1st. Saturday: Aizawl ṬKP Coordination Committee buatsaihin Aizawla Central Church Bial leh Republic Vengthlang Bial-te chuan Aizawl Civil Hospital tan thisen unit 57 an pe a, a petute mipa 52 leh hmeichhia panga an ni.
2nd. Sunday: Baptist Church of Mizoram chuan tun hnaia missionary tura an lak thar mi 13-te tirh chhuahna hun an hmang. Tirh chhuahna inkhawm hi biak in pathumah neih a ni a; Lunglawn East biak inah mi pali, Rahsi Veng biak inah mi panga leh Serkawn biak inah pali an tír chhuak a ni.
3rd. Monday: VL Remruatpuia (25) s/o Thansiami, Dinthar, Aizawl chu an veng chhunga tuihâwk luankawr (side drain)-ah chesualin a tleng a, side drain tawpa khâmah tlain, ká chhawn lohin a thi.
4th. Tuesday: Sepoy Lalramchhana (42), Rashtriya Rifles-a ‘E’ Company hnuaia 9th. Mechanised Infantry Battalion-a Quick Reaction Team platoon-a awm Lalbiakhluni, Ratu khuaa mi fapa chu Jammu & Kashmir-a mi firfiakte nen an inkah laiin an sipaipui, anmahni zinga mi pakhatin a kâp hlum palh.
5th. Wednesday: Counter Insurgency and Jungle Warfare School (CIJWS)-a an hotu pakhat, Col. Ravinder Singh Vairengteah buaina a siam avangin Vairengte police-te’n an man. Col. Ravinder Singh hi a khawsak mawi loh ṭhin avangin thla hmasa khan Vairengte MZP leh MSU hruaitute chuan CIJWS Commandant hnenah páwna chhuak thei lo tura hrêng turin an lo ngen tawh a; Commandant chuan inquiry an lak mek thuin a lo chháng a ni.
6th. Thursday: Health minister Lal Thanzara hoin CMO conference hall-ah thingtlang leh hmun kilkhâwra chengte’n awlsam zawka doctor an ràwn theih dan tur sawiho a ni. He system-in a tum ber chu – thingtlang leh hmun chengkera chêng, hmun leh hmuna doctor ráwn thei lote’n internet hmanga doctor an râwn ve theihna tur a ni. Tele Medicine ang chi hi tun hma lam pawhin Mizoramah hman a lo ni tawh ṭhin a, mahse, a hlawhtling em em lo. Tun ṭuma mi hi chu chi dang deuh a ni a, Mizorama hman atan a ṭha dawn nge dawn lo tih meeting-ah hian an sawiho a ni.
7th. Friday: Hnahlanah police leh Assam Rifles-te’n silai, M3 Rifle pahnih an man. Police leh Assam Rifles-te hian an thu dawn bawhzuiin Hnahlan khaw dai, Myanmar kawngah Chingsianpianga, kum 36, Chinkhankhaia fapa, Myanmar-a Darkhai khua inti chu an lo man a, a kut atangin heng silai, M3 Rifle pahnih leh a mu dahna pathum an man a ni.
8th. Saturday: UPC (NEI) Aizawl East District-a Thianghlimna Committee chuan Salem Veng biak inah Mualpui Salem bial huapin zuk leh hmuam ṭhat lohzia inzirtirna hun an hmang. Seminar hi session hnih-ah ṭhen niin, chawhmaah MSTCS state nodal officer Dr Jane R Ralte leh psychologist Rebecca Lalruatfeli Hnamte ten thu an sawi a; chawhnuah district superintendent Rev. PC Lalnghakliana’n thu a sawi thung.
9th. Sunday: Champhai leh a chhehvelah nasa takin ruah a sûr a, Champhai leiletah nasa takin tui a tling a, hmun tam takah tuiin buh a chîm pil.
10th. Monday: Mizoram Hindi Prachar Sabha (MHPS) chuan Board Examination 2015 first session result a tichhuak a; Prabodh (class-X)-ah 82.05%, Visharad (class-XII)-ah 78.57% leh Praveen (B.A)-ah 97.09% an pass. MHPS-in result a tihchhuahah hian zirlai exam zawng zawng 253 zinga 232 an pass a, pass percentage chu 91.69 a ni.
11th. Tuesday: Dr PC Biaksiama lehlin, ‘Mizo Parallel Bible’ chu Vanapa Hall-ah TNT hotupa Sangthankima’n a tlangzarh. Paralellel Bible hi a hmain Thuthlung Thar bik tihchhuah a ni tawh a, tunah hian a bu pumpuia tlangzarh a ni. Mizo Parallel Bible-ah hian a lehlamah sap ṭawng King James Version a awm a, a column lehlamah Mizo ṭawng zela dah a ni.
12th. Wednesday: Aizawl Municipal Council (AMC) inthlan vawi hnihna, kumin tawp lama awm tura hmeichhe tana seat hauh turte IPR conference hall-ah pawh a ni a, hmeichhe ward turte chu Ward I, VII, IX, XIII, XV leh XVIII-te an ni. Danin a phût angin, AMC-ah hian 33% women reservation hman a ni a, Ward 19 zinga paruk chu hmeichhe tana hauh zel tur a ni. Hmeichhe ward turte chu a inchhâwka thlan ṭhin tura tih a ni. AMC inthlan vawi hnihnaa hmeichhe ward tur pawhnaah hian political party tin aiawh te, Mizoram People Forum, Central YMA, MHIP leh Mizoram Journalist Association hruaitute leh thuthar thehdarhtute an tel.
13th. Thursday: Kelkanga Special Assistance Scheme hnuaia petty trade thlangtu mi pakua hnenah Champhai DC H.Lalengmawia’n Rs. 15,000/- ṭheuh a hlan. H.Lalengmawia chuan petty trade ṭanpuina dawngtute chu dawr neisa an nih deuh vek avangin an pawisa dawn chu an dawr bungrua tihchangtlunna atan ṭangkai taka hmang turin a chah.
14th. Friday: All India Radio, Aizawl chuan FM radio signal chak zawka thawn chhuak thei, Digital 6 Kw FM Transmitter chu an tlangzarh. Digital 6 Kw FM Transmitter tlangzarh hnua a hmasa ber atan Larsap Lt.Gen. Nirbhay Sharma thuchah tihchhuah a ni.
15th. Saturday: Independence Day vawi 69-na chu India ram pumah urhsun taka lawm a ni. Mizoramah pawh khaw tam takah independence day hi lawm a ni. Aizawla lawmna inkhawma khuallian chief minister Lal Thanhawla chuan ram mipuite chu kut tling loa sum lak luh dopuiah a sawm. Lammuala I-Day lawmna hi zing dar 9-ah ṭan a ni a, khuallian chief minister hian hnam puanzar a pawt pharh a, parade contingent 29-te’n hnam puanzar chibai an bûk a chháng lêt a ni.
16th. Sunday: Hnam dang khalh truck MH-04 GC-3064 chuan Kolasib Khuangpuilàmah Lalthlamuana (18) s/o H Lalremsanga, Kolasib a chíl a, ká chhawn lohin a thi. Lalthlamuana hi a ṭhiante pahnihte nen anmahni bike ṭheuh hmangin an léng chhuak a, Thingdawl aṭanga Kolasib pana an haw lam chu truck nen an inpelhna lamah chesualin, truck-in a chíl zui ta a ni.
17th. Monday: Mara Autonomous District Council huam chhunga Niawhtlang khaw hming, Mara tawnga Noaotla ti-a thlak a nih avanga lungawi loh lantir nan Niawhtlangah Total Bandh neih a ni. Niawhtlang JAC Chairman, Pu K.Ngunchunga hnen atanga thu dawn danin, MADC-in a huam chhunga khaw hrang hrang hming a thlakah an khaw hming, Noaotla ti-a thlak a ni chu an duh lo a, Nihawhtlang chu MADC huam chhunga awm ni mahse, a khaw mipuite chu Lai hnam vek an ni a, an khaw hming thlak a nih chuan an lehkha pawimawh tam taka an khaw hming an lo dah tawhte chu a buai dawn niin a sawi. Saiha police-te chuan, he bandh hi buaina chhuak lo-in tlai dar 3 –ah bandh hi tihtawp a nih thu leh, chhunzawm pawh tum a nih loh thu an sawi.
18th. Tuesday: Minister of state Lal Thanzara chuan Sunshine Overseas Pvt. Ltd.-a share neia puh a nih avang leh hei hi MLA te tan chuan thianglo niia opposition lamin an ngaih bawk si avangin Chief Minister hnenah minister a nihna aṭanga bânna a thehlut a, Assembly Speaker hnenah pawh MLA a nihna aṭanga bànna a thehlut bawk. CM chuan Lal Thanzara banna thehluh hi a pawm a, Governor pawmpui turin a thawn nghal. Lal Thanzara hi Health & Family Welfare, Minor Irrigation leh Information & Communication Technology department-te enkawltu minister a ni a; chief minister Lal Thanhawla enkawl department-te a enkawl pui tel bawk.
19th. Wednesday: Mizoram aṭanga Myanmar rama tui lian leh leimin tuar Mizote chhawmdawlna tur buhfai leh ei tur dangte phurtu truck chu Chawngtlai aṭanga km. 8 vela hla, Merabâwk ramah kawng thlangah metre 100 vel a lum a, driver leh handyman in hliam tenau an tuar. Tanpuina bungrua a phurhte chu Delhi-a Chin Welfare leh zirlai pawlte’n an thawn a ni.
20th. Thursday: Kumin April ni 30-a Aizawl khawpui huam chhunga Local Council leh Dist. 6-a Village Council inthlan result puan tak chu Local Council thenkhat leh VC thenkhatah chhiar nawn leh ngen a nih avangin Aizawl Dist.-a Local Council 4-ah leh VC 2-ah chhiar nawn a ni a, a tlangpuia a dik rualin Dam Venga Local Council inthlanna a vote tla chhiar nawn leh a nih chuan Congress-in seat khat an hloh a, MNF-in member pakhat an neih belh thung.
21st. Friday: Aizawl District Court-in naupang kum tling lo pawngsualtu, Lalngurliana, Vairengte khua chu hrehawm taka kum 13 táng turin a hrem. Lalngurliana hian naupang kum tling lo hi a pawngsual mai bakah, a kut ding lam zungchal a tansak bawk.
22nd. Saturday: Sailam leh Thenzawl inkara leimin leh lung tlain kawngpuia maxicab tlan lai a delh a, maxicab khalhtu Lalthlamuanpuia (27) s/o Lianṭhuama, Salem Veng a delh fuh. Driver Lalthlamuanpuia hi a hliam a nat deuh avangin Aizawl Civil Hospital panpui nghal a ni.
23rd. Sunday: Governor Lt.Gen. Nirbhay Sharma pizawn, Malti Joshi (90) chu Raj Bhavan-ah a thi.
24th. Monday: Chief Secretary Lalmalsawma hoin Mizoram sorkara secretary-te chu Secretariat conference hall-ah an ṭhukhawm a, sorkar kalphung ṭha zawka kalpui dan tur an sawiho. Meeting-ah hian department hrang hrangte’n sorkara sum an chhûn luh dante thlir hoin, chak zawka ṭan lak ni se, an ti a; department hrang hrangte’n an hnathawhnaa harsatna an tawhte sawihoin, a sutkian dan turte an ngaihtuah bawk.
25th. Tuesday: Police-te’n human rights an bawhchhiat leh bawhchhiat loh chungchangah Lunglei SP Conference Hall-ah District Executive Force-te tan inhnial fiamna (debate) buatsaih a ni a, Lunglei SP Zosangliana’n a hawng. Zosangliana chuan, National Human Rights Commission-in mihringte dikna leh chanvo palzût a duh lo hle tih sawiin, human rights bawhchhiat a nih loh nana fimkhur turin police-te a chah.
26th. Wednesday: Vanlalngena, Assembly deputy speaker hlui lehkhabu ziah, ‘Lalngo ṭah ka báng dawn lo’ tih chu Aizawl Press Club-ah minister Zodintluanga’n a tlangzarh.
27th. Thursday: K.Vanlalnghaka (55), S/o Bata, Bilkhawthlir, Bethlehem English School, Noagong, Tripura-a evangelist teacher chu Baghbahar aṭanga Noagong khaw luh dawnah thia chhar a ni. Vanlalnghaka hi scooty-in Baghbahar-ah a kal a, a haw lamah vanduaina a tawk a ni. A chesual lai hmutu an awm lo a, a ruang aṭanga a lan danin, motor chîl hlum nia rin a ni.
28th. Friday: ZONET network in Mizo Idol hun rei tak atanga a lo neih tawh chu a hmawr bawk a ni ta. Hetah hian Rabecca Zorintluangi, Sairang Sihhmui chu Mizo Idol 2013 Grace Lalchhanhimi’n lallukhum a hlan a ni.Mizo Idol atan thlan Rabecca Zorintluangi hian Rs 100,000/- turah Rs 52,000/- a la nghal a; a bak zawng hi chu thlatin Rs 4000/- zelin kum khat chhung a la thin ang. Tin, mi inphal te hnen atangin thilpek thahnem tak a dawng bawk.
29th. Saturday: Sangsawmthanga (39) S/o Liankunga Saikot, Manipur, tuna Lengte khua ( Mamit District ) a khawsa chuan Lengte rama thlam pakhatah Lengte khaw naupang kum 6 mi chu tihluihna in a serh a fawhtir mai bakah amawngah pawl in naupang mawng chu a thí hial a, a duhtawk a ngah hnu-ah naupang khuaikhemtu Sangsawmthanga hi thlam atang a chhuakin ramhnuaiah a biru a, naupang chunga thilthleng chu mipui ten an hriatin Sangsawmthanga chu an zawng nghal a, an hmuh hnuah kut pawh an thlak ve nual hnuin Police kutah an hlan zui leh ta a ni.
30th. Sunday: Kohhran Thianghlim chuan Kidron Valley, Chawlhhmuna Solomon’s Temple-ah Coronation Day an hmang. Coronation Day pual hian Solomon’s Temple leh a chhehvelte chu nasa takin an chei a, a duh apiang tlawh theiha hawngin mipui thahnem takin an tlawh. a ni.
31st. Monday: RK. Lalsawmliana (40) Chhingchhip Venglai chu an in atanga feet 300 vel a hla-ah thi a chhar a ni. Pu RK. Lalsawmliana hi a in a in kalh rei tawh avang leh a khawlai veivak vel hmuh tur a van avangin an thenawm khawvengte ngaihtha lo in an zawn nak chuan hetiang hian an hmu ta mai a ni. Pu Sawma hi horticulture dept. a hnathawk lai niin a nupui leh fate nen Chhingchhip Venglai-ah hian an awm a, a nupuiin zin san avang leh a fate zirna avanga hmundanga an awm vek bawk avangin amah chauhin in-ah hian a awm a ni.
Similar Posts:
- Rorelna langtlang awm tur a ni
- 2013-ah Sorkar tha
- District Council for Paite
- Mizoram leh Council Panga te
- Zanah inkhelh theih nan Lammual-ah êng dah a ni ang – Lal Thanhawla
November 24th, 2015 at 10:15 pm
1st
Report this comment