin zawn ngar a ni. Chung chu, Abela thil hlanah te, Abrahaman Isaka a hlanah te, Fatir tihhlum loh nana Kawngka bianga thisen tah te, Thlalera dar rul khai kan te, Isaia lo hrilhlawk zawng zawngte khan an kawk vek a, Setana hian tihbuai leh a lo pianna line tihbuai hi a tum ve ngar ngar thung tih a hriat theih a. Pa Pathian hian a fapa Lal Isua kaltlang lova Chhandamna kawng dang emaw, short cut emaw lam hi a ngaithei lem lo viau tih a hriat theih khawp mai.

    Report this comment

  13. 13
    H.Vangchhia Says:

    A tha hle (Y)

    Report this comment

  14. 14
    Uaiizzz Says:

    Post tha tak a ni.

    * Ka va han reh tlek tlek em! A kum tel teh meuh hnua ka Log-in ve chu. Lung a tileng e.

    Report this comment

Leave a Reply

You must be logged in to post a comment.