mi(sual).com

1st. Tuesday: India ram pumah petrol leh diesel man tihniam a ni a, Mizoramah pawh tihniam niin hman hman nghal a ni. Petrol chu litre khatah Rs. 2-in a hniam a, diesel man chu litre khatah pawisa 50-in a hniam thung.

2nd. Wednesday: MZP general headquarters chuan ‘Mizo zirlaite tana hnam dang nupui/pasal nei lo tura inzirtirna leh intiamkamna ní siam’ an lo rel tawh angin an hmang a, Mizoram hmun hrang hrangah hnam dang nupui/pasal nei lo tura inzirtirna leh intiamkamna hun an buatsaih. MZP tarlan danin, Aizawlah chuan college leh sikul eng emaw zatah hun an hmang a, MZP hruaitute’n Mizo ngei nupui/pasala neih a ṭul dan leh ram leh hnam humhalhna kawnga a pawimawh dante an sawi. Intiamkamna tura hming ziahna an buatsaihah zirlai sang chuangin hnam dang nupui/pasal nei lo turin intiamkamna hming an ziak a ni.

3rd. Thursday: Phunchawng Mel-10-ah truck AS-24 C-2498 leh Pulsar bike MZ-01 D-7782 an insú a, bike khalhtu Vanlallawmkima Chhangte (24) s/o Thangchungnunga, Lengpui Model Veng a hmunah a thi. Truck driver chu Rubel Ahmed Mazumder, Hailakandi a ni.Vanllalawmkima hi 10 Assam Regiment niin Bangalore-ah a awm a, chawlh hmanga a rawn haw lai a ni.

4th. Friday: Census of Govt. Employees & Workers, Aizawl District 2015 bu siam thar chu District Research Office, Venghluiah Federation of Gov’t. Employees & Workers president R.Lalrammawia’n a tlangzarh. Lehkhabu hi Economics & Statistic department buatsaih a ni a, Aizawl district bika Mizoram sorkar hnathawkte chhiarpui an neih hnua kawng hmang nei taka rem khawmna lehkhabu a ni.

5th. Saturday: Teachers’ Day a ni a; Mizoram hmun hrang hrangah hman a ni a, a hmanna pui ber MZP-in Synod Conference Centre-a an hman chu School Education minister H.Rohluna’n a hmanpui. H.Rohluna chuan, zirtirtu hna chu hna zahawm leh pawimawh a nih thu sawiin, zirtirtu nungchang mawi lo tlemtête avangin an hmingchhe hma bik tih a sawi a, “Zirtirtu thawk ṭhate vanga hmasawnna hmuh tur tam tak a awm erawh chu hmuh hmaih a ni lo a, chawimawi phûte pawh chawimawi a ṭul hle a ni,” a ti.

6th. Sunday: Synod Conference Hall, Lunglei-ah Chakma Kristian Fellowship chu Lunglei khaw chhunga Kristian ni sa, zirlai te leh sorkar hnathawk te leh mahnia eizawnna avanga cheng mek ten an din thar. Hei hi SMB in Lungleia Chakma Evangelist a dah Pu Lallianzuala Sailo leh Bru/Chakma Gospel Team, Chawngte te beihpui thlak rah chhuah a ni. Anni hian Lunglei huam china Chakma ringlo leh kohhran bel mumal lote zingah Crusade hlawhtling tak an nei a. Chakma Kristian Fellowship din tur pawh hian an phur tlang hle a ni. Tunah hian Chhim Working Comt. hnenah pawmpui tur leh a enkawltu tur bial leh kohhrante dil tura hmalakna kalpui mek a ni. Tun dinhmunah hruaitu atan Chairman ah Pu Lallianzuala Sailo leh Secretary ah Tv. Sala Singh te ruat an ni.

7th. Monday: RL Rinawma, IRS chu Principal Adviser to CM atan ruat a ni. CM office-ah a ṭhu ang. RL Rinawma hi Ministry of Finance-a Principal Chief Commissioner of Income Tax a nih laiin February 2015 khan pension-in a chhuak a ni.

8th. Tuesday: DIET chuan Aizawl South SDEO huamchhunga primary teacher-te Aibawk BRC hall-ah ‘New Texbook Training’ an buatsaih. Kumin aṭang hian NCERT adapted New Textbook hman a nih avangin training hi buatsaih a ni.

9th. Wednesday: Mizoram Legislative Assembly hnuaia Subject Committee-I chuan Kerala sorkar hmalaknate tlawh turin Aizawl an chhuahsan. Subject Committee-I member-te hi an chairman Chalrosanga Ralte hoin an kal a, member dangte chu – Lalrinliana Sailo, R.Vanlalvena leh Lalthanlianate an ni a, Assembly official-te’n an ṭawiawm. September 15-ah Aizawlah an lo let leh ang.

10th. Thursday: World Suicide Prevention Day (mahni intihhlum dona/venna ni) a ni a, Health department-a Mental Health Wing leh Aizawl West College-a Psychology department-te huaihawtin IPR Auditorium-ah hman a ni. World Suicide Prevention Day hmannaah hian Aizawl West College principal Dr Laithanzauva khuallian a ni a, Health services director Dr Rohmingthanga Ralte khualzahawm a ni. Mahni intihhlum avangin khawvelah kum tin mi nuai 8 chuang an thi ziah anga chhût a ni. Kulikawn Hospital-a Psychiatry department chuan September 2014 leh August 2015 chhungin mahni intihhlum tum an hnen pantu mi 28 an enkawl a, chungte chu mipa 20 leh hmeichhia pariat niin, thingtlang mi 12 leh khawpui mi 16 an ni.

11th. Friday: Mara Students Organisation (MSO)-te chuan Saiha khawpuia hnam dang dawr paruk, licence dik lo leh mi dang hming hawha hawnte an khârsak.

12th. Saturday: Lairam Isua Krista Baptist Kohhran (LIKBK) Assembly-in kumpuana a hman, ‘Thianghlimna’ tih bawhzuiin LIKBK ṭhalai pawlte hnatlang an nei a; khawlai leh vantlang hmun pawimawh – zun in, tuihâwk luankawr leh kalkawngte an tifai. Hnatlangah hian member ṭhahnem tak an thawk chhuak a ni.

13th. Sunday:Mizoram Presbyterian kohhran hnuaia Naupang Sunday School naupangte chuan anmahni pastor bial tinah inkhawmpui an nei. Inkhawmpui naah hian chang, thuinchhang leh hla te a inelna neih a ni.

14th. Monday: Mizo Hindi Zirlai Pawl (MHZP) buatsaihin Chanmari YMA Hall-ah National Hindi Day (Hindi Diwas) hman a ni a, minister of state Lalrinmawia Ralte-in a hmanpui. Lalrinmawia Ralte chuan, India rama cheng kan nih avangin Hindi a pawimawh tih sawiin, “India ram hi kan ta tih ngamna thinlung pu tur chuan Hindi kan thiam a ngai. Ram chhung hmun dangah hna thawk turin ṭhalai an chhuak fo a, harsatna an tawh lian ber chu ṭawng a ni. Ṭawng kan thiam phawt chuan khawi hmunah pawh Mizo ṭhalaite tan hna hmuh a harsa ngai lo,” a ti. Hindi Day hmannaah hian National Hindi Prachar Sabha result chhuaka ti ṭhate hnenah chawimawina hlan nghal a ni.

15th. Tuesday: Republic Veng, Upper Republic leh Republic Vengthlang thlànmual inṭawm mawng lam a min a, thlan 40 chuang a tichhia.

16th. Wednesday: Serchhip district deputy commissioner (DC) thar, Dr Lalrozama chuan a hna thar a zawm a, Serchhip DC piasaah DC mawhphurhna la mek tu VL Remliana hnen aṭang mawhphurhna a la a ni.

17th. Thursday: K.Lalsawmliana (59) h/o H.Lalnghinglovi, Sihphir chu chuap cancer avangin Synod Hospital-ah a boral. Pu Sawma hian a nupui, afate pahnih leh a tute pali a kalsan.

18th. Friday: Mizoram Nationalist Party leh Mizoram People’s Conference Party (Democrat)-te chu Congress party-ah an inchhûng lut a; Congress Bhavan-ah lawm luhna inkhawm neih a ni.

19th. Saturday: Muallungthu Bial KṬP-te chuan Aizawl Civil Hospital tan thisen pein, mipa 46 leh hmeichhia pariatte’n unit 54 an pe.

20th. Sunday: Tuivawl luiah Immanuel Malsawmzuali (thla 6) d/o Sithaniel Bisra (Mizo hming Zamawia), Keifang Vengthar chu a tla hlum. Malsawmzuali hi a ú hmeichhiain a pua a, a nute nen Tuivawl lui pan laia dai kai an tumna lamah an chesual a ni.

21st. Monday: MNF party chuan Aizawl bakah, district khawpui leh khaw dang hmun 16-ah Martarte Ni an hmang. Aizawlah chuan MNF treasurer Vanlalzawma hoa hman a ni a, MNF president Zoramthanga’n Kolasib-ah leh senior vice president Tawnluia’n Lungleiah an hmanpui. MNF-te hian Martarte Ni hi September, 20, 1980-ah an hmang ṭan a; Luangmuala Martar Thlanmual an siamah martar hming 1,563 ziah a ni tawh.

22nd. Tuesday: Mizoram Hindi Training College (MHTC) leh Central Hindi Directorate ṭangkawp chuan MHTC auditorium-ah ‘Significance and Importance of Hindi in the Development of Languages of the North East India’ seminar an buatsaih a, parliamentary secretary (HTE) H.Zothangliana’n a hmanpui. H.Zothangliana chuan, India rama awm tan Hindi thiam ngei a pawimawh tih sawiin, “Hindi hi India ram zau tak min phuarkhawmtu a ni. Ram inpumkhat nan Hindi ṭawng thiam a pawimawh,” a ti. Seminar hi HTE joint director H.Lalramhluna’n a kaihruai a, India ram hmun hrang hrang aṭangin paper present turin mi pasarih an tel bawk.

23rd. Wednesday: Young Lai Association (YLA) din champha vawi 41-na a ni a, YLA branch hrang hrangin an remchan dan angin an lawm a; branch tam ber chuan khua/veng chhung thenfai hnatlang, vantlang tana thil pawimawh tih nan leh hnam làm leh zai entirna leh intihhlimna atan an hmang.

24th. Thursday: 2015 Subroto Cup Football Tournament-ah Mizoram team (Govt Chawngfianga Middle School, Kolasib hminga kal) chuan Ambedkar Stadium, Delhi-ah Afghanistan aiawha kal Esteqal School, Kabul, Afghanistan chu extra time-a Norbert Lalfakawma goal hmangin 3-2 in an hneh a, a vawi lina atan Sub Junior inelnaah an champion. Mizoram champion puitu coach Lalthawmmawia chu best coach-ah thlan a ni a, final-a goal hnih khungtu Ramhlunchhunga Hmar chu best player-a thlan niin inhliam vanga final khel thei lo Lallawmkima chu best keeper-a thlan a ni bawk.

25th. Friday: Mosolman-te ni pawimawh, Id-Ul-Zuha a ni a, Mizoramah pawh Mosolman-te’n an hmang. Aizawlah chuan Lammualah ṭawngṭaina hun an hmang a, mi 3,000 chuang pungkhawmin, bungbúin an ṭawngṭai a ni. Aizawl Mosque-a Imam Maulana Bilal Ahmed kaihhruai ṭawngṭainaah hian Mizoram, India leh khawvel ram dangah remna leh muanna awm theih nan te, hmasawnna atante leh mipuite hamṭhatna atan an dil a ni.

26th. Saturday: Central KṬP buatsaihin Mizoram pumah ram tana ṭawngṭai rualna hun huaihawt a ni a, Aizawlah chuan Lammualah neih a niin member thahnem tak an fuankhawm a ni.

27th. Sunday: Mizoram UPC ṭhalai pawl, Pentecostal Youth Department (PYC) General Conference vawi 21-na, September 25th. atanga Sakawrdaia neih chu a ṭiak. An thurel ṭhenkhatte chu – kum 2016-a hmalakna atan zûk leh hmuam do beihpui thlak te, mihlim kawng zawh neih te, thu leh hla kûtpui buatsaih te, live crusade buatsaih leh blood donation camp neihte a ni. Kum 2016 budget atan Rs. 16,85,800/- an pawm a; kum 2016 conference chu Vairengte-ah neih tur a ni. PYD inkhawmpuiah Mizoram UPC pastor bial 72 aṭangin palai riak lut 2,013 an awm a ni.

28th. Monday: AH&Vety Minister C.Ngunlianchunga chuan Lawngtlai AH & Vety Complex-ah NLUP hnuaia vawk vulh thlangtu chhung 98 hnenah final installment Rs. 10,050/- ṭheuh a hlan. C.Ngunlianchunga chuan, Mizoram sorkarin mipuiten hma an sawn loang tih hlauin an thawh thiam zawng eizawnna a thlan tira, chu an eizawnna thlanah chuan a bul tan sakin mamawh engkim a pein, a vil zui tih a sawi.

29th. Tuesday: Chief minister Lal Thanhawla chuan DoNER minister Dr. Jitendra Singh chu Delhi-ah a hmu a, Mizoram mamawh hrang hrangte a thlen. Dr. Jitendra Singh chuan Mizoram chu India rama mau ngah state a nih vangin furniture atan mai ni lo, lehkha puan siam nan hlawk taka hman thei an ni tih sawiin, “Mau hmanga lehkhapuan siamchhuah chu state sumhnar mai ni loin ṭhalaite hna siamsakna tur a ni,” a ti. Chief Minister hian Aizawl leh a chhehvela community hall sakna tur ruahmanna chu ngaih pawimawh hmasak (priority) zinga dah tur leh hmarchhak state pariatte hnam ziarang tilang chiang thei tura hmasawnna hnathawh a ṭul thute Dr. Jitendra Singh hi a hrilh.

30th. Wednesday: Ni thum awh tur Anthurium Festival 2015 chu Lengpui Mini Sports Complex-ah ṭan a ni a, Governor Lt.Gen. Nirbhay Sharma-in a hawng. Larsap chuan, Mizo tam takin sum hmuh nana an hman anthurium pangpar hming chawia kût siam chu thil inhmeh tak nia a hriat thu a sawi.

Similar Posts:

• Ngaihtuahna ṭawng (Mind language)
• Administrative Technical Terminology and Scientific Writing Seminar khar a ni
• Meghalaya CM hnenah thlen
• Mizo Youths eager to learn Hindi
• Mahni hnam tawng thiamloh a zahthlak

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Tuesday, November 24th, 2015 at 8:45 pm and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.