Zirtawpni Chibai 
Zirtawpni a ni bawk a, hlim hle mai ang hmiang. Ka Zak Chem Chem! tihah khan ka chetchhiatna awm chhun ka sawi zo vek tawhin ka hria. Chetthat ringawta hun hmang thin ka nih vang nge ni, chetchhiatna han ziah tur mai ka hre si lova. Ka thian te chetchhiatna tlemte hi ka’n sawi mai te’ng. Chawngkhum dan tlang huat loh kan ti ang a. In duh leh in thiante chetchhiatna in sawi ve ang a, a sawi duh lo erawh kan sawi luih tir chuang lovang. 
Ka thianpa’n kan Headmaster a vau
Thingtlang khuaah chuan, thlasik a’n nih hian sava hrang hrang te’n thing rah leh par – ngambawm, chawmzil, partlan, hmawng, hnah/rahhlun, ladt., an tlan nasa thin hle a. Hunawl kan neih chuan sava veh nan kan hmang mai thin. Kan zirtirtu te ngei pawh sava veh hrat pawl an ni ve tho a.
Tuk khat chu kan thianpa pakhat hian ngambawm par tlan sava a chang a. A sava perhtur a tin vang vang lai chuan, chhak lam atangin tu tih hriat loh hian a rawn perh khalh thin a. Chutiang hlir chuan vawi thum vel sava an hnawhdarsak takah chuan ka thianpa a insum zo ta lo. Tunge I nih, rawn ti leh vaih teh, ka rawn perh tawh ang che tiin.
A chhak kan headmaster lah chu, a rukin a nui char char bawk a. A ngai te bawkin sava chu a hnawhdarhsak thin a. Ka thianpa thinrim chuan, insual inpeih tawkin, saihlum rawn kalna lam chu a pan chho va. A tum loh deuhin kan headmaster a hmu thut mai chu(h), sawi tur a van a sin. Kan zirtirtu pa pawh a intimitak thei bik lo, a nui nasa ve khawp mai. 
Warden a barakhaih
BVSc& AH kan zirlaiin, kan u pakhat pawh, girls’ hostel-ah bialnu a nei a. Tlai thim hma hian a va rim mai thin a. Tlai khat chu, unau hmel hai vel a ni tawh ang tihin, a nula rim zo chuan kan hostel a rawn pan a. Kalkawngah chuan kan hostel warden, hostel tlawha rawn kal mek chu a hmaah a kal a.
Kan thianpa phawk ve tak mai chuan, kan warden (assamese) chu kan cook (Bihari) emaw a ti a. A hnunglam atangin a veh then then a, Are Bhaiaa tiin a hnunglam atangin a va kuah chawt a. Kan warden pawh a phu ve nasa a ni awm e. A’n en chiang chu, kan hostel warden, Anatomy department-a asst. professor lek chu lo niin! Rang takin a kut a la sawn a, Good evening sir a ti leh vel. A zahthlak, awm dan tur hriat a har khawp mai a ti..
