Aizawl the 13th June 2007 : Universal Hindi Communications Centre, Aizawl leh Commission for Scientific and Technical Terminology, Ministry of Human Resource Development buatsaih ni hnih awh National Seminar on Administrative Technical Terminology and Scientific Writing chu vawiin chawhnu khan khar a ni. Kharna hun hi Dr Lalzama, Minister, Higher and Technical chuan hmanpuiin seminar-a telte hnenah Participation Certificate a hlan.
Inkhawm hi Pu V.R.Ralte, Director, Universal Hindi Communications Centre-in a kaihruai a. Dr Lalzama chuan India ram State zingah pawh a kilkhawr leh te ber pawl Mizoram-ah Hindi pawimawhna inzirtirna seminar buatsaih a ni chu vanneihthlak a tih thu leh tun hi a tawpna ni lo se, kum dangah pawh mi tam zawk tel theihna tura rawn buatsaih leh turin Ministry aiawhte chu a ngen a.
Myanmar leh Bangladesh nena inram ri Mizoram tana Hindi thiam a pawimawh bikzia tarlangin Hindi kan thiam poh leh hnam inpumkhatna kan nei tha ang a, India mi kan nih anga ram leh hnam venhimna lamah pawh kawng ro su tur nia a hriat thu a sawi bawk.
Minister chuan Mizoram-in tunhma atang tawha a theih ang anga Hindi tawng hman uar nana a hmalaknate sawiin kum 1969 daih tawh khan Lunglei-ah Hindi Zirna hmasa ber din a lo ni tawh a. Kum 1975-ah Hindi Training College din a nih dan leh tun dinhmunah Private-a Hindi zirna leh School zawng zawng-a Hindi compulsory a zir tura tih a lo nih chhoh dante a tarlang bawk.
Heng bakah hian H & T Edn hmalaknaah tun dinhmunah College 22 a awm thu te, chung zingah chuan Sawrkar enkawl 8 le Deficit College 14 a awm thu sawiin hengah te hian thawktu an indaih loh avangin Contract basis-in Lecturer lak an ni thin a, heng harsatnate sukiang tur hian tun hnaiah Lecturer post siam belh tum a ni a ti bawk. Tin Lunglei leh Durtlang, Aizawl-a Polytecnic-te chu zirna tha tehfung pakhat ISO Certificate hlan a nih tawh thu a sawi bawk a. Seminar-a tel zawng zawngte duhsakna hlanin Hindi thiam taka inzir puitling turin a ngen bakah amah ngei pawhin Hindi-a thusawi thei tura inpuahchah a tum thu a sawi.
Seminar kharna inkhawmah hian Upa C.Sangzuala’n Pathian hnena inhlanna hun a hmang a. Pu Umakant Khubalkar, Deputy Director, Commission for Scientific & Technical Terminology, Ministry of HRD in Mizoten an lo dawnsawn dan chungchangah lawmthu a sawi bawk a. Dr (Prof) C.E. Jeeni, Head of Dept. Linguistic, Central Institute of Hindi, Ministry of HRD-in hun a hmang bawk.
Seminar hawnna nimina neih hi Dr R.Lalthangliana’n a hmanpui bakah Prof. Darchhawna, kum 20 zet Mizoram Hindi Prachar Sabha President lo ni tawhin a hmanpui bawk. Seminar hi Ministry of HRD atangin mithiam rual engemawzat bakah Manipur University, Jawaharlal Nehru University leh Hindi College dang atanga Lecturer bakah zirlaite an tel a ni.
March 27th, 2011 at 10:46 am
First keuh teng 🙂
March 27th, 2011 at 11:04 am
First-na tur awm zawng zawngah ka first vek tawh emaw ka tia! 2nd leh ila ni mai ‘lawm!