MIN NGAIDAMDAM LUL RAWH
– H.zate
[Khawvel hian eng chu a inherchhuahpui thin ni maw! Ka awm mai mai hi thawnthu mak tak tak hian min rawn deng zut zut reng a. Ka nat phah hial thin. He thawnthu pawh hi a tak, inthiam lo leh rilru hreawm tak atang lo chhuak a ni a. Ka thiam ang tawkin ka han ziahsak leh dawn chu anih hi. A….. A ziah ka rawn khawrpum ni berin ka hre zawk! ]
A kum, a hun leh ni ka la hre reng! Khawvel hmasawnnain a ken tel WhatsApp group pakhatah kan awm hova, chuta inchhar chu kan ni. Ka thian pakhat nen in inkawm thin a, ani avang chuan kan inbe chho ta a, kan inkawm ngeih ve hle anih kha. Khang hunlai khan nuam ka ti a, a hlimawm a, a ngaihawm!
Kan inkawm a, kn inbia a, nuam kan ti ve hle thin a nih kha. Mahse, May 2015 a lo thleng a, ka lo beisei ngai loh, i lak atanga dawn ka rin ngai miah loh chu ka lakah puin, “Ka hmangaih Che!” tia kumtluang atana min sawmin min lo bem ta anih kha. I lakah khatiang rilru ka lo put loh vang ge ni, i rilru puthmang tur ka hrethiam lova, nangin min hnaih dan i ngaihtuah laiin kei erawh chuan i lak atanga hlat dan ka ngaihtuah a. A mak ani kha mi hnu atang khan, khatiang khawpa inkawm nel si kha ka be tha peih ngai ta lo che a nih kha!
I msg te hi en lovin ka delete a, ka chhanglet ngai lo che. Ka chhanlet che lahin tawi te tein ka chhang thin che anih kha.”ngaihzawng atan min duh loh pawn thian ang khan awm leh ang!”tia min ngenna pawh ka pawm duh lova, Ka be tha tawh chuang duh ta chuang lo che anih kha. Aw! Ka lo va nunrawng tak em!
Min biak i duh si, keiin ka biak duh tlat si loh che avangin ka chanchin hriat mai pawh hadamthlaka ngaiin ka thiannu te lo biain, ka chanchin i lo zawt thin a. Ka thiannuin in inbiak dan leh min ngaih theih zia a sawi chuan, “a lo biak che pawn chhang tawh suh.” tiin ka thiannu ka hau zawk a! Engtin nge kan inthianna kha i hmangaihna vang hian ‘inhuatna’-a ka chantir bik tlat le.!
Ka nat, hreawm , lungngaih leh muy theih loh chang te khan min rawn ‘call’ a Bible min chhiarsqk a, min tawngtaisak thlap thin a nih kha. Ka tana i inpekna ropui kha ka va phu lo si em!
Kei, hmeichhe awm nem leh derdep tana i inpekna leh i nun zia engkim mai kha a mawi a. I fel thin ziate kha aw! Mahse tunah chuan mitthi mai i ni tawh sia.
I nerve that loh vangin i kal tha thei lova, i pum lam a tha lo bawk a, thawhah i lo nei lehzel bawk nen. Damna beiseiin damdawiin an panpui che a, Oxygen i mamawh a, i mamawh khawp a awm loh vangin khawpui zawka mi an chah a. Mahse, i tana an thil chah ngei chu i lo chahthlak san ta si. Engvangin nge i liam dawn lai talin i bulah dawm tur chein ka lo awm loh le?! Engati nge khatiang khawpa natna khirhkhan i vei tih ka lo hriat loh ?! A pawi ka ti. A na ani. Kan chunga thil thlen dan hi a rang teh vut em ani! Siamtu hian a duang sual nge keima zir loh zawk?!
“He khawvel ah hi chuan tumah reng hi cham hlen tur kan awm lo. Thihna hi tu chungah pawh a thleng thei si a. Kei ngei pawh hian engtik ah nge he khawvel hi ka chhuahsan dawn ka hre lo. Keini’n, “a la hma em mai!” ti chungin inthlah liam thin mahila Siamtu ngaih ah chuan hma tih reng a awm si lo.
Kan hun kal tawh te kha ko kirin, i thinlung mamawh kha lo hlan ve thei che ila, tlem talin ka inchhirna hi a nep tur! Hun kal tawh kohkir thei pawh ni ila nang erawh chu ka chelh ding thei awm si lo che. Mahse, hei erawh, ka ti ngei ang; i thusawi duh kha ka ngaihthlaksak ngei ang che. I sawi duh pawh ngaihthlaksak hman lo khawp in engati nge ka lo buai le? Engah nge i message reply kha ka duh lo zawk?
Ni e, kum kal ta kha chuan, ni tin zan tin kan inbe thin nih kha! Mahse i mi duh derna min hrilh khan chhanna ka pe thei ta lo che a, i hmangaihna chu ka tan ninawm a ni tlat si. Min ngaihsakna kha ninawmah ka lo dah tlat si.
Zawi zawi in ka be tlem telh telh che a, min biak dan tur ngaihtuahin i buai a ka thiante hial i lo be thin a nih kha. Kei lahin kha i hmangaihna kha hriatthiam tum lam aiin ka hlat telh telh che a. Ni tin, zing leh tlai-ah min lo tex a, a changin ka reply che a, achangin i message pawh en lovin ka delete hial thin a nih kha! Khang zawng zawng kha ka sual hrim hrim vang a ni lova, Ka chapo vang leh keimah ka induh tawk lutuk vang lah a ni hek lo. I hmangaihna hrethiam turin ka lo men tawk loh vang alo ni. ‘I ngaihzawng atan min pawm lo a nih pawhin thian ang talin!’ tia min ngen lawm lawm pawh ka ngaihsak lo che a. Ka uksak bawk lo che anih kha. Ka lo va han nunrawngin ka va ti sual tak em!!
Kar hmasa tun ang hun kha chuan min lo bia a, “Bawih hrilh tur che ka nei a,” inthlahrung takin, “i buai em?” i ti hram a. Kei erawh chuan ka buai thu a chhang chein, “nakinah ka hman hunah ka lo bia ang che.” ka tia mahse, ka be leh lem hlei lo che a. Ka lo biak hun che nghakin min tihbuai hlau siin i phone i lo melh reng awm si a. A va han na tak em! I laka ka awm dan natzia i liam hnu chauha ka hrethiam hi Min ngaidam mawlh ang che aw!!
Vawin 10 August ****, khawvel i lo chhuahsan ni a lo ni mai hi a mak ka va’n ti tak em! A mak ka ti a, na ka ti tak zet a ni. I sawi duh tal kha lo ngaithla ni ila tuna ka inchhirna hi a nep deuh tur! A pawi ka ti,min ngaidam ang che aw!
Bawih, Ka thiam loh ani, Min ngaidam lul rawh!
Mangtha le!
01 Novemberr 2016 | Thingdawl
hzate.wordpress.com
Similar Posts:
- Hmangaihna – Naupang ah
- Ka pu Shakespeare-a love story
- Hmangaihna (Keima Version)
- Sam ang ka then hnu..
- Hmangaihna 131
December 15th, 2016 at 4:43 pm
First…..
kan inchuh lai te kha
Report this comment
December 16th, 2016 at 12:51 pm
Ka ngaidam thei ngang lo che a ni.
Report this comment
December 16th, 2016 at 8:53 pm
Ngaihdam ngai reng mai, ninawm lutuk
hairehai
Report this comment
December 25th, 2016 at 1:02 pm
Nia, First i chuh laite kha a ngaihawm.
Report this comment
January 1st, 2017 at 12:26 am
Kum a thar ta.
Report this comment
January 1st, 2017 at 2:58 pm
Ngaihdam ngaiin awm tawh miah suh kum a thar tawh hi.
Report this comment
January 10th, 2017 at 1:46 pm
Ngaidam ang
Report this comment